1. I yini leswi u nga ha swi pimisaka ntsrhaku ka ku va u dondzre buku ledzri hi wunyaminyami?

U KUME timhaka tinyingi ta ntiyiso wa Bibele loko u li ku dondzreni ka buku ledzri, ku fana ni xidumbiso xa Xikwembu Nkulukumba xa wutomi lebyi nga helikiki, xiyimu xa vafi, ni dumbo dzra ku pfuka ka vafi. (Eklesiasta 9:5; Luka 23:43; Yohan 5:28, 29; Apfuletelo 21:3, 4) Swi nga yentxeka u sungule ku hlengela ni Timboni ta Yehovha u tlhela u xiya leswaku ti hanya hi leswi ti swi dondzrisaka. (Yohan 13:35) Swi nga ha yentxeka u sungule ku txutxela wuxaka bya le kusuhi na Yehovha, nakone swi nga ha yentxeka mfuzri u tiyimisele ku mu tizrela. Kutani ke, u nga  ha pimisa leswi: ‘I yini leswi ni nga swi yentxaka akuva ni tizerela Xikwembu Nkulukumba?’

2. Ha yini wanuna wa mu-Etiyopiya a djule ku babatisiwa?

² Leswo hi leswi swi pimisiwiki hi wanuna mun’wana wa mu-Etiyopiya lweyi a hanyiki nkameni wa Yesu. Khambi dzrin’wana ntsrhaku ka ku pfuxiwa ka Yesu, Filipi, lweyi a a li mudondzrisiwa wa Yesu, a txhumayele mu-Etiyopiya lweyo. Filipi a mu kholwise leswaku Yesu a a li Mesiya. Wanuna lweyi wa mu-Etiyopiya a khumbeke mbilu hi leswi a swi dondzriki lakakuva hi xikahlula a ku: ‘Hi lawa mati; xana ku nga sivela yini ku nha ndzri babatisiwa?’​—Amintiṛo 8:26-36.

3. a) I xileleto xini lexi Yesu a xi nyikiki valandzreli vakwe? b) Xana mhunu a fanela ku babatisiwa hi ndlela yini?

³ A Bibele dzri swi beka livaleni leswaku loko u djula ku tizrela Yehovha, u fanela ku babatisiwa. Yesu a byele valandzreli vakwe a ku: ‘Fambani, n’wi ya dondzrisa matiko hinkwawu, n’wi va babatisa’. (Mattheo 28:19) Mfuzri Yesu a beke xikombiso hi ku va yene ha byakwe a babatisiwa. A nhingenisiwe hi ku helela a matini, ku nga li ku va a txheliwa hi mati nhlokweni. (Mattheo 3:16) Namunhla, loko mukriste a babatisiwa swa fanela ku va na yene a nhingenisiwa, kumbe a nyuvetiwa, a matini.

4. Xana a ku babatisiwa kwaku ku va byela yini vambeni?

⁴ A ku babatisiwa kwaku ku komba vambeni leswaku nakunene u djula ku va munghanu wa Yehovha ni ku mu tizrela. (Amapsalma 40:7, 8) U nga ha tivutisa: ‘Xana ni fanela ku yentxa yini akuva ni babatisiwa?’

5. a) Xana u fanela ku zranga u yentxa yini na u nga si na babatisiwa? b) Ha yini mintlhanganu ya wukriste yi li ya lisima?

⁵ Na u nga si na babatisiwa u fanela ku zranga u tiva Yehovha na Yesu. Nakunene u sungulile ku yentxa leswo hi  ku dondzra Bibele. (Dondzra Yohan 17:3.) Kambe leswo ntsena a swi dzringani. Bibele dzri li u fanela ku ‘tala hi ku tivisisa’ ku zrandzra ka Yehovha. (Ba-le-Kolosa 1:9) Mintlhanganu ya Timboni ta Yehovha yi ta ku pfuna kuva u txutxela wunghanu bya le kusuhi na Yehovha. Lexo i xivangelo xa lisima lexi faneliki xi ku yentxa u nga lovhi mintlhanganwini.​—Ba-Heberu 10:24, 25.

6. Xana u fanela ku tiva swa ku gama kwini hi Bibele na u nga si na babatisiwa?

⁶ I ntiyiso leswaku Yehovha a nga laviselanga kuva u zranga u tiva hinkwaswu na u nga si na babatisiwa. A nga yimelanga kuva mu-Etiyopiya a tiva hinkwaswu na a nga si na babatisiwa. (Amintiṛo 8:30, 31) Nakunene hi nge ti za hi hetile ku dondzra ha Xikwembu Nkulukumba. (Eklesiasta 3:11) Kambe akuva u babatisiwa, u fanela ku tiva u tlhela u pfumela tindondzro ta masungulu ta Bibele.​—Ba-Heberu 5:12.

7. Xana ku dondzra kwaku Bibele ku ku pfunise kuyini?

⁷ A Bibele dzri li: ‘Handle ka ku pfumela, a swi koteki ku nha mhunu a tsrhaveliwa hi Xikwembu Nkulukumba.’ (Ba-Heberu 11:6) Xileswo, akuva u babatisiwa, u fanela ku zranga u va ni lipfumelo. Bibele dzri hi byela leswaku vambeni le doropeni dzra Korinte wa khale va twe leswi valandzreli va Yesu a va swi dondzrisa, kutani va ‘pfumela, va va va babatisiwa’. (Amintiṛo 18:8) Hi lani ku fanaka, ku dondzra kwaku Bibele ku ku pfune ku va ni lipfumelo ka swidumbiso swa Xikwembu Nkulukumba ni le ka ntamu wa xitizrulo xa Yesu, lexi nga hi tizrulaka ka xidoho ni lifu.​—Yehošua 23:14; Amintiṛo 4:12; 2 Timoteo 3:16, 17.

8. I yini xi taka ku kutxa ku byela vambeni leswi u swi dondzraka?

⁸ Loko u ya u dondzra swa ku tala a Bibeleni u tlhela u vona leswi swi ku pfunisaka xiswone a wuton’wini byaku,  lipfumelo dzraku dzri ta ya dzri tiya. U ta navela ku byela vambeni leswi u swi dondzraka. (Yeremiya 20:9; 2 Ba-le-Korinte 4:13) Kambe, u nga byela mani xana ke?

9, 10. a) Xana u nga sungula hi ku byela vamani leswi u swi dondzraka? b) Xana u fanela ku yentxa yini loko u djula ku zrezra ni bandla?

⁹ U nga ha navela ku byela maxaka yaku, vanghanu, vavundzramani kumbe vatizri-kuloni leswi u swi dondzraka. Leswo i swinene, kambe vulavula hi ndlela ya ku zrula ni ya lizrandzru minkama hinkwayu. Hi ku famba ka nkama u ta sungula ku zreza ni bandla. Loko u navela ku sungula, u nga byela Mboni leyi dondzraka Bibele na wene leswaku u navela ku sungula ku zrezra ni bandla. Loko a vona leswaku wa fanekela nakone u hanya hi leswi u swi dondzraka a Bibeleni, wene na yene mi ta bula ni vakulu vabidzri va bandla.

¹⁰ Mi ta bula hi yini ni vakulu lavo? Va ta bula na wene akuva va vona kumbe wa ti twisisa u tlhela u ti kholwa tindondzro ta masungulu ta Bibele, kumbe siku ni siku u hanya hi leswi u swi dondzraka a Bibeleni, ni leswaku hakunene wa swi navela ku va mun’we wa Timboni ta Yehovha. Dzrimuka leswaku vakulu va zron’weka hi swizro hinkwaswu swa bandla, ku patsra na wene, xileswo u nga txhave ku bula navu. (Amintiṛo 20:28; 1 Petros 5:2, 3) Ntsrhaku ka ntlhanganu lowo, vakulu va ta ku byela loko swi fanekela kuva u sungula ku zrezra ni bandla.

11. Ha yini swi li swa lisima swinene ku va u txintxa na u nga si na sungula ku zrezra ni bandla?

¹¹ Vakulu va nga ha ku tlhamuxela leswaku ku djuleka u txintxa swimbeni na u nga si na sungula ku zrezra ni bandla. Ha yini swi li swa lisima ku yentxa ku txinxa koloko? Hikusa loko hi bulisana ni vhanu mayelanu na Xikwembu Nkulukumba, hi va na hi yimela  Yehovha. Xileswo hi fanela ku hanya hi ndlela leyi mu kombisaka xihluwa.​—1 Ba-le-Korinte 6:9, 10; Ba-le-Galatia 5:19-21.

12. Hayini vhanu hinkwavu va fanela ku tisola?

¹² Ku ni swimbeni leswi u fanelaka ku swi yentxa na u nga si na babatisiwa. Mupostola Petro a li: ‘Tisolani n’wi ndzruluka, akuva swihono swenu swi hlanguliwa’. (Amintiṛo 3:19) Swi tlhamuxela yini ku tisola? Swi tlhamuxela ku titwa nandzru swinene hi kola ka ntxhumu wun’wana ni wun’wana wa ku biha lowu u wu yentxiki. Hi xikombiso, loko mhunu a hanya hi wumbuye, swa fanekela kuva a tisola. Nambi loko ku li leswaku a wuton’wini byaku u zama hi tindlela hinkwatu ku yentxa leswi nga swinene, swa ha fanekela kuva u tisola hikusa hinkwezru ha doha nakone hi fanela ku kombela ku dzrivaleliwa ha Xikwembu Nkulukumba.​—Ba-le-Roma 3:23; 5:12.

13. Swi tlhamuxela yini ku ‘ndzruluka’?

¹³ Xana swa yanela kuva ntsena u tisola hi leswi u swi yentxiki? Im-him. Petro a hlaye leswaku u fanekela ku tlhela u ‘ndzruluka’. Leswi swi tlhamuxela leswaku u fanekela ku tsrhika mahanyela hinkwawu ya ku biha kutani u sungula ku yentxa leswi lulamiki. Hi xikombiso, a hi nge u fambisa movha ka mbangu wa kukazri hi khambi dzra ku sungula. Ntsrhakunyana u gungula leswaku u phazame ndlela. A u ta yentxa yini? Handle ka ku ganaganeka a u ta wu yimisa, u wu djikisa, u gama u teka ndlela leyi nga yone. Hi lani ku fanaka, loko u ya u dondzra Bibele, u nga ha gungula leswaku u ni mahanyela, kumbe mintxhumu leyi u fanekelaka ku yi txintxa. Tibekisele ku ‘ndzruluka’ hi ku va u txintxa lomu swi djulekaka u va u sungula ku yentxa leswi lulamiki.

14. U tinyiketela ka Xikwembu Nkulukumba hi ndlela yini?

¹⁴ Ntxhumu wun’wana wa lisima lowu u fanekelaka ku wu yentxa na u nga si na babatisiwa i ku tinyiketela ka Yehovha. Loko u tinyiketela ka Yehovha, u mu dumbisa hi xikhongoto leswaku u ta dzrumisa yene ntsena ni ku zrangisa ku yentxa ku zrandzra kwakwe a wuton’wini byaku.​—Deuteronoma 6:15.

15, 16. I yini leswi kutxaka mhunu ku tinyiketela ka Yehovha?

¹⁵ Ku dumbisa ku tizrela Yehovha ntsena swi fana ni ku dumbisa mhunu lweyi u mu zrandzraka ku hanya na yene wutomi byaku hinkwabyu. Yanakanya hi wanuna ni wansati lava va ha dondzranaka. Loko wanuna a ya a tiva wansati lweyo ku yampswa, a ya a mu zrandzra kutani a navela ku mu txhata. Nambi leswi ku nga xiboho lexikulu, lwe wanuna a pfumela ku sinara hi leswi a zrandzraka lwe wansati.

¹⁶ Loko u ya u dondzra ha Yehovha, u ya u mu zrandzra ni ku yentxa hi lani u nga kotaka ha kone akuva u mu tizrela. Leswi swi ta ku kutxa ku mu dumbisa hi xikhongoto leswaku u ta mu tizrela. A Bibele dzri li mun’wana ni mun’wana lweyi a djulaka ku va mulandzreli wa Yesu ‘a a tiyale’. (Marka 8:34) Swi tlhamuxela yini leswo? Swi tlhamuxela kuva u yingiseta Yehovha ku sungula a wuton’wini byaku. Leswi swi djuliwaka ha Yehovha i swa lisima swinene ku tlula leswi u swi navelaka ni minkongometo yaku.​—Dondzra 1 Petros 4:2.

17. Ha yini vhanu vambeni va nga tinyiketeli ka Yehovha?

¹⁷ Hi ku txhava leswaku va nga txhuka va nga hetisisi xidumbiso, vambeni a va tinyiketeli ka Yehovha. A va swi djuli ku khunguvanyisa Yehovha. Va nga ha tibyela leswaku  loko va nga tinyiketeli ka Yehovha, a nge va zrwexi wutiyanguleli hi leswi va swi yentxaka.

18. U nga pfuniwa hi yini ku hlula ku txhava ku khunguvanyisa Yehovha?

¹⁸ Lizrandzru dzraku ha Yehovha dzri ta ku pfuna ku hlula ku txhava kun’wana ni kun’wana loku u nga ha vaka na kone ka ku mu khunguvanyisa. Leswi u mu zrandzraka, u ta yentxa hi lani u nga kotaka ha kone akuva u hetisisa xidumbiso xaku. (Eklesiasta 5:4; Ba-le-Kolosa 1:10) U nge tipimisa leswaku swa bindzra ku yentxa ku zrandzra ka Yehovha. Mupostola Yohane a tsrale leswi: ‘Hikuva a ku zrandzra ka Xikwembu Nkulukumba hi loko hi bekisa swileleto swakwe; a swileleto swakwe a swi bindzri.’​—1 Yohan 5:3.

19. Ha yini u nga fanelanga u txhava ku tinyiketela ka Yehovha?

¹⁹ A swi djuli leswaku u va mhunu wa ku hetiseka akuva u tinyiketela ka Yehovha. A nga yimeli kuva hi yentxa leswi hi ngeke na ku swi kota. (Amapsalma 103:14) A ta ku pfuna akuva u yentxa leswi nga swinene. (Ezaya 41:10) Mu dumbe hi mbilu yaku hinkwayu, kutani yene ‘a ta lulamisa tindlela taku’.​—Amaproverbia 3:5, 6.

20. Ntsrhaku ka ku tinyiketela ka Xikwembu Nkulukumba, hi xini xiyenge lexi landzrelaka?

²⁰ Xana u tibekiselile ku tinyiketela ka Yehovha? Ntsrhaku ka loko u tinyiketelile ka Yehovha, u ta va u lulamele ku ya ka xiyenge lexi landzrelaka, ku nga ku babatisiwa.

21, 22. U nga dzri kombekisisa kuyini a lipfumelo dzraku hi ‘nomu’?

²¹ Byela mutlhanganisi wa huvo ya vakulu va bandla dzraku leswaku u tinyiketelile ka Yehovha nakone u djula  ku babatisiwa. Kutani yene a ta hamba malulamiselo ya leswaku van’we ka vakulu va kambisisa na wene tindondzro ta masungulu ta Bibele. Loko va vona leswaku wa faneleka, va ta ku byela leswaku u nga babatisiwa ka nhlengeletanu ya muganga kumbe ka nhlengeletanu leyikulu ya xifundzra ya Timboni ta Yehovha leyi landzrelaka. Ka nhlengeletanu yoleyo, ku ta va ni wukaneli lebyi taka nyikela ntlhamuxelo wa babatiso. Lweyi a taka nyikela wukaneli a ta hamba swivutiso swibidzri swa ku nabyala ka lava yaka ku babatisiweni.  Loko u yangula swivutiso leswo hi ku ‘pfumela hi nomu’, u kombisa livaleni ku pfumela kwaku.​—Ba-le-Roma 10:10.

²² Ntsrhaku ka leswo, u ta babatisiwa. U ta nyuvetiwa a matini hi ku helela. A babatiso dzri ta komba hinkwavu leswaku u tinyiketele wutomi byaku ka Yehovha ni leswaku kutani u mun’we wa Timboni ta Yehovha.

23. Swi tlhamuxela yini ku babatisiwa ‘hi vito dzra Tatana, ni dzra n’wana, ni dzra moya wa ku xwenga’?

²³ Yesu a hlaye leswaku a vadondzrisiwa vakwe a va ta babatisiwa ‘hi vito dzra Tatana, ni dzra N’wana, ni dzra moya lowa ku xwenga’. (Dondzra Mattheo 28:19.) Swi tlhamuxela yini leswo? Swi tlhamuxela leswaku wa byi pfumela wuhosi bya Yehovha ni ntizro wa Yesu a ku hetisiseni ka nkongometo wa Xikwembu Nkulukumba kun’we ni ndlela leyi a wu tizrisaka ha yone moya wa ku xwenga akuva a hetisisa ku zrandzra kwakwe.​—Amapsalma 83:18; Mattheo 28:18; Ba-le-Galatia 5:22, 23; 2 Petros 1:21

24, 25. a) Xana a babatiso dzri tlhamuxela yini? b) Ku ta buliwa hi yini ka ndzrima leyi landzrelaka?

²⁴ A babatiso dzri tlhamuxela ntxhumu wa lisima swinene. Loko u nyuvetiwa a matini, swi kombisa leswaku u file kumbe u tihambanisile ni wutomi byaku bya khale. Loko u huma matini, u ta sungula wutomi lebyimpswha bya ku yentxa ku zrandzra ka Xikwembu Nkulukumba. Leswo swi komba leswaku u ta tizrela Yehovha ku sukela swoswi ku ya mahlweni. U nyiketele wutomi byaku ka Yehovha.

²⁵ Ku tinyiketela kwaku ku ta ku pfuna leswaku u txutxela wunghanu bya le kusuhi na Yehovha. (Amapsalma 25:14) Leswi a swi hlayi swone leswaku mhunu a ta huluxiwa ntsena hi mhaka ya leswi a babatisiwiki. Mupostola Pawulo a tsrale a ku: ‘Tizrelani ku huluka kwenu hi ku txhava ni hi ku zruzrumela.’ (Ba-le-Filipi 2:12) Babatiso dzro va masungulu ntsena. Kambe ke, u nga swi kotisa kuyini ku va kusuhi na Yehovha? A ndzrima ya wugamu ya buku ledzri yi ta hlamula xivutiso lexi.