Lexi vangaka xihlawuhlawu minkama yinyingi i ku va vhanu va nga tivi dzrungula hinkwadzru hi mhaka ya kukazri kumbe va kholwa mhaka ya madzrimi. Vona swikombiso leswi landzrelaka:

• Van’wamabindzru vambeni va ni vonela ledzri hoxekiki dzra leswaku vavasati a va faneleki ku tizra hi mitxhini kumbe makomputadori.

• A Europa Medieval, a va-Yuda a va lumbetiwa leswaku a va txhela muzri swihloveni ni leswaku a va txhotxhela mavabyi. Hi nkama wa mfumu wa Vanazi, a va-Yuda va tlheli va lumbetiwa swimbeni. A va hlaya leswaku vone a va vanga swikazratu swa timali a Alemanha. Hinkwaswu leswo swi yentxi leswaku va kombisiwa xihlawuhlawu, lexi xa ha vonekaka hi mpimu wa kukazri ku ta tlhasa namunhla.

• Vhanu vanyingi va pimisa leswaku vhanu lava va nga ni wulema va tsrhama na va kwatile kumbe va khunguvanyekile.

Vhanu lava kholwaka ka madzrimi wolawo va djuletela swikombiso swa kukazri akuva va tiyimelela ka xihlawuhlawu xavu. Nakone loko mhunu a nga pfumelelani na vone va hlaya leswaku a nga na mhaka ni ntxhumu.

“A hi swinene ku va mhunu a pfumala wutivi.”​—AMAPROVERBIA 19:2, TRADUÇÃO DO NOVO MUNDO.

Xana hi dondzra yini? Loko hi nga tivi ntiyiso wa mhaka, swi nga hi yentxa hi teka swiboho leswi hoxekiki. Loko hi kholwa hinkwaswu leswi hi swi yingelaka, a matsrhan’wini ya ku djuletela ku tiva ntiyiso, hi nga ha yavanyisa vhanu hi ndlela leyi hoxekiki.

Loko hi tiva ntiyiso hi vhanu a hi nge ti kholwa ka madzrimi lawa va ma hlayaka mayelanu na vone. Nakone loko hi gungula ntiyiso hi vhanu va kukazri swi ta hi nabyalela kuva hi hlula xihlawuhlawu lexi hi nga naxu.

• Dzrimuka leswaku leswi u swi twiki mayelanu ni vhanu va ntlawa wa kukazri a swi tlhamuxeli leswaku hinkwavu ka ntlawa wolowo va tsrhamisise xiswoswo.

• Dzrimuka leswaku swi nga yentxeka u nga tivi wutsrhokotsrhoko hinkwabyu mayelanu ni vhanu va ntlawa wa kukazri.

• Djuletela ku tiva mhaka ka lava nga ni ntiyiso.