Ha yini Yesu a tsrhahe mazritu ya Davhida lawa ma kumekaka ka Amapsalma 22:1, na a nga si na fa?

Ka mazritu lawa Yesu a ma hlayiki na a nga si na fa, man’we ya kone ma kumeka ka Matewu 27:46, lama liki: “Xikwembu Nkulukumba wanga, Xikwembu Nkulukumba wanga, u ni tsrhikele yini?” Hi ku hlaya mazritu lawa, Yesu a hetisise mazritu ya mupsalma Davhida lama kumekaka ka Amapsalma 22:1. (Mr 15:34) A swi tava swi hoxile ku hlaya leswaku Yesu a tsrhahe mazritu wolawu hi leswi a a hele ntamu kumbe hi leswi a a lahlekeliwe hi lipfumelo hi nkama wa kukazri. Yesu a a xi twisisa hi ku helela xivangelo xa kuva a fa nakone a a tiyimisele kuva a swi hetisisa leswo. (Mt 16:21; 20:28) Nakone a a swi tiva leswaku Yehovha a a nge ti mu ‘biyelela’ akuva nga fi. (Yb 1:10) Kutani Yehovha a nga mu sizrelelanga Yesu akuva a kombisa leswaku a a ta tama a dumbeka swi nge na mhaka leswaku a a ta fisa kuyini.—Mr 14:35, 36.

Kutani ha yini Yesu a hlaye mazritu ya Psalma ledzri? A hi nge hlayi hi ku kongoma, kambe a hi kambisisi swivangelo swi nga li swingani. *

Yesu a a tshimisisa leswaku Yehovha a a nga ti mu pfuna loko a li kusuhi ni ku fa? Yesu a a fanela ku hakela xitizrulo na a nga pfuniwanga ha Yehovha. A a li mhunu wa nyama nakone a a fanela ku fa swanga mhunu wa nyama akuva a ‘yingela ku fa hi nkota hinkwavu’.—Hb 2:9.

Hi ku tsrhaha mazritu matsrongo ya psalma ledzri, xana Yesu a a djula leswaku hi pimisa hi  psalma hinkwayu? A nkameni luwani a swi tolovelekile kuva Vayuda vanyingi va bekisa tindzrimana tinyingi ta mapsalma. Loko va dzrimuxiwa hi ndzrimana ya kukazri ya psalma, hi ntolovelo a va ta dzrimuka a psalma hinkwadzru. Loko xivangelo a a li lexo, Yesu a a tava a pfune Vayuda vanyingi lava a va li valandzreli vakwe akuva va dzrimuka wuprofeta bya psalma dzroledzro, mayelanu ni wutomi byakwe na a nga si fa. (Ps 22:7, 8, 15, 16, 18, 24) Nakone ka tindzrimana ta wugamu ta psalma ledzri, ku dzrumisiwa Yehovha a tlhela a kombiswa swanga hosi ya misava ka hinkwayu.—Ps 22:27-31.

Xana Yesu a a djula ku tshimisisa leswaku a nga na nandzru? Na a nga si fa, Yesu a yavanyisiwi hi ndlela leyi nga liki yinene a tlhela a lumbetiwa ku sandzra Xikwembu Nkulukumba (Mt 26:65, 66) Ku yavanyisiwa koloko ku ve ka kola ni kola ni wusiku nakone a ku nga fambisani ni nawu. (Mt 26:59; Mr 14:56-59) Hikuva Yesu a hambe xivutiso lexi “Xikwembu Nkulukumba wanga, Xikwembu Nkulukumba wanga, u ni tsrhikele yini?”, swi nga yentxeka a a djula ku kombisa leswaku a ku na ntxhumu lexi a xi yentxiki akuva dlayiwa hi ndlela liyani.

Xana Yesu a a djula ku hlaya leswaku Davhida, mutsrali wa Psalma ledzri, nambi leswi a xanisekiki, a swi nga djuli ku hlaya leswaku a a nga ha yamukeliwi ha Xikwembu Nkulukumba? Xivutiso xa Davhida a xi nga djuli ku hlaya leswaku a a nga ha na lipfumelo. Ntsrhaku ka loko a hambe xivutiso lexi, a tlhamuxele ndlela leyi a a wu dumba ha yone ntamu wa Yehovha wa ku huluxa ni leswaku Yehovha a a ta tama a mu tovokisa, nakone Yehovha a tame a mu tovokisa (Ps 22:23, 24, 27) Hi ndlela leyi fanaka, nambi leswi Yesu, “n’wana wa Davhida”, a xanisiwiki a mhandzrini ya nxanisa, a swi nga djuli ku hlaya swone leswaku a a nga ha yamukeliwi ha Xikwembu Nkulukumba.—Mt 21:9.

Xana Yesu o o phofula ku vavisa loku a a ku twa hi mhaka ya leswi Yehovha a tsrhikiki ku mu sizrelela akuva a kombisa ku dumbeka kwakwe? A nkongometo wa ku sungula wa Yehovha a a nga li wa kuva n’wanakwe a xaniseka a tlhela a fa. Leswo swi vileleki ntsrhaku ka loko Adamu na Evha va xandzrukile. Yesu a a nga yentxanga ntxhumu wa ku biha kambe a a fanela ku xaniseka a tlhela a fa akuva a hlamula xihehlo xa Sathana ni kuva a nyikela xitizrulo akuva a hakela leswi vhanu va swi lahliki. (Mr 8:31; 1Pe 2:21-24) Leswo a swi to yentxeka ntsena loko Yehovha hi nkama wa kukazri a tsrhika ku sizrelela Yesu hi khambi dzra ku sungula a wuton’wini byakwe.

Xana Yesu o o dzringisa ku pfuna valandzreli vakwe akuva va twisisa leswaku ha yini Yehovha a pfumelele ku va a dlayiwa hi ndlela liyani? * Yesu a a swi tiva leswaku a ku fa a mhandzrini ya nxanisa a swi ta khunguvanyisa vanyingi. (1Ko 1:23) Kambe loko valandzreli vakwe a vo beka miyanakanyu ka xivangelo xa lifu dzrakwe a va ta swi twisisa leswaku dzri tlhamuxela yini. (Ga 3:13, 14) A va ta mu vona swanga Muhuluxi ku nga li mudohi.

Swi nge na mhaka leswaku he xini xivangelo lexi yentxiki Yesu a hlaya mazritu lawa, a a swi tiva leswaku leswi a a swi yentxa a ku li ku zrandzra ka Yehovha. Ntsrhakunyana ka loko a hlaye mazritu ya psalma dzroledzro, Yesu a te: ‘Swi hetisekile.’ (Yh 19:30; Lk 22:37) Kuva Yehovha a tsrhike ku sizrelela Yesu hi nkama wa kukazri, swi yentxi Yesu a hetisisa hinkwaswu leswi a zrumiwiki kuva a swi yentxa la misaveni, nakone a pfumeleli leswaku ku hetiseka hinkwaswu leswi tsraliwiki mayelanu na yene ‘a nawini wa Moxe ni le Vaprofetini, ni le Mapsalmeni’.—Lk 24:44.