Mupostola Pawulo a tsralele vakriste va le Tesalonika a ku: “Loko mhunu wa kukazri a nga ma yingiseti mazritu yezru lawa ma nga ka papela ledzri, mu lavisisani mhunu lweyo”. (2 Tes. 3:14) Khale a hi hlaya leswaku a nkongomiso lowu a wu ya ka vakulu. Loko mhunu wa kukazri a tama a tlula minsinya ya milawu ya Bibele nambiloko a yamukele swilayu hi makhambi manyingi, vakulu a va beka a wukaneli bandleni akuva mun’wana ni mun’wana a tivonela. Xileswo, vazrezri a bandleni a va nge ti titlhanganisa ni mhunu lweyo handle ka loko va le nsin’wini kumbe a mintlhanganwini.

Kambe swi vilela kuva hi txintxa matwisisela lawo. Swoswi hi twisisa leswaku a xilayu xa Pawulo xi yelana ni xiboho lexi mukriste mun’wana ni mun’wana a fanelaka ku xi teka ka swiyimu swin’wana. Hi ndlela leyo, a swi vileli kuva vakulu va beka wukaneli akuva bandla dzri tivonela ka mhunu lweyo. Kambe, ha yini ku hambiwe ku txintxa loko? Vona leswaku ha yini Pawulo a nyikele xilayu lexi?

Pawulo a hlaye leswaku van’wana ka bandla dzra le Tesalonika a va nga “yingiseti”. Pawulo a a va nyike swilayu leswi seketeliwiki Bibeleni kambe a va nga djuli ku yingiseta. Nkama lowu Pawulo a va yendzreliki a a va lelete leswi: “Mhunu lweyi a kalaka a nga djuli ku tizra, a nga fanelanga a da.” Kambe van’we a va ha yala ku tizra akuva va tihanyisa nambiloko va ni wuswikoti bya ku yentxa leswo. Handle ka leswo, a va nghenelela ka timhaka ta van’wana. Xana vakriste a va fanela ku va khomisa kuyini vhanu lava a va nga yingiseti?—2 Tes. 3:6, 10-12.

Pawulo a te: “Lavisisani mhunu lweyo”. A zritu dzra Xigriki ledzri nga tizrisiwa lani dzri nyikela a mongo wa ku xiya vhanu va matsrhamela lawo ni ku tivonela kuva hi nga kutxeteliwi hi matsrhamela yavu. Pawulo a nyikele xilayu lexo ku nge ka vakulu ntsena kambe ka bandla hinkwadzru. (2 Tes. 1:1; 3:6) Kutani mukriste mun’wana ni mun’wana lweyi a a ta vona makwezru wa kukazri na a tlula a swilayu swa Zritu dzra Xikwembu Nkulukumba a a ta titekela xiboho xa ku “tsrhika ku titlhanganisa na yene”.

Xana leswo swi tlhamuxela leswaku mhunu lweyo a a fanela ku khomiwa swanga mhunu lweyi a susiwiki bandleni? Im-him, hikusa Pawulo a tlhele a ku: “Yanani mahlweni mi mu dzrimuxa hikusa i makwenu.”Xileswo, mukriste mun’wana ni mun’wana a a ha ta tama a hanyisana ni makwezru lweyo a mintlhanganwini ni le nsin’wini, kambe a nga hlawula kuva a nga heti nkama na yene ka swiyimu swin’wana kumbe ku hungata na yene. Ha yini? Pawulo a te: “Akuva a ta va ni tingana.” Loko hi lavisisa makwezru lweyo swi nga yentxeka a va ni tingana hi kola ka leswi a swi yentxaka ava a txintxa mahanyela yake.—2 Tes. 3:14, 15.

Xana vakriste va swi tivisa kuyini leswaku va fanela ku lavisisa mhunu wa kukazri? Xa ku sungula, hi fanela ku tiyiseka leswaku mahanyela ya mhunu lweyo ma kombisa leswaku a nga “yingiseti” hi lani Pawulo a tlhamuxeliki ha kone. Pawulo a a nga vulavuli hi vhanu lava nga ni mayanakanyela lama hambaniki ni yezru ka lipfalu dzrezru ni leswi hi swi zrandzraka. Nakone a a nga vulavuli hi vhanu lava hi khunguvanyisiki. A matsrhan’weni ya leswo, a a vulavula hi lava a va hlawula ku tlula swilayu leswi kongomiki swa Zritu dzra Xikwembu Nkulukumba hi maxivomu.

Namunhla, loko hi xiya leswaku makwezru wa kukazri a kombisa moya wa ku kala ku yingiseta, a nakone a tama a tlula swilayu swa Xikwembu Nkulukumba, hi ta titekela xiboho xa ku kala hi nga heti nkama wunyingi na yene kumbe ku hungata. Leswi lexi ku nga xiboho xa mun’wana ni mun’wana a hi nge ti bula ni van’wana ha swone loko ku nga li va ndangu wezru wa le kusuhi. Kambe hi ta tama hi va na yene a mintlhanganwini ni nsin’wini nakone loko a txintxa mahanyela yake ni swiyentxo swake hi ta tlhela hi hanyisana na yene hi lani a swi li ha kone ku sunguleni.