XANA u tivona na u li mhunu lwa tlangelaka? Hinkwezru hi fanela ku yanakanyisisa hi leswo. Bibele dzri profete leswaku a masikwini yezru vhanu vanyingi a va ta va ‘lava nga tivikiki ku tlangela’. (2Tm 3:2) Kumbexana u tiva vhanu lava nga ni mavonela ya leswaku ku djuleka vhanu hinkwavu va va yentxela mintxhumu. Va titwa na va faneleka ku yentxeliwa mintxhumu na swi nga vileleki kuva vone va tlangela. U sama u swi xiya leswaku ku va kusuhi ni vhanu va ku tanu, a swi nyonxisi. A hi swone xana?

Ku hambana ni swoswo, malandzra ya Yehovha ma byeliwa leswi: ‘Vanani lava tlangelaka.’ Hine hi fanela ku ‘tlangela hi hinkwaswu’. (Kl 3:15; 1Te 5:18) Swi tiyile leswaku hi ta pfuneka loko hi txutxela moya wa ku tlangela. Ku ni swivangelo swa ku hlawa swa ku va hi yentxa leswo.

Xivangelo xin’we xa lisima xa ku va hi txutxela moya wa ku tlangela hi leswaku matsrhamela lawo ma nga pfuna leswaku hi tivona hi ndlela leyinene. Mhunu lweyi a tlangelaka swi nga yentxeka a nyonxa hi ku yentxa leswo, kambe ni yelweyi a tlangeliwaka awa nyonxa hi swoswo. Ha yini ku tlangela swi buyisa mabindzru lawa hi matlhelo ha mabidzri? Yanakanya hi xikombiso lexi: Loko wene u xiya leswaku vambeni va tiyimiselile ku ku yentxela swa kukazri, leswo swi komba leswaku va ku nyika lisima, a hi swone xana? Vone va zron’weka ha wene. Nkama lowu u vonaka ku zron’weka kwavu ha wene swi ku yentxa na wene u nyonxa. Hi nga vona leswaku swa fana ni leswi yentxekeliki Rute. Boaz a ve ni moya wa ku hanana ka Rute. A swi ganaganekisi leswaku swi mu nyonxisile ngopfu Rute ku vona leswaku ku ni lweyi a a zron’weka ha yene.​—Rt 2:10-13.

Swa lisima ku tlulisa i kuva hi tlangela Xikwembu Nkulukumba. Handle ka ku ganagana wa yanakanya nkama ni nkama hi swihiwa leswinyingi swa moya ni swa nyama leswi a swi nyikeliki nangweso a yaka mahlweni a swi nyikela. (Dt 8:17, 18; Min 14:17) Kambe a matsrhan’wini ya ku pimisanyana hi wunene bya Xikwembu Nkulukumba, ha yini u nga heti nkama wa ku phela na u yanakanyisisa hi matovoko manyingi lawa wene ni lava u va zrandzraka mi nyikiwiki hi Xikwembu Nkulukumba? Ku yanakanyisisa hi ndlela leyi Mutumbuluxi waku a hananaka ha yone swi ta yengetela ku tlangela kwaku ka yene ni ku dumba kwaku ka leswaku Yehovha awa ku zrandzra nakone awa zron’weka ha wene.​—1Yh 4:9.

Swi nga ku dzringani ku yanakanyisisa ntsena hi ndlela leyi Xikwembu Nkulukumba a hananaka ha yone ni hi matovoko lawa a ku nyikaka wone; ku djuleka nakone u tlangela Yehovha hi wunene byakwe. (Ps 100:4, 5) MutsraIi mun’wana a same a hlaya leswi: ‘Ku tlangela vambeni i ndlela ya lisima ngopfu ya ku pfuna vhanu ku kuma ku tsrhava.’

Xivangelo ximbeni xa kuva ku tlangela ku li kunene ka wene hi leswaku ku tiyisa wunghanu. Hinkwezru hi djula ku titwa na hi nyikiwa lisima. Loko u tlangela mun’wana hi wunene lebyi a ku yentxelaka byone, ha wubidzri byenu mi yentxa wunghanu byi ya byi tiya. (Ro 16:3, 4) Ntlhantakubidzri, vhanu lava tlangelaka va talisa ku va lava pfunanaka. Vone va xiya wunene lebyi va yentxeliwaka byone hi vambeni kutani na vone va susumeteka ku va yentxela hi ku fanana. Ina, a ku pfuna vambeni swi bindzrula ku nyonxa. Hi swoswo Yesu a swi hlayiki, a ku: ‘A tovoko dzra ku hanana dzri tlula tovoko dzra ku hananiwa.’—Min 20:35.

 Robert Emmons, mun’we wa vazrangeli va nkambisiso mayelanu ni ku tlangela lowu yentxiwiki hi Univhersidadi dzra le Califórnia, a beke vonela ledzri: “Akuva hi va ni moya wa ku tlangela ku djuleka hi twisisa leswaku hi nga pfuna vhanu mfuzri na vone va nga hi pfuna.” Hi nkama wa kukazri hi nga pfuna mhunu a va na yene a hi pfuna hi nkama wumbeni. Ntiyiso wa kone hi leswaku akuva hi hanya na hi nyonxile, hi djula ku pfuniwa hi van’wanyana hi tindlela ta ku siyana-siyana. Hi xikombiso, va nga ha hi lulamisela swakuda kumbe ku hi dahisa loko hi vabya. (1Ko 12:21) Mhunu lweyi a tlangelaka a kombisa livaleni leswaku awa khensa leswi van’wanyana va mu yentxelaka swone. Loko swi li tanu, xana u ni xitoloveto xa ku tlangela leswi vambeni va ku yentxelaka swone?

Swimbeni swi ku susumetelaka ku kombisa ku tlangela hi leswaku ku khensa ka ku pfuna kuva u kongomisa wutomi byaku ka mintxhumu leyinene matsrhan’wini ka leya ku biha. Hi mpimu wa kukazri, vongwe byaku byi tizra ku fana ni nsefo. Bya ku pfuna ku beka mbilu yaku ka mintxhumu leyinene na hi wolowo nkama u tingawula leya ku biha. Loko u yengetela ku tlangela kwaku, swi ta ku yentxa u vona mintxhumu yinyingi leyinene. Swoleswo swi ku yentxa mhunu lweyi a tlangelaka swinene. Ku va ni ku tiyimisela ku tlangela a wuton’wini, swi ta ku pfuna ku yentxa hi ku ya hi xilayu xa Pawulo lexi liki: ‘Tsrhavani a Hosini hi minkama hikwayu.’​—Flp 4:4.

U ta xiya leswaku ku tlangela koloko ku yentxa leswaku u nga vi nayu miyanakanyu leya ku biha. Xana a swi kazrati ngopfu kuva u titwa na u tlangela na hi nkama wolowo wa wun’we u li ni wukwele, ku vaviseka, kumbe xiviti? Vhanu lava tlangelaka nakone a va tinyiketeli ka ku zrandzra wukosi. Va yaneliwa hi leswi va nga na swone. A va tsrhami nkama hinkwawu na va dzringisa ku swi yengesela.​—Flp 4:12.

Swanga mukriste, wa swi xiya leswaku Sathana a a ta nyonxa hi ku ku vona na u ni gome ni ku hela ntamu hi mhaka ya swikazratu leswi u tlhanganaka naswu a masikwini lawa ya wugamu. A a ta nyonxa hi ku ku vona na u ni moya wa wumpswaka ni wa ku sola-sola. Moya wolowo wu nga ku yentxa u nga vi nayu nkhinkhi swanga muzrezri wa madzrungula lamanene. Swa tikomba, ke, leswaku ku tlangela swi fambelana ni swiyenge swa mhandzru wa moya, leswi patsraka ku tsrhava ni likholo. Hine ha nyonxa loko hi vona mintxhumu leyinene leyi Xikwembu Nkulukumba a hi nyikiki yone, mfuzri hi ni likholo ka swidumbiso swakwe hinkwaswu.​—Ga 5:22, 23.

Swanga mun’we wa vhanu va Yehovha, swi nga ha yentxeka u pfumelelana ni leswi hlayiwiki ka nhloko-mhaka leyi, mayelanu ni ku tlangela. Nambitanu, u ta xiya leswaku ku va ni moya wa ku tlangela ni mavonela lamanene a hi swa mapswaliwa. Kambe, u nga tsrhike leswo swi ku godolisa. Wene u nga swi kota ku hluvuka u tlhela u va ni vonela ledzrinene mayelanu ni ku tlangela. Hi ndlela muni? Tinyike nkama siku ni siku akuva u pimisa hi swiyimu swa kukazri swa wutomi byaku leswi u fanelaka ku swi tlangela. Nkama lowu u titolovetaka ku tlangela, hi lani u ta ka ya mahlweni kone u byekemela ka ku tlangela hi ku nabyala. Leswi swi ta ku yentxa u tama u nyonxa ku tlula lava va tsrhamaka hi ku pimisa hi swikazratu swa wutomi byavu. Yanakanya hi mintxhumu leyinene, leyi Xikwembu Nkulukumba ni vambeni va ku yentxelaka yone leyi ku tiyisaka, yi tlhela yi ku tsrhavisa. Swi nga va swinene kuva u swi tsrala swanga papela dzra mfambu wa siku ni siku. Ka dzrone, u nga tsrala swibidzri kumbe swizrazru leswi ku yentxiki u tlangela siku dzrodzro.

Vhanu van’wana lava va dondzriki mhaka leyo va li “ku tolovela ku tlangela swi nga txintxa matizrela ya vongwe byezru, swi hi yentxa hi va ni vonela ledzrinene”. Mhunu lweyi a tlangelaka a tsrhama na a nyoxile. Hi leswo ke, yanakanya hi matovoko yaku, londzrovota mintxhumu leya hombe leyi ku humelelaka. Matsrhan’wini ya ku pimisa leswaku i mfanelo yaku kuva mintxhumu leyinene yi yentxeka wuton’wini byaku, ‘tlangela Yehovha, hikuva a nga munene’. Mfuzri, ‘tlangela hi hikwaswu’.​—1Mk 16:34; 1Te 5:18.