XANA u ke u titwa na u li wuswaku hi leswi a u lwisana ni swikazratu? Hi hanya ka “minkama ya ku bindzra leyi swi kazrataka ku langusana na yone”, leswo swi nga hi yentxa hi titwa na hi li wuswezru hi hela ni ntamu. (2 Tim. 3:1) Nambitasu, a swi djuli hi za hi langusana ni swikazratu na hi li wuswezru. A Bibele dzri hi komba ndlela leyi vanghanu va ntiyiso va nga ni lisima ha yone ‘a makhombyeni’.—Amapr. 17:17.

Vanghanu lava heketiki Pawulo ka mayendzro yake ya wuzrumiwa va mu pfune ngopfu swinene. (Kol. 4:7-11) Loko Pawulo a pfaleliwe djele a Roma, vanghanu vake va mu pfune ku yentxa mintxhumu leyi a a nge ti kota ku yi yentxa na a li wuswake. Hi xikombiso, loko vamakwezru va le Filipiya va djule ku nyika Pawulo mintxhumu ya kukazri, Epafroditu a fambe na yone a ya yi nyika Pawulo. (Filp. 4:18) Nakone Tikiko a nyikele mapapela ya Pawulo ka mabandla ya ku siyanasiyana. (Kol. 4:7) Hi ku pfuniwa hi vanghanu vake, Pawulo a kote ku hetisisa ntizro wake wa ku zrezra nambiloko a pfaleliwe kaya kwake kumbe a djele. Namunhla ke, u nga va munghanu wa ntiyiso hi ndlela yini?

A masikwini yezru, vamakwezru va kombisa leswi vanghanu va nga swi yentxelaka van’wana. Vona xikombiso xa makwezru wa xisati lweyi a viki munghanu wa ntiyiso ka makwezru lweyi a vitaniwaka Elisabet wa le Espanha. Loko ku gunguliwe leswaku mamana wa Elisabet a ni câncer dzra ku kala dzri nga daheki, makwezru lweyi wa xisati a zrumelele Elisabet mamensaji lama tiyisanaka lama seketeliwiki a Bibeleni. Elisabet a li: “Loko ni yamukela mamensaji yake a ni nyonxa ngopfu hi ku tiva leswaku ku ni lweyi a zron’wekaka ha mine nakone leswo a swi ni nyika ntamu wa ku kota ku tiyisela siku ni siku.”—Amapr. 18:24.

Hi nga tiyisa wunghanu byezru ni vamakwezru hi ku va pfuna leswaku va va kone mintlhanganwini ni le nsin’wini. Hi xikombiso, u nga ha teka makwezru wa xinuna kumbe wa xisati lweyi a kuliki hi ntanga hi movha, lowo a nga ha va mukhandlu wa kuva mi tiyisana. (Rom. 1:12) Kambe vamakwezru van’wana a va swi koti ku suka kaya. Xana hi nga va pfunisa kuyini vamakwezru lava?

Van’we ka vamakwezru a va swi koti ku hlalela mintlhanganu hi xivizri hi kola ka swikazratu swa mavabyi kumbe hi kola ka swiyimo swin’wana. Vona xikombiso xa David lweyi ku gunguliwiki leswaku a ni câncer. Swi djule kuva va mu daha mavabyi yake ku dzringana 6 wa tihweti. Ku dzringana nkama lowo, yene ni nkatake Lidia a va hlalela mintlhanganu na va le kaya.

Xana vamakwezru bandleni va va pfunise kuyini? Ntsrhaku ka ntlhanganu wun’wana ni wun’wana, van’we ka vamakwezru lava a va li kone ka Yindlu Ya Wugandzreli a va va fonela akuva va bula na David  ni nkatake Lidia. Handle ka leswo, loko David na Lidia va nyikela tinhlamulo, ntsrhaku ka ntlhanganu vamakwezru a va gama va va zrumelela mamensaji lama tiyisanaka. Xana leswo swi mu pfunise kuyini David na Lidia? A va titwa na va zrandzriwa ni ku va kusuhi ni vamakwavu.

U swi vonisa kuyini ku hamba makungu ya ku zrezra ni vamakwezru lava kalaka va nga swi koti ku suka kaya? Kumbexana swi nga ha djula kuva u hamba ku txintxanyana kutsrongo ka xiyimiso xaku akuva u kota ku tizra na vone, hi ku yentxa leswo va ta swi vona leswaku a va dzrivaliwanga. (Amapr. 3:27) Kumbe swi nga ha djula kuva u tinyika nkama wa kuva u tsrala mapapela na vone kumbe u zrezra na vone hi telefoni. Nakone vakulu va nga ha hamba malulamiselo ya kuva ntlhanganu wa nsimu wu hambiwa ni hi vídeo-conferência. David na Lidia va tlangele ngopfu hi leswi bandla dzravu dzri yentxiki leswo. David a li: “Ntsena hi leswi hi kotiki ku va kone ka ntlhanganu wa nsimu ni ka xikhongoto hi leswi va hi patsriki ka vídeo-conferência swi hi tiyisile.” Handle ka leswo, loko swi koteka, xana u nga ha famba ni xidondzro xaku a kaya ka muzrezri lweyi a kalaka a nga swi koti ku suka kaya?

Loko hi tizra ni vamakwezru lava kalaka va nga swi koti ku suka kaya, hi ni mikhandlu ya ku vona matsrhamela yavu ya ku xonga ni ku tiyisa wunghanu byezru na vone. Ndlela leyi u va hloniphaka ha yone yi ta ya yi yengeseleka loko u vona wuswikoti byavu bya ku tizrisa Bibele akuva va khumba mbilu ya mhunu. Handle ka leswo hi ku va u pfuna vamakwezru leswaku va va kone mintlhanganwini ni le nsin’wini u ta hamba vanghanu lavampshwa.—2 Kor. 6:13.

Loko Pawulo a kumane ni swikazrau, munghanu wake Tito a ye mu pfuxela nakone leswo swi mu pfune kuva a titwa ha hombe. (2 Kor. 7:5-7) I swinene ngopfu ku tiyisa vamakwezru hi mazritu yezru. Kambe a xikombiso xa Tito xi tlhela xi hi komba leswaku hi nga txhavelela vamakwezru hi ku va hi tinyika nkama wa ku va na vone ni ku yentxa xa kukazri akuva hi va pfuna.—1 Yoh. 3:18.

Vamakwezru va le Rússia va hi nyika xikombiso lexinene xa kuva hi pfunana. Vona leswi humeleliki Sergey ni nkatake Tatyana. Ntsrhaku ka loko mapholisa ma nghene ma setxha kaya kwavu, va game va tekiwa akuva va ya thethisiwa. Tatyana a zrange a ntsrhuxiwa a va a muka kaya. Makwezru Sergey a li: “Na Tatyana a ha ku tlhasa kaya, makwezru wa kukazri lweyi a nga ni xixixi a ye kaya kwezru. Vamakwezru van’wana na vone va tile va hi pfuna ku basisa ni ku lulamisa kaya kwezru”.

Sergey a tlhela a ku: “Na dzri zrandzra Buku dzra Amaproverbia 17:17 ledzri liki: ‘A nakulobye wa mhunu awa mu zrandzra hi masiku i makwavu a makhombyeni.’ Hi nkama wa nxanisa, mazritu lawa ma ve ni ntlhamuxelo wa wukulu kwanga swanga hi leswi a ni nge ti swi kota ku langusana ni hinkwaswu leswo na ni li wuswanga. Yehovha a ni nyike vanghanu lava kalaka va nga txhavi ku va na mine”.  a

Loko nkama wu ya wu famba, hi ta lavisana ni swiyimu leswi swi to ko ya swi kazrata. Xileswo, hi ta vilela vanghanu lava hi va dumbaka nakone hi nkama wa nhlomulo lowukulu hi ta ya hi va vilela ngopfu vanghanu va matsrhamela lawo. Kutani swoswi hi wone nkama wa kuva hi yentxa hinkwaswu leswi hi nga swi kotaka akuva hi va vanghanu va ntiyiso!—1 Pet. 4:7, 8.