Wudzrunguli lebyi nga ka Deuteronoma 22:25-27 ngopfu-ngopfu byi khanela hi ku tiyisa nandzru wa lweyi wanuna, hikusa a swi buya na swi tiveka leswaku a na wone nandzru. Nawu lowu a wu tizrela ngopfu ka ku basisa nandzru lweyo wansati. Xiya mongo wa kone.

Tindzrimana ta le henhla ti khanela hi wanuna lweyi a nga txhukaka a yetlela ni wansati lwa butiwiki hi ku mu sindzrisa “mutini”, kumbe a doropeni. Loko a yentxa tanu, wanuna wa kone a a hlayiwa leswaku a ni nandzru wa wumbuye, hikusa wansati lwa butiwiki a a voniwa swanga lwa tekiwiki. Ku hlayiwa yini hi lweyo wansati? A a ta dlawa ‘hikuva a nga huwelelanga [na a li] mutini’. Loko a e huwelela, vhanu inhaka va mu twile va va va ya mu lwela. Kambe a nga zanga a huwelela. Xileswo, a a yentxa wumbuye, leswi a swi yentxa hi wubidzri byavu va hlayiwa leswaku va ni nandzru.​—Dt 22:23, 24.

A ntsrhaku, Nawu wu tlhamuxele xiyimu lexi hambanaka, wu ku: ‘Kambe loko wanuna a kuma nhoveni wanhwanyana lwa butiwiki, a mu sindzrisa, a yetlela naye, wanuna lwa yetleliki naye a ta fa, a li yene ntsena. U nga yentxi ntxhumu ku wanhwanyana, a nga na nandzru lowu fanekelaka ku fa; hikusa swi fana ni loko mhunu a pfukela makwavu, a mu dlaya, a mhaka i yin’we. Hikusa a mu kumi a nhoveni; wanhwanyana lwa butiwiki a huwelelile, kambe [a] ku nga vanga na mhunu wa ku mu huluxa.’​—Dt 22:25-27.

A mhakeni leyo, vatsremi va timhaka a va mu vona na a nge na nandzru lweyo wansati. Hi ndlela yini? A ku yanakanyiwa leswaku ‘a huwelelile, kambe [a] ku nga vanga na mhunu wa ku mu huluxa’. Xileswo, a a nga yentxi wumbuye. Kasi lweyo wanuna a a ni nandzru wa ku pfinya wansati ni wa ku yentxa wumbuye hikusa a e ‘mu sindzrisa, a yetlela naye’.

Xileswo, nambi leswi nawu lowu a wu tizrela ngopfu ka ku basisa nandzru ka wansati, wudzrunguli lebyi byi hlaya ha kone leswaku lweyo wanuna a a ni nandzru wa ku pfinya ni wa ku yentxa wumbuye. Hi nga dumba leswaku vatsremi va timhaka a va ta ‘yi kamba swinene’ va va va yentxa xiboho hi ku twanana ni nawu wa Xikwembu Nkulukumba lowu a a wu tlhamuxeliwe ha hombe hi ku phindha-phindha.​—Dt 13:14; 17:4; Eks 20:14.