Na wa ha nghena ka pajina dzrezru ku ni tinhlokomhaka ni mavhidiyu lama hambiwiki akuva ma koka vhanu va timbilu letinene lava nga liki Timboni ta Yehovha. (Min 13:48) Hakanyingi tinhlokomhaka leto ti yelana ni madzrungula kumbe mhaka leyi vhanu va khanelaka ngopfu ha yone.

Xana u nga dzri tizrisa hi ndlela yini pajina dzra jw.org a nsin’wini?

• Nghena ka pajina ledzri nkama wun’wana ni wun’wana. Xiyisisa ha hombe tinhlokomhaka leti nga nkameni nakone yanakanyisisa hi ndlela leyi u nga ti tizrisaka ha yone akuva u pfuna mhunu lweyi a nyonxelaka. (Akuva u vona timhaka tin’wana leti samiki ti humexiwa masikunyana ntsrhaku ka pajina dzrezru, deketa lani ku liki “Vona Leswi Yengetelekiki”.) Ku tolovelana ni pajina dzrezru swi ta ku pfuna ku va ni timhaka ta ku siyanasiyana ta ku bula ha tone nsin’wini.

• Tizrisa tinhlokomhaka ni mavhidiyu leswi swi kombisiwaka loko wa ha nghena ka pajina dzrezru akuva u sungula mabulu. Timhaka leti ti nga ha hi pfuna ku pimisa hi mintxhumu leyi vhanu va le nsin’wini yezru va nga ha va ka va kumana na yone.

• Komba vhanu leswi humaka ku sungula loko u pfula pajina dzrezru. Va tlhamuxeli tinhla leti kongomiki ni ku va komba leswaku loko va djula timhaka tin’wana va nga ti kumisa kuyini.

• Zrumelela link. Van’wana a va swi zrandzri ku bula, ngopfungopfu ku bula ni Timboni ta Yehovha, kambe va tiyimiselile ku yendzrela pajina dzrezru. Xileswo u nga tsrhiki ku zrumelela link ka lava va nyonxelaka akuva va nghena va vona tinhlokomhaka kumbe mavhidiyu leswi swi kombisiwaka loko wa ha nghena ka pajina dzrezru.