1-3. Xana Yesu a tlhantukelise kuyini matilweni, nakone he swini swivutiso leswi sekelekaka?

 A VA nga djuli kuva nkama luwani wu khaluta. Ka vapostola, mavhiki ya wugamu a ma nyonxisa swinene! Loko Yesu a pfuxiwile, ku xukuvala ku helile kutani va nyonxa swinene. Ku dzringana 40 wa masiku, Yesu a humelele makhambi ya ku siyanasiyana a dondzrisa ni ku kutxa valandzreli vake. Kutani ku tlhase siku ledzri a a ta humelela kwavu hi khambi dzra wugamu.

² Na va yime Nhaveni ya Minhlwazri, vapostola va Yesu va ma yingela hi wuzron’wana mazritu hinkwawu lawa Yesu a ma hlayaka. Loko Yesu a gamile, a tlakuxa mavoko a va tovokisa, ka vapostola leswi swi yentxeke hi ku kahlula swinene. Hiloko Yesu a sungula ku tlhantukela matilweni. Vadondzrisiwa va Yesu va tama va mu lavisisa nkama lowu a tlhantukelaka  matilweni. Kutani ku ta tlavi dzri mu funeketa a nga ha voneki, nambitanu vapostola va ha tama va lavisisa tilweni.—Luk. 24:50; Mint. 1:9, 10.

³ Xiyentxakalu lexo xi ve xa lisima swinene a wuton’wini bya vapostola. A va ta yentxa yini leswi kutani Muzrangeli wavu Yesu Kriste a tlhantukeliki matilweni? Hi nga tiyiseka leswaku Yesu a a va lulamisele ha hombe akuva va ya mahlweni ni ntizro lowu a wu sunguliki. Xana a va lulamisele hi ndlela yini akuva va yentxa ntizro lowo wa lisima, nakone vapostola va yentxe yini? Xana leswo swi va khumba hi ndlela yini vakriste namunhla? Ndzrima ya ku sungula ya buku dzra Mintizro yi ni tinhlamulo leti nyonxisaka ta swivutiso leswo.

4. Xana Luka a sungule dzrungula dzrake ka buku dzra Mintizro hi ndlela yini?

⁴ Luka a sungula dzrungula dzrake hi ku khanela na Teyofilo, ku nga wanuna lweyi a vulavuliki ha yene ka Evhangeli dzrake. a Akuva a kombisa leswaku dzrungula dzra buku dzra Mintizro dzri yisa mahlweni dzrungula dzra Evhangeli dzrake, Luka a sungula hi ku hamba nkatsrakanyu wa leswi tsraliwiki ka Evhangeli ledzro hi ku tizrisa mazritu lawa ma hambaniki ni ku nyikela wutsrhokotsrhoko lebyi yengetelekiki.

5, 6. a) I yini leswi a swi ta pfuna valandzreli va Yesu ku tama va va ni lipfumelo ledzri tiyiki? b) Ha yini hi nga hlayaka leswaku lipfumelo dzra vakriste va ntiyiso namunhla dzri seketeliwe hi wumboni byinyingi lebyi ‘kholwisaka’?

⁵ I yini leswi a swi ta tiyisa lipfumelo dzra valandzreli va Yesu? Ka Mintizro 1:3, hi dondzra leswi: “[Yesu] a humelele mahlweni kwavu makhambi manyingi akuva va ta kholwa leswaku nakunene awa hanya.” A Bibeleni o va Luka ntsena, lweyi a tlhelaka a vitaniwa “dokodela lweyi a zrandzrekaka”, a tizrisiki zritu ledzri ndzruluteliwiki dzri va “akuva va ta kholwa”. (Kol. 4:14) Zritu ledzro a dzri tizrisiwa ka mapapela ya ta wudahu nakone a dzri tlhamuxela “wumboni lebyi nga livaleni, bya ku helela ni bya ku dumbeka”. Yesu a nyikele wumboni bya matsrhamela wolawo. A humelele minkama ya ku tala ka valandzreli vake, minkama yimbeni a humelele ka mun’we kumbe vabidzri, kasi ka yimbeni, a humelele ka vapostola hinkwavu; kambe khambi dzrimbeni a humelele ka vadondzrisiwa lava tlulaka 500. (1 Kor. 15:3-6) Nakunene lebyo i wumboni lebyi kholwisaka!

⁶ Hi ndlela leyi fanaka, namunhla, lipfumelo dzra vakriste va ntiyiso dzri seketeliwa hi wumboni byinyingi lebyi ‘kholwisaka’. Xana ku ni wumboni  bya leswaku Yesu a hanye lani misaveni, a fele swidoho swezru nakone a pfuxiwile? Nakunene byi kone! Madzrungula ya ku dumbeka ya vhanu lava hanyiki nkameni lowo, ma tsraliwiki ka Zritu dzra Xikwembu Nkulukumba ledzri huhutiwiki, ma nyikela wumboni lebyi kholwisaka ni lebyi hi byi vilelaka. Lipfumelo dzrezru dzri nga tiya loko hi dondzra wudzrunguli lebyo hi tlhela hi khongota ha byone. Dzrimuka leswaku wumboni lebyi tiyiki byi nga hi pfuna ku va ni lipfumelo ledzri tiyiki ledzri hambaniki ni ku kholwa ntsena. Hi fanela ku va ni lipfumelo ledzri tiyiki akuva hi va ni wutomi lebyi nga helikiki.—Yoh. 3:16.

7. He xini xikombiso lexi Yesu a xi siyeliki valandzreli vake loko swi ta mhakeni ya ku zrezra ni ku dondzrisa?

⁷ Yesu a tlhele a “vulavula hi ta Mfumu wa Xikwembu Nkulukumba”. Hi xikombiso, a tlhamuxele wuprofeta lebyi kombisaka leswaku Mesiya a a ta xaniseka a tlhela a fa. (Luk. 24:13-32, 46, 47) Loko Yesu a vulavula hi xiyenge xake swanga Mesiya, a a beka livaleni lisima dzra Mfumu wa Xikwembu Nkulukumba, hikusa yene a a ta va Hosi ya wone. Minkama hinkwayu Yesu a a zrezra mayelanu ni Mfumu wa Xikwembu Nkulukumba, nakone ni namunhla valandzreli vake va ha yentxa hi lani ku fanaka.—Mat. 24:14; Luk. 4:43.

8, 9. a) He wani mavonela mabidzri lawa vapostola va Yesu va ma kombisiki? b) I yini leswi Yesu a swi hlayiki akuva a lulamisa mapimisela ya vapostola, nakone leswo swi hi dondzrisa yini namunhla?

⁸ Loko vapostola va li Nhaveni ya Minhlwazri va ve ni ntlhanganu wa wugamu na Yesu lani misaveni. Na va ni ku lavisela lokukulu va vutise leswi: “Hosi, hi swoswi u taka pfuxela Israyele a mfumu?” (Mint. 1:6) Xivutiso lexo, xi kombise leswaku vapostola a va ni mavonela mabidzri lama hoxekiki. Dzra ku sungula, a va pimisa leswaku Mfumu wa Xikwembu Nkulukumba a wu ta buyiseliwa ka Vayisrayele va nyama. Dzra wubidzri, a va yimela leswaku Mfumu wa Xikwembu Nkulukumba wu sungula ku fuma hi ‘nkama woluwa’. Xana Yesu a va pfunise kuyini ku lulamisa mapimisela yavu?

⁹ A swi ganaganekisi leswaku Yesu a a swi tiva swaku a vonela dzra ku sungula a dzri ta hatla dzri lulamisiwa. Ntsrhaku ka 10 wa masiku, valandzreli vake a va ta va timboni ta tiko ledzrimpshwa, ku nga Israyele wa moya. Akuva a lulamisa mavonela ya wubidzri, Yesu hi lizrandzru a va dzrimuxe leswi: “A swi lumbi n’wine ku tiva minkama kumbe tinguva leti Papayi a tibekeliki tone.” (Mint. 1:7) Yehovha i mubekisi lwenene wa nkama ku tlula hinkwavu. Na a nga si fa, Yesu a hlaye leswaku nambi ku li n’wana a a nga tivi ntxhumu mayelanu ni “siku ledzro ni nkama” lowu a wugamu a byi ta tlhasa ha wone, kambe a “swi tiviwa ntsena hi Papayi”. (Mat. 24:36) Hi lani ku fanaka, namunhla loko vakriste va kazrateka ngopfu hi siku ledzri  wugamu bya xiyimu lexi dzri taka tlhasa ha dzrone va va na va kazratekela mintxhumu leyi kalaka yi nga va lumbi.

10. He dzrini vonela dzra vapostola ledzri hi fanelaka ku dzri yetisela nakone ha yini?

¹⁰ Nambitanu, a hi fanelanga ku va tekela hansi vapostola va Yesu lava a va ni lipfumelo ledzri tiyiki. Hi ku titsrongahata, va yamukele xilayu lexi va xi kumiki ka Yesu. Nambileswi xivutiso xavu a xi sukela ka mapimisela lama hoxekiki, a xi kombisa leswaku a va ni vonela dzrinene. Hi minkama yinyingi Yesu a kutxe valandzreli vake a ku: “Tsrhamani na mi zrindzrile.” (Mat. 24:42; 25:13; 26:41) Nakunene a va zrindzrile, va xiyisisa wumboni bya leswaku ku nga li khale Yehovha a ta yentxa xa kukazri. Na hine namunhla hi fanela ku va ni vonela ledzri fanaka. Nakunene, a “masikwini [lawa] ya wugamu” swi vileleka ngopfu ku tsrhama na hi zrindzrile ku tlula nkama wini na wini.—2 Tim. 3:1-5.

11, 12. a) He wini ntizro lowu Yesu a zrumiki valandzreli vake kuva va wu yentxa? b) Ha yini a swi fanelile kuva Yesu a yelanisa moya wa ku xwenga ni ntizro wa ku zrezra?

¹¹ Yesu a dzrimuxe vapostola vake leswi a va fanela ku swi zrangisa. A te: “Kambe mi ta yamukela ntamu loko moya wa ku xwenga wu ta henhla kwenu, nakone mi ta va timboni tanga a Yerusalema, a Yudeya hinkwaku ni Samariya, ku ya tlhasa mimbangwini ya le kule swinene ya misava.” (Mint. 1:8) Dzrungula dzra ku pfuxiwa ka Yesu a dzri ta zranga hi ku zrezriwa a Yerusalema, lani vhanu va nyikeliki Yesu kone akuva a dlayiwa. Ntsrhaku, dzrungula a dzri ta hangalaka a Yudeya, Samariya ni ku ya tlhasa mimbangwini yimbeni.

¹² Swa twala leswi Yesu a nga phindhaphindha xidumbiso xa ku zrumela moya wa ku xwenga akuva wu pfuna vadondzrisiwa vake kutani ntsrhaku, a va zruma ku ya ku zrezreni. Ka buku dzra Mintizro ku vulavuliwa hi “moya wa ku xwenga” ku tlula 40 wa makhambi. Khambi dzrin’wana ni dzrin’wana buku ledzri, ledzri khumbaka mbilu, dzri swi beka livaleni leswaku a hi nge swi koti ku yentxa ku zrandzra ka Yehovha handle ka ku pfuniwa hi moya wa ku xwenga. Kutani i swa lisima kuva minkama hinkwayu hi khongota hi kombela mpfunu wa moya wa ku xwenga! (Luk. 11:13) Ku tlula minkama hinkwayu swoswi hi wu vilela ngopfu moya wa ku xwenga.

13. He wini ntizro lowu hi nyikiwiki wone hi Xikwembu Nkulukumba nakone ha yini hi fanela ku wu pfumela hi mbilu hinkwayu?

¹³ Ntlhamuxelo wa mazritu lama liki “ku ya tlhasa wugan’wini bya misava’’ wu txintxile ku sukela nkameni luwa. Nambitanu, hi lani hi swi voniki ha kone ka ndzrima leyi khalutiki, Timboni ta Yehovha ti pfumele hi mbilu hinkwayu ku hetisisa ntizro wa ku zrezra, hikusa ta swi tiva leswaku Xikwembu Nkulukumba a djula kuva vhanu hinkwavu va twa madzrungula lamanene ya Mfumu wake. (1 Tim. 2:3, 4) Xana wene wa wu hisekela ntizro lowu wa ku huluxa vhanu? A ku na ntizro wa lisima wu  tlhela wu nyonxisa ku fana ni lowu. Yehovha a ta ku nyika ntamu lowu vilelekaka akuva u kota ku wu hetisisa. Buku ledzri dzra Mintizro dzri ta ku komba tindlela leti u fanelaka ku ti tizrisa ni vonela ledzri u fanelaka ku dzri txutxela, akuva u kota ku humelela ka ntizro lowu.

14, 15. a) I yini leswi tintsrumi ti swi hlayiki hi ku ta ka Yesu nakone swi tlhamuxela yini? (Vona ntlhamuxelo wa le hansi.) b) Xana ku ta ka Yesu ku ve hi ndlela leyi fanaka ni ku tlhela kwake hi ndlela yini?

¹⁴ Hi lani hi swi voniki ha kone ku sunguleni ka nhlokomhaka leyi, Yesu a tlhantukele matilweni a va a nyamalala. Nambitanu, vapostola vake va 11 va tame va yima va languta matilweni. Ntsrhaku, ku humelele tintsrumi tibidzri leti va kawukiki hi ndlela ya lizrandzru ti ku: “Vavanuna va le Galileya, ha yini mi yima lani mi lavisa tilweni? Yesu lweyi a a li na n’wine lweyi kutani a tlhantukisiwiki tilweni a ta ta hi ndlela yoleyi mi mu voniki a tlhantukela tilweni ha yone.” (Mint. 1:11) Xana tintsrumi a ti djula ku hlaya leswaku Yesu a ta buya ni mizri wa nyama hi lani va wukhongoti byimbeni va dondzrisaka ha kone? Im-him. Hi swi tivisa kuyini leswo?

¹⁵ Tintsrumi ti hlaye leswaku Yesu a ta tlhela “hi ndlela yoleyi” va mu voniki a tlhantuka ha yone ku nga li hi xivumbeko lexi fanaka. b Xana Yesu a tlhantuke hi ndlela yini? Nkama lowu tintsrumi ti vulavuliki ha wone a swi nga ha koteki ku mu vona. I vapostola ntsena lava swi xiyiki leswaku Yesu a a suke misaveni a tlhelela matilweni ka papayi wake. Nakone hi swoswo swi humeleliki. Namunhla, ko va ntsena lava twisisaka Matsralwa lava twisisaka leswaku Yesu a tlhelile hikusa awa fuma swanga Hosi. (Luk. 17:20) Hi fanela ku swi twisisa ha hombe swikombiso swa ku buya ka Yesu ni ku swi byela vhanu vambeni akuva na vone va vona lisima dzra minkama leyi hi hanyaka ku yone.

16-18. a) Xana Mintizro 1:13, 14 yi hi dondzrisa yini mayelanu ni mintlhanganu ya wukriste? b) Hi dondzra yini ka xikombiso xa Mariya mamana wa Yesu? c) Ha yini mintlhangano ya wukriste yi li ya lisima namunhla?

¹⁶ Ntsrhaku ka hinkwaswu leswi yentxekiki, a swi hlamalisi leswi vapostola va nga “tlhelela a Yerusalema na va nyonxe ngopfu swinene”. (Luk. 24:52) Kambe xana a va ta yangulisa kuyini ka minkongomiso ni leswi Kriste a va leletiki swone? Ka Mintizro ndzrima 1, tindzrimana 13 ni 14, hi dondzra leswaku vapostola a va tlhanganile “ka sala dzra le henhla” nakone hi dondzra swa kukazri leswi nyonxisaka mayelanu ni ntlhanganu lowo wa vadondzrisiwa va ku sungula. A minkameni liyani a swi tolovelekile kuva tiyindlu ta le Palestina ti va ni sala dzra le henhla, lani a ku khandzriyiwa swikada leswi a swi kumeka handle ka yindlu. Xana a “sala [ledzro] dzra le henhla” a dzri kumeka ka yindlu leyi ku khaneliwaka ha yone ka Mintizro 12:12, leyi a yi lumba mamana wa Marka? Swi nge na mhaka  leswaku sala ledzro a dzri li ka yindlu leyo kumbe im-him, swi le livaleni leswaku a ku li mbangu lowu nabyaliki ni lowu fanelekaka akuva valandzreli va Kriste va tlhangana ku wone. Kambe i vamani lava a va li ka ntlhanganu wolowo nakone va yentxe yini?

¹⁷ Xiya leswaku ka ntlhanganu lowo a ku ngo va ni vapostola ntsena nakone a ku nga li ntlhanganu wa vavanuna ntsena. A ku ni “vavasati va kukazri” ku patsra na Mariya, mamana wa Yesu. Ledzri i khambi dzra wugamu ledzri Bibele dzri khanelaka ha Mariya hi ku kongoma. Swa twala ku hlaya leswaku a a nga li lahayani kuva a tidjulela ndhuma kambe a a li kone kuva a gandzrela kun’we ni vapfumelikulobye. Swi fanelile kuva Mariya a nyonxe ngopfu hikuva a vone vanake va xinuna va mune lava a va nga pfumeli ka Yesu nkama lowu a a li lani misaveni, na va li kone ka ntlhanganu lowo. (Mat. 13:55; Yoh. 7:5) Vamakwavu lava va txintxe ngopfu ntsrhaku ka loko makwavu a file ni ku tlhela a pfuxiwa.—1 Kor. 15:7.

¹⁸ Tlhela u vona leswaku ha yini vadondzrisiwa va tlhanganile: “Va ya mahlweni va khongota hi nkongometo wun’we.” (Mint. 1:14) Ku sukela khale ku tlhangana kun’we i swa lisima ka wugandzreli bya wukriste. Hi tlhangana kuva hi tiyisana, hi yamukela minkongomiso ni swilayu. Ku tlula hinkwaswu hi tlhangana kun’we ni vamakwezru akuva hi gandzrela Yehovha, Papayi wezru lweyi a nga matilweni. Ku khongota xikan’we ni ku yimbelela tinsimu leti dzrumisaka Yehovha swi mu nyonxisa ngopfu nakone i swa lisima kwezru. Hi nga tsrhikeni kuva kone ka mintlhanganu leyo ya ku xwenga ni leyi yakaka!—Heb. 10:24, 25.

19-21. a) Hi dondzra yini ka ntizro lowu Petro a wu yentxiki hi ku hiseka a bandleni? b) Ha yini a swi vileleka kuva Yudasi a pfaletiwa nakone hi dondzra yini ka ndlela leyi mhaka yi lulamisiwiki ha yone?

¹⁹ Kambe swoswi valandzreli volavo va Kriste a va fanela ku teka xiboho xa lisima swinene, nakone mupostola Petro hi yene a zrangeliki ku tekeni ka xiboho xolexo. (Tindzrimana 15-26) Swa kutxa ku vona ndlela leyi Petro a txintxiki ha yone hi tlhelo dzra moya hi mavhiki matsrhongo, ntsrhaku ka kuva a yale Hosi makhambi mazrazru. (Mar. 14:72) Hinkwezru hi vadohi nakone mhaka leyi yi hi dzrimuxa leswaku Yehovha i ‘munene, [hi] lwe a dzrivalelaka’ hinkwavu lava tisolaka na swi sukela mbilwini.—Amaps. 86:5.

²⁰ Petro a tlhasele wugamu bya leswaku Yudasi, mupostola lwe a wongiki Yesu a a fanela ku pfaletiwa. Kambe a a ta pfaletiwa hi mani? Petro a hlaye leswaku mupostola lwemumpshwa a ku fanela ku va mhunu lweyi a landzreliki Yesu loko a ha li lani misaveni nakone a nga mboni ya ku pfuxiwa kwake. (Mint. 1:21, 22) Xiboho lexo a xi pfumelelana ni xidumbiso xa Yesu: “N’wine mi viki valandzreli vanga mi ta tsrhama ka 12 wa swiluvelo mi yavanyisa tinxaka ta 12 ta Israyele.” (Mat. 19:28) Swi le livaleni leswaku a a li kongometo wa Yehovha kuva 12 wa vapostola lava landzreliki Yesu loko a ha li lani misaveni, a nkameni  lowu taka va va “12 wa mazribye ya masungulo” ya Yerusalema lwemumpshwa. (Mpful. 21:2, 14) Hi ndlela leyo Xikwembu Nkulukumba a pfumelele leswaku Petro a vona ku hetiseka ka wuprofeta lebyi a byi ta hetiseka ka Yuda, lebyi liki: ‘A mun’wana a a teke xikhundla xakwe.’—Amaps. 109:8.

²¹ Xana a hlawuliwe hi ndlela yini mupostola lwemunpshwa? Va hambe wuhlolotwana, ku nga leswi a swi tolovelekile minkameni ya ku tsraliwa ka Bibele. (Amapr. 16:33) Nakunene ku ve khambi dzra wugamu ku vulavuliwa hi ku tizrisiwa ka wuhlolotwana hi ndlela leyi a Bibeleni. Swi tikomba ingiki a ku txhululiwa ka moya wa ku xwenga ku yentxe wuhlolotwana lebyo byi nga ha tizri. Xiya leswaku ha yini ku tizrisiwe wuhlolotwana. Vapostola va khongote va ku: “Wene, Yehovha, wene u tivaka timbilu ta hinkwavu, hi kombe leswaku he wini ka lavabidzri lweyi u mu hlawuliki.” (Mint. 1:23, 24) A va djula leswaku Yehovha a va yene a hlawulaka. Ku hlawuliwe Matiyasi, lweyi swi nga yentxekaka a a li mun’we wa lava 70 lava Yesu a va zrumeliki ku ya zrezra. Xileswo, Matiyasi a ve mun’we wa “lava 12”. c—Mint. 6:2.

22, 23. Ha yini hi fanela ku tibeka hansi ni ku yingiseta lava zrangelaka a bandleni?

²² Leswi swi hi dzrimuxa lisima dzra kuva hinkwaswu swi hambiwa hi ndlela leyi hlelekiki a xikazri ka vhanu va Xikwembu Nkulukumba. Ku ta ta tlhasa namunhla vavanuna lava nga ni wutiyanguleli va hlawuliwa akuva va va valaviseli mabandleni. Vakulu va kambisisa hi wunyaminyami matsrhamela lama vilelekaka hi ku ya hi Bibele ka vhanu lava nga bekiwaka swanga valaviseli nakone va khongota va kombela nkongomiso wa moya wa ku xwenga. Xileswo, a bandla dzri vona vavanuna volavo swanga lava va hlawuliwiki hi moya wa ku xwenga. Loko hi tibeka hansi ni ku yingiseta vavanuna lava, hi yentxa leswaku ku va ni ntizrisanu a bandleni.—Heb. 13:17.

²³ Leswi vadondzrisiwa volavo a va tiyisiwile hi ku vona Yesu ntsrhaku ka loko a pfuxiwile ni leswi a va hlele ndlela leyi bandla a dzri ta tizra ha yone a va swi lulamele ha hombe ku langutana ni leswi a swi ta landzrela. Nhlokomhaka leyi landzrelaka yi ta vulavula hi mhaka leyo.