NHLOKOMHAKA YA XIDONDZRO 35
LISIMU 123 Titsrongahate Ka Nawu Wa Yehovha
Ndlela Leyi Vakulu Va Nga Pfunaka Lava Susiwiki Bandleni Ha Yone
“Ku ta va ni ku nyonxa lokukulu a tilweni hi mhaka ya mudohi mun’we lweyi a tisoliki, ku tlula lava 99 va ku lulama lava swi nga vilelekiki kuva va tisola.”—LUK. 15:7.
NKONGOMETO
Ha yini swi vilela kuva van’wana va susiwa a bandleni nakone vakulu va nga va pfunisa kuyini akuva va tisola ni ku tlhela va yamukeliwa ha Yehovha.
1-2. a) Xana Yehovha a titwisa kuyini hi lava yentxaka swidoho leswikulu va va va nga tisoli? b) I yini leswi Yehovha a yimelaka leswaku vadohi va swi yentxa?
A HI mahanyela hinkwawu ma yamukelekaka ka Yehovha; awa xi nyenya xidoho. (Amaps. 5:4-6) Yehovha a yimela leswaku hinkwezru hi yingiseta milawu yake leyi nga Bibeleni. I ntiyiso leswaku a nga yimeli leswaku hi yentxa mintxhumu hi ndlela leyi hetisekiki hikusa awa swi tiva leswaku a hi hetisekanga. (Amaps. 130:3, 4) Kambe, hi nkama wu li wun’we a nga pfumeleli “vhanu lava nga txhavikiki Xikwembu Nkulukumba, lava tizrisaka timpswalu letikulu ta Xikwembu Nkulukumba akuva va tiyimelela ka mahanyela yavu ya ku biha”. (Yud. 4) Nakone Bibele dzri khanela hi “ku helisiwa ka vhanu lava kalaka va nga mu hloniphi Xikwembu Nkulukumba” ka yimpi ya Amagedoni.—2 Pet. 3:7; Mpful. 16:16.
2 Kambe, Yehovha a nga naveli leswaku ni mun’we a helisiwa. Hi lani hi swi voniki ha kone ka tinhlokomhaka leti khalutiki, a Bibele dzri swi beka livaleni leswaku “a navela leswaku vhanu hinkwavu va tisola”. (2 Pet. 3:9) Vakulu va yetisela Yehovha hikuva va lehisa mbilu nkama lowu va pfunaka vadohi akuva va tisola ni ku va va tlhela va yamukeleka ka Yehovha. Kambe, a hi hinkwavu va taka yamukela xipfunu xolexo. (Eza. 6:9) Van’wana va ha ta tama va yentxa leswi bihiki nambiloko vakulu va va pfuna makhambi manyingi. Ka xiyimu lexi, i yini leswi vakulu va faneliki ku swi yentxa?
“SUSANI MHUNU LWEYI A BIHIKI”
3. a) I yini leswi Bibele dzri hlayaka leswaku swi fanela ku yentxiwa mayelanu ni vadohi lava kalaka va nga tisoli? b) Loko mhunu a yentxe xidoho a nga tisoli a va a susiwa a bandleni, ha yini hi hlaya leswaku e tihlawulela?
3 Loko mhunu a hamba xidoho a va a nga tisoli, a vakulu va fanela ku landzra nkongomiso lowu nga ka 1 Vakorinte 5:13: “Susani mhunu lweyi a bihiki makazri kwenu.” Hi mazritu man’wana, i mudohi a hlawuliki hi wuswake ku susiwa a bandleni; o tsrhovela leswi a swi byaliki. (Gal. 6:7) Ha yini hi hlaya leswo? Hikusa a yalile loko vakulu va zame ku mu pfuna hi makhambi manyingi. (2 Tih. 17:12-15) Swiyentxo swake swi kombisa leswaku a nga swi djuli ku yingiseta milawu ya Yehovha.—Deut. 30:19, 20.
4. Ha yini ku hambiwa xitiviso loko mudohi lwa kalaka a nga tisoli a susiwa bandleni?
4 Loko mhunu a nga tisoli a va a susiwa bandleni, ku hambiwa xitiviso bandleni xa leswaku mhunu lweyo a nga ha li mun’we wa Timboni ta Yehovha. a Nkongometo wa xitiviso lexo a hi ku danisa mhunu lweyo kambe xi yentxeliwa kuva bandla dzri ta kota ku landzra nkongomiso lowu liki “tsrhika ku titlhanganisa” ni mhunu lweyo “nambi ku da mi nga di na yene”. (1 Kor. 5:9-11) Ku ni swivangelo leswi twalaka swa kuva Yehovha a hi nyika nkongomiso lowo. Mupostola Pawulo a te: “Fermentu dzritsrongo dzri kukumukisa mbila hinkwayu.” (1 Kor. 5:6) Loko mudohi lwa kalaka a nga tisoli a nga susiwe bandleni, van’wana a bandleni va nga ha yanakanya leswaku a hi swa lisima ku landzra milawu ya Yehovha.—Amapr. 13:20; 1 Kor. 15:33.
5. Hi fanela ku mu vonisa kuyini a mhunu lweyi a susiwiki bandleni nakone, ha yini?
5 Kutani hi fanela ku mu vonisa kuyini mhunu lwa susiwiki bandleni? Hi nge he ti hungata kumbe ku heta nkama na yene. Kambe nambitanu, a hi fanelanga ku yanakanya leswaku a nge he ti tlhela a mu tizrela Yehovha, kambe hi fanela ku mu vona swanga hamba leyi lahlekiki. A hamba leyi titsravuxiki ni ntlhambi siku dzrin’wana yi nga ha tlhelela. Dzrimuka leswaku mhunu lweyo a tinyiketele ka Yehovha. Lexi vavisaka hi leswaku swoswi a nga hanyi hi ku fambisana ni ku tinyiketela koloko kumbe ku hanya hi ndlela leyi nyonxisaka Yehovha. (Ezek. 18:31) Kambe loko ka ha ni nkama ni kuva Yehovha a lulamele ku mu kombisa timpswalu, ha ha ni dumbo hi mhunu lweyo. Kutani, xana vakulu va nga mu pfunisa kuyini mudohi lweyi a susiwiki bandleni?
NDLELA LEYI VAKULU VA NGA PFUNAKA HA YONE LAVA SUSIWIKI BANDLENI
6. I yini leswi vakulu va ta swi yentxa akuva va pfuna lava susiwiki bandleni?
6 Loko mhunu a susiwe bandleni, xana vakulu va nge he ti mu pfuna? A swi tanu! Loko va ya bulisana ni mhunu lweyi a taka susiwa bandleni, va tlhela va mu byela leswi a fanelaka ku swi yentxa loko a djula ku tlhelela bandleni. Nakone vakulu va yentxa swa ku tlula leswo. Hakanyingi va vutisa mhunu lweyo leswaku va nga tlhela va bula na yene ntsrhaku ka tihweti ta kukazri, hi nkongometo wa ku djula ku vona leswaku a nga va a txintxe swiyentxo kumbe mapimisela yake. Loko mhunu lweyo a pfumela, ntsrhaku ka nkama wa kukazri vakulu va nga ha tlhela va bulisana na yene, va mu kutxa kuva a tisola leswaku a tlhelela ka Yehovha. Nakone nambiloko mhunu lweyo a nge si na tisola, vakulu va ta zama ku tlhela va bulisana na yene loko nkama wu ya wu famba, akuva va mu kutxa leswaku a tisola.
7. Xana vakulu va yetisela ntwelawusiwana wa Yehovha hi ndlela yini ka ndlela leyi va mu khomaka ha yone mhunu lweyi a susiwiki bandleni? (Yeremiya 3:12)
7 Vakulu va tikazratela ku yetisela ntwelawusiwana wa Yehovha loko va ya kumana ni mhunu lweyi a susiwiki bandleni. Hi xikombiso, Yehovha a nga yimelanga kuva Vaisrayele lava mu pfukeliki a va vone va zrangaka va yentxa xa kukazri akuva va tlhelela kwake. Amatsrhan’wini ya leswo, a ve yene wa ku zranga ku va pfuna na va nge si na kombisa leswaku va tisola. Hi lani hi swi voniki ha kone ka xidondzro xa wubidzri ka xihondzro lexi, Yehovha a byele Hoxeya leswaku a dzrivalela nkatake ni ku tlhela a mu yamukela nambileswi a a ya mahlweni hi ku doha. Hi ndlela leyo, Yehovha a kombe vhanu vake leswaku a a lulamele ku va dzrivalela. (Hoš. 3:1; Mal. 3:7) Ku fana na Yehovha, a vakulu nakunene va swi djula leswaku a mudohi a tisola ni ku va a tlhelela bandleni. Va yentxa hinkwaswu leswi va nga swi kotaka akuva leswo swi koteka nakone va nge ti swi kazratisa akuva a tlhelela bandleni.—Dondzra Yeremiya 3:12.
8. Xana xifaniso xa Yesu xa n’wana lweyi a lahlekiki kaya xi kombisa hi ndlela yini ntwelawusiwana ni timpswalu ta Yehovha? (Luka 15:7)
8 Ka xifaniso xa n’wana lwa lahlekiki, dzrimuka ndlela leyi papayi wake a mu yamukeliki ha yone. Loko a mu vone na a ha li kule, papayi wake “a tsrutsrume a mu tlhangaveta a tlhasa a mu xingazra a mu n’qunta”. (Luk. 15:20) Papayi a nga yimelanga leswaku ku li n’wanake a kombelaka lidzrivalelo. Amatsrhan’wini ya leswo, a ve yene wa ku zranga, ku nga leswi papayi mun’wana ni mun’wana wa lizrandzru a a ta swi yentxa. A vakulu va tikazratela ku va ni vonela ledzri fanaka hi lava titsravuxiki ni bandla. Va djula leswaku a hamba leyi lahlekiki yi “tlhelela kaya”. (Luk. 15:22-24, 32) Loko mudohi a tisola Yehovha, Yesu ni tintsrumi va nyonxa ngopfu swinene, ku nga leswi bandla hinkwadzru dzri fanelaka ku titwisa xiswone!—Dondzra Luka 15:7.
9. Xana Yehovha a va koka hi ndlela yini vadohi?
9 Ku ta tlhasela lani, hi swi vonile leswaku Yehovha a nga va pfumeleli vadohi lava kalaka va nga tisoli va tama va va Timboni take. Kambe leswo a swi hlayi swone leswaku Yehovha a nga ha djuli kuva va tlhelela kwake. A matsrhan’wini ya leswo a djula leswaku va tlhelela. Hošea 14: 4, yi kombisa ndlela leyi Yehovha a titwaka ha yone mayelanu ni vadohi lava tisolaka, a li: “Ni ta va daha, kutani a va nge he ti tsrhika ku dumbeka kwanga. Ni ta va zrandzra na swi sukela mbilwini, hikusa a na ha mu hlundzrukelanga Israyele.” Kuva vakulu va tiva ndlela leyi Yehovha a titwaka ha yone, swi ta va pfuna ku xiya loko mudohi a sungula ku tisola. Nakone ka lava susiwiki bandleni, i xitiyisekiso xa leswaku Yehovha awa va zrandzra nakone a djula leswaku va tlhelela a bandleni hi ku kahlula.
10-11. Xana vakulu va nga va pfuna hi ndlela yini lava susiwiki khale bandleni?
10 Xana vakulu va nga mu pfunisa kuyini mhunu lweyi a nga ni malembe ni malembe na a susiwile a bandleni? Swi nga yentxeka na xidoho lexi xi mu yentxiki a susiwa bandleni a nga ha xi yentxi. Nakone swi nga ha yentxeka nambi ku dzrimuka leswaku a susiwe hi mhaka muni a nga ha dzrimuki. A swi na mhaka ni leswaku he xini xivangelo, vakulu va ta zama ku mu djuletela ni ku mu pfuxela. Ka liyendzro ledzro, vakulu va nga ha khongota na yene ni ku mu kutxa kuva a tlhelela ka Yehovha. I ntiyiso leswaku, loko ku li khale na mhunu a yime ku hlengemela, a holi ngopfu hi tlhelo dzra moya. Loko a kombisa leswaku awa swi djula ku tlhelela bandleni, vakulu va nga ha hamba malulamiselo ya kuva mhunu lweyo a fambiseliwa xidondzro xa Bibele nambiloko a nga si na tlhelela bandleni. Ka swiyimu hinkwaswu, vakulu hi vone va fanelaka ku hamba malulamisela ya leswaku mhunu lweyo a kota ku fambiseliwa xidondzro xa bibele.
11 Vakulu va djula ku yetisela timpswalu ta Yehovha, xileswo vakulu va djuletela hinkwavu lava susiwiki bandleni akuva va va kutxa kuva va tlhelela ka Yehovha. Loko mudohi a tisola a va a txintxa mahanyela yake ya ku biha, a nga ha tlhelelisiwa bandleni hi ku kahlula.—2 Kor. 2:6-8.
12. a) He swini swiyimu leswi djulaka kuva vakulu va va ni wuxiyaxiya ka swone? b) Ha yini hi nga fanelanga hi yanakanya leswaku vadohi van’wana a va nge yamukeli timpswalu ta Yehovha? (Tlhela u vona ni ntlhamuxelo wa le hansi.)
12 Ka swiyimu swin’wana vakulu va fanela ku va ni wuxiyaxiya na va nge si tlhelelisa mhunu bandleni. Hi xikombiso, loko mhunu wa kukazri a pfinye n’wana, a li dukwa kumbe ku dlaya wukati handle ka xivangelo, vakulu va fanela ku tiyiseka ka leswaku a tisolile ha kunene. (Mal. 2:14; 2 Tim. 3:6) A vakulu va fanela ku sizrelela vamakwezru a bandleni. Kambe hi nkama wu li wun’we hi fanela ku swi tiva leswaku Yehovha a yamukela hinkwavu lava tisolaka hi kakunene va tlhela va nga ha yentxi mintxhumu ya ku biha. Nambileswi vakulu va djulaka ku tiyiseka ka leswaku mhunu lwa kanganyisiki van’wana a tisolile hi kakunene, a va fanelanga ku yanakanya leswaku mhunu yelweyo a nge he kombisiwi timpswalu hi Yehovha. b—1 Pet. 2:10.
LESWI BANDLA DZRI NGA SWI YENTXAKA
13. He kwini ku hambana ka ndlela leyi hi taka mu khoma ha yone mhunu lweyi a soliwiki hi vakulu ni mhunu lweyi a susiwiki bandleni?
13 Hi lani hi swi voniki ha kone ka xidondzro lexi khalutiki, minkama yin’wana loko ku tivisiwa leswaku mhunu wa kukazri a soliwile. Ka xiyimo lexo hi nga ha tama hi titlhanganisa na yene hikusa ha swi tiva leswaku a tisolile nakone a nga ha yentxi leswi bihiki. (1 Tim. 5:20) Mhunu lweyo a ha tama a va xizro xa bandla nakone a vilela nseketelo wa vamakwezru akuva a tama a yentxa leswi nga swinene. (Heb. 10:24, 25) Kambe swi hambanile ni loko mhunu a susiwile a bandleni. Lanu ke hi “tsrhika ku titlhanganisa” ni mhunu lweyo “nambi ku da mi nga di na yene”.—1 Kor. 5:11.
14. Xana vakriste va nga dzri tizrisa hi ndlela yini lipfalu dzravu ledzri dondzrisiwiki hi Bibele akuva va tiva ndlela leyi va nga va khomaka ha yone lava susiwiki bandleni? (Tlhela u vona ni ntlhamuxelo wa le hansi.)
14 Xana leswo swi hlaya leswaku hi ta va tingawula hi ku helela lava susiwiki bandleni? A swi hlayi swone, i ntiyiso leswaku a hi nge ti heta nkama wunyingi ni mhunu lweyo kambe loko a li xaka dzrezru kumbe munghanu wezru hi nga mu zramba kuva a hlalela mintlhanganu. Kambe swi li yini loko a pfumela? A khale nambi ku mu losa a hi nga ti mu losa mhunu lweyo. Mukriste mun’wana ni mun’wana a nga tizrisa lipfalu dzrake ledzri dondzrisiwiki hi Bibele akuva a vona leswaku a nga yentxa yini. Swi nga yentxeka van’wana va djula ku hoyozela mhunu lweyo hikuva va mu losa. Nambitasu i swa lisima ku dzrimuka leswaku a hi djuli ku heta nkama wa wunyingi na hi bulisana na yene. Nambi ku heta nkama na hi yentxa mintxhumu xikan’we.
A mukriste a nga tihlawulela leswaku a ta zramba mhunu lweyi a susiwiki bandleni akuva a hlalela mintlhanganu kumbe ku mu losa loko a ye mintlhangan’wini (Vona yava 14)
15. I mudohi wa matsrhamela wani lweyi a hlayiwaka ka buku dzra 2 Yohane 9-11? (Vona bokisi ledzri liki “ Xana Yohane Na Pawulo A Va Vulavula Hi Muxaka Wun’we Wa Xidoho?”)
15 Kambe van’wana va nga ha tivutisa va ku: ‘Xana a Bibele a dzri hlayi leswaku a hi fanelanga hi mu losa mudohi lweyo?’ (Dondzra 2 Yohane 9-11.) A mongo wa wubidzri wa 2 Yohane 9-11 yi tizrela ka madukwa kumbe vhanu lava hlohlotelaka mahanyela ya ku biha. (Mpful. 2:20) Xileswo loko mhunu a hlohlotela kumbe a kutxetela tidondzro ta madukwa kumbe mahanyela ya ku biha a vakulu va nge ti mu pfuxela. Nambitanu, ha ha ni dumbo leswaku hi ku famba ka nkama a ta tisola a txintxa mahanyela yake. Kambe loko a nga tisoli hi nge ti mu losa nambi ku mu zramba kuva a ya mintlhanganwini.
YETISELA TWELAWUSIWANA NI TIMPSWALU TA YEHOVHA
16-17. a) I yini leswi Yehovha a djulaka leswaku lava va dohiki va swi yentxa? (Ezekiel 18:32) b) Xana vakulu va nga tizrisana na Yehovha kuva va pfuna lwa dohiki hi ndlela yini?
16 I yini hi nga swidondzra ka ntlhanu wa tinhlokomhaka ta xihondzro lexi? Hi dondzre leswaku Yehovha a nga djuli leswaku ku helisiwa ni mhunu ni mun’we! (Dondzra Ezekiel 18:32.) A djula leswaku vadohi hinkwavu va tlhelela kwake. (2 Kor. 5:20) Hi kola ka leswo Yehovha minkama hinkwayu a kombeliki leswaku malandzra yake lama dohiki ma tisola nakone ma tlhelela kwake. Vakulu va ni mukhandlu wa ku tizrisana na Yehovha akuva va pfuna lava va yentxiki swidoho leswikulu leswaku va tisola.—Rom. 2:4; 1 Kor. 3:9.
17 Yanakanya hi ku nyonxa loku nga kone matilweni loko lweyi a dohiki a tisola! Minkama hinkwayu Yehovha, Papayi wezru a nyonxa ngopfu loko a vona hamba leyi a yi lahlekile yi tlhelela bandleni. Nakone lizrandzru dzrezru ha Yehovha dzri ya dzri kula loko hi yanakanyisisa hi ntwelawusiwana, timpswalu ni wunene lebyi kalaka byi nga hi faneli.—Luka 1:78.
LISIMU 111 Leswi Swi Hi Yentxaka Hi Tsrhava
a A hi nge he ti dzri tizrisa zritu ku tsremiwa. Hi ku ya hi mazritu ya mupostola Pawulo ka 1 Vakorinte 5:13, hi ta hamba hi tizrisa zritu ku susiwa a bandleni.
b A Bibele dzri hlaya leswaku ku ta va ni lava nge tiki dzrivaleliwa, ka xiyimu lexo ku hlayiwa vhanu lava nga hlawula ku lwisana na Yehovha. Ko va Yehovha na Yesu ntsena lava nga yavanyisaka leswaku mhunu a nga dzrivaleliwa kumbe im-him.—Mar. 3:29; Heb. 10:26, 27.
