1. Xana vanyingi namunhla va zron’weka hi vamani?

 XANA u swi xiyile leswaku vhanu vanyingi namunhla va zron’weka ngopfu ha vone vinyi ku tlula ndlela leyi va zron’wekelaka van’wana ha yone? Hi xikombiso, vhanu van’wana va tizrisa maredi sosiyali akuva va tibyela hi mintxhumu leyi va nga nayu ni leyi va kotaka ku yi yentxa. Nambitanu, ku ni lava yisaka lidzrumu ka Yehovha Xikwembu Nkulukumba. Ka xidondzro lexi, hi ta vona leswi tlhamuxelaka swone ku yisa lidzrumu ka Yehovha ni leswi fanelaka ku hi susumetela ku yentxa leswo. Hi ta tlhela hi dondzra ndlela leyi hi nga yisaka lidzrumu ledzri fanelaka Xikwembu Nkulukumba ni ndlela leyi a taka xwengisa vito dzrake ha yone a nkameni lowu taka.

XANA SWI TLHAMUXELA YINI KU YISA LIDZRUMU KA YEHOVHA?

2. Xana Yehovha a kombise wukulu byake hi ndlela yini a Nhaveni ya Sinayi? (Tlhela u vona mufoto ka.)

² Xana i yini lidzrumu? A Bibeleni zritu “lidzrumu” dzri tlhamuxela ntxhumu wun’wana ni wun’wana lowu yentxaka mhunu a va wa lisima. Yehovha a kombise wukulu byake ntsrhaku ka loko a humese Vaisrayele a wukazraweni a Egipta. Yanakanya hi leswi: Vaisrayele vanyingi va tlhangane a Nhaveni ya Sinayi akuva va yingela leswi Yehovha a a djula ku va byela swone. Tlavi dzra ku mphuma dzri funeketa nhava, ku nge kungani ku sungula ku va ni ku tsrekatsreka lokukulu ka misava loku a ku patsra ni ku buluka ka tinhava na hi nkama wu li wun’we ku va ni ku dzruma ka tilo ni lihati hi hala tlhelo ku va ni pongwe ledzrikulu ledzri a dzri tinga ni tindleve. (Eks. 19:16-18; 24:17; Amaps. 68:8) Yanakanya ndlela leyi Vaisrayele va hlamaliki ha yone loko Yehovha a kombisa wukulu byake.

3. Xana swi tlhamuxela yini ku yisa lidzrumu ka Yehovha?

³ Kambe swi li yini ha hine? Xana hi nga swi kota ku yisa lidzrumu ka Yehovha? Ina, hi nga swi kota. Yin’we ya tindlela ta  ku yisa lidzrumu ka Yehovha i ku byela van’wana mayelanu ni ntamu wake ni matsrhamela yake ya ku hlamalisa. Nakone hi tlhela hi yisa lidzrumu ka Yehovha hi ku mu tlangela hi mintxhumu hinkwayu leyi hi kotaka ku yi yentxa hi kola ka ntamu wake. (Eza. 26:12) Hosi Davhida a ve xikombiso lexinene xa mhunu lweyi a yisiki lidzrumu ka Yehovha. Ka xikhongoto xa kukazri lexi a xi yentxiki a mahlweni ka Vaisrayele, Davhida a hlaye leswi ha Xikwembu Nkulukumba: ‘Yehovha, i swaku a vukulu, ni ntamu, ni vumenyemenye, ni ku hlula, ni vuhosi, hikuva hinkwaswu leswi nga tilwini ni le misaveni i swaku.’ Ntsrhaku ka loko Davhida a game xikhongoto xake, ‘nhlengeletanu hinkwayu yi dzrumisa Yehovha’. —1 Makr. 29:11, 20.

4. Xana Yesu a dzrumise Yehovha hi ndlela yini?

⁴ Loko Yesu a li lani misaveni, a yise lindzrumu ka Papayi wake hi ku swi beka livaleni ka vhanu hinkwavu leswaku Papayi wake hi lweyi a a mu nyika ntamu wa ku yentxa mahlolana. (Mar. 5:18-20) Nakone Yesu a yise lidzrumu ka Yehovha hi ndlela leyi a a vulavula ha yone hi Papayi wake ni hi ndlela leyi a a va khoma ha yone vhanu. Hi khambi dzrin’wana na Yesu a le ku dondzriseni a sinagogeni a vone wansati lweyi a ku khaluta 18 wa malembe na a kazratiwa hi demona, demona ledzro dzri yentxe leswaku wansati lweyi a nga swi koti ni ku wololoka. Loko Yesu a vone ku kazrateka ka wansati lwiyani a mu twele wusiwana a va a mu tsrhindzrekelela a ku: “Wansati, u hanyisiwile ka mavabyi yaku.” Ntsrhaku ka leswo Yesu a mu tlhanteke mavoko, hi ku kahlula wansati “a sungula ku dzrumisa Xikwembu Nkulukumba”. Wansati lweyo a a nyonxe ngopfu hi leswi a hanyisiwiki ka mavabyi yake! (Luk. 13:10-13) Wansati lweyi a a ni swivangelo swinyingi swa kuva a dzrumisa Yehovha, na hine hi na swone swivangelo leswo.

HE SWINI SWIVANGELO LESWI HI YENTXAKA HI YISA LIDZRUMU KA YEHOVHA?

5. He swini swivangelo leswi hi nga na swone swa kuva hi hlonipha Yehovha?

⁵ Hi dzrumisa Yehovha hi leswi hi mu hloniphaka ngopfu swinene. Hi ni swivangelo swinyingi swa kuva hi mu hlonipha. Yehovha i Xikwembu Nkulukumba wa ntamu hinkwawu nakone ntamu wake a wu pimiwanga. (Amaps. 96:4-7) Hi kota ku vona wutlhazri byake lebyi tlakukiki ka mintxhumu leyi a yi tumbuluxiki. A hi nyike wutomi nakone a hi nyike hinkwaswu leswi hi swi vilelaka akuva hi tama hi hanya. (Mpful. 4:11) Yene awa dumbeka. (Mpful. 15:4) Hinkwaswu leswi a swi yentxaka swa humelela nakone a hetisisa swidumbiso swake. (Yehoš. 23:14) A swi hlamalisi leswi muprofeta Yeremiya a swi hlayiki ha Yehovha loko a ku: ‘A xikazri ka tintlhazri hinkwatu ta matiko, ni le mimfun’wini ya wone hinkwayu, a yi kone leyi fanaka na wene.’ (Yer. 10:6, 7) Handle ka ku ganaganeka, hi ni swivangelo leswi twalaka swa ku hlonipha Papayi wezru wa le matilweni. Kambe Yehovha a ngo faneliwa hi ku kombiwa xihlonipho ntsena, yene a faneliwa ni ku va hi mu komba leswaku ha mu zrandzra.

6. Ha yini hi zrandzra Yehovha?

⁶ Hi dzrumisa Yehovha hi leswi hi mu zrandzraka ngopfu swinene. Kambisisa matsrhamela manyingi lama hi yentxaka hi zrandzra Yehovha. Yene a ni timpswalu ni ntwelawusiwana. (Amaps. 103:13; Eza. 49:15) Loko Yehovha a hi vona na hi xukuvalile na yene awa xukuvala. (Zak. 2:8) A yentxa swi hi nabyalela ku tsrhindzrekela kwake ni ku va vanghanu vake. (Amaps. 25:14; Mint. 17:27) Nakone awa titsrongahata; a ‘kazrama a hlomela leswi nga tilwini ni le misaveni, a pfuxa xisiwana a ntsrhuzrini’. (Amaps. 113:6, 7) Nambitasu, ha yini van’wana va nga swi djuli ku dzrumisa Xikwembu Nkulukumba wezru?—Amaps. 86:12.

7. He yini mikhandlu ya ku hlawuleka leyi hi nga na yone?

 ⁷ Hi dzrumisa Yehovha hi leswi hi djulaka leswaku van’wana va mu tiva. Vanyingi a va wu tivi ntiyiso mayelanu na Yehovha. Ha yini? Hikusa Sathana a va dlaye miyanakanyu hi ku hangalasa madzrimi ha Yehovha. (2 Kor. 4:4) Sathana a yentxa vhanu va yanakanya leswaku Yehovha i mudzrihiseli, a nga na mhaka na hine, nakone va hlaya leswaku hi yene muvangi wa swikazratu leswi nga kone a misaveni. Kambe hine ha wu tiva ntiyiso mayelanu na Xikwembu Nkulukumba wezru! Hine hi ni mikhandlu ya ku byela vhanu mayelanu ni matsrhamela ya Xikwembu Nkulukumba ni ku va pfuna leswaku na vone va mu dzrumisa. (Eza. 43:10) A buku dzra Amapsalma 96 dzri vulavula hi ku yisa lidzrumu ka Yehovha. Nkama hi kambisisaka mazritu ya kukazri lama huhuteliwiki ya mapsalma lawa, yanakanya hi tindlela leti ha tone u nga yisaka lidzrumu ledzri fanelaka Yehovha.

XANA HI NGA YISA LIDZRUMU LEDZRI FANELAKA YEHOVHA HI NDLELA YINI?

8. He yini ndlela leyi hi nga dzrumisaka Yehovha ha yone? (Amapsalma 96:1-3)

⁸ Dondzra Amapsalma 96:1-3. Hi nga dzrumisa Yehovha hi leswi hi swi hlayaka ha yene. Ka tindzrimana leti, vhanu va Yehovha va zrambiwa kuva va ‘yimbelelela Yehovha’, akuva va ‘khensa vito dzrakwe’, va ‘hlaya huluxu dzrakwe hi masiku ni masiku’, ni ku ‘dzrungulela vumenyenye byakwe a matikweni’. Leti i tindlela leti hi nga dzrumisaka Papayi wezru wa le matilweni ha tone. Vayuda va ku dumbeka kun’we ni vakriste va le dzaneni dzra ku sungula a va tsrhikanga ku byela van’wana hi mintxhumu leyi Yehovha a va yentxeliki yone ni ku yimelela vito dzrake. (Dan. 3:16-18; Mint. 4:29) Xana hi nga va yetisela hi ndlela yini?

9-10. U dondzra yini ka mfambu wa Angelena? (Tlhela u vona ni mufoto.)

⁹ Kambisisa mfambu wa Angelena, a makwezru wa xisati lweyi a tshamaka a Estados Unidos. Hi xixixi a yimelele vito dzra Yehovha ka komponi leyi a a tizra ka yone. Leswi a a li mumpshwa ka komponi leyo, makwezru Angelena a zrambiwe ka ntlhanganu wa kukazri kun’we ni vatizrikulobye lava na vone a va ha ku nghena ka komponi leyo, lani mun’wana ni mun’wana a nyikiwiki mukhandlu wa ku tlhamuxelanyana switsrongo mayelanu ni wutomi byake. Makwezru Angelena a kunguhate ku va komba mifotonyana yitsrongo leyi a yi kombisa  ku nyonxa loku a nga na kone swanga mun’we wa Timboni ta Yehovha. Kambe, na ku nga si na tlhasa khambi dzrake dzra ku vulavula, mun’we ka vatizrikulobye a hlaye leswaku a kulisiwe swanga Mboni ya Yehovha. Kutani wanuna yelweyo a sungule ku vulavula ku biha hi leswi hi kholwaka ka swone. Angelena a li: “Mbilu yanga a yi ba ngopfu, kambe ni tivutise leswi: ‘Xana ni ta pfumela kuva mhunu a khanela ku biha hi vito dzra Yehovha? Kumbe ni ta mu yimelela?’”

¹⁰ Loko wanuna lweyo a hete ku vulavula, Angelena a hambe xikhongoto xa le mbilwini hi ku kahlula. Hi ndlela ya xitxhavu a mu tsrhindzrekelelile a va a mu byela leswi: “Na mine ni kulisiwe swanga Mboni ya Yehovha nakone na ha li Mboni ku ta tlhasa ni namunhla.” Nambileswi a a li ka xiyimu xa ku txhavisa, makwezru Angelena a tame a zrula. Yene a va kombe ni mafoto ya vanghanu vake lava a va tizrela Yehovha hi ku nyonxa nakone hi xitxhavu a va tlhamuxele leswi a pfumelaka ka swone. (1 Pet. 3:15) Xana a ve wani mabindzru ya kone? Loko makwezru Angelena a game ku vulavula, wanuna lwiyani kutani a a zrulile, a ve a hlaya mimfambu ya ku xonga leyi a viki na yone nkama na a ha li Mboni ya Yehovha. Makwezru Angelena a li: “Vito dzra Yehovha dzri fanela ku yimeleliwa. I tovoko dzrikulu ku yimelela vito dzra Yehovha.” Na hine hi ni tovoko dzra ku yimelela vito dzra Yehovha nambiloko van’wana va mu dzrela.

11. Hi ku famba ka malembe, vagandzreli va ntiyiso va wu landzre hi ndlela yini nsinya wa nawu lowu kumekaka ka Amapsalma 96:8?

¹¹ Dondzra Amapsalma 96:8. Hi nga dzrumisa Yehovha hi mintxhumu leyi hi nga na yone. Vagandzreli va Yehovha minkama hinkwayu va dzrumisa Yehovha hi ndlela leyo. (Amapr. 3:9) Hi xikombiso, Vaisrayele va nyikele hi leswi a va li naswu akuva va pfunisa ka ntizro wa ku yaka ni wa ku pfuxeta tempele. (2 Tih. 12:4, 5; 1 Makr. 29:3-9) Van’we ka vadondzrisiwa va Yesu va humese hi “mintxhumu yavu” leswaku va pfuna Yesu kun’we ni vapostola vake hi leswi a va swi vilela. (Luk. 8:1-3) Vakriste va le dzaneni dzra ku sungula na vone va nyikele mpfunu ka vamakwavu va moya lava a va vilela mpfunu. (Mint. 11:27-29) Namunhla, na hine hi nga humesa minyikelo ya ku tizrandzrela.

12. A minyikelo yezru yi nga yisa lidzrumu ka Yehovha hi ndlela yini? (Tlhela u vona ni mufoto.)

¹² A hi voneni mfambu lowu kombisaka ndlela leyi swihanano swezru swi yisaka lidzrumu ka Yehovha ha yone. A xib’iko lexi humesiwiki hi 2020 xi kombise ndlela leyi dandzra dzri  hlaseliki tiko dzra Zimbabwe ha yone. Vhanu vanyingi a va li kusuhi ni ku fa hi ndlala, mun’we wavu i makwezru lweyi a vitaniwaka Prisca. Nambileswi a ku ni dandzra nakone a a li nkama wa ku dzrima, makwezru Prisca a nga xi honisanga xiyimiso xake xa ku ya ku zrezreni hi Wawuzrazru ni Wawuntlhanu. Vavhizinyu a va mu hleka hi leswi a a ya ku zrezreni a matsrhan’wini ya ku ya masin’wini, a va ku: “U ta fa hi ndlala mamanoo.” Na a tiyile, makwezru Prisca a hlamule a ku: “Yehovha a nge txhuki a ma dzrivala malandzra yake.” Ntsrhaku ka nkamanyana a yamukele xipfunu lexi taka hi ka nhlengeletanu hi ku mu nyika leswi a a swi vilela. Xipfunu lexo xe koteka ntsena hi kola ka minyikelo yezru ya ku tizrandzrela. A vavhizinyu va Prisca va hlamale ngopfu lakakuva va ku: “Xikwembu a xi ku tsrhikanga, hi djula ku tiva leswi yengetelekiki ha xone.” Ntsrhaku ka leswo 7 wa vavhizinyu va Prisca va sungule ku hlalela mintlhanganu yezru.

13. Xana ndlela leyi hi hanyaka ha yone yi nga yisa lidzrumu ka Yehovha hi ndlela yini? (Amapsalma 96:9)

¹³ Dondzra Amapsalma 96:9. Hi nga dzrumisa Yehovha hi ndlela leyi hi tikhomaka ha yone. A vaprista lava a va tsrhama ka tempele dzra Yehovha a va fanela ku tsrhama na va basile hi le handle. (Eks. 40:30-32) Nambitasu xa lisima ngopfu i kuva hi basa ka ndlela leyi hi hanyaka ha yone. (Amaps. 24:3, 4; 1 Pet. 1:15, 16) Kutani swi djula kuva hi tikazrata akuva hi ‘hlivila wumhunu bya khale’ ku nga mahanyela ya ku kala ma nga basanga, hi va hi yambala “wumhunu lebyimpshwa” ku nga ku yanakanya ni ku yentxa mintxhumu hi ndlela leyi kombisaka matsrhamela ya Yehovha. (Kol. 3:9, 10) Hi mpfunu wa Yehovha, nambi lava nga ni mahanyela ya ku biha va nga ha txintxa va va va yambala wumhunu lebyimpshwa.

14. U dondzra yini ka mfambu wa Jack? (Tlhela u vona ni mufoto.)

¹⁴ Kambisisa mfambu wa Jack, wanuna lweyi a a ni tihanyi lakakuva a a vitaniwa demona. Hi kola ka swiyentxo swake swa wugevengu, Jack a tsremeliwe lifu. Na a ha yimela siku ledzri a a ta dlayiwa ha dzrone, Jack a pfumele ku fambiseliwa xidondzro xa Bibebe hi makwezru lweyi a a yendzrela djele. Nambileswi a a ni mahanyela ya ku biha, Jack a hlivile wumhunu bya khale nakone hi ku famba ka nkama a ve a faneleka kuva a babatisiwa. Jack a a txintxe ngopfu lakakuva hi siku ledzri a a ta dlayiwa ha dzrone a vazrindzri va djele a va humesa ni minyembeti nkama lowu a va mu lelela. Mun’we  ka vazrindzri va djele a hlaye leswaku “Jack a a li xigevengu lexikulu ku tlula hinkwaswu kambe swoswi hi yene wa ku yampswa wa kone”. Ka vhiki ledzri landzreliki na Jack a dlayiwile, vamakwezru lava tlheliki va ya fambisa ntlhanganu wa xikazri ka vhiki a djele, va kume xigevengu lexi a xi hlalela mintlhanganu hi khambi dzra ku sungula. I yini leswi susumeteliki xigevengu lexi akuva xi hlalela mintlhanganu? Xi hlamalisiwe hi ndlela leyi Jack a txintxiki ha yone nakone a xi djula ku dondzra leswi yengetelekiki akuva xi kota ku gandzrela Yehovha. Nakunene, ndlela leyi hi tikhomaka ha yone yi yisa lidzrumu a mahlweni ka Papayi wezru wa le matilweni!—1 Pet. 2:12.

XANA YEHOVHA A TA TLAKUXA VITO DZRAKE HI NDLELA YINI KU NGA LI KHALE?

15. Yehovha a ta tlakuxa vito dzrake hi ku helela ku nge khale hi ndlela yini? (Amapsalma 96:10-13)

¹⁵ Dondzra Amapsalma 96:10-13. A tindzrimana leti ta wugamu ta Amapsalma 96 ti tlhamuxela Yehovha swanga Muyavanyisi ni Hosi ya ku lulama. Xana Yehovha a ta dzri tlakuxa hi ndlela yini vito dzrake ku nga li khale? A ta tizrisa wuyavanyisi byake. A ta helisa Babilona Lwenkulu, lweyi a ntxhimisaka vito dzrake dzra ku xwenga. (Mpful. 17:5, 16; 19:1, 2) Van’we ka lava seketelaka Babilona Lwenkulu va nga ha tipatsra na hine ka wugandzreli bya ntiyiso. Hi wugamu, ka yimpi ya Armagedoni Yehovha a ta helisa xiyimu lexi xa misava ya Sathana hi kuva a helisa hinkwavu lava mu pfukelaka va tlhela va ntxhimisa vito dzrake. Kambe a huluxa hinkwavu lava mu zrandzraka va tlhela va mu yingiseta nakone va zrandzraka ku yisa lidzrumu a vitweni dzrake. (Mar. 8:38; 2 Tes. 1:6-10) A ku heleni ka 1.000 wa malembe ntsrhaku ka xikambelo xa wugamu ka Mfumu wa Kriste, Yehovha a ta va na a xwengise vito dzrake hi ku helela. (Mpful. 20:7-10) Hi nkama wolowo, “misava yi ta tala hi wutivi bya ku phatima ka Yehovha swanga hi leswi mati ma funeketaka lwandle”.—Habk. 2:14.

16. Xana u tiyimisele ku yentxa yini? (Tlhela u vona ni mufoto.)

¹⁶ Swi ta nyonxisa ngopfu loko vhanu hinkwavu a misaveni va yisa lidzrumu ledzri fanelaka vito dzra Yehovha! Kambe na ha ha yimela siku ledzro, hi nga yentxa hinkwaswu leswi hi nga swi kotaka akuva hi dzrumisa Yehovha hi ndlela leyi fanelaka vito dzrake. Akuva ku khanyisiwa ha hombe mhaka leyi, a Huvo Leyi Zrangelaka yi hlawule Amapsalma 96:8 akuva yi va tsralwa dzrezru dzra lembe dzra 2025: ‘Nyikani Hosi [Yehovha] xihluwa lexi fanelaka vito dzra yone.’