Xana a matilo ni misava ku patsra ni wutomi swi sungulise kuyini? Xana swi tumbuluxiwe ha Xikwembu Nkulukumba, kumbe swe na suketana swi titumbulukela? A nhlamulo leyi nyikeliwiki hi tintivi ta física leti hi ti hlayiki hala henhla ni leyi nyikeliwaka hi Bibele ka Genesis 1:1, ti hambane hi ku helela. Tinhlamulo ha tibidzri ti ni vhanu lava ti seketelaka hi ku tiyiseka, nakone a u nge va txintxisi hi ntxhumu mavonela yavu, nambitanu, vhanu vanyingi a va tiyiseki hi leswi va fanelaka ku pfumela ka swone. A vhanu va tolovela ku dokadokisana hi timhaka leti ka mabuku ni le ka maprograma ya televhizawu.

A xikole swi nga yentxeka u same u yingela vaprisori vaku na va hlaya hi ku tiyiseka leswaku a ku na Muvumbi, ni leswaku a matilo ni misava swe titumbulukela. Kambe, xana va ku kombe wumboni lebyi kombisaka leswaku a ku na Muvumbi? Hi hala tlhelo swi nga ha yentxeka u same u twa vazrangeli va wukhongoti na va hlaya leswaku ku ni Muvumbi, kambe, xana va ku kombile wumboni bya leswi va swi hlayaka, kumbexana ve ku byela leswaku ku pfumela leswaku ku ni Muvumbi swi djula lipfumelo?

N’waninkama na wene u same u yanakanya hi mhaka leyi. Xana u yanakanya leswaku a nga kone mhunu lweyi a nga tiyisekisaka leswaku ku ni Muvumbi? Nakone swi nga ha yentxeka u ni xivutiso xin’wana: Xana i swa lisima ku tiva nhlamulo?

A revhixta ledzri dzri ta kombisa mintiyiso ya kukazri leyi yentxiki vhanu vanyingi va pfumela leswaku ku ni Muvumbi. Dzri ta tlhela dzri kombisa leswaku ha yini swi li swa lisima ku tiva leswaku wutomi byi sungulise kuyini.