Ka hinkwavu lava va zrandzraka Yehovha Xikwembu Nkulukumba ni Zritu dzrakwe, Bibele:

Yesu a te: ‘N’wi ta tiva xihlayelamfuzri; a xihlayelamfuzri xi ta n’wi ntsrhunxa.’ (Yohan 8:32) Yanakanya hi ndlela leyi u titwiki ha yone loko u kume xihlayelamfuzri hi khambi dzra ku sungula! Swi nyonxisile ku tiva leswaku a misaveni leyi taliki hi madzrimi, hi nga dondzra xihlayelamfuzri.​—2 Timoteo 3:1.

Yehovha Xikwembu Nkulukumba a djula kuva hi tiva xihlayelamfuzri. Nakone leswi hi zrandzraka vhanu, hi djula ku va byela mhaka leyi. Kambe ku tizrela Xikwembu Nkulukumba a hi leswo ntsena. Hi fanela ku yentxa leswi hi nga swi kotaka akuva hi hanya swanga vakriste hikusa hi yi simamisa ngopfu minsinya ya milawu ya Yehovha. Yesu a kombise ndlela ya lisima ya ku komba leswaku ha mu zrandzra Xikwembu Nkulukumba. A te: ‘Loko n’wi bekisa milawu yanga, n’wi ta tsrhama a lizrandzrwini langa; swanga heswi na mine ndzri bekisiki milawu ya Tatana wanga, kutani ndzri tsrhami a lizrandzrwini lakwe.’​—Yohan 15:10.

Yesu awa mu zrandzra swinene Tatana wakwe, nakone a yentxa hinkwaswu leswi a mu zrumaka swone. Loko hi yetisela Yesu a mahanyelweni yezru, Yehovha a ta hi zrandzra nakone hi ta nyonxa ha kakunene. Hi lani Yesu a hlayiki ha kone, a ku: ‘Loko n’wi tiva leswo n’wi ni ndjombo loko n’wi swi yentxa.’​—Yohan 13:17.

Hi hlunyela kuva buku ledzri dzri ku pfuna ku dondzra ku hanya hi xihlayelamfuzri xa le Bibeleni ni kuva u va munghanu wa Xikwembu Nkulukumba. Hi khongota kuva lizrandzru dzraku ha Xikwembu Nkulukumba dzri kula ni ku tama u tsrhama ‘a lizrandzrwini dzra Xikwembu Nkulukumba . . . loli yisaka wuton’wini lebyi nga helikiki’.​—Yuda 21.