Muzrezri Lwa Zrandzrekaka:

Tiyanakanyi na u li mun’we wa vapostola lava nga nhaveni ya minhlwazri. Hiloko Yesu a humelela mahlweni kwaku. Na a nga si tlhantukela matilweni, a hlaya leswi: “Mi ta yamukela ntamu loko moya wa ku xwenga wu ta henhla kwenu, nakone mi ta va timboni tanga a Yerusalema, a Yudeya hinkwaku ni Samariya, ku ya tlhasa mimbangwini ya le kule swinene ya misava.” (Mint. 1:8) A u ta kuyini?

N’waninkama a u ta txhava hi ku vona ku kula ka ntizro u va u tivutisa leswi: ‘Phela hi vatsrongo, hi ta swi kotisa kuyini ku nyikela wumboni “ku ya tlhasa mimbangwini ya le kule swinene ya misava”?’ Swi nga yentxeka u dzrimuka leswi Yesu a swi hlayiki ka wusiku byake bya wugamu lani misaveni, loko a te: “A nandzra a nga mu tluli n’winyi wake. Loko va ni xanisile, na n’wine va ta mi xanisa; loko va ni yingisetile, na n’wine va ta mi yingiseta. Kambe va ta mi yentxa mintxhumu leyi hinkwayu hi mhaka ya vito dzranga, hikusa a va mu tivi Lweyi a ni zrumiki.” (Yoh. 15:20, 21) Nkama lowu u yanakanyaka hi mazritu lawo, swi nga yentxeka u tivutisa leswi: ‘Ni nga swi kotisa kuyini ku nyikela wumboni hi ku helela na ni ta langutana ni nkaneto ni ku xanisiwa?’

Namunhla hi tivutisa leswi fanaka. Swanga Timboni ta Yehovha, a ntizro wezru wu patsra ku nyikela wumboni hi ku helela “ku ya tlhasa ku heleni ka xiyimu lexi xa misava” ka “vhanu va matiko hinkwawu”. (Mat. 28:19-20) Xana ntizro lowu wu nga yentxisiwa kuyini, ngopfungopfu leswi hi lavisanaka ni nkaneto?

A buku dzra Mintizro ya Vapostola dzri hi nyika dzrungula dzra ku nyonxisa dzra ndlela leyi vakriste va le dzaneni dzra ku sungula a N.Y. va swi kotiki ha yone ku hetisisa xiyavelo xavu hi ku pfuniwa ha Yehovha. A nkongometo wa buku ledzri i ku ku pfuna ku kambisisa, ku twisisa ni ku zrandzra dzrungula ledzri kumekaka ka buku dzra Mintizro. U ta hlamala hi ku vona ku yelana loku ku nga kone ka malandzra ya Xikwembu Nkulukumba ya le dzaneni dzra ku sungula ni malandzra yake ya namunhla. U ta xiya leswaku a ku yelana loko a ko fambisana ntsena ni ntizro lowu hi wu yentxaka, kambe ku tlhela ku fambisana ni ndlela leyi hi hleliwiki ha yone akuva hi wu yentxa. Handle ka ku ganaganeka, ku yanakanyisisa hi ku yelana loko swi ta tiyisa ndlela leyi u dumbaka ha yone leswaku Yehovha a tama a kongomisa a nhlengeletanu yake ya lani misaveni.

Hi khongota hi mbilu hinkwayu leswaku ku kambisisa kwaku ka buku dzra Mintizro ku tiyisa ndlela leyi u mu dumbaka ha yone Yehovha kun’we ni ntamu wake, ku nga moya wa ku xwenga. Hi navela leswaku u tiyisiwa akuva u ya mahlweni u “nyikela wumboni hi ku helela” mayelanu ni Mfumu wa Xikwembu Nkulukumba ni ku pfuna vambeni akuva va kuma ndlela leyi yisaka a wuton’wini lebyi nga helikiki.—Mint. 28:23; 1 Tim. 4:16.