1. Ha yini swi ni lisima kwezru ku va malembe hinkwawu hi va kone ka Xidzrimuxo xa Lifu dzra Yesu?

 NAKUNENE wa tiyiseka leswaku a xitizrulo i xihiwa xa lisima ngopfu swinene! (2 Kor. 9:15) Hi kola ka gandzrelo dzra Yesu, hi nga va ni wuxaka bya le kusuhi ngopfu swinene na Yehovha. Handle ka leswo, a xitizrulo xi pfule tindlela ta kuva hi kuma wutomi lebyi nga helikiki. Hi ni swivangelo swinyingi swa ku tlangela lizrandzru ledzri Yehovha a hi kombisiki dzrone hi ku hi nyika N’wanake lwa zrandzrekaka! (Rom. 5:8) Nakone akuva a hi pfuna ku tlangela ni ku va hi nga xi dzrivali xitizrulo, Yesu a hi byele kuva lembe ni lembe hi nga dzrivali ku tlangela gandzrelo ledzri a dzri yentxiki.—Luk. 22:19, 20.

2. Hi ta kambisisa yini ka xidondzro lexi?

² Lembe ledzri a Xidzrimuxo xi ta va hi Mugqivela, hi 12 ka Abrili wa 2025. Handle ka ku ganaganeka, hinkwezru hi hamba malulamiselo ya kuva hi va kone ka siku ledzro. Hi ta susa londzrovoto ledzrikulu ka xiyentxakalu lexo xa lembe, loko hi yanakanyisisa a hi leswi Yehovha ni N’wanake va hi yentxelaka swone. Ka nhlokomhaka leyi, hi ta kambisisa leswi xitizrulo xi hi dondzrisaka swone mayelanu na Yehovha ni N’wanake. Kutani ka xidondzro lexi landzrelaka, hi ta twisisa ndlela leyi hi nga pfunekaka ha yone hi xitizrulo ni ndlela leyi hi nga kombisaka ku tlangela ha yone.

LESWI XITIZRULO XI HI DONDZRISAKA SWONE MAYELANU NA YEHOVHA

3. Xana gandzrelo dzra mhunu mun’we dzri nga huluxa vhanu vanyingi hi ndlela yini? (Tlhela u vona ni mufoto.)

³ A xitizrulo xi hi dondzrisa ngopfu mayelanu ni wululami bya Yehovha. (Deut. 32:4) Hi ndlela yini? Yanakanya hi leswi: Hi kola ka ku kala ku yingiseta ka Adamu, hi kume xidoho lexi hi wugamu  xi hi yisaka ku feni. (Rom. 5:12) Akuva Yehovha a hi huluxa ka xidoho ni lifu, a zrumele N’wanake akuva a hi fela. Kambe gandzrelo dzra mhunu mun’we lwa hetisekiki dzri nga huluxa vhanu vanyingi hi ndlela yini? Mupostola Pawulo a tlhamuxele hi ndlela leyi: “Hikusa ku fana ni leswi ku kala ku yingiseta ka mhunu mun’we ku yentxiki leswaku vhanu vanyingi va va vadohi, hi ndlela leyi fanaka, vhanu vanyingi va ta va lava lulamiki hi mhaka ya ku yingiseta ka mhunu mun’we.” (Rom. 5:19; 1 Tim. 2:6) Hi mahlayela man’wana, hi kola ka leswi mhunu mun’we a kalaka a nga yingisetanga, hinkwezru hi ndzruluke swikazrawa swa xidoho ni lifu. Hi lani ku fanaka, hi kola ka ku yingiseta ka mhunu mun’we, hinkwezru hi nga huluxiwa.

4. Ha yini Yehovha a nga pfumelelanga leswaku vana va Adamu lava yingisetiki va hanya hi lani ku nga helikiki?

⁴ Xana a swi djula kuva Yesu a fa akuva a hi huluxa? Ha yini Yehovha a nga pfumelelanga leswaku a vana va Adamu lava yingisetiki va hanya hi la ku nga helikiki? Hi nga yanakanya leswaku loko Yehovha a e yentxa leswo a a ta va a lulamise mhaka. Kambe leswo a swi nge ti kombisa wululami bya Yehovha, hikusa a swi ta yentxa ingiki a xidoho lexi Adamu a xi yentxiki a xi nga li xikulu.

5. I yini lexi hi tiyisekisaka leswaku minkama hinkwayu Yehovha a ta yentxa leswi nga swinene?

⁵ Xana a ku ta va ku yentxeke yini loko Yehovha a a nga hi nyikanga xitizrulo? Nakone a ku ta va ku yentxeke yini loko Yehovha a a nga kombisanga wululami a va a pfumelela leswaku a vana va Adamu lava kalaka va nga hetisekanga va hanya hi la ku helikiki? Loko leswo a swe yentxeka, hi ku famba ka nkama a vhanu a va ta sungula ku ganaganeka hi wululami bya Yehovha ni ka mintxhumu yimbeni. Hi xikombiso, van’wana kumbexana a va ta yanakanya leswi: ‘Xana mpelampela Yehovha a ta swi hetisisa swidumbiso swake hinkwaswu?’ Lexi nyonxisaka, hine a swi hi vilelisi leswo. Ntsena hi leswi Yehovha a kombisiki wululami hi ku nyikela N’wanake lweyi a mu zrandzraka ngopfu akuva a hi fela, i xitiyisekiso xa leswaku minkama hinkwayu a ta yentxa leswi nga swinene.

6. Xana xitizrulo xi swi kombisa hi ndlela yini leswaku Yehovha awa hi zrandzra? (1 Yohane 4:9, 10)

⁶ Handle ka kuva xitizrulo xi hi pfuna ku twisisa leswaku Yehovha a lulamile, xi tlhela xi hi pfuna ku twisisa leswaku Yehovha awa hi zrandzra. (Yoh. 3:16; Dondzra 1 Yohane 4:9, 10.) A xitizrulo xi hi dondzrisa leswaku Yehovha a djula kuva hi hanya hi lani ku nga helikiki. Nakone handle ka leswo, a djula leswaku hi hamba xiyenge xa ndangu wake. Yanakanya hi leswi: Loko Adamu a dohile, a swa ha kotekanga kuva a hamba xiyenge xa ndangu wa Yehovha. Hi kola ka leswo, na hine loko hi pswaliwile a hi nga hambi xiyenge xa ndangu wa Yehovha. Kambe hi kola ka xitizrulo, vhanu hinkwavu lava nga ni lipfumelo ka Xikwembu Nkulukumba va tlhela va  mu yingiseta, swi nga koteka kuva na vone va hamba xiyenge xa ndangu wa Yehovha. Nambi swoswi, Yehovha a nga hi dzrivalela swidoho swezru hi tlhela hi va ni wuxaka bya le kusuhi ngopfu swinene na Yene kun’we ni vamakwezru. A hi ganaganeki leswaku Yehovha awa hi zrandzra hakunene! —Rom. 5:10, 11.

7. Ha yini ndlela leyi Yesu a xanisekiki ha yone yi hi pfuna ku twisisa ndlela leyi Yehovha a hi zrandzraka ha yone?

⁷ Hi nga twisisa ndlela leyi Yehovha a hi zrandzraka ha yone loko hi yanakanyisisa hi ndlela leyi a twiki ku vavisa ha yone loko a nyikele N’wanake. Sathana a hlaye leswaku malandzra ya Yehovha a ma nge ti dumbeka loko ma kumana ni swiyimu swa ku kazrata. Akuva a kombisa leswaku mazritu lawa i madzrimi, Yehovha a pfumelele leswaku N’wanake a fa, kambe na a nge si na fa, a zranga hi ku xaniseka. (Yb. 2:1-5; 1 Pet. 2:21) Yehovha a vone loko vazrangeli va wukhongoti va poyila N’wanake, va mu ba, va mu gongondzrela mhandzrini ni ku tlhela a mu vona loko a xaniseka ku ya tlhasa loko a fa. (Mat. 27:28-31, 39) Yehovha a a ta swi kota kuva a huluxa N’wanake ka xiyimu lexiyani. Hi xikombiso, van’wana va te: “Loko a li leswaku Xikwembu Nkulukumba awa mu zrandzra, a a mu huluxi.” Inaka Yehovha a yentxe xa kukazri hi nkama wolowo. (Mat. 27:42, 43) Kambe loko Yehovha a e yentxa leswo, inaka xitizrulo xi nga hakeliwanga nakone a hi ta hanya na hi nge na dumbo. Xileswo, Yehovha a pfumelele kuva N’wanake a xaniseka ku ya tlhasa loko a fa.

8. Hi swi tivisa kuyini leswaku swi mu vavisile Yehovha loko a vona N’wanake na a xaniseka? Tlhamuxela. (Tlhela u vona ni mufoto.)

⁸ A swi ve kule na hine ku pimisa leswaku leswi Yehovha a nga wa ntamu hinkwawu a nga khumbeki kumbe ku pimisa leswaku a nga na matitwela! A hi vumbe na hi ni wuswikoti bya ku kombisa ndlela leyi hi titwaka ha yone. Leswi Bibele dzri hlayaka leswaku hi tumbuluxiwe a xifanisweni xake, swi hlaya leswaku Yehovha awa kombisa ndlela leyi a titwaka ha yone. A Bibele dzri kombisa leswaku Yehovha awa vaviseka ni ku khunguvanyeka. (Amaps. 78:40, 41) Dzrimuka wudzrunguli lebyi khanelaka ha Abrahamu na Izaki. Yehovha a kombele Abrahamu kuva a nyikela hi n’wanake wa mun’we swanga gandzrelo. (Gen. 22:9-12; Heb. 11:17-19) Yanakanya ndlela leyi Abrahamu a titwiki ha yone loko a lulamisela ku dlaya n’wanake hi ndlela ya ku kahlula akuva a nga twi ku vavisa. Yehovha a twe ku vavisa ngopfu swinene loko a vona N’wanake na a xanisiwa ni ku tlhela a fa hi ndlela leyi hlomulaka mbilu! Vona vhidiyu ledzri liki: Yetisela Lipfumelo Dzravu—Abrahamu, Xiyenge 2 ka jw.org.

9. Xana hi dondzra yini ka Varoma 8:32, 38, 39 mayelanu ni lizrandzru dzra Yehovha?

⁹ A xitizrulo xi hi dondzrisa leswaku a nga kone lwa hi zrandzraka ngopfu ku tlula Yehovha, nambi munghanu wezru lwenkulu kumbe xizro xa ndangu lexi hi xi zrandzraka ngopfu. (Dondzra Varoma 8:32, 38, 39.) Ha tiyiseka leswaku ndlela leyi Yehovha a hi zrandzraka ha  yone i yikulu ngopfu swinene ku tlula ndlela leyi hine hi tizrandzraka ha yone. Xana u djula ku hanya hi lani ku nga helikiki? Yehovha a swi djula hi ku tlulisa akuva u hanya hi lani ku nga helikiki. Xana u djula kuva swidoho swaku swi dzrivaleliwa? Yehovha a swi djula hi ku tlulisa ngopfu leswo. Ntxhumu lowu a hi kombelaka wone i kuva hi kombisa leswaku ha xi tlangela xitizrulo, hi kombisa lipfumelo ni kuva hi yingiseta. Nakunene a xitizrulo i xihiwa xa ku xonga lexi kombisaka leswaku Yehovha awa hi zrandzra. Nakone a misaveni leyimpshwa hi ta dondzra leswi yengetelekiki mayelanu ni ndlela leyi Yehovha a hi zrandzraka ha yone.—Ekles. 3:11.

XANA XITIZRULO XI HI DONDZRISA YINI HA YESU?

10. a) Xana i yini leswi kazratiki Yesu na a li kusuhi ni ku fa? b) Xana Yesu a swi kombise hi ndlela yini leswaku Sathana i muhembi? (Vona Bokisi ledzri liki: “ A Ku Dumbeka Ka Yesu Ku Kombise Leswaku Sathana I Muhembi.”)

¹⁰ Yesu a zron’weka ngopfu hi leswi vhanu va swi yanakanyaka hi Papayi wake. (Yoh. 14:31) Na ku sale kutsrongo akuva a fa, Yesu a lumbetiwe leswaku a a nga mu hloniphi Xikwembu Nkulukumba nakone a a li xigevengu. Leswo swi mu kazrate ngopfu lakakuva a pimisa leswaku leswi a va mu lumbeta ha swone a swi yentxa vhanu va pimisa ku biha hi Papayi wake. I xivangelo lexi mu yentxiki a khongota a ku: “Papayi, loko swi koteka, a kopo ledzri a dzri fambeli kule na mine.” (Mat. 26:39) Yesu a tame a dumbeka ku ya tlhasa ku feni. Hi ku yentxa leswo, a kombise leswaku Sathana i muhembi.

11. Xana Yesu a kombise leswaku a a va zrandzra ngopfu vhanu hi ndlela yini? (Yohane 13:1)

¹¹ A xitizrulo xi hi dondzrisa leswaku Yesu a zron’weka ngopfu hi vhanu, ngopfungopfu vadondzrisiwa vake. (Amapr. 8:31; dondzra Yohane 13:1.) Hi xikombiso, na a ha li lani misavei, Yesu a a swi tiva leswaku a a ta kumana ni mintxhumu yinyingi ya ku kazrata ku patsra ni  ku dlayiwa hi ndlela leyi vavisaka. Kambe Yesu a yentxe mintxhumu leyi ya ku kazrata a nge ntsena hi leswi Yehovha a mu zrumiki kuva a yi yentxa, kambe a yi yentxe ngopfungopfu hi leswi a a zrandzra vhanu. Hi xikombiso, Yesu a tinyikele hi mbilu hinkwayu akuva a zrezrela vhanu, a va dondzrisa ni ku va pfuna. Nambi hi siku ledzri a a ta fa ha dzrone, Yesu a tinyike nkama wa ku hlampswa minenge ya vapostola vake, a va dondzrisa ni ku va tiyisa. (Yoh. 13:12-15) Nambiloko a hayekiwe mhandzrini ya nxanisa, Yesu a xi yingisetile xigevengu lexi a xi li tlhelweni kwake ni ku tlhela a kombela Yohane kuva a mu hlayisela mamana wake Mariya. (Luk. 23:42, 43; Yoh. 19:26, 27) Swi le livaleni leswaku Yesu a kombise leswaku a a zrandzra vhanu hi mbilu hinkwayu a nge ntsena hi leswi a nyikeliki wutomi byake, kambe ni hi kola ka mintxhumu hinkwayu leyi a yi yentxiki na a ha li lani misaveni.

12. Xana hi nga hlaya leswaku Yesu a ha tama a hi pfuna namunhla hi ndlela yini?

¹² I ntiyiso leswaku Yesu “a fe kan’we swi helela kolanu” kambe ni namunhla a ha tama a hi yentxela mintxhumu yinyingi. (Rom. 6:10) Hi ndlela yini? A ha tama a tizra akuva a hi nyika mintxhumu hinkwayu leyinene leyi kotekaka hi kola ka xitizrulo. A tizra wusiku ni nhlikanhi swanga Hosi, Muprista Lwenkulu ni ku va nhloko ya bandla. (1 Kor. 15:25; Efe. 5:23; Heb. 2:17) Yesu a ni wutiyanguleli bya ku hlengeleta vatotiwa ni lava xitsrhungu lexikulu. Ntizro lowo a ta wu heta na nhlomulo lowukulu wu nge si na gama. b (Mat. 25:32; Mar. 13:27) Nakone a tlhela a tizrisa nandzra wa ku dumbeka akuva a hi nyika swakuda swa moya leswi hi swi vilelaka akuva hi tama hi tizrela Yehovha hi ku dumbeka ka masiku lawa ya wugamu. (Mat. 24:45) Nakone loko a fuma ku dzringana 1.000 wa malembe, a ta tama a tizra hi nkongometo wa ku hi pfuna. Nakunene Yehovha a hi nyike N’wanake!

TAMA U DONDZRA MINTXHUMU LEYIMPSHWA

13. I yini lexi nga ku pfunaka ku tama u dondzra hi lizrandzru dzra Yehovha na Yesu?

¹³ Hi nga tama hi dondzra hi ndlela leyi Yehovha na Yesu va hi zrandzraka ha yone loko hi yanakanyisisa hi mintxhumu hinkwayu leyi va yi yentxaka ku ta tlhasa swoswi. Ndzreni ka lembe ledzri, ka mavhiki lawa hi taka khoma Xidzrimuxo ha wone kumbe lama taka landzrela, u nga dondzra dzrin’we dzra Tievhangeli kumbe hinkwatu. Kambe u nga zame ku dondzra tindzrima hinkwatu hi nkama wun’we. A matsrhan’wini ya leswo, dondzra ha hombe nakone dzringisa ku kuma swivangelo leswimpshwa leswi ku yentxaka u tama u zrandzra Yehovha na Yesu.  Nakone u nga dzrivali ku yavelana ni van’wana leswi u swi kumiki.

14. Hi ku ya hi Amapsalma 119:97, xana ku hamba wusetxhi swi nga hi pfuna hi ndlela yini ku tama hi dondzra hi xitizrulo ni timhaka tin’wana? (Tlhela u vona ni mufoto.)

¹⁴ Loko u ni malembe manyingi na u babatisiwile, kumbexana u nga ha yanakanya leswaku a ku na mintxhumu leyimpshwa leyi u nga dondzraka ha yone mayelanu ni wululami bya Yehovha, lizrandzru dzrake ni hi xitizrulo. Kambe ku hlaya ntiyiso, minkama hinkwayu hi ta va ni mintxhumu leyimpshwa ya ku yi dondzra hi timhaka leti. Kutani u nga yentxa yini? Dondzra wudzrunguli lebyi nyonxisaka lebyi seketeliwiki Bibeleni ka mabuku yezru. Loko u dondzra ntxhumu wa kukazri a Bibeleni kambe u nga wu twisisi, hamba wusetxhi. Nakone loko siku dzri famba, yanakanyisisa hi leswi u swi dondzriki mayelanu na Yehovha, N’wanake ni hi ndlela leyi va ku zrandzraka ha yone.—Dondzra Amapsalma 119:97.

15. Ha yini swi li swa lisima ku tama hi dondzra hi mintxhumu yimpshwa leyi nga Bibeleni?

¹⁵ Loko u vona leswaku minkama hinkwayu leyi u dondzraka Bibele kumbe loko u hamba wusetxhi a u kumi mintxhumu leyimpshwa, u nga godoli, hi ndlela ya kukazri hi nga ku fanisa ni mhunu lweyi a nga ku djuleteleni ka woru. Hi ntolovelo mhunu lweyi a djuletelaka woru a nga ha teka mawora manyingi kumbe masiku manyingi akuva a kuma xikhemu lexitsrongo xa woru. Kambe nambitanu a nga godoli ku djuletela, hikusa a xikhemu lexo lexitsrongo xi ni lisima dzrikulu kwake. Ka hine, a mintiyiso leyi hi yi kumaka Bibeleni yi ni lisima dzrikulu ngopfu swinene ku tlula woru! (Amaps. 119:127; Amapr. 8:10) Lehisa mbilu nakone u nga godoli ku djuletela mintxhumu leyimpshwa a Bibeleni.—Amaps. 1:2.

16. Xana hi nga yetisela Yehovha na Yesu hi ndlela yini?

¹⁶ Nkama lowu u dondzraka, yanakanyisisa hi ndlela leyi ha yone u nga tizrisaka leswi u swi dondzraka a wuton’wini byaku. Hi xikombiso, yetisela wululami bya Yehovha hi kuva u nga khomi vhanu hi ndlela ya xihlawuhlawu. U nga yetisela lizrandzru ledzri Yesu a a li na dzrone hi Papayi wake ni van’wana. Yin’we ya tindlela ta ku yentxa leswo i ku lulamela ku yentxa ku zrandzra ka Yehovha ni ku pfuna van’wana nambiloko minkama yimbeni swi nga ku nabyaleli. Ndlela yimbeni i ku zrezrela van’wana akuva na vone va ta kuma tovoko dzra ku yamukela xihiwa lexi nyonxisaka xa Yehovha.

17. Xana hi ta vona yini ka xidondzro lexi landzrelaka?

¹⁷ Loko hi ya hi dondzra hi xitizrulo ni ku xi nyika lisima, a lizrandzru dzrezru ha Yehovha na Yesu dzri ta ya dzri kula nakone swanga mabindzru, na vone va ta ya va hi zrandzra hi ku tlulisa. (Yoh. 14:21; Yak. 4:8) Xileswo, hi djula ku ma londzrovota ha hombe malulamiselo ya Yehovha ni ku tama hi dondzra hi xitizrulo. Ka nhlokomhaka leyi landzrelaka, hi ta vona man’we ya matovoko lawa hi taka ma kuma hi kola ka xitizrulo ni ndlela leyi hi nga kombisaka ku tlangela ha yone lizrandzru ledzri Yehovha a nga na dzrone ha hine.