Xikwembu Nkulukumba a zramba vhanu va tinxaka hinkwatu akuva va tsrhindzrekela ka yene hi xikhongoto. (Amapsalma 65:2) Nambitanu, a hi swikhongoto hinkwaswu leswi a swi yingisetaka, kumbe a swi yamukelaka. Hi xikombiso, swikhongoto swa wanuna lweyi a xanisaka nsati wakwe swi nga siveliwa. (1 Petros 3:7) Handle ka leswo, a nkama lowu va-Israyele va tsrhamiki hi ku yentxa swa ku biha, Xikwembu Nkulukumba a yale ku twa swikhongoto swavu. Swa voneka, ke, leswaku xikhongoto i ndjombo leyikulu. Kambe Xikwembu Nkulukumba a ta yamukela swikhongoto swa vadohi lavakulu loko va tisola.​—Dondzra Ezaya 1:15; 55:7.

Hlalela vídeo Xana Xikwembu Nkulukumba A Yingiseta Swikhongoto Hinkwaswu?

Xikhongoto xi yentxa tlhelo dzra wugandzreli, xileswo hi fanela ku khongota ka Mutumbuluxi wezru ntsena, a nga Yehovha. (Mattheo 4:10; 6:9) Handle ka leswo, leswi hi kalaka hi nga hetisekanga, hi fanela ku khongota hi vito dzra Yesu hikusa a fele swidoho swezru. (Yohan 14:6) Yehovha a nga djuli kuva hi phindetela swikhongoto swa ku swi tiva hi xifuva kumbe swa ku tsraliwa. A djula leswaku hi khongota na swi huma mbilwini.​—Dondzra Mattheo 6:7; Ba-le-Filipi 4:6, 7.

Mutumbuluxi wezru a kota ni ku twa swikhongoto swa ku hlayiwa hi le mbilwini. (1 Samuel 1:12, 13) A hi zramba kuva hi khongota minkama hinkwayu, ya ku fana ni loko hi pfuka kumbe hi yetlela, loko hi djula ku da ni loko hi tlhangana ni swikazratu.​—Dondzra Amapsalma 55:22; Mattheo 15:36.

Ku tsrhindzrekela ka Xikwembu Nkulukumba a swi vevuki hikusa hi hanya xikazri ka vhanu lava pfumalaka lipfumelo ka Xikwembu Nkulukumba va tlhela va hleka loko a dumbisa leswaku  a ta tisa ku zrula la misaveni. (2 Timoteo 3:1, 4; 2 Petros 3:3, 13) Hi mhaka leyi, swa djuleka leswaku hi kumana ni vapfumeli-kulozri akuva hi tiyisana.​—Dondzra Ba-Heberu 10:24, 25.

Ku hlengeletana ni vhanu lava zrandzraka Xikwembu Nkulukumba swi hi pfuna ku tsrhindzrekela ka Yene. Mintlhanganu ya Timboni ta Yehovha yi hi pfulela mikhandlu leyinene ya kuva hi pfuneka hi lipfumelo dzra vambeni.​—Dondzra Ba-le-Roma 1:11, 12.

U nga tsrhindzrekela ka Yehovha hi ku yanakanyisisa hi leswi u swi dondzriki a Zritwini dzrakwe. Pimisa hi leswi u nga swi dondzraka ka mintizro yakwe, swilayu swakwe ni swidumbiso swakwe. Loko hi yanakanyisisa hi xikhongoto, ku tlangela kwezru ka lizrandzru ni wutlhazri bya Xikwembu Nkulukumba ka kula mbilwini yezru.​—Dondzra Yehošua 1:8; Amapsalma 1:1-3.

U nga tsrhindzrekela ka Xikwembu Nkulukumba ntsena loko u mu dumba, loko u pfumela ka yene. Kambe lipfumelo dzri fana ni ntxhumu wa ku hanya lowu djulaka ku disiwa. Nkama ni nkama u fanela ku disa lipfumelo dzraku hi ku dzrimukela leswaku leswi u swi kholwaka swi tiseketela ka yini.​—Dondzra Mattheo 4:4; Ba-Heberu 11:1, 6.

Yehovha awa zron’weka hi lava mu zrandzraka. A nga va sizrelela ka ntxhumu wini na wini lowu nga petaka khombyeni lipfumelo dzravu ni dumbo dzravu dzra wutomi lebyi nga helikiki. (Amapsalma 91:1, 2, 7-10) A hi basopisa ka mahanyela lawa ma hi tiselaka mavabyi ma tlhela ma hi yivela ku nyonxa. Yehovha a hi dondzrisa mahanyela lamanene ku tlula hinkwawu.​—Dondzra Amapsalma 73:27, 28; Yakob 4:4, 8.