XIDONDZRO 40
Hi Nga Va Lava Basiki Hi Ndlela Yini A Matihlweni Ya Yehovha?
Yanakanya hi mamana lweyi a nga ni lizrandzru lweyi a bekisaka xidjahatana xake akuva xi ya xikole. A tiyiseka leswaku xi basile a tlhela a xi yambexa mpahla ya ku basa ni leyi bekisekiki. Leswo swi yentxa leswaku xi va ni wutomi lebyinene nakone swi kombisa leswaku xi ni vapswele lava zron’wekaka ngopfu ha xone. Hi lani ku fanaka, Yehovha Papayi wezru wa le matilweni, a djula leswaku hi va lava basiki a mizrini ni le miyanakanywini. Loko hi basa, ku pfuneka hine nakone hi yisa lidzrumu ka Yehovha.
1. Xana hi nga basa mizrini hi ndlela yini?
Yehovha a hi byela leswi: ‘Xwengani.’ (1 Petros 1:16) Akuva hi va lava xwengiki, hi fanela ku basa a mizrini ni le mahanyeleni. Hi nga va lava basiki a mizrini hi ku hlamba nkama ni nkama, ku hlampswa mpahla yezru, ku basisa makaya kwezru ni mimovha yezru. Hi nga tlhela hi pfunisa hi ku basisa Yindlu ya Wugandzreli. Loko hi basa a mizrini, hi yisa lidzrumu ka Yehovha.—2 Ba-le-Korinte 6:3, 4.
2. He yini mikhuva leyi hi fanelaka ku yi bakanya akuva hi tsrhama na hi basile?
Bibele dzri hi kutxa ku va hi ‘tihlampswa xambya hinkwadzru dzra mizri ni dzra moya’. (2 Ba-le-Korinte 7:1) Leswi swi djula ku hlaya leswaku hi fanela ku fambela kule ni hinkwaswu leswi nga hi honaka mizri ni miyanakanyu. Miyanakanyu yezru yi fanela ku nyonxisa Yehovha, xileswo hi ta yentxa leswi hi swi kotaka akuva hi bakanya mimpimiso ya ku biha. (Amapsalma 104:34) Hi tlhela hi lwela ku va ni mavulavulela lama basiki.—Dondzra Ba-le-Kolosa 3:8.
He swini leswi nga ha ntxhimisaka mizri ni mahanyela? Mintxhumu yimbeni yi nga ha ntxhimisa mizri wezru. Hi ndlela leyo, hi fambela kule ni mintxhumu ya ku fana ni ku dzraha masigari ni timbangi ta mixaka hinkwayu. Loko hi fambela kule ni leswo, ha tibasisa hine hi tlhela hi kombisa xitxhavu ka nyiko ya wutomi. Hi tlhela hi lwela ku va lava basiki a mahanyeleni hi ku lwa ni mikhuva ya ku biha ya ku fana ni ku hlalela ponografiya ni ku txhokotxha. a (Amapsalma 119:37; Ba-le-Efesa 5:5) A swi nabyali ku tsrhika mikhuva yoleyo, kambe Yehovha a nga hi pfuna ku yi tsrhika.—Dondzra Ezaya 41:13.
KELISISA
Kambisisa leswaku xana ku basa mizrini swi dzrumisa Yehovha hi ndlela yini nakone vona ndlela leyi u nga lwaka ni mikhuva ya ku biha ha yone.
3. Ku basa a mizrini swi yisa lidzrumu ka Yehovha
Hi nga twisisa vonela dzra Yehovha mayelanu ni ku basa loko hi kambisisa nawu lowu a a wu nyike Israyele wa khale. Dondzrani Eksoda 19:10 ni 30:17-19, mi gama mi bulisana hi swivutiso leswi:
-
Xana tindzrimana leti ti hi byela yini mayelanu ni vonela dzra Yehovha hi ku basa a mizrini?
-
He swini swihena leswinene leswi taka ku pfuna ku basa a mizrini?
Ku va lwa basiki a mizrini swi teka nkama nakone swi djula ku tikazrata. Kambe hi nga swi kota nambi hi tsrhama kwini, kumbe hi swisiwana kumbe hi ganyile. Vonani VHIDIYU, mi gama mi bulisana hi xivutiso lexi landzrelaka.
-
Xana ku bekisa mintxhumu yezru na yi basile, swi nga yisa lidzrumu ka Yehovha hi ndlela yini a nsin’wini?
4. Lwana ni mikhuva ya ku biha
Yehovha a nga hi pfuna kuva hi hlula mukhuva wa ku biha
Loko u dzraha masigari kumbe timbangi, swi nga yentxeka u swi twisisa ku kazrata ka swone ku lwa ni mukhuva lowo. I yini lexi nga ku pfunaka? Vona ndlela leyi mikhuva leyi yi nga ku honaka ha yone. Dondzrani Matewu 22:37-39, mi gama mi bulisana hi ndlela leyi ku dzraha masigari ni timbangi swi nga ha khumbaka ha yone . . .
-
wuxaka bya mhunu na Yehovha.
-
ndangu wa mhunu ni vambeni.
Tihambele kungu dzra ku lwa ni mukhuva wa ku biha. b Vonani VHIDIYU.
Dondzrani Ba-le-Filipi 4:13, mi gama mi bulisana hi xivutiso lexi:
-
Xana ku khongota nkama ni nkama, ku dondzra Bibele ni ku hlalela mintlhanganu swi nga nyika mhunu ntamu wa ku lwa ni mukhuva wa ku biha hi ndlela yini?
5. Lwana ni miyanakanyu ni swiyentxo leswi nga basangakiki
Dondzrani Ba-le-Kolosa 3:5, mi gama mi bulisana hi swivutiso leswi:
-
Hi swi tivisa kuyini leswaku a ponografiya, ku zrumelana mamensaji ya timhaka ta tinkuku ni ku txhokotxha a swi basanga a mahlweni ka Yehovha?
-
Xana u vona leswaku Yehovha awa yanakanyela ka leswi a swi djulaka ka hine? Ha yini u hlaya leswo?
Vona leswaku u nga lwisa kuyini ni miyanakanyu leyi nga basangakiki. Vonani VHIDIYU.
Yesu a tizrise xifaniso xa kukazri akuva a hi komba leswaku hi fanela ku lwela ku tsrhama na hi basile a mahanyeleni. Dondzrani Matewu 5:29, 30, mi gama mi bulisana hi xivutiso lexi:
-
Nambileswi Yesu a kalaka a nga hlayanga leswaku hi fanela ku basa a mizrini, kambe a kombise leswaku hi fanela ku yentxa xantxhumu. He xini xiboho lexi mhunu a nga xi tekaka akuva a fambela kule ni miyanakanyu leyi nga basangakiki? c
Loko a li leswaku u li ku lweni ni miyanakanyu leyi kalaka yi nga basanga, Yehovha awa yi tlangela minzamu yaku. Dondzrani Amapsalma 103:13, 14, mi gama mi bulisana hi xivutiso lexi:
-
Loko u li ku lweni ni mukhuva wa kukazri wa ku biha, xana ndzrimana leyi yi nga ku pfunisa kuyini?
U nga kazrali!
Swa nabyala ku tibyela leswi: ‘Ni hlulekile, swa yampswa ni huma ka swone.’ Kambe pimisa hi leswi: Ntsena hi leswi mutsrutsrumi a phasekaka a wa, a swi hlayi leswaku a luzile ka mpalisanu wa ku tsrutsruma nakone a swi hlayi swone leswaku a fanela ku sungulisa. Hi lani ku fanaka, ku hluleka kan’we a swi hlayi swone leswaku u hlulekile a ku lweni kwaku ni mukhuva wa ku biha. U nga tlheleli ntsrhaku ka leswi kutani u swi yentxiki. A ku wa, ku hamba xiyenge xa yimpi leyi u nga ku yi lweni. U nga kazrali! Hi mpfunu wa Yehovha u nga swi kota ku lwa ni mukhuva wa ku biha.
VA’NWE VA LI: “Ni pele hi nhloko. A ni nge he swi koti ku huma.”
-
He yini ndzrimana leyi u talisaka ku yi tizrisa ku komba mhunu leswaku hi ku pfuniwa hi Yehovha a nga swi kota ku tsrhika mukhuva wa ku biha?
NKATSRAKANYU
Hi nyonxisa Yehovha hi ku ya mahlweni hi basa a mizrini, a miyanakanywini ni le mahanyeleni.
Mpfuxeto
-
Ha yini swi ni lisima ku basa?
-
U nga basa a mizrini hi ndlela yini?
-
U nga basa a miyanakanywini ni le mahanyeleni hi ndlela yini?
HANDZRISISA
He yini mintxhumu ya ku nabyala u nga yi yentxaka akuva u va lweyi a basiki a mizrini nambiloko u li xisiwana?
Vona leswi u nga swi yentxaka akuva u yima ku dzraha.
“Ni Nga Tsrhikisa Kuyini Ku Dzraha” (Pfukani!, Mayu wa 2010)
Twana mihandzru ya ku biha leyi tisiwaka hi ku hlalela ponografiya.
Ponografiya—Xana I Dzrinene Kumbe Dzri Ni Khombo?” (Xihondzro Xa Ku Zrindzra, 1 ka Agoxto wa 2013)
Vona ndlela leyi wanuna mun’we a nga hlula ha yone mukhuva wa ku hlalela ponografiya.
“Ni Swi Kotile Ku Hlula, Ntsrhaku Ka Ku Lwa Swinene” (Xihondzro Xa ku Zrindzra, No 4 2016)
a Ku txhokotxha i ku tiswoswela swizro swa mbeleko hi nkongometo wa ku tinyonxisa.
b Nhlokomhaka leyi liki “Ni Nga Tsrhikisa Kuyini Ku Dzraha”, leyi kombisiwiki ka xiyenge lexi liki Handzrisisa ka xidondzro lexi, yi tlhamuxela leswi nga yentxiwaka ku hlula mukhuva lowo.
c Akuva u kota ku hlula mukhuva wa ku txhokotxha, dondzra nhlokomhaka leyi liki “Ni Nga Wu Hlulisa Kuyini Mukhuva Wa Ku Txhokotxha?” ka buku ledzri liki, Swivutiso Leswi Vampshwa Va Swi Vutisaka—Tinhlamulo Leti Tizraka, Vhulumi 1, ndzrima 25.
