XIDONDZRO 16
I Yini Leswi Yesu A Swi Yentxiki Na A Ha Li Lani Misaveni?
Vhanu vanyingi va li Yesu i xibebetana lexi nga kotikiki ku yentxa ntxhumu, muprofeta wa ku tlhazriha, kumbe mhunu lweyi a nga ku dlayiweni. Kambe, xana hi nga dondzra leswi yengetelekiki ha yene hi ku kambisisa wutomi byake bya loko a ha li lani misaveni? Ka ndzrima leyi, hi ta khanela hi yin’we ya mintxhumu ya lisima leyi Yesu a yi yentxiki ni ndlela leyi swoleswo swi nga ku pfunaka ha yone.
1. A wu li wini ntizro wa lisima ngopfu ka Yesu?
Ntizro wa lisima ngopfu ka Yesu a ku li ku ‘zrezra evhangeli dzra mfumu wa Xikwembu Nkulukumba’. (Dondzra Luka 4:43.) A zrezre madzrungula lamanene ya leswaku Xikwembu Nkulukumba a ta beka mfumu, kumbe wuhosi lebyi taka lulamisa swikazratu hinkwaswu swa vhanu. a Yesu a tizre ngopfu ka ntizro wa ku zrezra a dzrungula ledzri dzra dzrinene ku dzringana malembe mazrazru ni hamfu.—Matewu 9:35.
2. Xana a mahlolana lawa Yesu a ma yentxiki a ma ni nkongometo wini?
Bibele dzri khanela hi ‘mintizro ya ntamu ni mahlolana ni swikombiso, leswi Xikwembu Nkulukumba a swi yentxiki ha [Yesu]’. (Amintiṛo 2:22) Xikwembu Nkulukumba a nyike Yesu ntamu wa ku lawula maxela, ku phamela magidigidi ya vhanu, ku daha lava vabyaka, nambi ku pfuxa lava fiki. (Matewu 8:23-27; 14:15-21; Marka 6:56; Luka 7:11-17) Mahlolana lawa Yesu a ma yentxiki ma swi beke livaleni leswaku a a zrumiwe ha Xikwembu Nkulukumba. Ma tlhele ma kombisa leswaku Yehovha a ni ntamu wa ku lulamisa swikazratu swezru hinkwaswu.
3. Hi nga dondzra yini ka ndlela leyi Yesu a hanyiki ha yone?
Yesu a yingisete Yehovha ka swiyimu hinkwaswu. (Dondzra Yohan 8:29.) Nambi loko a vengiwa, Yesu hi ku dumbeka a yentxe leswi Papayi wake a mu kombeliki swone. A swi yentxile a wuton’wini byake hinkwabyu bya lani misaveni, nambi leswi va ku tala va dzringisiki ku mu yimisa. Xileswo, Yesu a hi ‘siyele xikombiso xa ku va [hi] landzra mintila yakwe’.—1 Petros 2:21.
KELISISA
Dondzra ndlela leyi Yesu a zrezriki madzrungula lamanene a tlhela a yentxa mahlolana ha yone.
4. Yesu a a zrezra madzrungula lamanene
Yesu a fambe mimpfhuka ya ku leha a switaratwini swa xipfunye, na a zrezrela vhanu vanyingi madzrungula lamanene. Dondzrani Luka 8:1, mi gama mi bulisana hi swivutiso leswi landzrelaka:
-
Xana Yesu a a zrezrela vhanu lava a va mu yela ntsena?
-
Xana Yesu a a tikazrata hi ndlela yini akuva a kuma vhanu?
Xikwembu Nkulukumba a hlaye na ke he mahlweni leswaku Mesiya a a ta zrezra madzrungula lamanene. Dondzrani Ezaya 61:1, 2, mi gama mi bulisana hi swivutiso leswi landzrelaka:
-
Xana Yesu a byi hetisise hi ndlela yini wuprofeta lebyi?
-
U swi vonisa kuyini: Xana vhanu va swi vilela ku yingela madzrungula lawa lamanene namunhla?
5. Yesu a a dondzrisa tidondzro ta lisima ngopfu
Handle ka ku zrezra madzrungula lamanene mayelana ni Mfumu wa Xikwembu Nkulukumba, Yesu a a dondzrisa tidondzro leti pfunaka a wuton’wini bya siku ni siku. Vona swikombiso swi nge swingani ka Dondzro ya le Nhaveni. Dondzrani Matewu 6:14, 34 na 7:12, mi gama mi bulisana hi swivutiso leswi landzrelaka:
-
Ka tindzrimana leti, xana Yesu a nyikele swilayu swini leswi pfunaka a wuton’wini bya siku ni siku?
-
Hi mavonela yaku, xana swilayu leswo swa ha pfuna ni namunhla?
6. Yesu a a yentxa mahlolana
Yehovha a nyike Yesu ntamu wa ku yentxa mahlolana manyingi. Akuva mi vona xikombiso xin’we, dondzrani Marka 5:5-34 kumbe vonani VHIDIYU, mi gama mi bulisana hi swivutiso leswi landzrelaka.
-
Ka vhidiyu, xana i yini leswi wansati lweyi a a vabya a a swi kholwa?
-
I yini lexi xi ku nyonxisiki ka hlolana dzroledzro?
Dondzrani Yohan 5:36, mi gama mi bulisana hi xivutiso lexi:
-
Xana mahlolana lawa Yesu a ma yentxiki ma ‘hambe vumboni’, kumbe ma seketele mhaka yini mayelana na yene?
Xana a wu swi tiva?
Wunyingi bya leswi hi swi tivaka mayelanu na Yesu swi buya mabukwini ya mune ya Bibele, lama vitaniwaka Tievhangeli ku nga Matewu, Marka, Luka na Yohan. Mutsrali wa buku dzrin’wana ni dzrin’wana dzra Evhangeli a patsre timhaka leti hambanaka mayelanu na Yesu. Ti-mhaka leto hinkwatu ta longoloka ti va ti hi komba hi ku khanya leswi a hanyisiki xiswone.
-
MATEWU
I buku dzra ku sungula dzra Evhangeli dzri tsraliwiki. Dzri khanela ngopfu hi tidondzro ta Yesu, ngopfungopfu leswi Yesu a swi dondzrisiki mayelana ni Mfumu wa Xikwembu Nkulukumba.
-
MARKA
I buku dzra dzritsrongo dzra kone ka mabuku ya Tievhangeli. Dzri khanela ngopfu hi mintxhumu ya ku hlamalisa.
-
LUKA
Dzri vulavula hi ndlela leyi xikhongoto a xi li xa lisima ha yone a wuton’wini bya Yesu ni ndlela leyi a hanyisaniki ha yone ni va xisati.
-
YOHAN
Dzri tlhamuxela ngopfu wumhunu bya Yesu hi ku dzrungula mabulu ya ku tala lawa Yesu a viki na wone ni vanghanu vake lavakulu ni vhanu vambeni.
VAN’WE VA LI: “Yesu a o va mhunu lwenene ntsena; a a nga li Mesiya.”
-
Wene ke, u swi vonisa kuyini?
NKATSRAKANYU
Yesu a a zrezra mayelana ni Mfumu wa Xikwembu Nkulukumba a tlhela a yentxa mahlolana, nakone a a yingiseta Yehovha ka swiyimu hinkwaswu.
Mpfuxeto
-
Loko Yesu a li lani misaveni, xana a wu li wini ntizro wa lisima ngopfu ka yene?
-
Xana mahlolana lawa Yesu a ma yentxiki ma tiyise mhaka yini?
-
Xana hi tini tidondzro leti pfunaka a wuton’wini bya siku ni siku leti Yesu a ti dondzrisiki?
HANDZRISISA
Hi yini mhaka leyi Yesu a a khanela ngopfu ha yone?
Vona xivangelo lexi hi yentxaka hi kholwa leswaku mahlolana ya Yesu ma yentxekile hakunene.
“Xana U Nga Dondzra Yini Ka Mahlolana Ya Yesu?” (Xihondzro Xa Ku Zrindzra, 15 ka Julhu wa 2004)
Dondzra ndlela leyi xikombiso xa Yesu xa ku hanyela vambeni xi khumbiki mbilu ya wanuna wa kukazri ha yone.
“A Ni Nge Na Mhaka Ni Vhanu Van’wana” (Xihondzro Xa Ku Zrindzra, 1 ka Otubru wa 2014)
Vona mintizro leyikulu leyi Yesu a yi yentxiki loko a li lani misaveni na yi longoloxiwe hi nkama lowu yi yentxekiki ha wone.
a Swidondzro 31-33 swi ta khanela hi wuyenti mayelana ni Mfumu wa Xikwembu Nkulukumba.
