NHLOKOMHAKA YA XIDONDZRO 5
LISIMU 108 Lizrandzru Dzrikulu Dzra Yehovha
Ndlela Leyi Hi Pfunekaka Ha Yone Hi Lizrandzru Dzra Yehovha
“Kriste Yesu a te misaveni akuva a ta huluxa vadohi.”—1 TIM. 1:15.
NKONGOMETO
Hi ta vona ndlela leyi hi pfunekaka ha yone hi xitizrulo ni ndlela leyi hi nga kombisaka ha yone leswaku ha mu tlangela Yehovha hi kola ka xone.
1. Hi nga yentxa yini akuva hi nyonxisa Yehovha?
YANAKANYA hi loko u nyika mhunu wa kukazri xihiwa xa ku xonga nakone xi nga ni lisima. A swi ta ku vavisa ngopfu loko mhunu lweyo a nga xi nyiki lisima nakone a nga ha xi dzrimuki, hi tlhelo dzrin’wana a u ta nyonxa loko a kombisa leswaku awa xi tlangela xihiwa lexo nakone a xi nyika lisima. Kutani, he yini yinhla lani? Yehovha a nyikele hi N’wanakake akuva hine hi pfuneka. Yehovha a nyonxa ngopfu swinene loko hi kombisa ku tlangela xihiwa lexo xa lisima ni lizrandzru ledzri mu susumeteliki kuva a hi nyika xitizrulo!—Yoh. 3:16; Rom. 5:7, 8.
2. Hi ta kambisisa yini ka xidondzro lexi?
2 Hi ku famba ka nkama hi nga ha sungula kuva hi nga xi nyiki lisima xihiwa xa xitizrulo, leswo a swi to fana ni loko hi teka xihiwa xa Xikwembu Nkulukumba hi xi beka hi va hi nga ha xi dzrimuki. Akuva leswo swi nga yentxeki, minkama hinkwayu hi fanela ku txutxela ku tlangela kwezru ka leswi Yehovha na Yesu va hi yentxeliki swone. Xidondzro lexi xi ta hi pfuna ku yentxa leswo. Hi ta kambisisa ndlela leyi hi nga pfunekaka ha yone hi xitizrulo swoswi ni le nkameni lowu taka. Hi ta tlhela hi kambisisa ndlela leyi hi nga kombisaka ku tlangela ha yone lizrandzru dzra Yehovha ngopfungopfu hi nkama wa Xidzrimuxo xa lifu dzra Yesu.
NDLELA LEYI HI PFUNEKAKA HA YONE SWOSWI
3. Xana hi pfuneka hi xitizrulo hi ndlela yini na ke he swoswi?
3 Na ke he swoswi ha pfuneka hi gandzrelo dzra xitizrulo dzra Yesu. Hi xikombiso, hi kola ka xitizrulo, Yehovha awa hi dzrivalela swidoho swezru. Yene a nga sindzriseki ku yentxa leswo. Hi ku susumeteliwa hi ku tlangela, mupsalma a yimbelele a ku: ‘Hikusa wene, Hosi, u munene, u lwe a dzrivalelaka.’—Amaps. 86:5; 103:3, 10-13.
4. Xana Yehovha a xi nyike vamani xitizrulo? (Luka 5:32; 1 Timotewu 1:15)
4 Van’wana va nga ha titwa na va nga faneliwi hi ku dzrivaleliwa ha Yehovha. Ku hlaya ntiyiso, hinkwezru a hi faneliwi hi lidzrivalelo. Mupostola Pawulo a a titwa na swi nga mu “faneli ku vitaniwa mupostola”. Nambitanu a yengeteli a ku: “Hi kola ka timpswalu letikulu ta Xikwembu Nkulukumba ni leswi ni nga swone.” (1 Kor. 15:9, 10) Loko hi tisola ka swidoho swezru, Yehovha awa hi dzrivalela. Ha yini? Ku nga li hi leswaku swo hi fanela kambe hi leswi a hi zrandzraka. Loko u kazratiwa hi ku titwa na u nga faneliwi hi ku dzrivaleliwa ha Yehovha, dzrimuka leswaku Yehovha a nga humesanga xitizrulo ka lava va kalaka va nga dohi kambe a xi humesele lava dohaka va va va tisola.—Dondzra Luka 5:32; 1 Timotewu 1:15.
5. Xana van’we vezru va fanela ku titwa na va faneliwa hi ku yamukela timpswalu ta Yehovha? Tlhamuxela.
5 Nambiloko mhunu a ni malembe manyingi na a tizrela Yehovha, a nga kone ni mun’we wezru lweyi a fanelaka ku titwa na a faneliwa hi timpswalu ta Yehovha. I ntiyiso leswaku Yehovha awa nyonxa hi mintizro yezru ya ku dumbeka. (Heb. 6:10) A hi nyike N’wanake swanga xitizrulo hi mahala, ku nga li hi leswaku o hi hakela hi leswi hi mu tizrelaka. Kutani, swi ta va swi hoxile loko hi ngo yanakanya leswaku leswi Yehovha hi mu yentxeliki mintxhumu yinyingi, a fanela ku hi dzrivalela. Loko hi yanakanya hi ndlela leyo, hi ta va na hi hlaya leswaku a hi nga vileli xitizrulo.—Dzringanisa ni Vagalatiya 2:21.
6. Ha yini Pawulo a tizre hi nkhinkhi a ntizrweni wa Yehovha?
6 Mupostola Pawulo a a swi tiva leswaku swi nge na mhaka ni leswi a swi yentxeliki Yehovha, yene a a nga sindzriseki ku mu dzrivalela. Kutani, ha yini a tizre hi nkhinkhi a ntizrweni wa Yehovha? A yentxe leswo akuva a kombisa ku tlangela wunene ni timpswalu leti Yehovha a mu kombisiki tone. (Efe. 3:7) Ku fana na Pawulo, hi tama hi tizrela Yehovha hi nkhinkhi ku nga li hi nkomgometo wa kuva a hi kombisa timpswalu kambe hi leswi hi djulaka ku kombisa ku tlangela kwezru.
7. He yini ndlela yin’wana leyi hi nga pfunekaka ha yone hi xitizrulo na ke he swoswi? (Varoma 5:1; Yakobe 2:23)
7 Ndlela yin’wana leyi hi pfunekaka ha yone i ku va ni wuxaka bya le kusuhi na Yehovha. a Hi lani swi kombisiwiki ha kone ka nhlokomhaka leyi khalutiki, a hi pswaliwanga na hi ni wuxaka na Yehovha. Kambe hi kola ka xitizrulo hi nga va ni “ku zrula . . . na Xikwembu Nkulukumba”, hi ndlela leyo hi nga va ni wuxaka na yene.—Dondzra Varoma 5:1; Yakobe 2:23.
8. Ha yini hi fanela ku tlangela Yehovha hi kola ka tovoko dzra ku khongota kwake?
8 Vona ntxhumu lowu kotekaka hi kola ka wuxaka byezru na Yehovha, ku nga tovoko dzra ku khongota kwake. Yehovha a nga yingiseti swikhongoto leswi malandzra yake ma swi yentxaka loko ma li hi ntlawa ntsena, kambe a yingiseta swikhongoto swa mun’wana ni mun’wana wavu. A xikhongoto xi hi nyika ku zrula ka le mbilwini nakone xi hi nyika ku zrula ka miyanakanyu, kambe a hi pfuneki hi leswo ntsena, xi tlhela xi tiyisa wuxaka byezru na Yehovha. (Amaps. 65:2; Yak. 4:8; 1 Yoh. 5:14) Nkama na a ha li lani misaveni, minkama hinkwayu Yesu a a khongota ka Yehovha hikusa a a swi tiva leswaku awa swi yingiseta swikhongoto swake nakone a swi ta yentxa wuxaka byake na yene byi tiya. (Luk. 5:16) Hi tlangela ngopfu hi kola ka gandzrelo dzra xitizrulo dzra Yesu ledzri yentxaka hi va ni wuxaka na Yehovha ni ku vulavula na yene hi xikhongoto!
NDLELA LEYI XITIZRULO XI TAKA HI PFUNA HA YONE A NKAMENI LOWU TAKA
9. Xana xitizrulo xi ta va pfuna hi ndlela yini vagandzreli va Yehovha a nkameni lowu taka?
9 Xana vagandzreli va ku dumbeka va Yehovha va ta pfuneka hi ndlela yini hi xitizrulo a nkameni lowu taka? Va ta nyikiwa wutomi lebyi nga helikiki. Vhanu vanyingi va yanakanaya leswaku leswo a swi nge yentxeki hikusa ku khaluta malembe manyingi na vhanu va fa. Kambe nkongometo wa Yehovha a ku li leswaku vhanu va hanya hi lani ku nga helikiki. Loko Adamu a a nga dohanga, a nga kone ni mun’we kwezru lweyi a a ta yanakanya leswaku a swi nge koteki kuva hi kuma wutomi lebyi nga helikiki. Nambileswi swi kazrataka ku tiyanakanya na hi hanya hi lani ku nga helikiki swoswi, hi nga tiyiseka leswaku leswo swi ta yentxeka. Ha swi tiva leswaku Yehovha a hakeli ku dula hi wutomi bya N’wanake akuva a yentxa leswo swi koteka.—Rom. 8:32.
10. Xana vatotiwa ni lava tihamba tin’wana va yimele yini?
10 Nambileswi wutomi lebyi nga helikiki hi taka byi kuma a nkameni lowu taka, Yehovha a djula leswaku hi yanakanyisisa ha byone na ke he swoswi. A vatotiwa va ta nyikiwa wutomi lebyi nga helikiki na va fuma na Yesu Kriste a matilweni. (Mpful. 20:6) Lava tihamba tin’wana va ta hanya a misaveni leyi nga paradeyisi na va nga ha vabyi nakone na va nga ha xaniseki. (Mpful. 21:3, 4) Xana u mun’we wa lava tihamba tin’wana leti taka kuma wutomi lebyi nga helikiki kola misaveni? A xidumbiso lexi a xo hi txhavelela ntsena, kambe hi leswi vhanu va tumbuluxeliwiki swone! Wutomi lebyo byi ta hi yentxa hi va vhanu lava nyonxiki.
11-12. He wani man’we ya matovoko lawa hi yimelaka ku ma kuma a Paradeyisini? (Tlhela u vona ni mufoto.)
11 Yanakanya hi ndlela leyi wutomi byi taka va xiswone a Paradeyisini kola misaveni. A u nge he ti hlatiyela hi mavabyi kumbe hi lifu. (Eza. 25:8; 33:24) Yehovha a ta yanelisa ku navela hinkwaku loku u nga na kone. I yini leswi u navelaka ku swi dondzra loko u li Paradeyisini? A u navela ku dondzra leswi yengetelekiki mayelanu ni swihazri? Kumbexana u navela ku dondzra ku txhaya xitxhayatxhayana xa kukazri? Kumbe u navela ku dondzra ku dezenyara? Handle ka ku ganaganeka, ku ta vileleka vahambi va madezenyu ya tiyindlu kumbe vayaki kun’we ni vadzrimi. Nakone ku ta tlhela ku va ni swivileleko swa ku seketela mintizro ya kukazri, ku pfuxeta, ndlela ya ku lulamisela swakuda, ku hamba switizro swa kukazri ni ku bekisa jaradi. (Eza. 35:1; 65:21) Nkama lowu u yaka u tikholisa hi wutomi, u ta va ni mukhandlu wa ku dondzrela ku yentxa ntxhumu wun’wana ni wun’wana lowu u wu yanakanyaka.
12 Swi ta nyonxisa ngopfu ku hoyozela lava taka pfuxiwa ku feni! (Mint. 24:15) Tlhela u yanakanyisisa hi ndlela leyi swi taka nyonxisaka ha yone, ku dondzra leswi yengetelekiki mayelanu na Yehovha hi ku kambisisa mintxhumu yinyingi leyi a yi tumbuluxiki. (Amaps. 104:24; Eza. 11:9) Ntxhumu wa ku nyonxisa ngopfu hi leswaku hinkwezru hi ta gandzrela Yehovha hi lipfalu ledzri basiki na hi nga ha titwi nandzru hi kola ka swihoxo swezru. Xana u ta hlawula ku phukwiwa hi matovoko lawa hi kola ka ku “tikholisa hi xidoho swa nkamanyana”? (Heb. 11:25) Nikutsrongo! A ku na ntxhumu lowu nga hi sivelaka kuva hi kuma matovoko lawo. Dzrimuka leswaku paradeyisi a nge ti va xidumbiso xa hi lani ku nga helikiki, siku dzrin’wana xi ta hetiseka. Leswo swi to koteka ntsena hi leswi Yehovha a hi zrandzriki a va a nyikela hi N’wanake leswaku a hi tizrula!
He wani matovoko lawa u ma yimeliki a Paradeyisini? (Vona mayava 11-12)
PFUMELA LIZRANDZRU DZRA YEHOVHA
13. Xana hi nga yangulisa kuyini ka lizrandzru ledzri Yehovha a hi kombisiki dzrone? (2 Vakorinte 6:1)
13 Xana hi nga yangulisa kuyini hi leswi Yehovha a hi nyikiki xitizrulo? Hi ku va hi zrangisa Mfumu wake a wuton’wini byezru. (Mat. 6:33) Phela Yesu a fe “akuva lava hanyaka va nga ha tihanyeli, kambe va hanyela lweyi a va feliki a tlhela a pfuxiwa”. (2 Kor. 5:15) Handle ka ku ganaganeka a hi djuli ku luza nkongometo wa timpswalu ta Yehovha.—Dondzra 2 Vakorinte 6:1.
14. Xana hi nga kombisa leswaku hi ni lipfumelo ka minkongomiso ya Yehovha hi ndlela yini?
14 Hi nga tlhela hi kombisa leswaku ha mu zrandzra Yehovha hi ku landzra minkongomiso yake. Hi nga swi yentxisa kuyini leswo? Hi nga yentxa leswo hi ku zranga hi kambisisa leswi a nga ku zrandzra ka Yehovha loko hi djula ku teka swiboho mayelanu ni tidondzro ni ntizro lowu hi taka wu pfumela. (1 Kor. 10:31; 2 Kor. 5:7) Loko hi kombisa lipfumelo dzrezru hi mintizro, ku yentxeka ntxhumu wa kukazri wa ku hlamalisa ku nga ku va lipfumelo ni wuxaka byezru na Yehovha swi ya swi tiya. Nakone ku lavisela kwezru ka ku hanya hi lani ku nga helikiki ku ya ku va ka hakakunene kwezru.—Rom. 5:3; Yak. 2:21, 22.
15. Xana hi nga kombisa ku tlangela kwezru hi nkama wa Xidzrimuxo hi ndlela yini?
15 Ka ha ni ndlela yin’wana ya ku kombisa leswaku ha mu zrandzra Yehovha. I kuva hi londzrovota nkama lowu wa Xidzrimuxo akuva hi kombisa ndlela leyi hi mu tlangelaka ha yone Yehovha hi kola ka xitizrulo. A matsrhan’wini ya ku va hi va kone hine ntsena ka Xidzrimuxo, hi fanela ku zramba van’wana leswaku na vone va va kone. (1 Tim. 2:4) Tlhamuxela lava u va zrambiki leswi taka yentxeka ka Xidzrimuxo. U nga swi nyonxela ku va komba vhidiyu ledzri liki: Ha Yini Yesu A File? Ni ledzri liki: Dzrimuka Lifu Dzra Yesu ka jw.org. Vakulu, dzrimukani ku zramba lava holiki hi tlhelo dzra moya. Yanakanya ku nyonxa loku taka va kone a matilweni ni lani misaveni loko mhunu lweyi a holiki hi tlhelo dzra moya a tlhelela ka Yehovha! (Luk. 15:4-7) Hi nkama wa Xidzrimuxo hi djula ku hoyozela hinkwavu, kambe ngopfungopfu vazrambiwa kun’we ni lava a va yime ku hlengemela. Hi djula ku yentxa hinkwavu va titwa na va yamukelekile!—Rom. 12:13.
16. Ha yini hi fanela ku yanakanyisisa hi ku yengesela ntizro wezru hi nkama wa Xidzrimuxo?
16 U nga yentxa leswi yengetelekiki a ntizrweni wa Yehovha hi nkama wa Xidzrimuxo ni loko Xidzrimuxo xi khalutile. Ku yentxa leswo i ndlela ya ku kombisa ku tlangela leswi Xikwembu Nkulukumba kun’we na Yesu va hi yentxeliki swone. Nkama lowu hi tamaka hi tihita a ntizrweni wa Yehovha, hi ta vona nseketelo wake nakone leswo swi nga yentxa hi tama hi mu dumba. (1 Kor. 3:9) Handle ka leswo, landzrelelisisa ku dondzra ka Bibele hi nkama wa Xidzrimuxo kumbe hi lani swi kombisiwiki ha kone ka xibukwana lexi liki: Ku kambisisa Matsralwa Siku Ni Siku kumbe ka bokisi ledzri kumekaka ka Xiyimiso Xa Mintlhanganu xa makazri ka vhiki. Nakone u nga ha tlhela u tizrisa tindzrimana leto akuva u tihambela dondzro ya ximhunu.
17. I yini leswi nyonxisaka Yehovha? (Tlhela u vona bokisi ledzri liki: “ Tindlela Leti Hi Nga Yangulaka Ha Tone Ka Lizrandzru Dzra Yehovha.”)
17 I ntiyiso leswaku a swiyimu swaku swi nga yentxeka swi nga ku pfumeleli ku tizrisa swidzringanyeto hinkwaswu leswi hi swi kumiki ka xidondzro lexi. Dzrimuka leswaku Yehovha a nga dzringanisi leswi u swi yentxaka ni leswi van’wana va swi yentxaka kambe a vona leswi nga mbilwini yaku. Yehovha a nyonxa ngopfu loko u tlangela xihanano xake xa xitizrulo na swi sukela mbilwini.—1 Sam. 16:7; Mar. 12:41-44.
18. Ha yini hi tlangela Xikwembu Nkulukumba na Yesu Kriste?
18 A xitizrulo hi xone xi yentxaka leswaku swi koteka akuva hi dzrivaleliwa swidoho swezru, hi va ni wuxaka na Yehovha ni ku lavisela wutomi lebyi nga helikiki. Minkama hinkwayu, a hi kombiseni ku tlangela lizrandzru dzra Yehovha ledzri mu susumeteliki kuva a hi nyika matovoko lawa hinkwawu. (1 Yoh. 4:19) Hi djula ku tlhela hi tlangela Yesu Kriste hi leswi a hi zrandzriki a va a nyikela wutomi byake akuva ku pfuneka hine!—Yoh. 15:13.
LISIMU 154 Lizrandzru Ledzri Nga Helikiki
