Xana swa ku kazratela ku dondzra Bibele vhiki ni vhiki? Xana minkama yin’wana u vona ku dondzra Bibele na ku li ntxhumu lowu popshwanaka kumbe swi nga ku nyonxisi? A u wuswaku, hinkwezru swa hi yentxekela minkama yin’wana. Kambe yanakanya hi mintxhumu leyi hi yi yentxaka nkama ni nkama, ya ku fana ni ku hlamba. Ku hlamba swi teka nkama ni ku kazrata, kambe ntsrhaku ka loko hi hlambile hi titwa ha hombe hi tlhela hi pepa! Ku dondzra Bibele na swone swi nga hi pepisa ku fana ni loko hi hlambe hi “mati hi ku tizrisa zritu”. (Efe. 5:26) Vona swidzringanyeto swin’wana leswi nga ku pfunaka:

• Tihambele xiyimiso. Dondzro ya ximhunu ya Bibele i wun’we wa mintxhumu ya “lisima ngopfu” lowu mukriste mun’wana ni mun’wan a fanelaka ku wu yentxa. (Filp. 1:10) Akuva u nga dzrivali nkama lowu u tibekeliki akuva u dondzra, swi ngo yini u tsrala siku ni nkama wa kone ka xipapelana u va u xi beka ka mbangu lowu swi taka ku nabyalela ku xi vona? Kumbe u beka alarmi ka telefone dzraku akuva dzri ku dzrimuxa nkama wa ku dondzra.

• Yanakanya hi leswi nga ku pfunaka kuva miyanakanyu yaku yi nga yingayingi. He swini swi ku nabyalelaka, xana swa ku nabyalela kuva u dondzra ku dzringana wora na miyanakanyu yaku yi nga yingayingi? Kumbe u vona swi yampswa ku dondzra nkamanyana wutsrongo kambe u swi yentxa makhambi manyingi? U swi tiva ha hombe swiyimu swaku. Kutani, tihambele xiyimiso xa ku dondzra na u ni leswi a miyanakanwyini. Loko ku tlhasa nkama lowu u wu bekisiki akuva u dondzra, kambe u vona leswaku a u si na lulamela ku dondzra, swi ngo yini u dondzranyana swa 10 wa maminutu? Nambiloko wo dondzra swa 10 wa maminutu, u ta susa londzrovoto dzrikulu ku tlula loko a u nga dondzranga. Nakone, loko u za u sungula ku dondzra, nambiloko kutani ku khalute 10 wa maminutu lawa u ma bekisiki, loko leswi u swi dondzraka swi ku nyonxisa u ta ya u djula ku dondzra swinyingi.—Filp. 2:13.

• Hlawula leswi u taka swi dondzra na ka ha ni nkama. Loko u yimela nkama lowu u wu bekisiki kuva u dondzra wu tlhasa akuva u hlawula leswi u taka swi dondzra, u ta va na u nga wu tizrisi “hi ndlela leyinene nkama” waku. (Efe. 5:16) Swi ngo yini u tsrala tinhlokomhaka leti u navelaka ku tidondzra? Loko ku ni mhaka ya kukazri leyi u kalaka u nga yi twisisi ha hombe, tekela ku yi tsrala mhaka yoleyo. A wugan’wini bya xidondzro xin’wana ni xin’wana, yengesela mhaka yin’wana leyi u nga ha navelaka ku dondzra ha yone ka leti kutani u ti tsraliki.

• Hamba ku txintxa loko swi vileleka. A xa lisima i ku va u dondzra vhiki ni vhiki. Akuva leswo swi koteka, loko swi vileleka u nga ha hamba ku txintxa ka kukazri ka siku ni nkama lowu u wu bekisiki akuva u dondzra. U nga ha hlawula leswaku u ta dondzra nkama wa ku gama kwini kumbe mayelanu na yini.

Hi pfuneka ngopfu loko hi dondzra vhiki ni vhiki. Wunghanu byezru na Yehovha byi ta tiya, hi ta dondzra ku teka swiboho leswinene a wuton’wini nakone hi ta kutxeka.—Yehoš. 1:8.