1. I vamani lava pfunisiki ku pfula bandla dzra le Filipi?

LOKO mupostola Pawulo, Silasi, Luka, na Timotewu va yendzrele muganga wa Filipi lowu a wu li hansi ka mfumu wa Roma, va kume vhanu vanyingi lava a va nyonxela zritu dzra Mfumu. Vazrezri lava va mune va ku hiseka va pfunise ku pfula bandla, nakone vadondzrisiwa hinkwavu va sungule ku tlhangana, kumbexana a kaya ka wansati mun’we wa mupfumeli lweyi a a ni malwandla, lweyi a a vitaniwa Lidiya.​—Min 16:40.

2. Hi swini swikazratu leswi bandla ledzro dzri langusaniki na swone ntsrhakunyana ka loko dzri pfuliwile?

² Hi nkamanyana bandla ledzro ledzrimpswha dzri sungule ku langusana ni swikazratu. Sathana a hlohlotele vhanu lava a va nyenya ntiyiso leswaku va honetela ntizro wa ku zrezra wa vakriste lava va ku dumbeka. Pawulo na Silasi va khomiwile, va pswhitiwa hi minkhavi va gama va petiwa djele. Loko va ntsrhunxiwile, va pfuxele vadondzrisiwa lavaya lavampswha akuva va va kutxa. Ntsrhaku ka leswo, Pawulo, Silasi, na Timotewu va siye muganga lowo kambe Luka swi tikomba a tame a tsrhama kone. Xana vamakwezru va bandla ledzro ledzrimpswha va yentxe yini? Hi ku pfuniwa hi moya wa Yehovha, vapfumeli lavampswha va tame va tizrela Yehovha hi ku hiseka. (Flp 2:12) Handle ka ku ganaganeka, Pawulo a a ni xivangelo lexinene xa ku nyonxa ha vone!

3. Hi ku ya hi Ba-le-Filipi 1:9-11, i yini leswi Pawulo a a swi kombela a swikhongotweni swakwe?

³ Kolomu ka khume dzra malembe ntsrhaku, Pawulo a tsralele bandla dzra le Filipi. Loko u dondzra papela ledzro, u nga hantla u vona lizrandzru ledzri Pawulo a a li na dzrone hi vamakwezru, a tsrale leswi: ‘Ndzra n’wi zrandzra hinkwenu hi lizrandzru la Kriste Yesu.’ (Flp 1:8) Ka papela dzroledzro, Pawulo a hlaye leswaku a a va kombelela ngopfu ka Yehovha hi xikhongoto. A a kombela  kuva Yehovha a va pfuna ku yandzrisa lizrandzru dzravu, va hlawula leswa lisima ngopfu, va nga vi na bati, va nga khunguvanyisi vambeni ni ku tama va beka mihandzru ya ku lulama. Handle ka ku ganaganeka wa pfumelelana na swone leswaku mazritu lawo ya Pawulo lama sukaka mbilwini ma nga hi pfuna namunhla. Xileswo, a hi dondzreni leswi Pawulo a swi tsraleliki va le Filipi. (Dondzra Ba-le-Filipi 1:9-11.) Ntsrhaku ka leswo, hi ta kambisisa tinhla leti a khaneliki ha tone ni ndlela leyi hi nga ti tizrisaka ha yone.

4. a) Hi ku ya hi 1 Yohan 4:9, 10, xana Yehovha a swi kombisise kuyini leswaku awa hi zrandzra? b) Xana hi fanela ku zrandzra Yehovha ku ya tlhasa kwini?

⁴ Yehovha a kombise leswi a hi zrandzrisaka xiswone hi ku zrumela N’wanakwe la misaveni akuva a hi fela leswaku hi dzrivaleliwa swihono swezru. (Dondzra 1 Yohan 4:9, 10.) Ndlela leyi Yehovha a hi zrandzraka ha yone i yikulu swinene lakakuva na hine hi susumeteleka ku mu zrandzra. (Ro 5:8) Kambe hi fanela ku mu zrandzra ku ya tlhasa kwini? Yesu a hlamule xivutiso lexo loko a byele mufarisi wa kukazri, a ku: ‘Zrandzra [Yehovha], Xikwembu Nkulukumba waku, hi mbilu yaku hinkwayu, ni hi hika dzraku hinkwadzru, ni hi ku yanakanya kwaku hinkwaku.’ (Mt 22:36, 37) Mbilu yezru a yi fanelanga ku va leyi yavaniki. A matsrhan’wini ya leswo, hi djula leswaku a lizrandzru dzrezru ka yene dzri kula siku dzrin’wana ni dzrin’wana. Pawulo a byele va le Filipi leswaku a lizrandzru dzravu dzri fanela ku ‘yandzrisiwa ngopfu-ngopfu’. I yini leswi hi nga swi yentxaka akuva hi yandzrisa lizrandzru dzrezru ka Yehova?

5. Xana hi nga dzri kulisisa kuyini lizrandzru dzrezru?

⁵ Akuva hi zrandzra Xikwembu Nkulukumba, ku djuleka hi mu tiva. Bibele dzri li: ‘Lwa nga zrandzrikiki a nga mu tivi Xikwembu Nkulukumba, hikusa Xikwembu Nkulukumba i lizrandzru.’ (1Yh 4:8) Mupostola Pawulo a kombise leswaku lizrandzru dzrezru ka Xikwembu Nkulukumba dzri ta kula loko hi djuletela ku kuma wutivi bya ntiyiso ni ku yingelisisa hinkwaku ka Yehovha. (Flp 1:9) Loko hi sungula ku dondzra Bibele, hi dondzre ku zrandzra Xikwembu Nkulukumba nambi leswi a hi nga tivi swinyingi mayelanu ni wumhunu byakwe bya ku xonga. Hi ku famba ka nkama, hi dondzre swinyingi mayelanu ni wumhunu byakwe, nakone lizrandzru dzrezru ka yene dzri ye dzri kula swinene. Kambe a hi swi djuli leswaku a lizrandzru ledzro dzri yima ku kula. Hi kola ka leswo hi vona ku dondzra ka Bibele ka siku ni siku xikan’we ni ku yanakanyisisa swanga yin’we ya mintxhumu leyi nga ya lisima a wuton’wini byezru!​—Flp 2:16.

6. Hi ku ya hi 1 Yohan 4:11, 20, 21, i yini leswi hi fanelaka ku swi yentxa akuva hi yandzrisa lizrandzru dzrezru?

⁶ Ndlela leyi Yehovha a hi zrandzraka swinene ha yone yi ta hi susumetela ku zrandzra vamakwezru. (Dondzra 1 Yohan 4:11, 20, 21.) Hi nga ha pimisa leswaku ku zrandzra vamakwezru i ntxhumu lowu wu taka tiyentxekela. Phela, hi vagandzreli va Yehovha nakone hi tikazratela ku yetisela wumhunu byakwe bya ku xonga. Hi landzrela xikombiso xa Yesu, lweyi a hi zrandzriki ngopfu lakakuva a nyikela wutomi byakwe hi nkonta yezru. Kambe, minkama yimbeni swi nga ha hi bindzrela ku yingiseta xileleto xa kuva hi zrandzrana. Vona leswi yentxekiki a bandleni dzra le Filipi.

7. I yini leswi hi swi dondzraka ka xilayu lexi Pawulo a xi nyikiki Evhodiya na Sintike?

⁷ Evhodiya na Sintike a va li vamakwezru va xisati lava hisekaka lava tizriki kusuhi na kusuhi na mupostola Pawulo. Kambe, swi nga yentxeka va pfumelele timhaka leti a va li na tone leswaku ti hona wunghanu byavu. Ka papela ledzri a dzri tsraleliki bandla ledzri vamakwezru lava va xisati a va tizrela ka dzrone, Pawulo a khanele hi ku kongoma ha Evhodiya na Sintike a tlhela a va nyika xilayu lexi twisisekaka xa leswaku a va fanela ku va ni ‘ku yanakanya kun’we’. (Flp 4:2, 3) Pawulo a tlhele a vona swi fanela ku nyikela xilayu xin’wana ka bandla hinkwadzru a  ku: ‘Yentxani hinkwaswu na n’wi nga n’unun’uti, n’wi nga kanetani.’ (Flp 2:14) Handle ka ku ganaganeka, xilayu lexi xa ku kongoma xa Pawulo a xi pfunanga vamakwezru lavabidzri va xisati ntsena kambe xi pfune bandla hinkwadzru ku tiyisa lizrandzru dzravu ka mun’wana ni mun’wana wa vone.

8. Hi xini xikazratu lexikulu lexi nga hi sivelaka ku zrandzra vamakwezru, nakone hi nga xi hlulisa kuyini?

⁸ Ku fana na Evhodiya na Sintike, swi nga ha yentxeka hi li ni xikazratu lexikulu lexi hi sivelaka ku zrandzra van’wana—ku nga ku tsrhamela ku langusa swihoxo ntsena. Hinkwezru ha hoxa siku ni siku. Loko hi tsrhamela ku langusa swihoxo ntsena ka van’wana, lizrandzru dzrezru ka vone dzri nga ha sungula ku titimeta. Hi xikombiso, yanakanya hi loko makwezru wa kukazri nkama hinkwawu a dzrivala ku hi pfuna ku basisa Yindlu ya Mfumu, hi nga ha kwatisiwa ha swone. Kutani loko hi sungula ku beketela swihoxo hinkwaswu leswi makwezru lweyo a swi yentxiki, ku kwata kwezru ku ta kula kambe a lizrandzru dzrezru dzri ta pumbeka. Loko u ni mhaka ya ku fana ni leyo ni makwezru wa kukazri, a swi tava swinene ku yanakanyisisa hi ntiyiso lowu: Yehovha a vona swihoxo swa makwezru yelweyo ni swezru. Kambe, nambi leswi a swi vonaka, yene a ha tama a zrandzra makwezru yelweyo nakone a ha tama a hi zrandzra. Kutani a wu voni leswaku a swi tava swinene loko a ho yetisela lizrandzru dzra Yehovha hi va hi langusa leswi nga swinene ka vamakwezru? Loko hi yentxa hinkwaswu leswi hi nga swi kotaka akuva hi zrandzra vamakwezru, hi ta tiyisa wumun’we byezru.​—Flp 2:1, 2.

9. Hi yini mintxhumu leyi nga ya lisima ngopfu leyi Pawulo a khaneliki ha yone ka papela ledzri a dzri tsraleliki va le Filipi?

⁹ Moya wa ku xwenga wu huhutele Pawulo ku byela vakriste va le Filipi—xikan’we ni vakriste hinkwavu—leswaku va fanela ku ‘hlawula leswa ku lulama [swa lisima ngopfu, NM]’. (Flp 1:10) Mintxhumu leyi ya lisima yi patsra ku hlawulekisiwa ka vito dzra Yehovha, ku hetiseka ka ku zrandzra kwakwe, ni leswaku ku va ni ku zrula ni wumun’we a bandleni. (Mt 6:9, 10; Yh 13:35) Loko mintxhumu leyi yi li ya lisima a wuton’wini byezru, hi kone hi kombisaka leswaku ha mu zrandzra Yehovha.

10. I yini leswi hi fanelaka ku swi yentxa akuva hi voniwa swanga lava basiki?

¹⁰ Pawulo a tlhele a hlaya leswaku hi fanela ku va ‘lava ku basa’. Kambe leswi a swi hlaye swone leswaku hi fanela ku va lava hetisekiki. A hi nge swi koti ku va lava ku basa hi ndlela leyi Yehovha, Xikwembu Nkulukumba a basiki ha yone. Kambe Yehovha a nga hi vona swanga lava basiki loko hi yentxa hinkwaswu leswi hi nga swi kotaka akuva hi kulisa lizrandzru dzrezru hi va hi hlawula leswa ku lulama kumbe leswi nga swa lisima ngopfu. Ndlela yin’we leyi hi kombisaka lizrandzru dzrezru ha yone i ku yentxa hinkwaswu leswi hi nga swi kotaka akuva hi nga khunguvanyisi van’wana.

11. Ha yini hi fanela ku tivonela ku khunguvanyisa van’wana?

¹¹ Xileleto xa kuva hi tivonela ku khunguvanyisa van’wana i xa ntamu swinene. Xana hi nga mu khunguvanyisa hi ndlela yini mun’wana? Hi nga ha swi yentxa hi leswi hi hlawulaka ku tihungata ha swone, hi mayambalela yezru nambi hi ntizro lowu hi wu yentxaka. Leswi hi swi yentxaka swi nga ha va swi nga hoxekanga. Kambe loko ku hlawula kwezru ku khumba lipfalu dzra mhunu mun’wana kutani ku mu khunguvanyisa, lanu hi kone ku nga ni mhaka. Yesu a te a swi ta va swa hombe ka mhunu leswaku a tsrimbeleliwa zribye dzra ku sila a nhan’wini yakwe, a txukumetiwa a lwandle a matsrhan’wini ya ku khunguvanyisa yin’we ya tihamba takwe!​—Mt 18:6.

12. I yini leswi hi swi dondzraka ka xikombiso lexi hi bekeliwiki xone hi vatekani van’we lava nga maphayona?

¹² Vona leswi vatekani van’we lava nga maphayona va xi yingisetisiki xiswone a xibasopiso xa Yesu. A bandleni dzravu a ku ni vatekani van’wana  lava a va ha ku babatisiwa, lava hi wubidzri byavu a va kulisiwe ka mindangu leyi mintxhumu yinyingi a yi nga pfumeleliwi. Vatekani lava a va pimisa leswaku vakriste a va nga fanelanga ku ya a sinema​—nambi ku hlalela ma-filme lama basiki. Kutani va khumbeke ngopfu loko va xiye leswaku vatekani lava nga maphayona va ye a sinema. Ntsrhaku ka leswo, vatekani lava nga maphayona va tsrhiki ku ya a sinema ku ya tlhasa loko vadondzrisiwa lavampswha va hlakulela lipfalu ledzri dzringaniselaka. (Hb 5:14) Hi ku va pimisela, vatekani lava nga maphayona va kombise leswaku a va zrandzra vamakwezru lavampswha ku nga li hi mazritu ntsena kambe ni hi swiyentxo.​—Ro 14:19-21; 1Yh 3:18.

13. Xana hi nga yentxa makwezru a wela xidohweni hi ndlela yini?

¹³ Ndlela yin’wana leyi hi nga khunguvanyisaka van’wana ha yone i ku hlaya mintxhumu leyi nga va yentxaka va doha. Swi nga yentxekisa kuyini leswo? Pimisa hi mhaka leyi: Ntsrhaku ka minzamu ya ku tala, mhunu lweyi hi dondzraka Bibele naye a kota ku tsrhika mukhuva wa ku kukutlela byala. Handle ka leswo, a tiyimisela ku kala a nga ha nwi byala nikutsrongo. A yentxa nhluvuku hi ku kahlula, a va a babatisiwa. Ntsrhaku, makwezru wa kukazri a bandleni a mu zramba leswaku va ta fihlula xikan’we a va a mu nyika byala, a ku: “Swoswi u babatisiwile, u ni moya wa ku xwenga wa Yehovha. Nakambe tsrhamela dzrin’we dzra mhandzru wa moya i ku tikhoma, a hi swone ke? Loko u tikhoma, u ta swi kota ku nwa na u pimela.” Vona mazritu lawo! Yanakanya leswi a swi ta yentxeka loko makwezru lweyo a ha ka ku babatisiwa o yingiseta mazritu lawo lama hoxekiki.

14. Xana mintlhanganu ya wukriste yi hi pfuna hi ndlela yini ku tizrisa mazritu lama nga ka Ba-le-Filipi 1:10?

¹⁴ Mintlhaganu yezru ya wukriste yi nga hi pfuna ku tizrisa mazritu lawa hi ma kumaka ka Ba-le-Filipi 1:10 hi tindlela ta ku siyana-siyana. Ya  ku sungula, swakuda swa moya leswi hi swi kumaka ka yone swi hi komba leswi Yehovha a swi nyikaka lisima. Ya wubidzri, yi hi komba leswi hi nga swi tizrisisaka xiswone leswi hi swi dondzraka akuva hi va lava ku basa. Ya wuzrazru, ka yone hi ‘susumetana a lizrandzrwini ni swiyentxweni leswinene’. (Hb 10:24, 25) Nkama lowu hi kutxanaka ni vamakwezru, lizrandzru dzrezru ka Xikwembu Nkulukumba wezru ni ka vamakwezru dzri ta kula. Loko mbilu yezru yi tala hi mixaka leyibidzri ya lizrandzru, hi ta yentxa hinkwaswu leswi hi swi kotaka akuva hi tivonela ku khunguvanyisa vamakwezru.

15. Xana swi tlhamuxela yini ku ‘tala mihandzru ya ku lulama’?

¹⁵ Pawulo a khongote a kombela leswaku vakriste va le Filipi va ‘tala mihandzru ya ku lulama’. (Flp 1:11) Handle ka ku ganaganeka ‘mihandzru ya ku lulama’ leyi a a khanela ha yone yi patsra lizrandzru dzravu ka Yehovha ni vhanu vakwe. Yi tlhela yi patsra ku bula ni van’wana hi lipfumelo dzravu ka Yesu ni hi dumbo dzravu dzra wumundzruku lebyi hlamalisaka. Ka Ba-le-Filipi 2:15 a tizrisa xifananiso xin’wana, lexi liki, va fanela ku vaninga swanga ‘swivaningo misaveni’. Xifananiso lexo xa fanela hikusa Yesu a vitane vadondzrisiwa vakwe leswaku vone i ‘ku vaninga ka misava’. (Mt 5:14-16) A tlhele a leleta valandzreli vakwe leswaku va yentxa vadondzrisiwa ni leswaku va ‘va timboni . . . ku ya tlhasa wugan’wini bya misava’. (Mt 28:18-20; Min 1:8) Loko hi ku hiseka hi pfunisa ka ntizro lowu wa lisima wa ku tlula hinkwayu hi kone hi bekaka ‘mihandzru ya ku lulama’.

16. Xana Ba-le-Filipi 1:12-14 yi swi kombisa hi ndlela yini leswaku hi nga swi kota ku vaninga swanga swivaningo nambi loko hi li hansi ka swiyimu swa ku bindzra? (Vona xifaniso xa kapa.)

¹⁶ Hansi ka swiyimu hinkwaswu, hi nga swi kota ku vaninga swanga swivaningo. Minkama yin’wana, ntxhumu lowu tikombaka na wu li xihinga akuva hi zrezra ndzrava ya Mfumu wu nga ha ndzruluka mukhandlu lowunene wa ku txhumayela.  Vona xikombiso xa mupostola Pawulo, lweyi a tsraleliki va le Filipi na a pfaleliwe ka yindlu ya kukazri a Roma. Yene a nga pfumelelanga leswaku tighomondho ti mu sivela ku zrezrela lava a va mu zrindzra xikan’we ni lava a va mu pfuxela. Pawulo a txhumayele hi ku hiseka hansi ka swiyimu leswo, nakone swi yentxe vamakwezru va va ni ku tiya ni xixixi xa ‘ku hlaya Zritu dzra Xikwembu Nkulukumba hi ku tiyisa, va nge na ku txhava.’​—Dondzra Ba-le-Filipi 1:12-14; 4:22.

17. Nyikela xikombiso xa vamakwezru va masiku lawa lava bekaka mihandzru a hansi ka swiyimu swa ku bindzra.

¹⁷ Ku tala ka vamakwezru va xinuna ni va xisati va ni mukhandlu wa ku yetisela xixixi xa Pawulo. Vone va tsrhama ka matiko lawa swi nga kotekikiki ku txhumayela hi ku ntsrhunxeka kumbe hi muti ni muti, xileswo va djula tindlela tin’wana ta ku txhumayela madzrungula lamanene. (Mt 10:16-20) Ka dzrin’we dzra matiko wolawo, mulaviseli wa muganga wa kukazri a kutxe vazrezri kuva mun’wana ni mun’wana wavu a va ni “nsimu yakwe” hi leswaku a a fanela ku zrezrela maxaka, vayakelani, vadondzri-kulobye, vatizri-kulobye kumbe vhanu van’wana va va tivaka. Ntsrhaku ka malembe mabidzri, nhlayu ya mabandla ka muganga wolowo yi kule swinene. Swi nga yentxeka hi nga tsrhami a tikweni ledzri hi siveliwaka ku zrezra hi ku ntsrhunxeka. Nambitanu, hi nga susa dondzro ya lisima ka xikombiso xa vamakwezru va xinuna ni va xisati lava yentxaka hinkwaswu akuva va kota ku txhumayela. Nkama hinkwawu yentxa hinkwaswu leswi u nga swi kotaka akuva u zrezra madzrungula lamanene, dumba leswaku Yehovha a ta ku nyika ntamu lowu u wu vilelaka akuva u hlula xihinga xin’wana ni xin’wana.​—Flp 2:13.

18. I yini leswi hi fanelaka ku tiyimisela swone?

¹⁸ Swoswi ku tlula minkama hinkwayu, a hi tiyimiseleni ku landzra xilayu lexi Pawulo a huhuteliwiki xone lexi kumekaka ka papela ledzri a dzri tsraleliki va le Filipi. Hi fanela ku hlawula leswa lisima ngopfu, hi va lava ku basa, lava tivonelaka ku khunguvanyisa vambeni hi tlhela hi beka mihandzru ya ku lulama. Hi ku yentxa leswo hi ta yandzra a lizrandzrwini nakone hi ta tisa lidzrumu ka Tatana wezru wa ku zrandzreka, Yehovha.