1. Ha yini Yehovha a tumbuluxe wutomi?

KU VE ni nkama lowu Yehovha a a li wuswakwe. Kambe a a nga li xivundzreni hikusa a hetisekile ka hinkwaswu. Nambitanu, Xikwembu Nkulukumba a zrandzri leswaku vambeni va va ni wutomi va tlhela va nyonxa. Hi ku susumetiwa hi lizrandzru, Yehovha a sungule ku tumbuluxa mintxhumu.​—Ps 36:9; 1Yh 4:19.

2. Xana Yesu ni tintsrumi va titwe hi ndlela yini hi leswi Yehovha a swi tumbuluxiki?

² Ku sungula, Yehovha a tumbuluxe N’wanakwe, Yesu, akuva a tizra na yene. Ha Yesu, ‘ka vumbiwi hinkwaswu’ ku patsra ni magidigidi ya tintsrumi. (Kl 1:16) Yesu a nyonxe ngopfu hi ku va ni mukhandlu wa ku tizra ni Tatana wakwe. (Pr 8:30) Na tone tintsrumi ti ve ni xivangelo xa ku nyonxa. A ti swi vona ha hombe loko Yehovha na Yesu, Mutizri Lwe A Nga Ni Wuswikoti, va vumba matilo ni misava. Xana tintsrumi ti yentxe yini? ‘A ti yimbelela hi ku nyonxa’ loko misava yi vumbiwa, nakone handle ka ku ganaganeka a ti tama ti nyonxa loko ti vona Yehovha a vumba mintxhumu yimbeni. Swi nga yentxeka tintsrumi ti nyonxe ngopfu swinene loko ti vone ku vumbiwa ka xivumbiwa xa wugamu ni xa lisima ku tlula hinkwaswu a misaveni, ku nga mhunu. (Yb 38:7; Pr 8:31) Xivumbiwa xin’wana ni xin’wana xi kombise lizrandzru ni wutlhazri lebyi Yehovha a nga na byone.​—Ps 104:24; Ro 1:20.

3. Hi ku ya hi 1 Ba-le-Korinte 15:21, 22, i yini leswi kotekaka hi nkonta ya xitlhavelo xa Yesu?

³ Yehovha a a djula leswaku vhanu va hanya hi la ku nga helikiki ka planeta dzra ku xonga ledzri a dzri vumbiki. Kambe Adamu na Evha va xandzrukeli Tatana wavu wa lizrandzru, nakone xidoho ni  lifu swi tluleli vhanu hinkwavu. (Ro 5:12) Xana Yehovha a yentxi yini? Ntsrhaku ka loko Adamu na Evha va dohile, Yehovha a hlaye leswi a a ta swi yentxa akuva a huluxa vhanu. (Gn 3:15) A a ta nyikela N’wanakwe, Yesu, swanga xitizrulo nakone leswo a swi ta yentxa leswaku vana va Adamu na Evha va huluxiwa ka xidoho ni lifu. Mun’wana ni mun’wana a a tava ni mukhandlu wa ku langa ku tizrela Yehovha ni ku kuma wutomi lebyi nga helikiki.​—Yh 3:16; Ro 6:23; dondzra 1 Ba-le-Korinte 15:21, 22.

4. Hi swini swivutiso leswi taka hlamuliwa ka xidondzro lexi?

⁴ Xidumbiso xa ku pfuka ka vafi xi sekelekisa swivutiso swi nga li swingani. Hi xikombiso, xana ku pfuxiwa ka vafi ku ta yentxekisa kuyini? Xana hi ta swi kota ku tiva maxaka ni vanghanu loko va pfuxiwa? Hi kwini ku nyonxa loku hi taka va na kone hi ku pfuxiwa ka lava fiki? Nakone ku pfuxiwa ka vafi ku hi dondzrisa yini hi lizrandzru, wutlhazri ni ku lehisa mbilu ka Yehovha? Hi ta kambisisa swivutiso leswo ha xin’we xin’we.

5. Ha yini hi nga hlayaka leswaku ku pfuxiwa ka vafi ku ta yentxeka hi ndlela leyi hlelekiki ni hi swigava?

⁵ A paradeyisini, Yehovha a ta tizrisa N’wanakwe akuva a pfuxa vhanu va ntsrandzravahlayi lava fiki. Kambe hi nga hlaya leswaku lava fiki a va nge ti pfuxiwa hinkwavu hi nkama wun’we. Ha yini hi nga hlayaka leswo? Hikusa loko nhlayu ya vhanu yo kula hi nkama wun’we, a misaveni leyimpswha ku nga va ni yimayima leyikulu. Kambe Yehovha a nga yentxi mintxhumu hi ndlela leyi nga hlelekangakikiki. Awa swi tiva leswaku akuva ku va ni ku zrula a mintxhumu yi fanela ku tizra hi mfanelo. (1Ko 14:33) Na a li kazri a tizra na Yesu akuva va vumba matilo ni misava, Yehovha a kombise wutlhazri ni ku lehisa mbilu; a lulamiseli misava hakatsrongokatsrongo na a nga si vumba vhanu. Nakone Yesu a ta yetisela xikombiso xa Tatana wakwe loko a tizra ni lava taka huluka Armagedoni ka ku lulamisela misava akuva ku ta yamukeliwa lava taka pfuxiwa.

6. Hi ku ya hi Amintiṛo 24:15, hi wini ntlawa wun’wana lowu taka va kone ka lava taka pfuxiwa?

 ⁶ Lava va taka huluka Armagedoni va ta va ni ntizro wa lisima ngopfu swinene akuva va wu yentxa, ku ta djuleka leswaku va dondzrisa lava taka pfuxiwa mayelanu ni Mfumu wa Xikwembu Nkulukumba ni swileleto swa Yehovha. Ha yini leswo swi ta vileleka? Hikusa vanyingi ka lava taka pfuxiwa va hamba xiyenge xa ‘lavamfani’. (Dondzra Amintiṛo 24:15.) Swi ta djula leswaku vhanu lavo va yentxa ku txintxa kunyingi a wuton’wini akuva va kuma matovoko lama tisiwaka hi xitizrulo xa Kriste. Pimisa kutsrongo hi ntizro hinkwawu lowu taka va kone, wa ku dondzrisa ntiyiso vhanu vanyingi ngopfu swinene lava va nga mu tivikiki Yehovha. Xana mhunu mun’wana ni mun’wana lweyi a taka pfuxiwa a ta va ni mhunu lweyi a taka mu dondzrisa hi la swi yentxekaka ha kone namunhla loko hi fambisa swidondzro swa Bibele? Xana lava taka pfuxiwa va ta zrumeliwa ka mabandla ya kukazri, akuva va ya wupfisiwa leswaku va dondzrisa vhanu vambeni lava taka pfuxiwa ntsrhaku kwavu? Hi ta swi vona a nkameni wa kone. Lexi hi xi tivaka hi leswaku a wugan’wini bya 1.000 wa malembe ya Mfumu wa Kriste, ‘a misava yi ta tala hi ku tiva Yehovha’. (Eza 11:9) Hi ta va ni ntizro wunyingi hi nkama wa 1.000 wa malembe, kambe wu ta va ntizro wa ku nyonxisa ngopfu swinene!

7. Ha yini vhanu va Xikwembu Nkulukumba va ta swi kota ku tibeka a mbangwini wa vhanu lava taka pfuxiwa loko va va dondzrisa?

⁷ Hi nkama wa Mfumu wa Yesu wa 1.000 wa malembe, ku ta djuleka leswaku malandzra hinkwawu ya Yehovha lani misaveni ma tama ma yentxa ku txintxa ka kukazri a wuton’wini akuva ma mu nyonxisa. Xileswo, va ta swi kota ku tibeka a mbangwini wa vhanu lava taka pfuxiwa loko va va dondzrisa, hikusa va swi tiva leswaku swa kazrata ku lwisana ni mimpimiso ya ku biha ni ku landzra swileleto swa Yehovha. (1Pe 3:8) Handle ka ku ganaganeka, lava taka pfuxiwa va ta swi djula ku hamba xiyenge xa vhanu va Yehovha lava titsrongahataka, lava na vone va taka va na va ‘tizrela ku huluka kwavu’.​—Flp 2:12.

8. Hi swini swivangelo leswi hi nga na swone akuva hi pimisa leswaku swi ta koteka ku tiva maxaka ni vanghanu lava taka pfuxiwa?

⁸ Ku ni swivangelo swinyingi leswi hi yentxaka hi kholwa leswaku hi ta ma tiva maxaka ni vanghanu lava taka pfuxiwa. Hi xikombiso, loko hi yanakanyisisa hi ku pfuka ka vafi loku ku viki kone khale, swi tikomba ingiki Yehovha a ta pfuxa vhanu xileswi a va li xiswone na va nga si fa, leswi liki, hi ndlela leyi a va li ha yone, a va khanela ha yone ni ndlela leyi a va pimisa ha yone. Dzrimuka leswaku Yesu a fananise ku fa ni ku yetlela kumbe wuzrongo, a tlhela a fananisa ku pfuka ka vafi ni ku pfuka wuzrongweni. (Mt 9:18, 24; Yh 11:11-13) Loko mhunu a pfuka a wuzrongweni a ha tama a va xileswi a a li xiswone na a nga si yetlela. Ndlela leyi a a li ha yone ni mimpimiso yakwe a swi txintxi. Yanakanya hi xikombiso xa Lazaru. Yene a a ni mune wa masiku na a file. Nakone mizri wakwe a wu sungule ku bola. Kambe loko a pfuxiwile hi Yesu, vamakwavu va tekeli ku mu tiva, nakone yene handle ka ku ganaganeka a a va dzrimuka.​—Yh 11:38-44; 12:1, 2.

9. Ha yini lava taka pfuxiwa va nge ti pfuka na va ni mizri ni miyanakanyu leyi hetisekiki?

⁹ Yehovha a dumbisa leswaku a paradeyisini a ku na mhunu lweyi a taka ku ‘ndzra vabya’. (Eza 33:24; Ro 6:7) Xileswo, lava taka pfuxiwa va ta va ni lihanyu ledzrinene, kambe va tava na va nge si na hetiseka. Loko a vo pfuxiwa na va hetisekile, kumbexana maxaka yavu ni vanghanu vavu a va nge ti va tiva. Swi tikomba ingiki ka Mfumu wa 1.000 wa malembe wa Kriste, vhanu va ta hetiseka hakatsrongokatsrongo. Ku tava ntsena a ku heleni ka 1.000 wa malembe lani Yesu a taka tlhelisela Mfumu ka Tatana wakwe. A nkameni lowo, nkongometo wa Mfumu wa Xikwembu Nkulukumba wu ta va na wu hetisekile hi ku helela, leswi patsraka ku yentxa vhanu hinkwavu va hetiseka.​—1Ko 15:24-28; Mpf 20:1-3.

10. Xana ku pfuxiwa ka vafi ku ku yentxa u titwisa kuyini?

¹⁰ Yanakanya hi ndlela leyi u taka titwa ha yone loko u yamukela xaka kumbe munghanu lweyi u mu zrandzraka. Xana u ta humexa minyembeti kumbe u hlekelela hi ku nyonxa? Xana u ta sungula ku yimbelela u tlangela Yehovha? U nga tiyiseka hi leswi, ku pfuxiwa ka vafi ku ta kulisa lizrandzru ledzri u nga na dzrone ha Yehovha na Yesu. Hi to yamukela nyiko leyo ya ku hlamalisa ntsena hi leswi va hi kombaka lizrandzru ni wunene.

11. Hi ku ya hi mazritu ya Yesu lama nga ka buku dzra Yohan 5:28, 29, i yini leswi taka yentxekela lava landzraka milawu leyi lulamiki ya Yehovha?

¹¹ Yanakanya hi ku nyonxa loku lava taka pfuxiwa va taka va na kone loko hakatsrongotsrongo va sungula ku tsrhika wumhunu bya khale va va sungula ku landzra milawu leya ku lulama ya Xikwembu Nkulukumba. Lava kombisaka ku txintxa loku vilelekaka va ta pfuka va ya wuton’wini. Kambe Yehovha a nge ti va pfumelela lava mu xandzrukelaka leswaku va tama va hanya a paradeyisini akuva va nga honeteli ku zrula a paradeyisini.​—Eza 65:20; dondzra Yohan 5:28, 29.

12. Xana Yehovha a ta tovokisa vhanu lava tsrhamaka misaveni hi ndlela yini?

¹² Loko Mfumu wa Xikwembu Nkulukumba wu ta sungula ku fuma, vhanu hinkwavu va Yehovha va ta pfumelelana ni mazritu ya Amaproverbia 10:22 lama liki: ‘A makateko ya Yehovha ma nyika mhunu wukosi; a nga mu yengeteli minkazralo.’ Hi ku pfuniwa hi moya wa ku xwenga, malandzra ya Xikwembu Nkulukumba ma ta va swipfundzri hi tlhelo dzra moya, leswi liki, ma ta ya ma fana na Kriste ma tlhela ma va vhanu lava hetisekiki. (Yh 13:15-17; Ef 4:23, 24) Siku dzrin’wana ni dzrin’wana ma ta ya ma va ni lihanyu ledzrinene, nakone ma ta ya ma va vhanu va ku yampswa. A wutomi byi ta nyonxisa ngopfu swinene. (Yb 33:25) Kambe, xana ku yanakanyisisa hi ku pfuxiwa ka vafi ku nga hi pfuna swoswi?

13. Hi ku ya hi Amapsalma 139:1-4, xana ku pfuxiwa ka vafi ku swi kombisa hi ndlela yini leswaku Yehovha awa hi tiva ha hombe?

¹³ Hi lani hi swi voniki ha kone, loko Yehovha a pfuxa mhunu, a ta yentxa leswaku hinkwaswu leswi mhunu lwiyani a a swi pimisa ni wumhunu byakwe swi va xileswi a swi li xiswone khale na a nga si fa. Yanakanyisisa hi xivangelo xa leswo. Yehovha a ku zrandzra ngopfu lakakuva a vonisisa hinkwaswu leswi u swi yanakanyaka, u swi twaka, u swi khanelaka ni leswi u swi yentxaka nakone a ni wuswikoti bya ku dzrimuka hinkwaswu. Loko a swo djula leswaku Yehovha a ku pfuxa a a ta swi kota ku ku pfuxa hi ku nabyala ni mimpimiso leyi a wu li na yone na u nga si fa, swiyentxo swaku ni matsrhamela yaku. Hosi Davhida a a swi tiva leswaku Yehovha a ni mhaka swinene ni mun’wana ni mun’wana wezru. (Dondzra Amapsalma 139:1-4.) I yini leswi hi swi dondzraka hi ku va Yehovha a hi tiva ha hombe?

14. Ha yini swi li swinene ku yanakanyisisa hi leswaku Yehovha awa hi tiva ha hombe?

¹⁴ Ku yanakanyisisa hi leswaku Yehovha awa hi tiva ha hombe, swi hi pfuna kuva hi nga vileli. Ha yini hi nga hlayaka leswo? Dzrimuka leswaku Yehovha a ni mhaka na wene. Yene a vona mun’wana ni mun’wana wezru swanga wa lisima ka yene. A vonisisa ha hombe hinkwaswu leswi u kumanaka na swone a wuton’wini leswi ku yentxaka u va leswi u nga swone. A hi ku nyonxisa ka swone ku tiva leswo! A hi swone ke? Xileswo, u nga titwe na u li wuswaku. Minutu yin’wana ni yin’wana Yehovha a na wene, na a djuletela mikhandlu ya ku va a ku pfuna.​—2Mk 16:9.

15. Xana dumbo dzra ku pfuka ka vafi dzri kombisa wutlhazri bya Yehovha hi ndlela yini?

¹⁵ Loko mhunu a byeliwa leswaku a ta dlayiwa a nga ha sindzriseka ku yentxa mintxhumu leyi a a nge ti yentxa hi leswi a txhavaka ku fa.  Vhanu lava fumiwaka hi Sathana va tizrisa ndlela leyi vhanu va txhavaka lifu ha yone akuva va va susumetela ku xandzrukela vanghanu ni ku tsrhika leswi va swi kholwaka. Kambe leswo a swi hi txhavisi. Ha swi tiva leswaku valala vezru va nga susa wutomi byezru, kambe Yehovha a ta tlhela a hi pfuxa. (Mpf 2:10) Ha tiyiseka leswaku a va nge swi koti ku hi hambanisa na Yehovha. (Ro 8:35-39) Yehovha a kombise wutlhazri byakwe lebyikulu hi ku hi nyika dumbo dzra ku pfuxa lava fiki! Hi mhaka ya dumbo ledzro, a hi txhavi loko lava yimaka na Sathana va hi byela leswaku va ta hi dlaya loko hi nga yentxi leswi vone va swi hlayaka. Nakone, dumbo ledzro dzri hi nyika xixixi lexi tiyiki xa ku tama hi dumbeka ka Yehovha.

16. Hi swini swivutiso leswi u fanelaka ku tiyentxa swone, nakone tinhlamulo ta swivutiso leswo ti nga ku pfuna hi ndlela yini ku tiva leswaku u mu dumba ku ya tlhasa kwini Yehovha?

¹⁶ Loko valala va Yehovha va hlaya leswaku va djula ku ku dlaya, xana u ta yangulisa kuyini? Xana u ta dumba Yehovha ni xidumbiso xakwe xa ku ku pfuxa? Ndlela ya ku vona leswaku wa mu dumba Xikwembu Nkulukumba i ku tivutisa leswi: ‘Xana ka swiboho swanga leswitsrongo na swi kombisa leswaku na mu dumba Yehovha?’ (Lk 16:10) Xivutiso xin’wana hi lexi: ‘Xana ndlela leyi ni hanyaka ha yone ya swi kombisa leswaku na swi dumba leswaku loko ni zrangisa Mfumu ku sungula, Yehovha a ta ni pfuna ku kuma leswi ni swi vilelaka hi tlhelo dzra nyama?’ (Mt 6:31-33) Loko nhlamulo yaku ka swivutiso leswo yi li ina, swi kombisa leswaku wa mu dumba Yehovha, ni leswaku u lulameli mindzringo hinkwayu leyi u taka kumana na yone.​—Pr 3:5, 6.

17. a) Xana ku pfuka ka vafi ku kombisa ku lehisa mbilu ka Yehovha hi ndlela yini? b) Hi nga kombisa ku tlangela ku lehisa mbilu ka Yehovha hi ndlela yini?

¹⁷ Yehovha awa dzri tiva siku ni nkama lowu a taka helisa xiyimu lexi xa mintxhumu ha wone. (Mt 24:36) Yehovha a nge ti hela mbilu lakakuva a tisa wugamu na nkama wu nga si tlhasa. Nakone nambi leswi a swi djulaka ngopfu ku pfuxa vafi, a ha tama a lehisa mbilu. (Yb 14:14, 15) Yene a yimela nkama lowu wu nga woni akuva a pfuxa lava fiki. (Yh 5:28) Handle ka ku ganaganeka, ku lehisa mbilu ka Yehovha ku hi dondzrisa swinyingi. Yanakanya hi leswi: Hi kuva Yehovha a lehisa mbilu vhanu vanyingi va kume mukhandlu wa ku va va ndzruluka, ku patsra na hine. (2Pe 3:9) Yehovha a djula leswaku vhanu vanyingi va kuma mukhandlu wa ku va ni wutomi lebyi nga helikiki. Xileswo, hi fanela ku tlangela ku lehisa mbilu ka Yehovha. Hi ndlela yini? Hi ku yentxa hinkwaswu leswi hi nga swi kotaka akuva hi kuma lava ‘bekiseliwiki wutomi lebyi nga helikiki’ ni ku va pfuna akuva va zrandzra va tlhela va tizrela Yehovha.  (Min 13:48) Xileswo, va ta pfuneka hi leswi Yehovha a lehisaka mbilu, hi lani na hine hi pfunekiki ha kone.

18. Ha yini hi fanela ku lehisela mbilu van’wana?

¹⁸ Yehovha awa swi tiva leswaku hi ta hetiseka ntsena a ku heleni ka 1.000 wa malembe. Xileswo, ku ya tlhasa nkameni wolowo, Yehovha a ta tama a hi lehisela mbilu, a tlhela a tiyimisela ku hi dzrivalela a swihono swezru. Lexo i xivangelo xinene lexi hi yentxaka hi djula leswinene ka van’wana ni kuva hi va lehisela mbilu. Vona xikombiso xa makwezru wa kukazri wa xisati lweyi a nuna wakwe a sunguliki ku khomiwa hi ku hlatiyela lokukulu a va a yima ku ya mintlhanganwini. Makwezru lweyo a li: “Leswo swi ni vavise swinene. Hinkwaswu leswi a hi kunguhate ku swi yentxa a ndangwini swi honekile.” Nambitanu, nsati lweyo wa ku zrandzreka a lehiseli mbilu nuna wakwe. Yene a dumbe Yehovha nakone a nga helanga mbilu. Ku fana na Yehovha a nga lavisisanga swihoxo swa nuna wakwe kambe a beki miyanakanyu ka leswi a a swi yentxa swa swinene. Yene a li: “Nuna wanga a ni wumhunu bya ku xonga swinene nakone siku ni siku a tikazratela ku yampswisa.” Xikombiso lexi xi swi beka livaleni leswaku i swa lisima akuva hi lehisela mbilu vandangu wezru ni vamakwezru lava nga bandleni lava tikazratelaka ku lwisana ni swikazratu.

19. I yini leswi hi fanelaka ku tiyimisela ku swi yentxa?

¹⁹ Yesu kun’we ni tintsrumi va nyonxe ngopfu loko va vona misava yi vumbiwa. Kambe yanakanya hi ndlela leyi va taka titwa ha yone loko va vona misava hinkwayu yi tala hi vhanu lava hetisekiki lava zrandzraka va tlhela va tizrela Yehovha. Yanakanya hi ku nyonxa loku vatotiwa va taka va na kone hala matilweni, na va fuma na Kriste, loko va vona mabindzru ya ntizro wavu lani misaveni. (Mpf 4:4, 9-11; 5:9, 10) Nakone yanakanya hi leswi wutomi byi taka va xiswone a misaveni leyi minyembeti ya ku xaniseka yi taka txintxiwa hi ya ku nyonxa, ni leyi mavabyi, ku hlatiyela kumbe gome ni ku fa swi taka helisiwa. (Mpf 21:4) Na siku ledzro dzri nga si na tlhasa, tiyimiseli ku yetisela lizrandzru, wutlhazri ni ku lehisa mbilu ka Yehovha. Loko u yentxa leswo, u ta tama u nyonxa, ku nge na mhaka leswaku i yini leswi u kumanaka na swone. (Yk 1:2-4) Handle ka ku ganaganeka, hi ni swivangelo swinyingi swa ku tlangela Yehovha hi leswi a hi dumbisaka leswaku ‘ku ta va ni ku pfuka ka lava ku fa’!​—Min 24:15.