Ku hlayiwa leswaku vhanu i vanghanu loko “va zrandzrana ni ku hloniphana”. Hi xikombiso, Yonatani na Davhida va sungule ku va ni wunghanu lebyi tiyiki ntsrhaku ka loko Davhida a dlaye Goliyati. (1Sa 18:1) Mun’wana ni mun’wana wavu a a ni wumhunu lebyi a byi yentxa leswaku mumbeni a djula ku tama a va munghanu wake. Xileswo, wunghanu lebyi tiyiki byi seketeliwi ka wutivi lebyi kongomiki. Akuva vhanu va tivana ku yampswa swi djula va tikazrata nakone swi teka nkama. Nambitanu, ka maredi sosiyali a vhanu va nga ha hamba “wunghanu” ni vhanu vambeni hi ku deketanyana. Swi nabyalile kuva vhanu va tifihla leswi va nga xiswone ka maredi sosiyali, hikusa va swi kota ku kunguhata leswi va taka swi hlaya nakone va mamela ha hombe leswi vambeni va va vonisaka xiswone. Xileswo i swinene kuva hi tibekela ‘swipimelo kumbe milawu’ ya lava hi djulaka ku tlanga na vone ka internet. U nga txhavi ku yala ku hamba xinghanu ni mhunu lweyi u kalaka u nga mu tivi hi ku txhava kuva va ku twisa ku vava. Hi ku txhava leswo, vambeni va tilangele ku ka va nga ma tizrisi maredi sosiyali. Kutani, loko u lange ku tizrisa maredi sosiyali, i yini leswi u fanelaka ku va na swone a miyanakanywini?

HLALELANI VÍDEO LEDZRI LIKI TIZRISA MAREDI SOSIYALI HI NDLELA LEYINENE, MI GAMA MI HLAMULA SWIVUTISO LESWI LANDZRELAKA:

• I yini leswi u fanelaka ku zranga u swi yanakanya na u nga si na poxtara ntxhumu wa kukazri?

• Ha yini u fanela ku hlawula vanghanu ka maredi sosiyali hi wutlhazri?

• Ha yini u fanela ku tibekela nkama lowu u taka wu heta na u li ka maredi sosiyali?—Ef 5:15, 16