1, 2. I yini leswi vhanu vanyingi va tivutisaka swone?

XIDZEDZE xi hohlota tiyindlu xi siya vhanu va ku tala na va nge na ka ku yetlela. Swigevengu leswi nga ni swibalesa ni mabutxha swi dumela vhanu ni wusiku, swi va vavisa, swi dlaya vambeni swi tlhela swi va tekela mintxhumu yavu. Mamana muni a dlawa hi mavabyi a siya ntlhanu wa vana wuswavu.

² Loko makhombo ya ku tanu ma humelela, vhanu vanyingi va tivutisa leswi: “Kasi ha yini?” Vanyingi va tivutisa leswaku ha yini misava yi tale hi livengo ni ku xaniseka. Xana u sama u tivutisa leswi?

3, 4. a) Xana Habakuki a tivutise yini? b) Yehovha a mu hlamule hi ndlela yini?

³ A Bibeleni, hi dondzra leswaku vhanu lava a va ni lipfumelo ledzri tiyiki ka Xikwembu Nkulukumba na vone va hambe swivutiso leswi fanaka. Hi xikombiso, muprofeta Habakuki a vutise Yehovha a ku: ‘U ndzri kombisela yini a ku somboloka, u ndzri vonisa wubihi? A ku honeka ni ku lebya ku le mahlweni kwanga; A timholova ti kone, a ku hambana ku humelela.’​—Habakuk 1:3.

⁴ Ka Habakuk 2:2, 3, hi kuma nhlamulo leyi Yehovha a yi nyikiki Habakuki ni xidumbiso Xakwe xa ku lulamisa xiyimu. Yehovha a va zrandzra swinene vhanu. Bibele dzri li awa zron’weka ha n’wine. (1 Petros 5:7) Nakunene, Xikwembu Nkulukumba a swi nyenya ngopfu ku vona vhanu na va xaniseka ku tlula hine. (Ezaya 55:8, 9) Kutani ke, a hi buleni hi xivutiso lexi liki: Ha yini ku xanisekiwa ngopfu la misaveni?

5. I yini leswi vafundhisa vanyingi va swi hlayaka mayelanu ni ku xaniseka, kambe i yini leswi Bibele dzri swi dondzrisaka hi mhaka leyo?

⁵ Hakanyingi vafundhisa, vapadre ni vazrangeli van’wana va wukhongoti, va hlaya leswaku loko vhanu va xaniseka i ku zrandzra ka Xikwembu Nkulukumba. Van’wana va nga ha hlaya leswaku hinkwaswu leswi humelelaka mhunu, ku patsra ni makhombo, a swi tsraliwe khale ha Xikwembu Nkulukumba nakone a hi nge txhuki hi swi twisisa leswaku ha yini. Van’wana va nga ha hlaya leswaku vhanu, ku patsra ni swivanana, va fa leswaku va ya tsrhama na Xikwembu Nkulukumba a tilweni. Kambe leswo a hi ntiyiso. Yehovha a hi yene muvangi wa mintxhumu ya ku biha. Bibele dzri li: ‘A swi ve kule ni Xikwembu Nkulukumba ku yentxa swa ku biha; Ni kule ni Lwe wa Ntamu hinkwawu ku yentxa vusomboloki!’—Yob 34:10.

6. Ha yini vanyingi va nyika nandzru Xikwembu Nkulukumba hi ku xaniseka hinkwaku loku nga kone la misaveni?

⁶ Vhanu vanyingi va lumbeta Xikwembu Nkulukumba hi kola ka ku xaniseka hinkwaku loku nga kone la misaveni. Va pimisa leswaku Xikwembu Nkulukumba hi yene a fumaka misava. Kambe hi lani hi dondzriki ha kone ka Ndzrima 3, Sathana Diyavulosi hi yene hi ntshima a fumaka misava.

7, 8. Ha yini ku xanisekiwa ngopfu la misaveni?

⁷ Bibele dzri hi byela leswaku ‘a misava hinkwayu mi tsrhami ku lwemfani’. (1 Yohan 5:19) Mufumi wa misava leyi, Sathana, i mubihi mfuzri a ni tihanyi. A ‘kanganyisa misava hinkwayu’. (Apfuletelo 12:9) Vhanu vanyingi va tekelela Sathana. Lexo i xin’we xa leswi yentxaka leswaku misava yi tala hi madzrimi, livengo ni tihanyi.

⁸ Ku ni swivangelo swin’wana leswi yentxaka leswaku ku va ni ku xaniseka kukulu la misaveni. A ntsrhaku ka loko Adamu na Evha va dohile, va tlulete xidoho ka vanavu. Kutani hi kola ka xidoho, a vhanu va xanisa van’wana. Minkama  ya ku tala va djula ku va lava tlakukiki ku tlula vambeni. Va lwa, va pfuxa tiyimpi nakone va xanisa van’wana. (Eklesiasta 4:1; 8:9) Minkama yin’wana vhanu va xaniseka hikusa a ‘nkama ni humelelo i swa hinkwavu’. (Eklesiasta 9:11) Leswi hlayaka leswaku va nga yentxekeliwa hi timhangu ni swin’wana swa ku biha, loko vo txhuka va kumeka ka mbangu lowu nga liki wunene hi nkama lowu nga liki wunene.

9. Hi swi tivisa kuyini leswaku Yehovha a ta helisa ku xaniseka?

⁹ Yehovha a nga vangi ku xaniseka. A nga fanelanga ku nyikiwa nandzru hi kola ka tiyimpi, wugevengu ni tihanyi. Xikwembu Nkulukumba a nga vangi timhangu ta ntumbuluku ta ku fana ni ku tsrekatsreka ka misava, ku buluka ka tinhava ni tindhambhi. Kambe u nga ha tivutisa leswi: ‘Leswi Yehovha a nga lwe wa ntamu hinkwawu a wuyakweni hinkwabyu, ha yini a nga siveli mintxhumu ya ku biha akuva yi nga yentxeki?’ Ha swi tiva leswaku Xikwembu Nkulukumba a hi zrandzra ngopfu. Xileswo, a ni xivangelo lexi twalaka xa ku pfumelela ku xaniseka ku tama ku va kone.​—1 Yohan 4:8.

10. Xana Sathana a hehle Yehovha hi ndlela yini?

¹⁰ A xizrambeni xa Edeni, Diyavulosi a kanganyise Adamu na Evha. A hehle Xikwembu Nkulukumba hi ku hlaya leswaku i Mufumi wa ku biha ni leswaku a a tsrona Adamu na Evha mintxhumu leyinene. Sathana a a djula ku va kholwisa leswaku yene a a ta va fuma ha hombe ku tlula Yehovha nakone vone a va nga mu vileli Xikwembu Nkulukumba.​—Genesis 3:2-5; Yana ka “Dondzra Swin’wana”, 27.

11. Hi xini xivutiso lexi hi fanelaka ku xi hlamula?

¹¹ Adamu na Evha va kanye Yehovha va tlhela va mu pfukela. Va yanakanye leswaku va ni mfanelo ya ku tihlawulela leswi nga swinene ni leswi bihiki. Xana Yehovha a a ta swi  kombisa hi ndlela yini leswaku vapfukeli lava a va hoxile ni leswaku yene awa swi tiva leswi nga swinene ka hine?

12, 13. a) Ha yini Yehovha a nga tekelanga ku helisa vapfukeli? b) Ha yini Yehovha a pfumelele Sathana ku va mufumi wa misava ni vhanu leswaku va tifuma?

¹² Yehovha a nga tekelanga ku helisa Adamu na Evha. A matsrhan’wini ya leswo, a va pfumelele leswaku va va ni vana. Kutani Yehovha a yentxe swi koteka leswaku vanavu va tihlawulela lweyi va djulaka leswaku a va mufumi wavu. Nkongometo wa Yehovha a ku li ku tata misava hi vhanu lava hetisekiki nakone leswo a swi ta yentxeka nambi loko Diyavulosi a o yentxa yini na yini.​—Genesis 1:28; Ezaya 55:10, 11.

¹³ Sathana a lumbete Yehovha a mahlweni ka tintsrumi ta ntsrandzra-vahlayi. (Yob 38:7; Daniel 7:10) Kutani Yehovha a nyike Sathana nkama wa ku kombisa leswaku ku lumbeta kwakwe a ku li ntiyiso kumbe madzrimi. A tlhele a nyika vhanu nkama wa ku tifuma na va kongomisiwa ha Sathana, ku vona loko swi ta va fambela ha hombe na va nge na mpfunu wa Xikwembu Nkulukumba.

14. Xana i yini leswi kombisiwiki hi ku famba ka nkama?

¹⁴ Vhanu va dzringisa ku tifuma ku dzringana malembe ya madzana-dzana, kambe va hluleka. Leswo swi kombisa leswaku Sathana i muhembi. Vhanu va djula ku pfuniwa ha Xikwembu Nkulukumba. Muprofeta Yeremiya a a tiyisile loko a ku: ‘Yehovha, ndzra swi tiva leswaku a ndlela ya mhunu a yi le ntan’wini wakwe; a mhunu lwe a fambaka a nga na ku lulamisa mavangwa yakwe.’—Yeremiya 10:23.

15, 16. a) Ha yini Yehovha a pfumelele ku xaniseka ku dzringana nkama wa ku leha? b) Ha yini Yehovha a nga lulamisanga swikazratu leswi yentxiwiki ha Sathana?

¹⁵ Ha yini Yehovha a pfumelele ku xaniseka ku dzringana nkama wa ku leha? Ha yini a nga sivelanga mintxhumu ya  ku biha akuva yi nga yentxeki? Swi teke nkama akuva ku kombisiwa leswaku mfumu wa Sathana wu hlulekile. Vhanu va dzringise mafumela hinkwawu, kambe va hlulekile. Nambi leswi va hluvukiki hi tlhelo dzra siyensa kumbe tekinolojiya, ku ni wubihi byinyingi, wusiwana, wugevengu ni tiyimpi ku tlula dzrini na dzrini. A hi nge swi koti ku tifuma na hi nge na mpfunu wa Xikwembu Nkulukumba.

¹⁶ Nambitanu, Yehovha a nga lulamisanga swikazratu leswi yentxiwiki ha Sathana. Loko a e swi lulamisa, a swi ta komba leswaku a seketela mfumu wa Sathana. Kambe Yene a nge ti txhuka a swi yentxile leswo. Handle ka leswo, vhanu a va ta pimisa leswaku va swi kota ku tifuma. Kambe leswo i madzrimi. Yehovha a a nge ti za a ma seketelile madzrimi lawo. Yene a nga hembi.​—Ba-Heberu 6:18.

17, 18. Xana Yehovha a ta yentxa yini hi leswi honeteliwiki ha Sathana?

¹⁷ Xana Yehovha a nga swi kota ku lulamisa leswi honeteliwiki hi kola ka kuva Sathana ni vhanu va nga yingisetanga? Ina, a nga swi kota. Ka Xikwembu Nkulukumba, hinkwaswu swa koteka. Yehovha awa wu tiva nkama lowu madzrimi hinkwawu ya Sathana ma taka huma livaleni ha wone. Ntsrhaku ka leswo a ta yentxa misava yi va paradeyisi, hi lani a a djula ha kone. Hinkwavu lava nga ‘masizreni’ va ta pfuxiwa. (Yohan 5:28, 29) Vhanu a va nge he ti vabya nambi ku fa. Yesu a ta lulamisa hinkwaswu leswi honeteliwiki ha Sathana. Yehovha a ta tizrisa Yesu ‘akuva a helisa mintizro ya Diyavulosi’. (1 Yohan 3:8) Ha mu tlangela Yehovha hi leswi swoswi a hi lehiselaka mbilu akuva hi mu tiva ni ku tihlawulela leswaku hi djula ku fumiwa ha Yene. (Dondzra 2 Petros 3:9, 10.) Nambi loko hi xaniseka, a hi nyika ntamu wa ku tiyisela.​—Yohan 4:23; dondzra 1 Ba-le-Korinte 10:13.

¹⁸ Yehovha a nga hi sindzrisi leswaku hi mu hlawula swanga  Mufumi wezru. A nyike vhanu ntsrhunxeko wa ku tihlawulela. A hi voneni leswaku leswo swi hlaya yini ka hine.

19. Hi yini nyiko ya ku hlamalisa leyi Yehovha a hi nyikiki yone nakone ha yini hi fanela ku yi tlangela?

¹⁹ Nyiko ya Yehovha leyi hlamalisaka ya ntsrhunxeko wa ku tihlawulela yi hi yentxa hi va lava hambaniki ngopfu ni swihazri. Swone swi yentxa mintxhumu hi ku ya hi ntumbuluku, kambe hine hi nga hlawula leswi hi djulaka ku hanyisa xiswone kumbe hi hlawula ku nyonxisa Yehovha. (Amaproverbia 30:24) Nakone, hine a hi fani ni mutxhini lowu yentxaka leswi wu hambeliwiki swone ntsena. Hi ni ntsrhunxeko wa ku hlawula leswi hi djulaka ku va swone, lava hi djulaka ku tlanga navu ni leswi hi djulaka ku swi yentxa hi wutomi byezru. Yehovha a djula hi tikholisa hi wutomi.

20, 21. Hi kwini ku hlawula lokunene loku u fanelaka ku ku yentxa swoswi?

²⁰ Yehovha a djula hi mu zrandzra. (Mattheo 22:37, 38) A fana ni tatana lweyi a nyonxaka hi ku twa n’wanakwe a ku “papayi, na ku zrandzra”, na swi pfela mbilwini ku nga li hi ku sindzrisiwa. Yehovha a hi nyike ntsrhunxeko wa ku hlawula ku mu tizrela kumbe im-him. Sathana, Adamu na Evha va hlawule ku fulazrela Yehovha. Xana wene u ta yi tizrisa hi ndlela yini nyiko ya ntsrhunxeko wa ku tihlawulela?

²¹ Tizrisa ntsrhunxeko wa ku tihlawulela leswaku u tizrela Yehovha. Ku ni vhanu va ntsrandzra-vahlayi lava langiki ku tizrela Yehovha kutani va fulazrela Sathana. (Amaproverbia 27:11) Xana u nga yentxa yini swoswi akuva u va kone ka misava leyimpswha ya Xikwembu Nkulukumba loko a ta helisa ku xaniseka? Ndzrima leyi landzrelaka yi ta hlamula xivutiso lexo.