1-3. Ha yini Pawulo a ye Korinte, nakone he swini swikazratu leswi a lavisaniki na swone?

 A LEMBE dzra wu 50 N.Y. dzri ya ku heleni. Pawulo a le Korinte, ku nga mbangu lowu dumiki hi manegosiyu nakone ku nga ni vhanu vanyingi lava nga Vagriki, Varoma ni Vayuda. a Pawulo a a nga yeli ku ya xava kumbe ku xavisa mintxhumu ya kukazri, nakone a a nga yeli ku ya djuletela ntizro. Pawulo a le Korinte akuva a yentxa ntizro wa lisima ngopfu swinene, ku nga ku nyikela wumboni mayelanu ni Mfumu wa Xikwembu Nkulukumba. Hi nkama wu li wun’we Pawulo a vilela mbangu wa ku tsrhama ka wone nakone a tiyimisele kuva a nga vi ntsrhwalu ka van’wana hi ku va va mu hlayisa. Pawulo a nga djuli kuva va sindzriseka ku mu hlayisa hi leswi a tizrelaka Xikwembu Nkulukumba. Xana a ta yentxa yini?

² Pawulo a tiva ntizro wa ku hamba matende. A ntizro wa ku hamba matende a wu nabyali, kambe Pawulo a tiyimisele ku wu yentxa akuva a tihanyisa. Xana a ta wu kuma ntizro ka doropa ledzri, ledzri nga ni yimayima? A mbangu wa kuva a tsrhama ka wone ke, xana a ta wu kuma? Nambileswi a kumanaka ni swikazratu leswi hinkwaswu, Pawulo a nga tsrhiki ku zrangisa ntizro wa lisima ngopfu swinene, ku nga ntizro wa ku zrezra.

³ Pawulo a hete nkama wunyingi na a tsrhama Korinte, nakone ntizro wake wa ku zrezra a Korinte wu ve ni mihandzru yinene. I yini leswi hi nga swi dondzraka mayelanu ni ntizro wa Pawulo a Korinte, leswi nga hi pfunaka nkama lowu hi zrezraka madzrungula ya Mfumu wa Xikwembu Nkulukumba hi ku helela ka nsimu yezru?

4, 5. a) Xana Pawulo a a tsrhama kwini nkama lowu a a li Korinte, nakone he wini ntizro lowu a a wu hamba? b) Xana Pawulo a nga va a dondzrise kuyini ntizro wa ku hamba matende?

⁴ Ntsrhakunyana ka loko a tlhase Korinte, Pawulo a tive vatekani lava a va ni malwandla, ku nga Akila lweyi a a li Muyuda ni nkatake Prisila kumbe Prixka. Vatekani lava va zruzrele Korinte hi mhaka ya leswi mufumi Klawudiyu a humesiki nawu wa leswaku “Vayuda hinkwavu va fanela ku suka a Roma”. (Mint. 18:1, 2) Akila na Prisila a ve yamukela Pawulo kaya kwavu ntsena, kambe va patsre ni ku mu zramba akuva a tizra na vone. A Bibele dzri li: “Nakone leswi a va ni ntizro lowu fanaka, [Pawulo] a tsrhame kaya kwavu a tizra na vone, hikusa a va li vahambi va matende.” (Mint. 18:3) A nkama lowu Pawulo a a yentxa ntizro wa ku zrezra a Korinte, a a tsrhama kaya ka vatekani lava, lava nga ni malwandla. Ka nkama lowu Pawulo a nga wu heta na a tsrhama kaya kwavu, swi nga yentxeka Pawulo a tsrale mapapela lawa hi ku famba ka nkama ma gamiki ma va xiyenge xa Bibele. b

⁵ Xana Pawulo a a wu tivisa kuyini ntizro wa ku hamba matende nakasi a a li mhunu lweyi a a “dondzrisiwe hi Gamaliyele”? (Mint. 22:3) Swi tikomba na Vayuda va le dzaneni dzra ku sungula a va swi nyika lisima ku dondzrisa vanavu ntizro wa mavoko nambiloko vana volavo a va ha ta gama va yisiwa xikole. Pawulo a a li wa le Tarso a Kilikiya, ku nga muganga lowu a wu dumile hi ku va ni panu ledzri a dzri vitaniwa cilicium  ledzri a dzri tizriseliwa ku hamba matende. Xileswo swi nga yentxeka Pawulo a dondzrele ntizro lowo ku sukela na a ha li mumpshwa. Xana a ku patsreka yini ka ntizro wa ku hamba matende? Ntizro lowu a wu patsra ku luka panu dzra ku hamba tende ha dzrone, kumbe ku tsrema ni ku zrunga panu dzra ku tsindzra akuva ku hambiwa tende. Nakunene ntizro lowu a wu nga nabyali.

6, 7. a) Xana Pawulo a a wu vonisa kuyini ntizro wa ku hamba matende, nakone i yini lexi kombisaka leswaku Akila na Prisila a va ni vonela ledzri fanaka? b) Xana vakriste namunhla va xi yetisela hi ndlela yini xikombiso xa Pawulo, Akila na Prisila?

⁶ Pawulo a a nga teki ntizro wa ku hamba matende wu li wone wa lisima kwake kumbe lowu a a ta wu hamba wutomi byake hinkwabyu, ku hambana ni leswo, a a yentxa ntizro lowu akuva a tihanyisa nkama lowu a a zrezra madzrungula lamanene “hi mahala”. (2 Kor. 11:7) Akila na Prisila ke, a va wu vonisa kuyini ntizro wavu? Swanga vakriste, a va ni mavonela lawa ma fanaka ni ya Pawulo. Loko Pawulo a suke Korinte hi lembe dzra wu 52 N.Y., Akila na Prisila va ye Efesa na yene. A kaya ka Akila na Prisila ku sale ku tizrisiwa akuva ku khomeliwa kone mintlhanganu ya bandla. (1 Kor. 16:19) Hi ku famba ka nkama va tlhelele Roma, nakone ntsrhaku ka leswo va game va tlhelela Efesa. Vatekani lavabidzri, lava a va ni nkhinkhi, a va zrangisa Mfumu a wuton’wini byavu, nakone hi mbilu hinkwayu a va pfuna vamakwavu, a va tikazrata akuva va tizrela van’wana, xileswo a va tlangeliwa hi “mabandla hinkwawu ya vamatiko”.—Rom. 16:3-5; 2 Tim. 4:19.

⁷ Namunhla vakriste na vone va yetisela xikombiso xa Pawulo, Akila na Prisila. A vazrezri va tizra hi nkhinkhi akuva va nga bindzriseli van’wana nkama lowu va yentxaka ntizro wavu wa ku zrezra. (1 Tes. 2:9) Maphayona manyingi ma kulungeliwa hi ku va ma tizra hamfu ya siku, kumbe ku yentxa mintizro leyi yi nga ma tekeliki nkama wunyingi, akuva ma kota ku tiwundla nkama lowu ma yentxaka ntizro lowu wu nga wa lisima ngopfu a wuton’wini bya wone, ku nga ku zrezra madzrungula lamanene. Ku fana na Akila na Prisila, malandzra manyingi ya Yehovha, lawa ma nga ni malwandla, ma yamukela valaviseli va miganga a makaya ya wone. Lava va kombisaka malwandla va swi tiva leswaku ku yentxa leswo swa nyonxisa nakone swa tiyisana.—Rom. 12:13.

8, 9. Xana Pawulo a yangulise kuyini loko Vayuda va kanete wumboni byake, nakone a game a ya zrezrela kwini?

⁸ Pawulo a a hamba matende akuva swi mu pfuna ku tama a zrezra,  leswo swi tikomba hi ku va Silasi na Timotewu va ye Makedoniya ni mintxhumu yinyingi akuva va ya mu nyika. (2 Kor. 11:9) Ku sukela kolanu, Pawulo ‘a sungule ku khomeka ngopfu swinene hi zritu’ nakone a a nga ha yentxi ntizro wun’wana. (Mint. 18:5) Nambitanu, a wumboni lebyi a byi nyikeliki ka Vayuda byi pfuxe nkaneto lowukulu. Akuva Pawulo a swi beka livaleni leswaku a a nga na nandzru hi leswi Vayuda va yaliki dzrungula dzra huluku mayelanu na Kriste, Pawulo a gubute mpahla yake, nakone a byele vakaneti lavayani a ku: “A ngati yenu a yi weli tinhlokweni tenu. A ni na nandzru wa ngati ya mhunu. Ku sukela swoswi ni ta ya ka vhanu va matiko.”—Mint. 18:6; Ezek. 3:18, 19.

⁹ Xana Pawulo a a ta zrezra kwini? Wanuna lweyi a vitaniwaka Titosi Yuxtu, lweyi a a li muprozelita nakone a muti wake a wu kumeka tlhelweni ka sinagoga, a yamukele Pawulo kaya kwake. Xileswo Pawulo a hume a sinagogeni a ya kaya ka wanuna lweyo. (Mint. 18:7) A nkama lowu Pawulo a a li Korinte, a tame a tsrhama na Akila na Prisila. Kambe ntizro wa ku zrezra a a wu yentxela kaya ka Titosi Yuxtu.

10. I yini lexi kombisaka leswaku Pawulo a a nga tiyimiselanga ku zrezrela vamatiko ntsena?

¹⁰ Xana mazritu ya Pawulo ya leswaku a a ta ya ka vamatiko a ma tlhamuxela leswaku a a ta yima hi ku helela ku zrezrela Vayuda ni vaprozelita nambi lava a va yamukela dzrungula? Im-him. Hi xikombiso, a dzrungula dzri li: “Krixpo, lweyi a a li muzrangeli wa sinagoga, yene kun’we ni ndangu wake hinkwawu va pfumela ka Hosi.” Swi tikomba na vanyingi lava a va ya sinagogeni va tipatsre na Krixpo, hikusa Bibele dzri li: “Vakorinte vanyingi lava yingeliki madzrungula lamanene va ndzruluke vapfumeli va va va babatisiwa.” (Mint. 18:8) Xileswo, a kaya ka Titosi Yuxtu ku ndzruluke mbangu lowu bandla dzra le Korinte, ledzri a dzra ha ku simekiwa, a dzri gandzrela ka wone. Loko a li leswaku a dzrungula ledzri dzri tsraliwe hi ku longoloka ka dzrone, hi lani Luka a a tolovela ku yentxa ha kone, a Vayuda ni vaprozelita va ndzruluke vakriste ntsrhaku ka loko Pawulo a gubute mpahla yake. Loko swi li hi ndlela leyo, swi kombisa leswaku mupostola Pawulo a a dzringanisela.

11. Xana Timboni ta Yehovha namunhla ti mu yetisela hi ndlela yini Pawulo loko ti zrezrela vhanu lava tihlayaka vakriste?

¹¹ Namunhla, ka matiko manyingi, a wukhongoti lebyi tihlayaka vakriste byi ni ntamu nakone byi ni nkutxetelo wukulu a wuton’wini bya swizro swa byone. Ka matiko ni le ka swihlale swin’wana, a vazrangeli va wukhongoti va yentxa leswaku vhanu vanyingi va nghena ka wukhongoti byavu. Ku fana ni Vayuda va le Korinte va le dzaneni dzra  ku sungula, vanyingi lava tihlayaka vakriste namunhla, i swikazrawa swa swihena. Hi ndlela leyo, ku fana na Pawulo, hine Timboni ta Yehovha hi zrezra hi nkhinkhi akuva hi pfuna vhanu. Hi londzrovota wutivi byin’wana ni byin’wana lebyi va nga ha vaka na byone hi Matsralwa akuva hi va dondzrisa mintiyiso ya Bibele. Nambiloko va hi kaneta kumbe vazrangeli va wukhongoti va hi xanisa, a hi heleliwi hi dumbo. A xikazri ka vhanu lava hlayaka leswaku ‘va mu hisekela Xikwembu Nkulukumba, kambe na va nga ku tivi ha hombe ku zrandzra  kwake’ hi nga kuma vhanu vanyingi lava nga ni timbilu letinene.—Rom. 10:2.

12. I xitiyisekiso muni lexi Pawulo a xi kumiki a xivonisweni?

¹² Loko a li leswaku Pawulo a tivutise leswaku swa ha fanela kuva a tama a zrezra Korinte, a nhlamulo a yi kumile siku ledzri Hosi Yesu a humeleliki kwake a xivonisweni a ku: “U nga txhavi kambe yana mahlweni u vulavula, u nga tsrhiki, hikusa ni na wene a nga kone lweyi a taka ku dumela akuva a ku vavisa; hikusa ni ni vhanu vanyingi a doropeni ledzri.” (Mint. 18:9, 10) Nakunene lexi i xivoniso lexi kutxanaka! Hosi Yesu a tiyisekise Pawulo leswaku a a ta mu sizrelela ka ntxhumu wun’wana ni wun’wana, nakone a ku ni vhanu vanyingi lava a va ta nyonxela ku yingela dzrungula ka doropa ledzro. Xana a xivoniso lexo xi mu khumbise kuyini Pawulo? A Bibele dzri li: “A tsrhame kohala ku dzringana lembe ni hamfu, na a va dondzrisa zritu dzra Xikwembu Nkulukumba.”—Mint. 18:11.

13. I yini leswi Pawulo a nga ha vaka a swi dzrimukile loko a tlhasa tribunali, kambe ha yini a a nga fanelanga a txhava?

¹³ Ntsrhaku ka lembe na Pawulo a li Korinte a Hosi yi mu tiyisekise leswaku a yi ta mu seketela. “A Vayuda va hlasele Pawulo va gama va mu yisa a tribunali”, ledzri vitaniwaka beʹma. (Mint. 18:12) Vhanu vanyingi va hlaya leswaku a beʹma a a li mbangu lowu swi nga yentxekaka a wu kumeka xikazri ka bazara ledzri a dzri le Korinte. A ku li mbangu wa ku tlakuka lowu a wu hambiwe hi mazribye ya mármore dzra azul ni ya ku basa nakone a dzri ni madezenyu. A mbangu wolowo lowu a wu kumeka mahlweni ka tribunali a wu li wukulu lakakuva a ku nghena vhanu vanyingi. Vayimbuli va hlaya leswaku a tribunali a dzri kumeka kusuhi ni sinagoga nakone a dzri kumeka kusuhi ni kaya ka Titosi Yuxtu. Loko Pawulo a ya a tsrhindzrekela beʹma, kumbexana a nga va a dzrimuke ku dlayiwa ka Stefanu, lweyi a tlhamuxeliwaka swanga mukriste wa ku sungula lweyi a dlayiwiki hi kola ka lipfumelo dzrake. Pawulo, lweyi a a tiviwa swanga Sawulo, “a ku seketelile ku dlayiwa ka Stefanu”. (Mint. 8:1) Xana ku humelele leswi fanaka ni ka Pawulo? Im-him, hikusa Yesu a a mu tiyisekise leswaku “a nga kone lweyi a taka ku dumela akuva a ku vavisa.”—Mint. 18:10.

14, 15. a) Xana Vayuda va lumbete Pawulo swa kuyini, nakone ha yini Galiyu a pfale mhaka leyo? b) I yini leswi yentxekeliki Soxtene, nakone ma ve wani mabindzru ya kone?

¹⁴ I yini leswi yentxekiki loko Pawulo a tlhase tribunali? Lweyi a a zrangela a a li Galiyu, govhernadori wa Akaya tlhelo makwavu  lwenkulu wa Sêneca, mutivi wa filozofiya wa Muroma. Phela Vayuda va lumbete Pawulo va ku: “Wanuna lweyi a hlohlotela vhanu kuva va gandzrela Xikwembu Nkulukumba hi ndlela leyi hambaniki ni leswi nawu wu hlayaka swone.” (Mint. 18:13) Vayuda va lumbete Pawulo leswaku a a txintxa vhanu na swi nga li nawini. Kambe Galiyu a swi vonile leswaku Pawulo a nga yentxanga “ntxhumu wa ku biha”, ni leswaku a a nga na nandzru wa “ku tlula nawu”. (Mint. 18:14) Kambe Galiyu a a nga swi djuli ku nghenela timhaka ta Vayuda, lakakuva na Pawulo a a ha djula ku vulavula akuva a tiyimelela, Galiyu a pfale mhaka leyo. Lava a va nyenya Pawulo va hlundzruke ngopfu swinene lakakuva va txhulula mahlundzru yavu ka Soxtene, lweyi swi nga yentxekaka a sive Krixpo swanga muzrangeli wa sinagoga. Xileswo, va khome Soxtene “va mu ba mahlweni ka tribunali”.—Mint. 18:17.

¹⁵ Ha yini Galiyu a nga xi sivelanga xitsrhungu kuva xi ba Soxtene? Swi nga yentxeka Galiyu a a yanakanya leswaku Soxtene a a li muzrangeli wa xitsrhungu lexi djikeliki Pawulo, ni leswaku kuva a biwa a a tsrhovela leswi a swi byaliki. Swi nge na mhaka leswaku a ve xini xivangelo xa kone, swi nga yentxeka na ku biwa ka Soxtene ku tise mihandzru leyinene. Ka papela dzrake dzra ku sungula ledzri a dzri zrumeliki bandla dzra le Korinte, ntsrhaku ka loko ku khalute malembe manyingi, Pawulo a tizrise zritu makwezru loko a vulavula hi wanuna wa kukazri lweyi a a vitaniwa Soxtene. (1 Kor. 1:1, 2) Xana Soxtene lweyi, lweyi Pawulo a vulavuliki ha yene, hi yelweyi a biwiki a Korinte? Loko a li leswaku hi yene, swi nga yentxeka na ku biwa kwake ku mu pfune kuva a ndzruluka mukriste.

16. Xana mazritu ya Hosi Yesu lawa ma liki: “U nga txhavi kambe yana mahlweni u vulavula, u nga tsrhiki hikusa ni na wene” ma fanela ku wu khumba hi ndlela yini ntizro wezru wa ku zrezra?

 ¹⁶ Dzrimuka leswaku a ve ntsrhaku ka loko Vayuda va yale ku zrezreliwa hi Pawulo lani Hosi Yesu a mu tiyisekisiki a ku: “U nga txhavi kambe yana mahlweni u vulavula, u nga tsrhiki, hikusa ni na wene.” (Mint. 18:9, 10) Hi yentxa swone loko hi va ni mazritu lawa a miyanakanywini, ngopfungopfu loko dzrungula dzrezru dzri nga yamukeliwi. U nga dzrivali leswaku Yehovha a vona leswi nga mbilwini, nakone lava nga ni timbilu letinene a va kokela kwake. (1 Sam. 16:7; Yoh. 6:44) Leswo swi hi pfuna kuva hi tama hi hisekela ntizro wa ku zrezra. Malembe hinkwawu vhanu va makhulukhulu va babatisiwaka, leswi liki siku dzrin’wana ni dzrin’wana ku ni nhlayu yikulu ya vhanu lava babatisiwa. Lava va yingisetaka nawu lowu liki: “Fambani mi ya dondzrisa vhanu va matiko hinkwawu akuva va va vadondzrisiwa”, Yesu a va tiyisekisa leswi: “Ni na n’wine ku ya tlhasa ku heleni ka xiyimu lexi xa misava.”—Mat. 28:19, 20.

17, 18. Xana Pawulo a nga ha va a yanakanye ha yini a nkama lowu a a yendzra a ya Efesa?

¹⁷ A hi swi tivi leswaku leswi Galiyu a swi yentxiki ka vhanu lava a va lumbeta Pawulo swi yentxe leswaku ku va ni ku zrula ka bandla dzra le Korinte ledzri a dzra ha ku simekiwa kumbe im-him. Leswi hi swi tivaka hi leswaku Pawulo “a tsrhame [Korinte] masikunyana” na a nga si lelela vamakwezru. A ku sunguleni ka lembe dzra wu 52 N.Y., Pawulo a kunguhate ku yendzra hi boti a ya Siriya na a sukela Kenkereya lomu a ku kumeka ka mpfhuka wa kolomu ka 11 wa makilometru a wuxeni bya doropa dzra Korinte. Na Pawulo a ha li Khezariya “a tsremete misisi yake yi goma hikusa a a yentxe xihlambanyu”. c (Mint. 18:18) Ntsrhaku ka leswo, a teke Akila na Prisila a tsremakanya navu a nambu wa Egeu va kongoma a Efesa, Ásia Menor.

¹⁸ Nkama lowu boti dzri sukaka Kenkereya, swi nga yentxeka Pawulo a a yanakanya hi nkama lowu a a li Korinte. Phela a ku yentxeke mintxhumu yinyingi ya ku nyonxisa leyi a yi mu yentxa a yaneliseka. A ntizro wake wa ku zrezra wa lembe dzrin’we ni hamfu ka doropa ledzriyani wu tise mabindzru manyingi. A bandla dzra ku sungula a Korinte a dzri simekiwile nakone a va hlengeletana kaya ka Titosi Yuxtu. Ka lava ndzrulukiki vakriste a ku na Titosi Yuxtu, Krixpo ni ndangu wake kun’we ni vhanu van’wana va vanyingi. Pawulo a a va  zrandzra ngopfu swinene vamakwezru lava, lava a va ha ku ndzruluka, hikusa hi yene a va pfuniki ku va vakriste. Hi ku famba ka nkama, Pawulo a a ta va tsralela papela na a tlhamuxela leswaku vone a va fana ni papela ledzri a dzri tsraliwe a mbilwini yake. Na hine hi va zrandzra ngopfu swinene lava hi viki ni tovoko dzra ku va pfuna ku dondzra ntiyiso. Phela swi nyonxisa ngopfu swinene ku vona vhanu lava fanaka ni mapapela lawa ma hlayaka leswaku “hi hine vamani”!—2 Kor. 3:1-3.

19, 20. I yini leswi Pawulo a swi yentxiki loko a tlhase Efesa, nakone hi dondzra yini a mhakeni ya ku tlhasela makungu ya moya?

¹⁹ Loko a tlhase Efesa, Pawulo a kongome ntizrweni. ‘A nghene sinagogeni a bulisana ni Vayuda a va pfuna kuva va twisisa Matsralwa’. (Mint. 18:19) Ka khambi ledzri, Pawulo a tsrhame nkama wutsrongo a Efesa nambileswi va mu kombeliki kuva a tama a tsrhama ku dzringana nkama wa kukazri, Pawulo “a nga pfumelanga”. Loko a lelela, a byele Vaefesa a ku: “Loko Yehovha a swi zrandzra ni ta tlhela ni buya.” (Mint. 18:20, 21) Nakunene Pawulo a a swi tiva leswaku a ntizro wa ku zrezra a Efesa a wu li wukulu. Mupostola Pawulo a a swi navela ku tlhelela a Efesa, nambitanu a swi tsrhike mavokweni ya Yehovha. Xana lexi a hi xikombiso lexinene lexi hi nga xi yetiselaka? Loko hi djula ku tlhaselela makungu yezru ya moya hi fanela ku yentxa xa kukazri. Nambitanu, minkama hinkwayu hi fanela ku dumba nkongomiso wa Yehovha hi tlhela hi lwela ni ku yentxa mintxhumu hi ku fambisana ni ku zrandzra kwake.—Yak. 4:15.

²⁰ Ntsrhaku ka ku siya Akila na Prisila a Efesa, Pawulo a ye Khezariya hi boti. (Vona nota de estudo ka Mint. 18:22, TNM) Kutani Pawulo a ye Antiyokiya wa Siriya ku nga mbangu lowu a a tlhasela kone loko a yentxa ntizro wa ku zrezra. A liyendzro dzrake dzra wubidzri swanga muzrumiwa a dzri fambe ha hombe. I mpswini leswi a swi mu yimelile ka liyendzro ledzri a dzri ta landzrela?