1. Hi ku ya Mattheo 24:9, ha yini hi nga fanelanga hi hlamala loko misava yi hi venga?

YEHOVHA a hi vumbe akuva hi kombisanana lizrandzru. Xileswo, loko mhunu wa kukazri a hi venga ha vaviseka nakone swi nga ha yentxeka hi txhava. Hi xikombiso, makwezru mun’we lweyi a vitaniwaka Georgina lweyi a tsrhamaka a Europa, a te: “Loko na ha ni 14 wa malembe, mamana a a ni nyenya hi leswi ni tizrelaka Yehovha. Ni titwe na ni li wuswanga ni tlhela ni pimisa leswaku kumbe xana a ni nga li mhunu lwenene.” * Makwezru lweyi a vitaniwaka Danilo a tsrale leswi: “Loko masotxha ma ni bile, ma ni zruketela, ma tlhela ma ni vavisa, hi leswi ni nga mun’we wa Timboni ta Yehovha ni txhave ngopfu ni tlhela ni titwa na ni nga pfuni ntxhumu.” Loko vhanu va hi venga, ha vaviseka kambe leswo a swi hi hlamalisi. Yesu a hlaye leswaku a hi ta vengiwa.​—Dondzra Mattheo 24:9.

2-3. Ha yini valandzreli va Yesu va vengiwa?

² Ha yini valandzreli va Yesu va vengiwa hi misava? Hikusa ku fana na, Yesu ‘a hi va misava’. (Yh 15:17-19) Xileswo, nambi loko hi yi bekela xitxhavu mimfumu, a hi yi gandzreli kumbe ku gandzrela swifaniso leswi yimelaka mimfumu yoleyo. Hi gandzrela Yehovha ntsena. Hi seketela Mfumu wa Xikwembu Nkulukumba wa ku lulama​—ku nga leswi Sathana ni vhanu vakwe va lwisanaka na swone hi ku helela. (Gn 3:1-5, 15) Hi zrezrela vhanu leswaku o va Mfumu wa Xikwembu Nkulukumba ntsena lowu taka helisa swikazratu hinkwaswu swa vhanu nakone wu ta helisa mimfumu hinkwayu leyi lwisanaka na wone. (Dn 2:44; Mpf 19:19-21) Madzrungula lawa i manene ka lava ku zrula, kambe ma bihile ka lavamfani.​—Ps 37:10, 11.

 ³ Hi tlhela hi nyenyiwa hi leswi hi hanyaka hi milawu ya Xikwembu Nkulukumba ya ku lulama. Loko hi dzringanisa milawu ya Xikwembu Nkulukumba ni mahanyela ya misava leyi, hi vona ku hambana lokukulu. Hi xikombiso, Xikwembu Nkulukumba a lovise Sodoma na Gomora hi kola ka mahanyela yavu ya ku biha. Kambe vhanu namunhla va hanya hi ku pfumelelana ni mahanyela wolawu ya ku biha! (Yd 7) Hi leswi hi landzraka milawu ya Bibele mayelanu ni mahanyela ya ku biha, vhanu vanyingi va hi poyila, va tlhela va hlaya leswaku hi ni xihlawuhlawu!​—1Pe 4:3, 4.

4. He wani matsrhamela lawa ma nga hi nyikaka ntamu wa ku tiyiselela livengo?

⁴ I yini lexi nga hi pfunaka loko vhanu va hi zruka va tlhela va hi venga? Swi djula ku va hi vani lipfumelo ledzri tiyiki dzra leswaku Yehovha a ta hi pfuna. Ku fana ni xitlhangu, a lipfumelo dzrezru dzri nga ‘timela mintumbana hinkwayu lemi pfuzraka ya nala’. (Ef 6:16) Kambe hi djula ku va ni ntxhumu wun’wana handle ka lipfumelo. Hi djula ku va ni lizrandzru. Ha yini? Hikusa a lizrandzru ‘a li lebyi’, li byatsrha hinkwaswu, li tiyiselela hinkwaswu. (1Ko 13:4-7, 13) A hi voneni ndlela leyi ku zrandzra Yehovha, vapfumelikulozri nambi ku li valala vezru swi nga hi pfunaka ha yone ku va hi tiyiselela livengo.

5. Xana lizrandzru ledzri Yesu a a li na dzrone hi Yehovha dzri mu pfunise kuyini?

⁵ A wusikwini ledzri valala va Yesu va mu dlayiki ha dzrone, a byele valandzreli vakwe a ku: ‘Ndzri zrandzra [Papayi] ni leswaku dzri ta tizra swanga hi leswi [Papayi] a ndzri leletisiki xiswone.’ (Yh 14:31) Lizrandzru ledzri Yesu a a li na dzrone ha Yehovha dzri mu pfune ku va a kuma ntamu lowu a a wu vilela akuva a kota ku langusana ni swikazratu leswi a swa ha ta. Lizrandzru dzrezru ha Yehovha dzri nga hi pfuna ku yentxa leswi fanaka.

6. Hi ku ya Ba-le-Roma 5:3-5, xana malandzra ya Yehovha ma titwisa ku yini hi ku tiyiselela livengo dzra misava?

⁶ Lizrandzru ledzri malandzra ya Yehovha ma nga na dzrone ha yene, minkama hinkwayu dzri ma pfuna ku kota ku tiyiselela ku xanisiwa. Hi xikombiso, loko Huvo leyi tlakukiki ya ku tsrema timhaka ya Vayuda yi yimise vapostola ku zrezra, lizrandzru dzravu ha Xikwembu Nkulukumba dzri va susumetele ku ‘yingela Xikwembu Nkulukumba ku tlula vhanu’. (Min 5:29; 1Yh 5:3) Lizrandzru dzroledzro ledzri tiyiki, dzri tlhela dzri pfuna vamakwezru vanyingi namunhla akuva va tiyiselela ku xanisiwa hi mimfumu leyi nga ni ntamu ni tihanyi. Xileswo, loko misava yi hi venga, a matsrhan’wini ya ku hela ntamu, ha tsrhava.​—Min 5:41; dondzra Ba-le-Roma 5:3-5.

7. Xana hi fanela ku yentxa yini loko maxaka yezru ma hi kaneta?

⁷ Swi nga yentxeka mindzringo yimbeni leyikulu leyi hi langutanaka na yone yi vangiwa hi swizro swa ndangu wezru. Loko hi sungula ku nyonxela xihlayelamfuzri xa Bibele, swi nga ha yentxeka swizro swimbeni swa ndangu wezru swi pimisa leswaku hi kanganyisiwile. Kasi vambeni va nga ha pimisa leswaku hi sunguliwe hi lihlanyi. (Dzringanisa na Marka 3:21.) Va nga ha hi ba, va hi zruka, kumbe va hi hlongola kaya. Leswo a swi fanelanga swi hi hlamalisa hikusa Yesu a te: ‘A valala va mhunu a ta va yindlu yakwe.’ (Mt 10:36) I ntiyiso leswaku nambi loko maxaka yezru ma hi hlupha a hi ma voni swa nga valala vezru. A matsrhan’wini ya leswo loko lizrandzru dzrezru ha Yehovha dzri ya dzri kula a lizrandzru hi vhanu vambeni dzri ya dzri kula. (Mt 22:37-39) Kambe a hi nga ti za hi honisa mahanyela yezru lawa ma fambisanaka ni Bibeleni minsinya ya milawu ya dzrone hi ku djula ku nyonxisa vhanu.

8-9. I yini lexi pfuniki makwezru wa kukazri ku tiyiselela nkaneto lowukulu?

⁸ Georgina, lweyi hi buliki ha yene ku sunguleni, a swi kotile ku yima a tiyile loko mamana  wakwe a mu kaneta hi ndlela leyikulu. Georgina, a li: “Mine na mamana hi sungule ku dondzra Bibele ni Timboni ta Yehovha. Kambe ntsrhaku ka 6 wa tihweti, loko ni djule ku sungula ku ya mintlhanganwini, mamana a txintxe swa kola ni kola a va a sungula ku ni kaneta. Ni gungule leswaku mamana a a titlhanganisa ni madukwa nakone a a tizrisa swihehlo swavu swa madzrimi loko a khanela na mine. A a tlhela a ni zruketela, a ni koka misisi, a ni tlhimba mankolo a tlhela a txukumeta ni mabuku yanga. Loko ni tlhanganise 15 wa malembe ni babatisiwile. Mamana a dzringise ku ni yimisa ku tizrela Yehovha hi ku ya ni beka ka muti wa ku daha vampshwa lava ngeke na mahanyela manene, lani vambeni va nga vadzrahi va mbangi ni swigevengu. A nkaneto wu vavisa ngopfu, ngopfungopfu loko wu vangiwa hi mhunu lweyi a a fanela ku ku zrandzra ni ku ku hlayisa.

⁹ Xana Georgina a yentxe yini? A li: “A siku ledzri mamana a nga sungula ku ni pfukela ha dzrone, a na ha ku heta ku dondzra Bibele hinkwadzru. A ni kholwiseka hi ku helela leswaku ni kume ntiyiso, a ni titwa kusuhi swinene na Yehovha. A ni tolovela ku khongota ka Yehovha nakone yene a a ni yingela. Na na ha tsrhama ka muti luwani, makwezru mun’we wa xisati a ni zrambe ku ya kaya kwakwe hi va hi dondzra Bibele xikan’we. Hi nkama wolowo, ni tiyisiwe ngopfu hi vamakwezru vaxinuna ni vaxisati a Ndlwini ya Wugandzreli. Va ni yentxe xizro xa ndangu wavu. Ni tivonele hi yanga leswaku Yehovha a ni ntamu ku tlula lava va hi kanetaka, nambi kova mani.”

10. I yini lexi hi nga tiyisekaka ha xone ha Yehovha Xikwembu Nkulukumba wezru?

¹⁰ Mupostola Pawulo a tsrale leswaku a ku na xantxhumu lexi ta ka kota ku hi ‘tsravukanisa ni lizrandzru la Xikwembu Nkulukumba lo li nga ku Kriste Yesu, Hosi yezru’. (Ro 8:38, 39) Nambi leswi hi nga ha xanisekaka ku dzringana nkama wa kukazri, minkama hinkwayu Yehovha kusuhi na hine akuva a hi txhavelela ni ku va a hi tiyisa. Nakone hi lani hi swi voniki ha kone ka mfambu Georgina, Yehovha a tlhela a hi pfuna hi ku tizrisa ndangu wezru wa lisima ku nga vamakwezru vaxinuna ni vaxisati a bandleni.

11. Xana lizrandzru ledzri Yesu a dzri hlayiki ka Yohan 15:12, 13, a dzri ta va pfunisa kuyini vadondzrisiwa vakwe? Nyikela xikombiso.

¹¹ Ka wusiku lebyi Yesu a fiki ha byone a dzrimuxe vadondzrisiwa vakwe leswaku va zrandzrananana. (Dondzra Yohan 15:12, 13.) A a swi tiva leswaku ku tinyiketela hi lizrandzru a swi ta va pfuna leswaku va va ni wumun’we ni ku tiyiselela livengo dzra misava. Vona xikombiso xa bandla dzra le Thesalonika ku sukela loko  dzri simekiwile a swizro swa dzrone swi xanisiwile, nambi tano vamakwezru lavo va ve swikombiso leswinene swa ku dumbeka ni lizrandzru. (1Te 1:3, 6, 7) Pawulo a va kutxe ku tama va kombisa lizrandzru nambi ku va va ‘yentxa hi ku tlulisa’. (1Te 4:9, 10, BX) Lizrandzru a dzri va susumetela ku txhavelela lava nga ni gome ni ku seketela lava heliki ntamu. (1Te 5:14) Va wu landzrile nkongomiso wa Pawulo hikusa ka papela dzrakwe dzra wubidzri, ledzri a dzri tsraliki loko ku khalute lembe a hlaye leswi ha vone: ‘Ni lizrandzru dzra ku zrandzrana kwenu, hinkwenu li kulaka.’ (2Te 1:3-5) Lizrandzru dzravu dzri va pfune ku tiyiselela swikazratu ni tinxanisa.

12. Hi nkama wa yimpi vamakwezru va tiko dzra kukazri va kombisanane lizrandzru hi ndlela yini?

¹² Vona xikombiso xa Danilo lweyi hi buliki ha yene ku sunguleni ni xa nsati wakwe. Nambi loko yimpi yi tlhase ka doropa dzravu, va tame va ya mintlhanganwini, va zrezra hi lani va nga kotaka ha kone ni ku yavela vamakwezru swakuda leswi a va li na swone. Hiloko siku dzrimbeni, Danilo a tsrhindzrekeleliwa hi masotxha lama hlomiki. Danilo, a li: “Va ni sindzrise ku tsrhika ku va mboni, loko ni yalile vani bile, va va va ni txhavisela, va balesela tinhlavu ti khaluta hi henhla ka nhloko yanga, va ku va ta ni dlaya. Na va nga si suka va ni txhaviselile va ku va ta tlhela va buya va ta ta pfinya nkatanga. Kambe hi ku kahlula vamakwezru va hi khwelise xitimela hi ya ka doropa dzrimbeni. Ni nga ti dzrivala lizrandzru ledzri vamakwezru lavayani lava zrandzrekaka va hi kombisiki dzrone. Loko hi xikile vamakwezru va doropa ledzro,va hi nyike swakuda, va ni pfuna ku kuma ntizro ni mbangu wa ku tsrhama! Swanga mihandzru na hine hi kote ku zruzrela Timboni timbeni leti a ti tsrutsruma mimbangu ya yimpi.” Mimfambu ya ku fana ni leyi yi hi komba leswaku Lizrandzru dzra wukriste dzringa hi pfuna ku tiyiselela livengo.

13. Xana moya wa Xikwembu Nkulukumba wu nga hi pfuna hi ndlela yini ku va hi tiyisela a ntizrweni wa Yehovha nambi loko vhanu va hi venga?

¹³ Yesu a byele valandzreli vakwe ku zrandzra valala vavu. (Mt 5:44, 45) Xana swa nabyala ku yentxa leswo? Ni kutsrongo! Kambe swa koteka hi mpfunu wa moya lowa ku xwenga wa Xikwembu Nkulukumba. Mihandzru ya moya yi patsra lizrandzru, ku lehisa mbilu, wunene ku nabyala ni ku tikhoma. (Ga 5:22, 23) Mahanyela lawo ma hi pfuna ku tiyiselela livengo. Vakaneti vanyingi va txintxa timbilu tavu hi leswi nuna lweyi a nga mupfumeli, nsati, n’wana, kumbe muvundzramani va kombisaka mahanyela wolawu lamanene. Vanyingi ka vakaneti volavo va kote nambi ku ndzruluka vamakwezru lava zrandzrekaka.  Xileswo, loko swi ku kazratela ku zrandzra lava ku vengaka hi leswi u tizrelaka Yehovha, khongota u kombela moya lowa ku xwenga. (Lk 11:13) Nakone kholwiseka hi ku helela leswaku, tindlela ta Xikwembu Nkulukumba minkama hinkwayu i tinene.​—Pr 3:5-7.

14-15. Xana a buku dzra Ba-le-Roma 12:17-21, dzri mu pfunise kuyini Yasmeen kuva a kombisa lizrandzru ka nuna wakwe nambi loko a mu kaneta hi ndlela ya tihanyi?

¹⁴ Vona xikombiso xa Yasmeen, lweyi tsrhamaka a Oriente Médio. Loko a ndzruluke Mboni ya Yehovha, nuna wakwe a a pimisa leswaku a kanganyisiwile, kutani a dzringise ku mu tsrhikisa ku tizrela Xikwembu Nkulukumba. A mu zruketelile a va a hlohlotela maxaka, mufundhisa ni n’anga akuva va mu txhavisela va hlaya leswaku a hohlota ndangu. Nuna wakwe a zruketele nambi vamakwezru na mintlhanganu yi li ku fambeni. Yasmeen a a tsrhamela ku dzrila hi leswi a a khomiwa hi ndlela ya ku biha hi nuna wakwe.

¹⁵ A ndlwini ya wugandzreli a ndangu wa Yasmeen wa moya a wu mu txhavelela wu tlhela wu mu tiyisa. Vakulu va mu kutxhe ku tizrisa mazritu ya Ba-le-Roma 12:17-21. (Dondzra.) Yasmeen, a li: “A xiyimu a xi bindzra. Kambe ni kombele Yehovha a ni pfuna, nakone ni yentxe leswi ni nga swi kotaka akuva ni tizrisa leswi Bibele dzri swi hlayaka. Xileswo, loko nuna wanga a txhela nsila a kozinheni ha mavomu akuva a ni khata, a no sula, loko a ni zruketela a ni hlamula hi ndlela ya ku zrula, loko a vabya a ni mu hlayisa.”

16-17. Hi nga dondzra yini ka xikombiso xa Yasmeen?

¹⁶ Yasmeen a tovokisiwile hi leswi a kombisiki lizrandzru ka nuna wakwe. Yene a li: “Nuna wanga a sungule ku ni dumba hi leswi a a swi tiva leswaku minkama hinkwayu a ni khanela ntiyiso, minkama hinkwayu loko hi bula hi ta wukhongoti awa ni yingiseta ha hombe, nakone hi bulile hi va hi pfumelelana leswaku a hi fanela ku vani ku zrula a ndangwini. Swoswi a tlhela a ni kutxa ku ya mintlhanganwini, wutomi bya ndangu wezru byi yampswe ngopfu swinene, nakone hi veni ku zrula a ndangwini. Ni navela leswaku nuna wanga a dondzra ntiyiso hi va hi tizrela Yehovha xikan’we.”

¹⁷ Xikombiso xa Yasmeen xi hi dondzrisa leswaku a lizrandzru ‘li pfumela hinkwaswu . . . li byatsra hinkwaswu’. (1Ko 13:4, 7) I ntiyiso leswaku a livengo dzrini ntamu nakone dzri nga ha hi vavisa, kambe a lizrandzru dzri ni ntamu wa ku tlula livengo. Lizrandzru ledzro dzri nga ha txintxa ndlela leyi vakaneti va hi vonaka ha yone. Ku tlula hinkwaswu dzri nyonxisa Yehovha. Nambi loko vakaneti vezru va hi venga hi nga tama hi nyonxa. Hi ndlela yini?

18. Ha yini hi nga nyonxaka nambi loko hi vengiwa?

¹⁸ Yesu a te: ‘N’wini ndjombo loko vhanu va ta n’wi venga.’ (Lk 6:22) Hine a hi hlawuli ku vengiwa, a hi swi zrandzri ku xanisiwa hi mhaka ya lipfumelo dzrezru. Kutani ha yini hi nga tsrhavaka nambi loko hi xanisiwa? Hi swivangelo swizrazru. Xa ku sungula, Loko hi tiyisela, ha yamukeliwa hi Xikwembu Nkulukumba. (1Pe 4:13, 14) Xa wubidzri, lipfumelo dzrezru dzri ya dzri tiya. (1Pe 1:7) Xa wuzrazru hi ni mukhandlu wukulu wa ku kuma wutomi lebyi nga helikiki.​—Ro 2:6, 7.

19. Ha yini vapostola a va tama va nyonxa nambiloko va biwile?

¹⁹ Ntsrhakunyana ka loko Yesu a pfuxiwile, vapostola vakwe va kume ku nyonxa loku Yesu a a ku hlayile. Ntsrhaku ka loko va biwile va va va tsrimbisiwa ku zrezra vone va tame va nyonxa. Ha yini? ‘Hi leswi va dzringaniwiki ni lava fanelaka ku soliwa hi nkonta ya vito dzra Yesu.’ (Min 5:40-42) Lizrandzru ledzri vapostola a va li na dzrone ha Yesu a dzri li dzrikulu, ku tlula ku txhava loku a va li na kone hi valala vavu. Va kombise lizrandzru dzroledzro hi ku tama va zrezra madzrungula lamanene. ‘Na va nga vanga zruteli’ kumbe ku yima. Vamakwezru vanyingi namunhla va tama va tizrela Yehovha hi ku dumbeka nambi loko va langutana ni swikazratu. Va swi tiva leswaku Yehovha a nge ti dzrivala a mintizro ni lizrandzru ledzri va dzri kombisaka hi kola ka vito dzrakwe.​—Hb 6:10.

20. I yini leswi hi ta ka swi vona ka xidondzro lexi landzrelaka?

²⁰ Na ha ha hanya ka misava leyi, a misava yi ta tama yi hi venga. (Yh 15:19) Kambe hi nga txhaveni. Hi lani hi ta ka swi vona ha kone ka xidondzro lexi landzrelaka, Yehovha “a ta tiyisa ni ku londzra” malandzra yakwe ya ku dumbeka. (2Te 3:3) Xileswo a a hi tameni hi zrandzra Yehovha, vamakwezru, nambi kuli valala vezru. Loko hi yentxa leswo hi ta tama hi va ni wumun’we hi tlhela hi tiya hi tlhelo dzra moya, hi ta dzrumisa vito dzra Yehovha hi tlhela hi kombisa leswaku lizrandzru dzri ni ntamu ku tlula livengo.