Ku va ni dumbo dzra leswaku ku xaniseka ku ta hela swi hi pfuna ku va ni wutomi lebyi nyonxisaka swi tlhela swi hi yentxa hi djula ku va vanghanu va Xikwembu Nkulukumba.

Vhanu vanyingi va swi navela ku helisa ku xaniseka, kambe va hluleka ku yentxa leswo. Xiya swikombiso leswi landzrelaka:

Nambi leswi ku gunguliwiki swinyingi ka ta wudahu . . .

• Mavabyi ya mbilu ma ha tama ma dlaya ngopfu.

• Mavabyi ya kankru ma dlaya magidigidi ya vhanu lembe dzrin’wana ni dzrin’wana.

• Ka revhixta ledzri khanelaka hi wudahu, * Dotori David Bloom a hlaye leswaku “misava ya ha tama yi lwisana ni mavabyi lawa ku nga khale ma li kone, man’we ma ha ku tumbuluka, na kasi man’wana me tlhela ma humelela”.

Nambi leswi matiko mambeni ma nga ni mali yinyingi . . .

• Lembe ni lembe, ku fa magidigidi ya vatsrongwana, ngopfungopfu a mimbangwini leyi vhanu va kone va nga swisiwana.

• Vhanu va ntsrandzravahlayi va hanya a mimbangwini leyi kalaka yi nga tsrhamisekanga.

• Magidigidi ya vhanu ma pfumala mati lama basiki.

Nambi leswi vhanu vanyingi namunhla va ti tivaka ha hombe timfanelo ta ximhunu . . .

• Ku xavisiwa ka vhanu ka ha ya mahlweni a matikweni manyingi. Nakone hi ku ya hi wudzrunguli bya Ntlhanganu wa Matiko, matiko man’wana a ma yentxi ntxhumu akuva ma lwisana ni wubihi lebyo hi leswi “ma tipfalaka matihlo a mhakeni leyo kumbe hi leswi ma nga liki na makotela ya ku lwisana na byone”.

  AKUVA U TIVA SWIN’WANA

  Vona vídeo ledzri liki Mfumo Wa Xikwembu I Yini?, ka jw.org/ts.

Xikwembu Nkulukumba a ni mhaka na hine.

Wa ku twisisa ku vavisa loku hi ku twaka.

‘[Xikwembu Nkulukumba] a nga dzrelanga, a nga nyenyanga ku xaniseka ka lweyi a xanisekaka, a nga mu fihlelanga mombo wakwe, kambe a mu yingisetile loko a huwelela ku yene.’​—AMAPSALMA 22:24.

‘N’wi txukumetela ku hlatiyela kwenu hinkwaku a henhla kwakwe, hikuva a zron’wa ha n’wine.’​—1 PETROS 5:7.

Ku xaniseka ku ta hela siku dzrin’wana.

Bibele dzri dumbisa leswaku nkongometo wa Xikwembu Nkulukumba ha hine wu ta hetiseka.

‘Xikwembu Nkulukumba . . . a ta hlangula minyembeti hinkwayu a mahlweni yavu; ni ku fa ku nga ha vi kone; ku nga ha vi na nkosi, ni ku bongosa, ni ku vaviseka.’​—APFULETELO 21:3, 4.

Xikwembu Nkulukumba a ta helisa leswi vangelaka vhanu ku xaniseka.

A ta swi yentxa hi ku tizrisa Mfumu Wakwe.

‘Xikwembu Nkulukumba wa tilu a ta pfuxa mfumu lowu nga tiki honeka ni siku ni dzrin’we; a wuhosi bya wone byi nga ka byi nga hundzri byi ya ku tiko dzrin’wana . . . wu ta va kone hinkwayu minkama.’​—DANIEL 2:44.