XIDONDZRO 55
Seketela Bandla Dzraku
A misaveni hinkwayu, ka mabandla ya magidigidi, vhanu va ntsrandzravahlayi va gandzrela Yehovha hi ku nyonxa. Va nyonxa ngopfu hi kola ka minkongomiso leyi va yi yamukelaka, nakone va tiyimisele ku seketela bandla hi tindlela ta ku tala. Xana u titwa hi ndlela leyi fanaka hi bandla dzraku?
1. He tini tin’we ta tindlela leti u nga tizrisaka nkama ni ntamu waku akuva u seketela bandla dzraku ha tone?
Hinkwezru hi nga yentxa xa kukazri a bandleni. Hi xikombiso, a nga va leswaku a bandleni dzraku ku ni lava duhwaliki kumbe lava vabyaka? Xana u nga va pfuna ku ya mintlhanganwini? Kumbexana u nga va pfuna hi tindlela timbeni ta ku fana ni ku ya va xavela mintxhumu a bazara kumbe ku va pfuna hi mintizro ya le kaya? (Dondzra Yakob 1:27.) Hi nga tlhela hi tinyikela a ku pfuniseni ka ku basisa ni ku bekisa Yindlu yezru ya Wugandzreli. A nga kone a nga hi sindzrisaka ku yentxa leswi. Lizrandzru dzrezru ha Xikwembu Nkulukumba ni vamakwezru dzri hi susumetela ‘ku va lava nkhinkhi’ kumbe ku tinyikela hi ku swi zrandzra.—Amapsalma 110:3.
Timboni leti babatisiwiki ti nga ha pfunisa hi tindlela leti yengetelekiki a bandleni. Vavanuna va moya lava fanelekaka va nga tizra swanga malandzra ya wutizreli kumbe vakulu. Vavanuna ni vavasati, va nga pfunisa hi ndlela leyikulu hi ku seketela ntizro wa ku zrezra, swanga maphayona. Timboni tin’we ti nga pfunisa ka ntizro wa ku yaka mimbangu ya wugandzreli kumbe ku zruzrela ka mbangu lowu ku nga ni bandla ledzri djulaka ku pfuniwa hi tindlela timbeni.
2. Xana hi nga yi tizrisa hi ndlela yini mali ni mintxhumu yezru akuva hi seketela bandla?
Hi nga ‘dzrumisa Yehovha hi leswi [hi] nga naswu’. (Amaproverbia 3:9) Hi swi teka ku li ndjombo ku nyikela hi mali kumbe mintxhumu akuva hi seketela bandla dzrezru ni ntizro wa misava hinkwayu wa ku zrezra. (Dondzra 2 Ba-le-Korinte 9:7.) Swihanano swezru swi seketela lava weliwiki hi timhangu ta ntumbuluku. Vanyingi va hlawula ku tibekela swa kukazri akuva va swi nyikela swanga xihanano. (Dondzra 1 Ba-le-Korinte 16:2.) Hi nga nyikela hi ku tizrisa makaxa ya minyikelo lama nga mimbangwini yezru ya wugandzreli kumbe hi internet ka donate.pr418.com. Yehovha a hi nyika mukhandlu wa ku kombisa ndlela leyi hi mu zrandzraka ha yone hi ndlela leyi hi hlawulaka ku tizrisa mintxhumu yezru ha yone.
KELISISA
Kambisisa tin’we ta tindlela leti u nga seketelaka bandla ha tone.
3. Hi nga tizrisa mintxhumu yezru
Yehovha na Yesu va zrandzra munyiki lwa nyonxiki. Hi xikombiso, Yesu a vulavule hi mufelwa wa xisiwana kun’we ni minzamu yake ya ku hanana. Dondzrani Luka 21:1-4, mi gama mi bulisana hi swivutiso leswi:
-
Akuva hi nyonxisa Yehovha swi djula hi nyikela hi mali ya yinyingi?
-
Xana Yehovha na Yesu va titwisa kuyini loko hi nyikela na swi sukela mbilwini?
Akuva u vona ndlela leyi swihanano swezru swi tizrisiwaka ha yone, vonani VHIDIYU. Ntsrhaku mi bula hi xivutiso lexi landzrelaka.
-
Xana swihanano swi tizrisiwa hi ndlela yini akuva ku pfuneka mabandla ya misava hinkwayu?
4. Hi nga tinyikela akuva hi pfunisa
A minkameni ya Bibele, vagandzreli va Yehovha va tizre hi ku hiseka akuva va hlayisa mimbangu yavu ya wugandzreli. Kambe leswo a swi patsra swinyingi ku tlula ku hanana hi mali. Dondzrani 2 Makronika 34:9-11, mi gama mi bula hi xivutiso lexi:
-
Xana Vaisrayele hinkwavu va pfunise hi ndlela yini a ku bekiseni ka muti wa Yehovha kumbe mbangu wa wugandzreli?
Akuva u vona ndlela leyi Timboni ta Yehovha ti landzrelaka ha yone xikombiso lexi xa khale, vonani VHIDIYU. Ntsrhaku mi bulisana hi swivutiso leswi landzrelaka.
-
Ha yini swi li swa lisima ku basisa Yindlu yezru ya Wugandzreli ni kuva yi va ka xiyimu lexinene?
-
He tini tindlela leti u nga pfunisaka ha tone?
5. Vamakwezru va xinuna va nga lwela ku kuma wutiyanguleli lebyi yengetelekiki
Matsralwa ma kutxa vavanuna va vakriste akuva va lwela ku yentxa hinkwaswu leswi va nga swi kotaka akuva va seketela bandla. Akuva u vona xin’we xa swikombiso, vonani VHIDIYU. Ntsrhaku u hlamula xivutiso lexi landzrelaka.
-
Ka vhidiyu, xana Ryan a yentxe yini akuva a seketela bandla hi ndlela leyikulu?
Bibele dzri tlhamuxela matsrhamela lama yimeliwaka ka vamakwezru va xinuna lava tizraka swanga malandzra ya wutizreli kumbe vakulu. Dondzrani 1 Timoteo 3:1-13, mi gama mi bulisana hi swivutiso leswi landzrelaka:
-
Xana ku yimeliwa yini ka vamakwezru va xinuna lava lwelaka ku tlhasela ku tizra swanga malandzra ya wutizreli kumbe vakulu?
-
Xana ku yimeliwa yini ka mindangu yavu?—Vona tindzrimana 4 na 11.
-
Loko vamakwezru va xinuna va lwela ku tlhasela timfanelo leti, xana a bandla hinkwadzru dzri pfunekisa kuyini?
VAN’WE VA NGA HA VUTISA LESWI: “Xana Timboni ta Yehovha ti yi kuma kwini mali ya ku seketela ntizro wa tone?”
-
A wu ta hlamulisa kuyini?
NKATSRAKANYU
Yehovha a yi tlangela ngopfu minzamu yezru ya ku seketela bandla hi nkama wezru, ntamu wezru, ni mintxhumu yezru.
Mpfuxeto
-
Xana hi nga wu tizrisa hi ndlela yini nkama wezru ni ntamu wezru akuva hi seketela bandla?
-
Xana hi nga yi tizrisa hi ndlela yini mintxhumu yezru akuva hi seketela bandla?
-
He tini tindlela leti u djulaka ku seketela bandla ha tone?
HANDZRISISA
Vona leswaku ha yini Xikwembu Nkulukumba a nga ha djuli leswaku malandzra yake ma nyikela swa wukhume.
“Xana Bibele Dzri Li Yini Hi Ku Nyikela Swa Wukhume?” (Leswi kumekaka ka jw.org)
Dondzra leswaku xiga lexi liki “ku tlhasela” xi tlhamuxela yini a bandleni.
“Xana U Lwela Ku Tlhasela Ntizro Wa Wulaviseli?” (Xihondzro Xa Ku Zrindzra, 15 ka Setembru wa 2014)
Vona tin’we ta Timboni leti nga tikazrata hi ndlela leyikulu akuva ti yisa mabuku ka vagandzrelikulobye.
Ku Hangalasiwa Ka Swipaluxiwa Leswi Seketeliwiki A Bibeleni A Congo (4:25)
Vona ndlela leyi ntizro wezru wu seketeliwaka ha yone hi timali, ku hambana ni wukhongoti byimbeni.
“Xana Ntizro Wa Timboni Ta Yehovha Wu Seketelisiwa Kuyini Hi Timali?” (Leswi kumekaka ka jw.org)
