1. I yini leswi Yehovha a swi vonaka ka vhanu vakwe?

YEHOVHA XIKWEMBU NKULUKUMBA a ‘tsrhavela vhanu vakwe’. (Ps 149:4) Leswo swi hi tsrhavisa ngopfu swinene! Yehovha awa ma vona matsrhamela yezru lamanene; a vona wuswikoti byezru a tlhela a hi kokela kwakwe. Loko hi tama hi dumbeka kwakwe, a ta tama a va kusuhi na hine hi la ku nga helikiki!—Yh 6:44.

2. Ha yini vambeni swi va kazratela ku kholwa leswaku Yehovha awa va zrandzra?

² Vambeni va li: “Na swi tiva leswaku Yehovha awa va zrandzra vhanu vakwe swanga ntlawa, kambe i yini xi nga ni tiyisekisaka leswaku a ni nyika lisima mine hi ku kongoma?” I yini xi nga ha yentxaka mhunu a tivutisa leswo? Oksana *, lweyi a xanisekiki ngopfu a wutsrongwanini byakwe, a li: “A ni nyonxe ngopfu loko ni babatisiwa, ni tlhela ni sungula ku phayona. Kambe a ntsrhaku ka 15 wa malembe, ni sungule ku dzrimuka mintxhumu ya ku biha leyi ni yentxekeliki a wutsrongwanini. Ni tibyele leswaku Yehovha a a nga ha ni yamukeli nakone a ni nga ha faneliwi hi lizrandzru dzrakwe.” Yua, phayona ledzri na dzrone dzri kumaniki ni swikazratu a wutsrongwanini, a li: “Ni nyiketele wutomi byanga ka Yehovha hikusa a ni djula ku mu tsrhavisa. Kambe a ni tiyiseka leswaku a nge txhuki a ni zrandzrile.”

3. Hi yini leswi hi taka swi vona ka xidondzro lexi?

³ Ku fana ni vakriste va ku dumbeka lava ha ha ka ku vulavula ha vone, u mu zrandzra ngopfu Yehovha kambe u nga ha ganaganeka leswaku na yene awa ku zrandzra. Ka xidondzro lexi, hi ta hlamula swivutiso swibidzri: Ha yini u fanela ku kholwiseka leswaku Yehovha a zron’weka ngopfu ha wene? Nakone i yini lexi nga ku pfunaka loko u khomiwa hi mimpimiso leyi hoxekiki?

4. Ha yini swi ni khombo ku ganaganeka leswaku Yehovha awa hi zrandzra?

⁴ Lizrandzru i ntamu lowukulu lowu kutxanaka. Loko hi kholwiseka leswaku Yehovha awa hi zrandzra a tlhela a hi pfuna, hi ta susumeteleka ku mu tizrela hi mbilu hinkwayu nambi loko hi langusana ni swikazratu swa wutomi. Hi tlhelo dzrimbeni, loko hi ganaganeka leswaku Yehovha awa zron’weka ha hine, a ‘ntamu [wezru wu ta va] wutsrongo’. (Pr 24:10) Nakone loko hi hela ntamu hi tlhela hi nga ha kholwi leswaku Xikwembu Nkulukumba awa hi zrandzra, Sathana a ta hi hlasela hi ku nabyala.—Ef 6:16.

5. Xana u ganaganeka hi lizrandzru dzra Xikwembu Nkulukumba swi va khumbise kuyini vambeni?

⁵ Ku ganaganeka swi tsranise lipfumelo dzra vakriste vambeni va ku dumbeka va le masikwini yezru. Nkulu wa kukazri, lwa vitaniwaka James, a li: “Nambi leswi a ni tizrela Betele ni tlhela ni wu nyonxela ntizro wanga wa ku seketela nsimu ka bandla dzra lidzrimi dzrimbeni, a ni tivutisa kumbe Yehovha awa ma yamukela magandzrelo yanga ha kunene. Ku be nkama ni tivutisa kumbe Yehovha awa swi yingiseta swikhongoto swanga kumbe im-him.” Eva, lweyi na yene a nga ka ntizro wa nkama hinkwawu, a li: “Ni dondzre leswaku swi ni khombo ku pimisa leswaku Yehovha a nga hi zrandzri hikusa swi khumba hinkwaswu leswi hi swi yentxaka akuva hi mu tizrela. Leswo swi khumba ndlela leyi u yi vonaka ha yone mintxhumu ya moya swi tlhela swi ku yentxa u nga ha swi naveli ku tizrela Yehovha.” Michael, lweyi a nga phayona dzra nkama hinkwawu nakone a tizraka swanga nkulu wa bandla, a li: “Loko u nga kholwi leswaku Xikwembu Nkulukumba awa zron’weka ha wene, u ta mu lahlekela.”

6. Xana hi fanela ku yentxa yini loko hi sungula ku buyeliwa hi miyanakanyu ya leswaku Xikwembu Nkulukumba a nga hi zrandzri?

⁶ Mimfambu leyi yi kombisa ndlela leyi ku pimisa leswaku Yehovha a nga hi zrandzri swi nga honaka ha yone lipfumelo dzrezru. Kambe xana hi fanela ku yentxa yini loko hi sungula ku buyeliwa hi miyanakanyu ya leswaku Xikwembu Nkulukumba a nga hi zrandzri? Hi fanela ku yi bakanya hi ku kahlula! Kombela Yehovha a ku pfuna ku siva ‘miyanakanyu’ leyo yi ku suselaka ku zrula hi ku ‘zrula ka Xikwembu Nkulukumba loku bekisaka mbilu yaku ni miyanakanyu yaku’. (Ps 139:23; Flp 4:6, 7) Nakone, dzrimuka leswaku a wu wuswaku. Vamakwezru vambeni va ku dumbeka va lwisana ni ku titwa hi ndlela leyi hoxekiki. Nambi vatizreli va Yehovha va nkama lowu khalutiki va lwisane ni matitwela lawo. Vona leswi hi nga swi dondzraka ka xikombiso xa mupostola Pawulo.

7. Xana he swini swikazratu leswi Pawulo a lwisaniki na swone?

⁷ Xana u pfana u hetiwa ntamu hi kola ka ku taleliwa hi mintizro, lakakuva u swi vona swi kazrata ku yi hetisisa hinkwayu? Loko swi li tanu, u nga mu twisisa Pawulo. A a hlatiyelisiwa, ku nga li hi bandla dzrin’we ntsena kambe hi ‘mabandla hinkwawu’. (2Ko 11:23-28) Xana u talisa ku suseliwa ku nyonxa kwaku hi mavabyi lama nga dahekiki? Pawulo a a tsrhamela ku kazratiwa hi “mutwa a nyameni”, lowu ku nga ha vaka ku ve xivavu xa le nyameni, nakone a a swi navela swinene ku dahiwa. (2Ko 12:7-10) Xana u hetiwa ntamu hi leswi u hlulekaka ku swi yentxa? Pawulo na yene a a pfana a titwa hi ndlela leyo. A tihlaye “mhunu wa khombo” hi leswi minkama hinkwayu a a tsrhamela ku lwisana ni ku pfumala ku hetiseka kwakwe.—Ro 7:21-24.

8. I yini lexi pfuniki Pawulo ku lwisana ni swikazratu swakwe?

⁸ Nambi loko a kumana ni mindzringo ya ku hambanahambana ni swiyimu leswi hetanaka ntamu, Pawulo a tame a tizrela Yehovha. I yini lexi mu nyikiki ntamu wa ku yentxa leswo? Nambi leswi a a swi tiva leswaku a nga hetisekanga, a a ni lipfumelo ledzri tiyiki ka xitizrulo. A a xi tiva ha hombe xidumbiso xa Yesu lexi liki ‘mani na mani lweyi a pfumelaka ku [Yesu] a kuma wutomi lebyi nga gamikiki’. (Yh 3:16; Ro 6:23) Nakunene, Pawulo a a li mun’we wa lava kombisaka lipfumelo ka xitizrulo. A a kholwiseka ka leswaku Yehovha a lulamele ku dzrivalela nambi lava yentxiki swidoho leswikulu loko va tisola.—Ps 86:5.

9. Hi dondzra yini ka mazritu ya Pawulo lama nga ka Ba-le-Galatia 2:20?

⁹ Handle ka leswo, Pawulo a a ni lipfumelo ka ntamu wa lizrandzru dzra Xikwembu Nkulukumba ledzri a dzri kombisiki ha Kriste. (Dondzra Ba-le-Galatia 2:20.) Xiya mazritu lama tiyisanaka a wugan’wini bya ndzrimana leyi. Pawulo a te: ‘N’wana wa Xikwembu Nkulukumba, lwa nga ndzri zrandzra a va a tinyiketa ha mine.’ Pawulo a a nga pimisi leswaku Xikwembu Nkulukumba o zrandzra vhanu va kukazri ntsena. A nga pimisanga swa ku fana ni leswi: “Na swi vona leswi nga yentxaka Yehovha a zrandzra vamakwezru, kambe mine, a nge ni zrandzri.” Pawulo a dzrimuxe va le Roma, a ku: ‘Xikwembu Nkulukumba a vonekisi lizrandzru lakwe ku hine hi leswi Kriste a nga hi fela na he he swihoni.’ (Ro 5:8) Lizrandzru dzra Xikwembu Nkulukumba a dzri na mindzrilakana!

10. Hi dondzra yini ka Ba-le-Roma 8:38, 39?

¹⁰ Dondzra Ba-le-Roma 8:38, 39. Pawulo a a kholwiseka hi ku helela hi ntamu wa lizrandzru dzra Xikwembu Nkulukumba. A tsrale leswaku ‘a ku na xa ntxhumu lexi taka kota ku hi tsravukanisa ni lizrandzru la Xikwembu Nkulukumba’. Pawulo a a yi tiva ndlela leyi Yehovha a lehisiki  mbilu ha yone loko a tizrisana ni Va-israyele. Nakone a a yi tiva ndlela leyi Yehovha a mu kombisiki timpswalu ha yone. Hi nga songa mazritu ya Pawulo hi ndlela leyi: ‘Leswi Yehovha a zrumeliki n’wanakwe akuva a ta ta fela mine, xana na ha ni xivangelo xa ku ganaganeka hi lizrandzru dzrakwe?’—Ro 8:32.

11. Nambi leswi Pawulo a yentxiki swidoho swa ku fana ni leswi nga ka 1 Timoteo 1:12-15, ha yini a a tiyiseka leswaku Xikwembu Nkulukumba awa mu zrandzra?

¹¹ Dondzra 1 Timoteo 1:12-15. Ha tiyiseka leswaku ku ve ni minkama leyi Pawulo a a kazratiwa hi leswi a swi yentxiki khale. A tivitane mudohi ‘lwenkulu’, nakone a swi hlamalisi! Na a nge si na tiva xihlayelamfuzri, Pawulo a va xanise ngopfu vakriste a madoropeni hinkwawu, a pfulela van’we djele, a tlhela a seketela ku dlayiwa ka vambeni. (Min 26:10, 11) Xana wa yi yanakanya ndlela leyi Pawulo a a ta titwa ha yone loko a o tivana ni mumpshwa wa mukriste lweyi vapswele vakwe va dlayiwiki hi mhaka yakwe? Pawulo a a tisola hi swidoho swakwe, kambe a a swi tiva leswaku a a nge na ku swi txintxa leswi yentxekiki. A pfumelile leswaku Kriste a a mu felile, nakone a tsrale leswi hi ku tiyiseka: ‘Hi timpswalu ta Xikwembu Nkulukumba ndzri leswi ndzri nga swone.’ (1Ko 15:3, 10) Hi dondzra yini? Pfumela leswaku Kriste a ku felile nakone a ku pfulele ndlela ya ku va ni wuxaka lebyi tiyiki bya ximhunu na Yehovha. (Min 3:19) Swi nga yentxeka u titwa nandzru hi swihoxo leswi u samiki u swi yentxa, na wu li Mboni ya Yehovha kumbe im-him. Kambe leswi nga swa lisima ka Xikwembu Nkulukumba hi leswi hi swi yentxaka swoswi ni leswi ha ha taka swi yentxa, ku nga li swihoxo leswi khalutiki.—Eza 1:18.

12. Xana mazritu lama kumekaka ka 1 Yohan 3:19, 20, ma nga hi pfunisa kuyini loko hi titwa hi nga pfuni ntxhumu hi tlhela hi nga faneliwi hi ku zrandzriwa?

¹² Loko u pimisa hi kuva Yesu a fele ku sula swidoho swaku, u nga ha tibyela leswi: ‘A ni faneliwi hi ntxhumu wa lisima wa nga hi lowo.’ I yini lexi nga ha ku yentxaka u titwa hi ndlela leyo? Mbilu yezru ya ku pfumala ku hetiseka yi nga  ha hi kanganyisa, yi hi yentxa hi titwa hi nga pfuni ntxhumu hi tlhela hi nga faneliwi hi ku zrandzriwa. (Dondzra 1 Yohan 3:19, 20.) Loko hi titwa hi ndlela leyo, hi fanela ku dzrimuka leswaku ‘Xikwembu Nkulukumba i nkulu a timbilwini tezru’. Lizrandzru ni ku dzrivalela ka Papayi wezru wa le matilweni i swikulu ngopfu swinene ku tlula ndlela yini na yini ya ku biha leyi hi titwaka ha yone leyi nga ha vaka yi tumbele a timbilwini tezru. Hi fanela ku tidondzrisa ku kholwa leswaku Yehovha awa hi zrandzra. Akuva hi kota ku yentxa leswo, hi fanela ku dondzra Zritu dzrakwe nkama ni nkama, hi khongota kwakwe wusiku ni nhlikanhi hi tlhela hi titlhanganisa ni vhanu vakwe va ku dumbeka minkama hinkwayu. Ha yini leswo swi li swa lisima swinene?

13. Xana ku dondzra Zritu dzra Xikwembu Nkulukumba swi nga hi pfunisa kuyini? (Tlhela u vona bokisi ledzri liki “ Ndlela Leyi Zritu Dzra Xikwembu Nkulukumba Dzri Va Pfunaka Ha Yone”.)

¹³ Dondzra Zritu dzra Xikwembu Nkulukumba siku ni siku. Ku yentxa leswo, swi ta ku pfuna ku vona wumhunu bya Yehovha bya ku xonga hi ku khanya. U ta swi vona leswaku a ku zrandzra ngopfu. Ku yanakanyisisa hi xiyenge xa kukazri xa Zritu dzra Xikwembu Nkulukumba siku ni siku swi nga ku vaningela miyanakanyu akuva u ‘luleka’ mbilu ni mapimisela yaku. (2Tm 3:16) Nkulu wa kukazri lweyi a vitaniwaka Kevin, lweyi a lwisaniki ni ku titwa na a nga pfuni ntxhumu, a li: “Ku dondzra ni ku yanakanyisisa hi Amapsalma 103, swi ni pfune ku lulamisa mapimisela yanga ni ku twisisa ndlela leyi Yehovha a ni vonaka ha yone hakunene.” Eva, lweyi hi khaneliki ha yene a ku sunguleni, a li: “Ni pfala siku hi ku yanakanyisisa hi mazritu ya Yehovha na ni li a mbangwini lowu zruliki. Leswo swi ni zrulelisa mbilu swi tlhela swi tiyisa lipfumelo dzranga.”

14. Xana xikhongoto xi nga hi pfunisa kuyini?

¹⁴ Khongota minkama hinkwayu. (1Te 5:17) Akuva wunghanu bya vhanu byi tiya, minkama hinkwayu va fanela ku bulisana na swi sukela a mbilwini. Swa fana ni wunghanu byezru na Yehovha. Loko hi mu byela leswi hi swi twaka, hi swi pimisaka ni leswi swi hi kazrataka hi xikhongoto, hi kombisa leswaku ha mu dumba ni leswaku ha swi tiva leswaku awa hi zrandzra. (Ps 94:17-19; 1Yh 5:14, 15) Yua, lweyi hi buliki ha yene a ku sunguleni, a li: “Loko ni khongota, ni zama kuva ni nga hlayi ntsena leswi ni swi yentxiki siku ledzro. Ni tiphofula ka Yehovha, ni mu byela ndlela leyi ha kunene ni titwaka ha yone. Ha katsrongokatsrongo, ni sungule ku vona Yehovha swanga Papayi lweyi a zrandzraka vanakwe hakakunene, ku nga li muzrangeli wa komponi ya kukazri.”—Vona bokisi ledzri liki “ U Dzri Dondzrile?”

15. Xana Yehovha a swi kombisisa kuyini leswaku awa zron’weka hi mun’wana ni mun’wana wezru?

¹⁵ Titlhanganise ni vanghanu va ku dumbeka; vone i swihiwa leswi pfaka ka Yehovha. (Yk 1:17) Papayi wezru wa le matilweni a kombisa leswaku awa zron’weka ha hine hi ku hi nyika ndangu wa moya wa vamakwezru va xinuna ni va xisati lava va hi zrandzraka minkama hinkwayu. (Pr 17:17)  Ka papela dzrakwe ka Vakolosa, Pawulo a phate vakriste va kukazri lava mu seketeliki, a va vitana ‘vamiyeti vanga’. (Kl 4:10, 11) Nambi Kriste Yesu a wu vilelile mpfunu, nakone a wu tlangelile nseketelo lowu a kombisiwiki wone hi tintsrumi xikan’we ni vanghanu vakwe va lani misaveni.—Lk 22:28, 43.

16. Xana vanghanu va ku dumbeka va nga hi pfunisa kuyini kuva hi tsrhindzrekela ka Yehovha?

¹⁶ Xana wa wu djuletela u tlhela u wu yamukela mpfunu lowu humaka ka vanghanu vaku va le bandleni? Ku va hi byela munghanu wezru lwa wupfiki leswi hi kazrataka, a swi hlayi leswaku a lipfumelo dzrezru a dzri tiyanga; a matsrhan’wini ya leswo, ku va byela swi nga hi sizrelela. Vona leswi James, lweyi hi khaneliki ha yene a ku sunguleni, a swi hlayaka: “Wunghanu lebyinene ni vakriste lava wupfiki byi ni pfune ngopfu swinene. Loko ni kazratiwa hi miyanakanyu leyi hoxekiki, vanghanu lavo va lisima va ni yingiseta ha hombe va tlhela va ni dzrimuxa leswaku va ni zrandzra. Hi kola kwavu, ni kota ku vona ndlela leyi Yehovha a ni zrandzraka ha yone hi ku kongoma a tlhela a ni hlayisa.” Hakunene, i swa lisima kuva hi txutxela hi tlhela hi hlayisa wunghanu ni vamakwezru va xinuna ni va xisati!

17-18. Hi fanela ku yingiseta mani, nakone ha yini?

¹⁷ Sathana a djula ku hi godolisa ku lwela ku yentxa leswi nga swinene. A djula hi kholwa leswaku Yehovha a nga hi zrandzri, ni leswaku a hi faneliwi hi ku huluxiwa. Kambe hi lani hi swi voniki ha kone, ha swi tiva leswaku lawo i madzrimi ya makulu swinene.

¹⁸ Yehovha awa ku zrandzra. U wa lisima swinene a matihlweni yakwe. Loko u mu yingiseta, u ta tama u ‘tsrhama a lizrandzrwini lakwe’ hi la ku nga helikiki, ku fana na Yesu. (Yh 15:10) Xileswo, u nga mu yingiseti Sathana, nakone u nga yingiseti mbilu yaku loko yi ku yavanyisa. A matsrhan’wini ya leswo, yingiseta Yehovha, lweyi a vonaka leswinene ka mun’wana ni mun’wana wezru. Kholwiseka leswaku a tsrhavela vhanu vakwe, ku patsra na wene!