1. Hi yini ndjombo leyi hi nga nayu?

I NDJOMBO leyikulu ku hamba xiyenge xa nhlengeletanu ya Yehovha! Hi li ka paradeyisi dzra moya ledzri taliki hi vhanu lava zruliki ni lava nyonxiki. Hi wini ntizro waku a bandleni?

2. Hi xini xifananiso lexi mupostola Pawulo a xi tizrisiki makhambi ma nge mangani ka mapapela yakwe lama huhuteliwiki?

² Hi nga dondzra swinyingi mayelanu ni ntizro lowu hi nga na wone a bandleni ka xifananiso lexi mupostola Pawulo a xi tizrisiki makhambi ma nge mangani ka mapapela yakwe lama huhuteliwiki. Ka dzrin’we dzra mapapela lawo, Pawulo a fananise bandla ni mizri wa mhunu. A tlheli a fananisa mhunu mun’wana ni mun’wana a bandleni ni swizro swa mizri.​—Ro 12:4-8; 1Ko 12:12-27; Ef 4:16.

3. Hi yini mintxhumu yizrazru leyi hi taka bula ha yone ka xidondzro lexi?

³ Ka xidondzro lexi hi ta bula hi mintxhumu yizrazru ya lisima leyi hi nga yi dondzraka ka xifananiso xa Pawulo. Wa ku sungula, hi ta dondzra leswaku mun’wana ni mun’wana wezru a ni ntizro * a nhlengeletanwini ya Yehovha. Wa wubidzri, hi ta vona leswaku hi nga yentxa yini loko swi hi kazratela ku twisisa leswaku hi va lisima a bandleni. Wa wuzrazru, hi ta vona leswaku ha yini hi fanela ku tsrhama na hi khomekile a ku hetisiseni ka ntizro lowu Xikwembu Nkulukumba a hi nyikiki wone a bandleni.

4. Hi dondzra yini ka Ba-le-Roma 12:4, 5?

⁴ Ntxhumu wa ku sungula lowu hi nga wu dondzraka ka xifananiso xa Pawulo i leswaku mun’wana ni mun’wana wezru i wa lisima a ndangwini wa Yehovha. Pawulo a sungule xifananiso xakwe hi ku hlaya leswi: ‘Hikuva swanga hi leswi hi nga swizro leswinyingi a mizrini min’we, na a swizro hinkwaswu swi nge na ntizro mun’we, swoleswo na hine hi nga lavanyingi, hi mizri min’we ku Kriste, a mun’wana ni mun’wana i xizro xa van’wana.’ (Ro 12:4, 5) Xana Pawulo a a djula ku hlaya yini? A a djula ku hlaya leswaku hi ni mintizro leyi hambaniki a bandleni, kambe hinkwezru hi va lisima.

5. Hi tini ‘tinyiko’ leti Yehovha a nyikiki bandla?

⁵ Loko u pimisa hi lava nga ni ntizro a bandleni, miyanakanyu yaku yi nga ha tsrutsrumela ka lava zrangelaka. (1Te 5:12; Hb 13:17) I ntiyiso leswaku Yehovha a nyika bandla dzrakwe tinyiko leti nga vhanu hi ku tizrisa Kriste. (Ef 4:8, Tradução do Novo Mundo) Tinyiko leti nga vhanu ti patsra swizro swa Huvo Leyi Zrangelaka, vapfunisi va Huvo Leyi Zrangelaka, swizro swa Xihubyana Xa Zrwavi, valaviseli va miganga, lava dondzrisaka ka swikole swa Mfumu, vakulu va bandla ni malandzra ya wutizreli. Vamakwezru lava hinkwavu va hlawuliwa hi moya wa ku xwenga akuva va hlayisa tihamba leti zrandzrekaka ta Yehovha ni ku tiyisa bandla.​—1Pe 5:2, 3.

6. Hi ku ya hi 1 Ba-le-Thesalonika 2:6-8, i yini leswi vamakwezru lava hlawuliwaka hi moya wa ku xwenga va lwelaka ku swi yentxa?

⁶ Vamakwezru va xinuna va hlawuliwa hi moya wa ku xwenga akuva va hetisisa mintizro ya ku siyanasiyana. Ku fana ni leswi swizro swa ku siyanasiyana swa mizri, swa ku fana ni mavoko ni minenge, swi tizraka akuva ku pfuneka mizri hinkwawu, vamakwezru va xinuna lava hlawuliwaka hi moya wa ku xwenga va tizra hi ku hiseka akuva ku pfuneka bandla hinkwadzru. Vamakwezru lavo a va dzringisi ku yentxa leswaku ku dzrumisiwa vone. A matsrhan’wini ya leswo, va lwela ku tiyisa vamakwezru. (Dondzra 1 Ba-le-Thesalonika 2:6-8.) Ha mu tlangela Yehovha hi kola ka vamakwezru lavo lava fanelekaka, lava zrangisaka swivileleko swa van’wana a mahlweni ka swavu!

7. Hi wani matovoko lawa ku tala ka lava tizraka hi nkama hinkwawu va ma kumaka?

⁷ Vamakwezru van’wana a bandleni va nga ha yaveliwa akuva va tizra swanga vazrumiwa, maphayona ya ku hlawuleka kumbe maphayona ya nkama hinkwawu. Nakunene, vamakwezru va xinuna ni vaxisati a misaveni hinkwayu va tiyimiseli ku tizrisa nkama wavu hinkwawu akuva va zrezra ni ku yentxa vadondzrisiwa. Hi ku yentxa leswo, va kota ku pfuna vhanu vanyingi akuva va ndzruluka vadondzrisiwa va Kriste Yesu. Nambi leswi ku tala ka vazrezri lavo va kalaka va nge na mali yinyingi kumbe mintxhumu yinyingi, Yehovha awa va tovokisa swinene. (Mr 10:29, 30) Hi va zrandzra swinene vamakwezru lavo va xinuna ni va xisati, nakone ha khensa hi leswi va nga xiyenge xa bandla!

8. Ha yini muzrezri mun’wana ni mun’wana wa madzrungula lamanene a li wa lisima ka Yehovha?

⁸ Xana ko va ntsena vamakwezru va xinuna lava hlawuliwiki hi moya wa ku xwenga kumbe vamakwezru lava tizraka hi nkama hinkwawu va nga ni ntizro a bandleni? Im-him! Muzrezri mun’wana ni mun’wana wa madzrungula lamanene i wa lisima ka Xikwembu Nkulukumba ni le bandleni. (Ro 10:15; 1Ko 3:6-9) Nakunene, wun’we wa minkongometo ya lisima swinene ya bandla i ku yentxa vadondzrisiwa va Hosi yezru, Yesu Kriste. (Mt 28:19, 20 TNM; 1Tm 2:4) Vazrezri hinkwavu, lava babatisiwiki ni lava kalaka va nga babatisiwanga, va lwela ku yentxa leswaku ntizro lowu wu va ntxhumu wa lisima swinene a wuton’wini byavu.​—Mt 24:14.

9. Ha yini hi va nyika lisima vakriste vaxisati?

 ⁹ Yehovha a kombisa ndlela leyi a va nyikaka lisima ha yone vamakwezru vaxisati a bandleni hi ku va nyika ntizro wa lisima. Vamakwezru vaxisati lava nga vasati, vamamana, vafelwa ni lava nga siki tekiwa lava mu tizrelaka hi ku dumbeka i va lisima ka yene. Bibele dzri khanela hi vavasati vanyingi va ku hlamalisa lava nyoxisiki Xikwembu Nkulukumba. Vone va kulungeliwa hi ku va swikombiso leswinene a ku kombiseni ka wutlhazri, lipfumelo, ku hiseka, xixixi, ku hanana ni mintizro leyinene. (Lk 8:2, 3; Min 16:14, 15; Ro 16:3, 6; Flp 4:3; Hb 11:11, 31, 35) Hi mu tlangela swinene Yehovha hi ku va ni vakriste vaxisati a bandleni, lava kombisaka matsrhamela wolawo ya ku xonga!

10. Ha yini vamakwezru lava kuliki hi ntanga va li va lisima ka hine?

¹⁰ A tovoko dzrin’wana ledzri hi nga na dzrone i dzra ku va ni vamakwezru vanyingi lava kuliki hi ntanga a bandleni. Ka mabandla mambeni ku ni vamakwezru vaxinuna ni vaxisati lava kuliki hi ntanga lava nga ni malembe manyingi na va tizrela Yehovha hi ku dumbeka. Swi nga yentxeka vamakwezru vambeni lava kuliki hi ntanga va dondzri ntiyiso swoswinyana. Ku tala ka vamakwezru volava lava kuliki hi ntanga va lwisana ni swikazratu swa mavabyi leswi fambisanaka ni ntanga. Swikazratu swoleswo swi nga ha va sivela ku yentxa hi lani va navelaka ha kone a bandleni ni le nsin’wini. Nambitanu, vamakwezru volavo va yentxa hi lani va nga kotaka hakone a ntizrweni wa nsimu. Va tlhela va tizrisa ntamu lowu va nga wone akuva va tiyisa ni ku wupfisa vambeni! Nakone ha pfuneka hi wutivi byavu. Vone i va lisima swinene ka Yehovha ni le ka hine.​—Pr 16:31.

11-12. Xana vampswha va le bandleni dzraku va ku tiyisa hi ndlela yini?

¹¹ Swoswi pimisa hi vampswha vezru. Vone va kumana ni mindzringo yinyingi loko va ya va kula ndzreni ka misava leyi fumiwaka hi Sathana Diyavulosi ni leyi hlohloteliwaka hi mimpimiso yakwe ya ku biha. (1Yh 5:19) Kambe, hinkwezru ha tiyisiwa loko hi vona vampswha vezru va nyikela tinhlamulo a mintlhanganwini, loko va hlengela a ku zrezreni ni loko va yimela hi xixixi leswi va swi pfumelaka. Ina, n’wine vampswha, mi ni ntizro wa lisima swinene a bandleni dzra Yehovha!​—Ps 8:2.

 ¹² Nambitanu, vamakwezru vambeni swa va kazratela ku pfumela leswaku vone i va lisima a bandleni. I yini leswi nga hi pfunaka ku vona leswaku mun’wana ni mun’wana wezru i wa lisima a bandleni? A hi swi voneni.

13-14. I yini leswi yentxaka vambeni va pimisa leswaku a va na lisima a bandleni?

¹³ Vona ntxhumu wa wubidzri lowu hi nga wu dondzraka ka xifananiso xa Pawulo. Yene a hi yentxa hi pimisa hi xikazratu lexi vanyingi va kumanaka na xone namunhla. Swa va kazratela ku pfumela leswaku i va lisima a bandleni. Pawulo a tsrale leswi: ‘Loko fa nenge wu nga ku: Leswi ndzri ngeke voko, a ndzri wa mizri, xana a hi wa mizri, nambi swi tanu? Na yo ndleve, nambi fa yi nga ku: Leswi ndzri ngeke tihlu, a ndzri wa mizri, xana nambi swi tanu, a hi ya mizri xana?’ (1Ko 12:15, 16) Xana Pawulo a a djula ku hi dondzrisa yini?

¹⁴ Loko u tsrhamela ku tifanisa ni vambeni a bandleni, u nga ha hluleka ku vona ndlela leyi wene u nga wa lisima ha yone. Swi nga ha yentxeka a bandleni dzraku ku ni vamakwezru lava nga ni wuswikoti bya ku dondzrisa ha hombe, bya ku lulamisela kumbe bya ku tiyisa vambeni. U nga ha pimisa leswaku u nge txhuki u fanile na vone. Hi tlhelo dzrin’we, mapimisela lawo i manene hikusa ma kombisa leswaku wa titsrongahata nakone wa pfumela leswaku a wu koti ku yentxa hinkwaswu. (Flp 2:3) Kambe tivoneli. Hikusa loko u tsrhamela ku tifanisa ni vamakwezru va le bandleni dzraku lava nga ni wuswikoti byinyingi, u nga ha pimisa leswaku wene a wu pfuni ntxhumu. Nakone hi lani Pawulo a hlayiki ha kone u nga ha pimisa leswaku a wu na lisima a bandleni. I yini leswi nga ku pfunaka ku lwisana ni matitwela lawo?

15. Hi ku ya hi 1 Ba-le-Korinte 12:4-11, i yini leswi hi fanelaka ku swi pfumela mayelanu ni tinyiko leti hi nga na tone?

¹⁵ Pimisa hi leswi: Hi hlolana Yehovha a nyike vakriste va kukazri va le dzaneni dzra ku sungula a tinyiko ta moya wa ku xwenga, kambe a hi hinkwavu lava yamukeliki tinyiko leti fanaka. (Dondzra 1 Ba-le-Korinte 12:4-11.) Yehovha a va nyike tinyiko ni wuswikoti lebyi hambaniki, kambe a a vona mun’wana ni mun’wana wavu swanga wa lisima. Namunhla a hi  yamukeli tinyiko ta moya wa ku xwenga hi hlolana. Kambe ni namunhla swa ha li xitanu. A hi hinkwezru hi nga ni wuswikoti lebyi fanaka. Nambitanu, hinkwezru hi va lisima ka Yehovha.

16. I xilayu xini xa Pawulo lexi hi fanelaka ku xi landzra?

¹⁶ A matsrhan’wini ya ku tifanisa ni vambeni, hi fanela ku landzra xilayu xa Pawulo lexi liki: ‘A mun’wana ni mun’wana a a tikambele a ntizro wakwe, hi kone a taka kota a ku titwalisa a ku tiyanakanyeni kwakwe, ku nge ha ku tifanisa na mun’wana.’​—Ga 6:4.

17. Hi wani mabindzru lawa hi ma kumaka hi ku landzra xilayu xa Pawulo?

¹⁷ Loko hi landzra xilayu lexi Pawulo a xi nyikeliki hi tlhela hi tikambela mintizro yezru, hi nga ha xiya leswaku hi ni tinyiko ni wuswikoti bya ku hlawuleka. Hi xikombiso, swi nga yentxeka nkulu wa kukazri a nge na wuswikoti byikulu bya ku beka wukaneli, kambe swi nga yentxeka a humelela ngopfu ka ku yentxa vadondzrisiwa. Nakone swi nga ha yentxeka a nge na wuswikoti byikulu bya ku lulamisela ha hombe ku fana ni vakulu vambeni a bandleni dzrakwe, kambe swi nga ha yentxeka a tiviwa swanga mubyisi lweyi a nga ni lizrandzru ni lweyi a nghenekaka lweyi vazrezri va titwaka na va ntsrhunxekile ku kombela swilayu swa Bibele ka yene. Kumbe swi nga ha yentxeka a tiviwa swanga mhunu lweyi a nga ni malwandla ngopfu swinene. (Hb 13:2, 16) Loko hi kota ku xiya ha hombe lomu hi humelelaka ngopfu kone ni tinyiko leti hi nga na tone, hi kuma swivangelo swa ku va hi titwa ha hombe, hi xiya leswaku hi nga yentxa swinyingi akuva ku pfuneka bandla. Hi nkama wun’we, leswo swi hi pfuna leswaku hi nga tsrohoki vamakwezru lava nga ni tinyiko leti hambaniki ni tezru.

18. I yini leswi nga hi pfunaka akuva hi ya hi humelela a ku zrezreni?

¹⁸ Swi nga na mhaka leswaku hi wini ntizro lowu hi wu yentxaka a bandleni, hinkwezru hi fanela ku tiyimisela ku yampswisa ntizro wezru ni ku kulisa wuswikoti byezru. Nakone Yehovha awa hi pfuna akuva hi swi kota. Yene a tizrisa nhlengeletanu yakwe akuva yi hi dondzrisa hi ndlela ya ku hlamalisa. Hi xikombiso, ka ntlhanganu wa xikazri ka vhiki, hi nyikiwa swileleto leswi hi pfunaka akuva hi ya hi humelela a ku zrezreni. Xana wa tikazratela ku tizrisa hinkwaswu leswi u swi dondzraka?

19. I yini leswi nga pfunaka akuva u kota ku ya dondzra ka Xikole xa Vazrezri va Mfumu?

¹⁹ Lulamiselo dzrin’wana dzra ku dondzrisa i Xikole xa Vazrezri va Mfumu. Xikole lexi xi pfulekeli vamakwezru hinkwavu lava nga ka ntizro wa nkama hinkwawu na va ni 23 ku ya ka 65 wa malembe. Swi nga ha yentxeka u pimisa leswaku a wu nge swi koti ku ya dondzra ka xikole lexo. Kambe a matsrhan’wini ya ku pimisela hi mintxhumu leyi nga ku sivelaka ku ya dondzra ka xone, swi ngo yini u pimisa hi swivangelo leswi ku yentxaka u djula ku ya dondzra ka xone? Ntsrhaku u hamba kungu ledzri taka ku pfuna ku yentxa leswi vilelekaka akuva u ya dondzra ka xone. Hi ku pfuniwa hi Yehovha ni ku tlhela u tikazrata ngopfu swinene, u nga kota ku yentxa leswi a wu pimisa leswaku a wu nge ti txhuka u swi kota.

20. I yini leswi hi nga swi dondzraka ka Ba-le-Roma 12:6-8?

²⁰ Ntxhumu wa wuzrazru lowu hi wu dondzraka ka xifananiso xa Pawulo wu kumeka ka Ba-le-Roma 12:6-8. (Dondzra.) Lani Pawulo a tlhela a kombisa leswaku hinkwezru a bandleni hi ni tinyiko leti hambaniki, kambe swoswi yene a ntshimisisa leswaku hi fanela ku tizrisa nyiko yin’wana ni yin’wana leyi hi nga na yone akuva hi pfuna ni ku tiyisa bandla.

21-22. I yini leswi hi nga swi dondzraka ka xikombiso xa makwezru Robert ni xa makwezru Felice?

²¹ Vona xikombiso xa makwezru lweyi hi taka mu vitana leswaku i Robert. Ntsrhaku ka ku va  a tizre a tikweni dzrimbeni, a yaveliwe leswaku a ya tizra a Betele dzra tiko ledzri a pswaliwiki ka dzrone. Nambi leswi a a swi tiva leswaku a a nga txintxiwe xiyavelo hi ku va a yentxi xa ku biha, Robert a te: “Ni heti tihweti tinyingi na ni titwa na ni nga pfuni ntxhumu. Minkama yimbeni ni pimise nambi ku huma a Betele.” I yini leswi nga mu pfuna ku tlhela a kuma ku nyonxa? Nkulu wa kukazri a dzrimuxe Robert leswaku xiyavelo xin’wana ni xin’wana lexi Yehovha a samiki a hi nyika xone xi hi lulamiseleli akuva hi kota ku hetisisa xiyavelo lexi hi nga na xone swoswi. Robert a xiye leswaku a a fanela ku yima ku hanya bya tolo, ni leswaku a a fanela ku sungula ku yanakanya hi leswi a kotaka ku swi yentxa swoswi.

²² Makwezru Felice Episcopo a kumane ni xikazratu lexi fanaka. Yene ni nkatakwe va pase ka xikole xa Giliyadi hi 1956 nakone va tizre ka ku yendzrela mabandla a Bolívia. Hi 1964 va kume n’wana. Felice a te: “Swi hi kazratelile ngopfu swinene ku siya xiyavelo lexi a hi xi zrandzra. Ku hlaya ntiyiso, ni heti kolomu ka lembe na ni tisola. Kambe hi ku pfuniwa hi Yehovha, ni txintxe mapimisela yanga ni va ni sungula ku pimisa ngopfu hi leswi a ni fanela ku swi yentxa swanga tatana.” Xana u titwa hi ndlela leyi fanaka ni ya makwezru Robert kumbe makwezru Felice? Xana swoswi u titwa na u heli ntamu hi leswi u kalaka u nga ha na swiyavelo leswi a wu li na swone khale? Loko u titwa hi ndlela yoleyo txintxa mapimisela yaku u va u sungula ku pimisa hi leswi u nga swi yentxaka swoswi akuva u tizrela Yehovha ni vamakwezru. Tsrhama na u khomekile, nakone tizrisa tinyiko ni wuswikoti byaku akuva u pfuna vambeni. Hi ndlela leyo, u ta titwa na u nyonxile nakone u ta tiyisa bandla.

23. Hi fanela ku tinyika nkama wa ku yentxa yini, nakone hi ta bula hi yini ka nhloko-mhaka leyi landzrelaka?

²³ Mun’wana ni mun’wana wezru i wa lisima ka Yehovha. Yene a djula leswaku hi va vandangu wakwe. Loko hi tinyika nkama wa ku yanakanyisisa hi ndlela leyi hi nga tiyisaka vamakwezru ha yone hi va hi yentxa hinkwaswu leswi hi nga swi kotaka ka ntizro lowu Yehovha a hi nyikiki wone, hi ta swi vona leswaku hakunene hi ni lisima a bandleni. Kambe swi li yini hi vambeni a bandleni? Hi nga swi kombisa hi ndlela yini leswaku ha wu hlonipha ntizro lowu Yehovha a va nyikiki wone? Nhloko-mhaka leyi landzrelaka yi ta khanela hi mhaka yoleyo ya lisima.