Swi tikomba na swi nga li tanu. Diyavulosi a nga mu byelanga Evha leswaku loko o da mhandzru lowu tsimbisiwiki hi Xikwembu Nkulukumba, a a ta voneka ingi o fa kambe xiyenge xa kukazri ndzreni kwakwe lexi nga vonekiki (lexi van’wana namunhla va liki i hika ledzri nga fikiki) a xi ta tama xi hanya ka wun’wana mbangu. Loko Sathana a khanela hi ku tizrisa nyoka, a te loko Evha o da mhandzru wa muzri luwa, ‘a a nga ti fa nikutsrongo’. A nyike miyanakanyu ya leswaku Evha a a ta tama a hanya, a tikholisa hi wutomi bya ku yampswa la misaveni na a nga fumiwi hi Xikwembu Nkulukumba.​—Gn 2:17; 3:3-5.

Loko ndondzro ya madzrimi ya ku nga fi ka hika swanga hi leswi yi dondzrisisiwaka xiswone namunhla yi nga sungulanga a Edeni, xana yi ta va yi sungule hi nkama wini? Hi nge hlayi hi ku tiyiseka. Ha swi tiva kutani leswaku hinkwabyu wugandzreli bya madzrimi bya helisiwile ka Ndhambhi a masikwini ya Nowa. Hi nkama wa Ndhambhi, a ku vanga na miyanakanyu ni yin’we ya ku hoxeka ya wukhongoti yi saliki, hikusa ke huluka Nowa ni ndangu wakwe ntsena​—lava a va li vagandzreli va xihlayelamfuzri.

Xileswo, ndondzro leyi nga kone namunhla ya leswaku hika dzra mhunu a dzri fi yi ta va yi sungule ntsrhaku ka Ndhambhi. Nkama lowu Xikwembu Nkulukumba a hambanisiki tindzrimi a Babel kutani a hangalasa vhanu ‘misaveni hinkwayu’, a swi ganaganekisi leswaku va hangalake nayu miyanakanyu ya leswaku vhanu va ni hika ledzri nga fikikiki. (Gn 11:8, 9) Nambi loko swi nga tiveki leswaku yi sungule hi nkama wini ndondzro yoleyo ya madzrimi, hi nga tiyiseka leswaku Sathana Diyavulosi, “tatana wa ku hemba”, hi yene muhlohloteli wa yone mfuzri awa nyonxa ku vona leswaku yi hangalake hinkwaku.​—Yh 8:44.