NDZRIMA 5
“Hi Fanela Ku Yingiseta Hosi Xikwembu Nkulukumba Ku Tlula Vhanu”
Vapostola va yentxe ntxhumu lowu nga xikombiso ka vakriste hinkwavu va ntiyiso
Dzrungula Ledzri Dzri Seketeliwe Ka Mintizro 5:12–6:7
1-3. a) Ha yini vapostola va yimisiwe mahlweni ka Sanedri, nakone a huvo ya Sanedri a yi djula leswaku va yentxa yini? b) Ha yini hi djula ku tiva leswi vapostola va swi yentxiki?
VAYAVANYISI va Sanedri va hlundzrukile! Vapostola va Yesu va le ku yavanyisiweni ka Tribunali ledzrikulu. Hi mhaka muni? Yosefa Kayafasi, muprista lwenkulu tlhelo muzrangeli wa Sanedri, a ya ku vone hi ndlela ya tihanyi a ku: “Hi mi byele hi ku kongoma hi ku mi nga ha dondzrisi hi vito ledzri.” Muzrangeli lweyo lwa hlundzrukiki a nga swi djuli nambi ku khumba vito dzra Yesu. Kayafasi a ya mahlweni a ku: “Kambe vonani leswi, mi tate Yerusalema hi tidondzro tenu nakone mi tiyimisele ku hi zrwexa nandzru wa ngati ya wanuna lweyi.” (Mint. 5:28) A mhaka a yi le livaleni ya leswaku a va fanela va yima ku zrezra, loko swi nga li tanu a va ta xanisiwa!
2 Xana vapostola a va ta yentxa yini? Phela a ntizro wa ku zrezra a va nyikiwe ha Yesu, lweyi a nyikiwiki wulawuli hi Xikwembu Nkulukumba. (Mat. 28:18-20) Xana vapostola a va ta txhava vhanu va va va tsrhika ku zrezra, kumbexana a va ta va ni xixixi va tama va yima va tiyile va ya mahlweni va zrezra? Nakunene, a mhaka a yi li kolanu ka leswaku a va ta yingiseta mani, Xikwembu Nkulukumba kumbe vhanu? Na a nga txhavi, mupostola Petro a khanela na a yimela vapostola hinkwavu. A khanela hi xixixi a va a kongoma mhaka.
3 Swanga vakriste va ntiyiso, hi swi djula ngopfu ku tiva ndlela leyi vapostola va yanguliki ha yone loko va pfukeliwa hi huvo ya Sanedri, hikusa na hine ha patsreka ka ntizro lowu. Na hine loko hi li ku hetisiseni ka ntizro lowu hi nyikiwiki hi Xikwembu Nkulukumba hi nga ha kumana ni nkaneto. (Mat. 10:22) Vakaneti va nga ha dzringisa ku hi bekela swipimelo kumbe ku yimisa ntizro wezru. Hi ta yentxa yini? Akuva hi pfuneka hi nga dondzra ka ndlela leyi vapostola va yanguliki ha yone ka swiyentxakalu leswi va yisiki ku yavanyisiweni a mahlweni ka huvo ya Sanedri. a
“A Ntsrumi Ya Yehovha Yi Pfula Swipfalu” (Mintizro 5:12-21a)
4, 5. Ha yini Kayafasi ni Vasaduki va tale “hi matsrhoho’’?
4 Dzrimuka leswaku ka khambi dzra ku sungula ledzri va yimisiwiki ku zrezra ha dzrone, Petro na Yohane va hlaye leswi: “A hi nge tsrhiki ku vulavula hi mintxhumu leyi hi yi voniki ni ku yi yingela.” (Mint. 4:20) Ntsrhaku ka ku yisiwa a hubyeni ya Sanedri, Petro, Yohane ni vapostola lavambeni va ye mahlweni va zrezra a tempeleni. Vapostola va yentxe mahlolana ya ku tala, ya ku fana ni ku daha lava vabyaka ni ku hlongola mademona. Va yentxe leswo ‘a ndleleni ya Solomoni’, ku nga mbangu lowukulu wa tlhelo dzra le wuxeni bya tempele lani Vayuda va ku tala a va talisa ku tlhangana kone. Phela swi tikomba nambi xintsrhuti xa Petro a xi daha vhanu! Vanyingi ka lava dahiwiki hi tlhelo dzra nyama va tlhele va pfumela kuva va dahiwa hi tlhelo dzra moya. Hi kola ka leswo, “ku yengeseleke vavanuna ni vavasati vavanyingi lava a va pfumela ka Hosi”.—Mint. 5:12-15.
5 Kayafasi kun’we ni Vasaduki, lava afa va li swizro swa wukhongoti lebyi Kayafasi a a lumba byone, “va tale hi matsrhoho” va va va beka nawu wa leswaku vapostola va fanela ku petiwa djele. (Mint. 5:17, 18) Xana Vasaduki va hlundzrukisiwe hi yini? Vapostola a va dondzrisa leswaku Yesu a a pfuxiwile kambe Vasaduki a va nga pfumeli ka ku pfuka ka vafi. Vapostola a va hlaya leswaku ntsena hi ku pfumela ka Yesu mhunu a a ta huluxiwa; Kambe Vasaduki a va txhava ku khatisiwa hi Varoma loko a vo pfumela leswaku Yesu i muzrangeli wavu. (Yoh. 11:48) A swi hlamalisi kuva Vasaduki va tiyimisele ku miyeta vapostola.
6. I vamani valala va malandzra ya Yehovha namunhla, nakone ha yini swi nga fanelanga swi hi hlamalisa?
6 Ni namunhla lava xanisaka vhanu va Yehovha i vazrangeli va wukhongoti. Vazrangeli lava dzringisa ku tizrisa politika kumbe madzrungula ya kukazri akuva va yimisa ntizro wa ku zrezra. Xana leswo swi fanela swi hi hlamalisa? Im-him. Dzrungula dzrezru dzri paluxa wukhongoti bya madzrimi. Loko vhanu lava nga ni timbilu letinene va pfumela dzrungula ledzri nga Bibeleni, va ntsrhunxeka ka tidondzro ni swihena leswi nga humikiki Matsralweni. (Yoh. 8:32) Xana swi fanela swi hi hlamalisa loko vazrangeli va wukhongoti va tala hi matsrhoho ni wukwele hi ntizro wezru wa ku zrezra?
7, 8. Xana vapostola va titwise kuyini ntsrhaku ka ku yamukela xileleto xa ntsrumi nakone he xini xivutiso lexi hi nga tihambaka xone?
7 Na vapostola va ha zrindzrele ku thethisiwa, swi le livaleni leswaku a va tivutisa leswaku valala vavu a va ta va dlaya hi mhaka ya lipfumelo dzravu. (Mat. 24:9) Kambe, a xikazri ka wusiku, ku humelele ntxhumu wa ku hlamalisa: “A ntsrumi ya Yehovha yi pfula swipfalu swa djele.” b (Mint. 5:19) Ntsrumi yi va byele hi ku kongoma leswi a va fanela ku swi yentxa. Yi te: ‘Fambani mi ya yima tempeleni mi ya mahlweni mi zrezra.’ (Mint. 5:20) Nawu lowo handle ka ku ganaganeka wu tiyise vapostola leswaku leswi a va swi yentxa a a li swone. A mazritu ya ntsrumi na wone ma va nyike xixixi xa ku tama va tizra na va tiyile ku nge na mhaka ni leswaku a ku ta yentxeka yini. Hi lipfumelo ledzri tiyiki ni hi xixixi, vapostola “va nghene tempeleni na bya ha ku xa va sungula ku dondzrisa”.—Mint. 5:21.
8 Mun’wana ni mun’wana wezru a a ta yentxa swone hi ku tivutisa leswi: ‘Xana a ni ta va ni lipfumelo ni xixixi leswi djulekaka akuva ni tama ni zrezra ka swiyimu leswi fanaka?’ Swa hi kutxa ku tiva leswaku ntizro wa ku nyikela wumboni hi ku helela hi ta Mfumu wa Xikwembu Nkulukumba wu seketeliwa hi tintsrumi.—Mint. 28:23; Mpful. 14:6, 7.
“Hi Fanela Ku Yingiseta Hosi Xikwembu Nkulukumba Ku Tlula Vhanu” (Mintizro 5:21b-33)
“Xileswo va buya na vone va tlhasa va va yimisa mahlweni ka Sanedri.”—Mintizro 5:27
9-11. Xana vapostola va yangulise kuyini ka nawu lowu humiki Sanedri wa kuva va tsrhika ku zrezra nakone leswo swi va bekele xikombiso xini vakriste va ntiyiso?
9 Kayafasi ni vayavanyisi vambeni va Sanedri a va tiyimisele kuva va thetha mhaka ya vapostola. Na va nga swi tivi leswi yentxekiki djele, tribunali dzri zrume valaveleli akuva va ya teka swib’otxhwa. Yanakanya ndlela leyi valaveleli va hlamaliki ha yone loko va kume leswaku vapostola a va nga ha li kone djele, nambileswi va dzri kumiki “na dzri khiyiwe ha hombe, na vo valaveleli va va kume na va yime tinyangweni”. (Mint. 5:23) Ntsrhakunyana ka nkama, mulaviseli wa tempele a twe leswaku vapostola a va li tempeleni, va nyikela wumboni mayelanu na Yesu Kriste, ku nga leswi va yentxiki va khomiwa! Hi ku kahlula mulaviseli wa tempele ni valaveleli va kongome a tempeleni akuva va ya khoma swib’otxhwa va swi yisa Sanedri.
10 Hi lani swi hlayiwiki ha kone ku sunguleni ka ndzrima leyi, vazrangeli va wukhongoti lava hlundzrukiki va swi beke livaleni leswaku vapostola a va fanela ku yima ku zrezra. Xana vapostola va yentxe yini? Petro a hlamule swanga muyimeli hi xixixi a ku: “Hi fanela ku yingiseta Hosi Xikwembu Nkulukumba ku tlula vhanu.” (Mint. 5:29) Hi ndlela leyo vapostola va bekele vakriste hinkwavu va ntiyiso xikombiso. Vafumi va luzekeliwa hi mfanelo yavu ya ku yingisetiwa loko va tsimbisa vhanu ku yentxa leswi Xikwembu Nkulukumba a swi djulaka kumbe ku va sindzrisa ku yentxa leswi Xikwembu Nkulukumba a kalaka a nga swi djuli. Kutani, a masikwini yezru hi ta yentxa yini loko “wuhosi” byi hi tsimbisa ku zrezra madzrungula lamanene? A hi fanelanga hi tsrhika xiyavelo xezru lexi hi nyikiwiki xone hi Xikwembu Nkulukumba. (Rom. 13:1) Xileswo, hi ta kuma tindlela ta wutlhazri ta ku tama hi nyikela wumboni mayelanu ni Mfumu wa Xikwembu Nkulukumba.
11 A swi hlamalisi ku vona ndlela leyi vapostola va yanguliki ha yone hi xixixi leswi yentxiki kuva vayavanyisi lava hlundzrukiki va tama va hlundzruka ni ku ‘djula ku va dlaya’. (Mint. 5:33) Timboni leti nga ni xixixi a ti ta fa hi kola ka lipfumelo dzra tone. Kambe a ti ta yamukela mpfunu lowu a wu ta buya hi lomu a ti nga ku yimelanga.
“A Mi Nge Ti Swi Kota Ku Va Tsrhikisa” (Mintizro 5:34-42)
12, 13. a) He xini xitsratsriyo lexi Gamaliyele a xi nyikiki vatizrikulobye nakone vone va yangulise kuyini? b) Xana Yehovha a va pfunisa kuyini vhanu vake namunhla nakone hi nga tiyiseka hi yini loko o pfumelela kuva hi “xaniseka hi mhaka ya leswi lulamiki”?
12 Gamaliyele, ‘mudondzrisi wa nawu lweyi a a hloniphiwa hi vhanu hinkwavu’, a sekeleke a hlaya zritu. c Mudondzrisi lweyi a a hloniphiwa hi vatizrikulobye hikusa a kote ku “leleta leswaku vapostola va humesiwa handle swa nkamanyana”. (Mint. 5:34) Gamaliyele a va dzrimuxe hi mintlawa leyi samiki yi va kone, leyi ntsrhaku ka ku fa ka vazrangeli va yone yi gamiki yi nyamalala, a va a kutxa tribunali akuva dzri nga vi ni magugu dzri tlhela dzri tsrhika vapostola lava muzrangeli wavu, Yesu, a a ha ku fa. Gamaliyele a hlaye mazritu ya lisima dzrikulu lama liki: “Mi nga tinghenisi ka timhaka ta vavanuna lava, kambe va tsrhikani. Hikusa loko nkongometo wavu kumbe ntizro wavu wu li wa vhanu, a wu nge ti tlhaveliwa hi dambu; kambe loko wu li wa Xikwembu Nkulukumba, a mi nge ti swi kota ku va tsrhikisa. Tivonelani hikusa mi nga ha tikuma na mi lwa na Xikwembu Nkulukumba hi ku kongoma.” (Mint. 5:38, 39) Vayavanyisi va yingisete xitsratsriyo xake. Nambitanu, va yentxe leswaku vapostola va biwa va tlhela va va byela leswaku “va tsrhika ku vulavula hi vito dzra Yesu”.—Mint. 5:40.
13 Ku fana ne masikwini ya khale, namunhla Yehovha a nga ha tizrisa vhanu va ku txhaviseka va ku fana na Gamaliyele akuva va pfuna vhanu vake. (Amapr. 21:1) Yehovha a nga ha tizrisa moya wake leswaku wu kongomisa vafumi lava nga ni ntamu, vayavanyisi kumbe vabeki va milawu akuva va hetisisa ku zrandzra kwake. (Nehem. 2:4-8) Kambe, nambiloko a pfumelela leswaku hi ‘xaniseka hi mhaka ya leswi lulamiki’, hi nga tiyiseka hi mintxhumu yibidzri. (1 Pet. 3:14) Wa ku sungula, Xikwembu Nkulukumba a nga hi nyika ntamu wa kuva hi kota ku tiyisela. (1 Kor. 10:13) Wa wubidzri, a valala a va nge swi koti ‘ku humelela’ ka ku helisa ntizro wa Xikwembu Nkulukumba.—Eza. 54:17, BX.
14, 15. a) Xana vapostola va yangulise kuyini ka tinxanisa leti va kumaniki na tone nakone ha yini? b) Nyikela xikombiso lexi swi bekaka livaleni leswaku vhanu va Yehovha va tiyisela hi ku nyonxa.
14 Xana vapostola va hele ntamu hi kola ka leswi va khomiwiki hi ndlela ya ku biha? Nikutsrongo! Kambe dzrungula dzri li: Va “huma Sanedri na va nyonxile”. (Mint. 5:41) “Na va nyonxile”? Hi mhaka muni? Handle ka ku ganaganeka a va nyonxanga hileswi va khomiwiki hi ndlela ya ku biha, kambe va nyonxe hileswi a va swi tiva leswaku va hlayise ku dumbeka kwavu ka Yehovha ni ku yetisela xikombiso xa Yesu.—Mat. 5:11, 12.
15 Ku fana ni vakriste va le dzaneni dzra ku sungula, na hine hi tiyisela hi ku nyonxa loko hi xanisiwa hi kola ka madzrungula lamanene. (1 Pet. 4:12-14) Nambileswi hi nga nyonxikiki hi ku kanetiwa, ku xanisiwa kumbe ku pfaleliwa djele, ku tsrhama na hi dumbekile swi hi nyika ku nyonxa lokukulu. Vona xikombiso xa Henryk Dornik, lweyi a tiyiseliki tinxanisa ku dzringana malembe ya ku tala ka mimfumu leyi nga ni mona. Yene a dzrimuka leswaku hi Agoxto wa 1944 a wulawuli byi tsreme leswaku yene ni makwavu va yisiwa mbangwini wa nxanisa. A valala va te: “A swi nge koteki ku va sindzrisa ku yentxa ntxhumu wa kukazri. Va nyonxisiwa hi lifu.” Makwezru Dornik loko a tlhamuxela a li: “Mine a ni nga swi djuli ku fa, kambe ku tiyisela nxanisa hi xixixi ni ku dumbeka ka Yehovha nakunene a swi ni nyika ku nyonxa.”—Yak. 1:2-4.
Ku fana ni vapostola, na hine hi zrezra hi “muti ni muti”
16. Xana vapostola va swi kombise hi ndlela yini leswaku a va tiyimisele hi ku helela, nakone hine hi xi yetisela hi ndlela yini xikombiso xavu a ku zrezreni?
16 Vapostola a va ha yimayimanga, va tekele ku yentxa ntizro wavu wa ku nyikela wumboni. Na va nga txhavi, “siku ni siku a va nga tsrhiki ku dondzrisa ni ku twalisa madzrungula lamanene mayelanu na Kriste Yesu, a tempeleni ni hi muti ni muti”. d (Mint. 5:42) Vazrezri volavo lava ku hiseka a va tiyimisele ku nyikela wumboni hi ku helela. Vona leswaku a va ya mahlweni va zrezra madzrungula lamanene a mitini ya vhanu, hi lani Yesu a va leletiki ha kone. (Mat. 10:7, 11-14) Handle ka ku ganaganeka ku ve hi ndlela leyo va kotiki ku tata Yerusalema hi tidondzro tavu. Namunhla Timboni ta Yehovha ti tiviwa hi ku dondzrisa, hi lani vapostola a va yentxa ha kone. Hikuva hi zrezrela miti hinkwayu ka nsimu yezru, hi swi beka livaleni leswaku hi djula ku nyikela wumboni akuva hinkwavu va kota ku twa madzrungula lamanene. Xana Yehovha awa wu tovokisa ntizro wezru wa ku zrezra hi muti ni muti? Nakunene! Vhanu va magidigidi va yamukela madzrungula lamanene ya Mfumu wa Xikwembu Nkulukumba a nkameni lowu wa wugamu, nakone vhanu vanyingi va twe madzrungula lamanene hi khambi dzra ku sungula loko Mboni ya Yehovha yi gongondzre xipfalo xavu.
Vavanuna Lava Fanelekaka Akuva Va Hetisisa “Ntizro Wa Lisima” (Mintizro 6:1-6)
17-19. a) He xini xikazratu lexi a xi ta va xi vange ku yavana ka vapostola? b) I yini leswi vapostola va swi yentxiki akuva va lulamisa xikazratu xolexo?
17 Bandla ledzri a dzra ha ku simekiwa dzri kumane ni xikazratu. A ku li xini xikazratu xa kone? Ku tala ka vadondzrisiwa lava a va babatisiwa a va nga li va Yerusalema, xileswo a va djula ku dondzra leswi yengetelekiki na va nga si tlhelela makaya. Leswi vhanu lavo a va vilela swakuda ni mintxhumu yimbeni, a vadondzrisiwa va nyikele hi mali yavu ni mintxhumu yimbeni akuva va yanelisa swivileleko swavu. (Mint. 2:44-46; 4:34-37) Hi kola ka leswo, ku humelele xikazratu lexikulu. Loko ku phakeliwa swakuda, a vafelwa lava a va vulavula Xigriki “a va nga nyikiwi ntxhumu”. (Mint. 6:1) Kambe leswo a swi nga yentxeki ka lava a va vulavula Xiheberu. Kutani, swi le livaleni leswaku lani a ku ni xihlawuhlwawu. Timhakanyana titsrongo ti nga va ni ntamu wa ku vanga ku yavana.
18 Vapostola lava a va tizra swanga Huvo leyi Zrangelaka ka bandla ledzriya ledzri a dzri ya dzri kula, va swi twisisile leswaku a ku nga ti va wutlhazri kuva va ‘tsrhika zritu dzra Xikwembu Nkulukumba akuva va yima mimenzeni va yavela swakuda’. (Mint. 6:2) Akuva va lulamisa mhaka leyi, va lelete leswaku vadondzrisiwa va djula 7 wa vavanuna, lava “va taliki hi moya wa Xikwembu Nkulukumba ni wutlhazri” lava a va ta va beka akuva va hetisisa “ntizro wa lisima”. (Mint. 6:3) A ku djuleka vavanuna lava fanelekaka hikusa ntizro luwani a wu nga patsri ku phakela swakuda ntsena, kambe a wu patsra ni ku hlayisa mali, ku xava leswi vilelekaka ni ku tsraletela hinkwaswu leswi xaviwiki. Leswi vavanuna hinkwavu lava hlawuliwiki a va ni mavito ya Xigriki, swi nga yentxeka swi pfunile akuva vafelwa lava a va nga nyikiwi ntxhumu va va dumba. Ntsrhaku ka kuva va khongotile hi mhaka leyi, vapostola va hlawule 7 wa vavanuna lava a va djuleka akuva va hetisisa “ntizro lowu wa lisima”. e
19 Xana a ku hlawuliwa ka vavanuna lava 7 leswaku va phakela swakuda a swi hlaya leswaku a va nga patsreki ka ku zrezra madzrungula lamanene? Nikutsrongo! Mun’we wa vavanuna lava hlawuliwiki a ku li Stefanu, lweyi a a tiyimisele ku zrezra hi xixixi. (Mint. 6:8-10) Filipi a a li mun’we wa lava 7 nakone a a vitaniwa “muevhangeli”. (Mint. 21:8) Swi le livaleni leswaku vavanuna volavo va 7 va ye mahlweni va va vazrezri va nkhinkhi.
20. Xana vhanu va Yehovha namunhla va xi yetisela hi ndlela yini xikombiso xa vapostola?
20 Vhanu va Yehovha namunhla va yetisela xikombiso xa vapostola. Vavanuna lava hlawuliwiki akuva va hlayisa mabandla va fanela ku kombisa leswaku va ni wutivi bya le henhla ni ku kombisa leswaku moya wa ku xwenga wa tizra ku vone. Hi ku landzra nkongomiso wa Yehovha, vavanuna lava nga ni timfanelo ta Matsralwa va nyikiwa wutiyanguleli bya ku va vakulu kumbe ku va malandzra ya wutizreli a mabandleni. f (1 Tim. 3:1-9, 12, 13) Hi nga hlaya leswaku lava fanelekaka va hlawuliwa hi moya wa ku xwenga. Vavanuna lava tinyiketelaka va hetisisa ‘mintizro leya lisima’. Hi xikombiso, vakulu va nga nyikela mpfunu ka vamakwezru va ku dumbeka lava duhwaliki ka leswi va swi vilelaka. (Yak. 1:27) Vakulu vambeni va tinyiketela ka ku yaka tiyindlu ta wugandzreli, ku lulamisela makongresu kumbe ku yendzrela vadokodela akuva va bekisa timhaka leti yelanaka ni ngati. Malandzra ya wutizreli ma hetisisa swiyavelo swinyingi leswi nga patsriki ku byisa ni ku dondzrisa hi ku kongoma. Vavanuna hinkwavu va fanela ku dzringanisela ka wutiyanguleli lebyi va nga na byone mabandleni ni le ka nhlengeletanu akuva va kota ku hlengela ka ntizro wa ku zrezra madzrungula lamanene lowu va nyikiwiki wone ha Xikwembu Nkulukumba.—1 Kor. 9:16.
“A Zritu Dzra Xikwembu Nkulukumba Dzri Ya Dzri Hangalaka” (Mintizro 6:7)
21, 22. I yini leswi kombisaka leswaku Yehovha a a tovokisa bandla ledzri a dzra ha ku simekiwa?
21 Hi ku pfuniwa hi Yehovha, a bandla ledzri a dzra ha ku simekiwa dzri hlule tinxanisa ta vafumi nakone dzri tlhele dzri lulamisa swikazratu leswi a swi ta vanga ku yavana a ndzreni ka bandla. Swi le livaleni leswaku Yehovha a a va tovokisa hikusa hi dondzra leswaku: “A zritu dzra Xikwembu Nkulukumba dzri ya dzri hangalaka, a nhlayu ya vadondzrisiwa yi ya yi yengeseleka ngopfu swinene a Yerusalema ni leswaku xitsrhungu xa xikulu xa vaprista xi ndzruluka vapfumeli.” (Mint. 6:7) Lexi o va xin’we ka swib’iko swinyingi leswi nga kone leswi kombisaka ku yandzra ka ntizro wa ku zrezra leswi kumekaka ka buku dzra Mintizro. (Mint. 9:31; 12:24; 16:5; 19:20; 28:31) A masikwini yezru ha kutxeka loko hi twa hi ta ntizro wezru wa ku zrezra mayelanu ni Mfumu wa Xikwembu Nkulukumba a mimbangwini yimbeni ya misava.
22 Hala a dzaneni dzra ku sungula N.Y., vazrangeli va wukhongoti lava a va ni wukwele a va tsrhikanga ku hlasela vadondzrisiwa. Vakriste a va ta xanisiwa hi ndlela ya ku vavisa ngopfu swinene. Na swi nga hlwelanga, Stefanu a xanisiwe hi ndlela ya tihanyi, hi lani hi taka swi vona ha kone ka ndzrima leyi landzrelaka.
a Vona bokisi ledzri liki “ Sanedri —Tribunali Ledzri Tlakukiki Dzra Vayuda”, ledzri nga ka pajina 43.
b Ka 20 wa makhambi lawa ku khaneliwaka hi tintsrumi hi ku kongoma ka buku dzra Mintizro, ledzri i khambi dzra ku sungula. Ka Mintizro 1:10 ku khaneliwa hi tintsrumi kambe ku nga li hi ndlela ya ku kongoma, hikusa yi li ‘ku humelele vavanuna vabidzri na va yambale mpahla ya ku basa’.
c Vona bokisi ledzri liki “ Gamaliyele—Lweyi A A Hloniphiwa Ngopfu Ka Ntlawa Wa Varabi”, ka pajina 45.
d Vona bokisi ledzri liki “ Ku Zrezra ‘Hi Muti Ni Muti’” ledzri nga ka pajina 46.
e Vavanuna lava swi nga yentxeka a va ni timfanelo leti djulekaka ka nkulu wa bandla, hikusa ku hetisisa “ntizro lowu wa lisima” a ku nga li matlangwana. Kambe a Matsralwa a ma kombisi hi ku kongoma leswaku a vavanuna va sungule dzrini ku hlawuliwa swanga vakulu ni valaviseli a mabandleni ya wukriste.
f A dzaneni dzra ku sungula vavanuna lava fanelekaka va pfumelelile ku hetisisa swiyavelo leswi hi nawu a swi yentxiwa hi vakulu. (Mint. 14:23; 1 Tim. 5:22; Tit. 1:5) Namunhla a Huvo leyi Zrangelaka yi yimisa a valaviseli va miganga, nakone a valaviseli va miganga va yimisa vakulu ni malandzra ya wutizreli.
