1-2. a) Xana i yini jubilewu? (Vona bokisi ledzri liki “ Xana Jubilewu A A Li Yini?”) b) Hi laha swi tsraliwiki ha kone ka Luka 4:16-18, xana Yesu a khanele ha yini?

A MATIKWENI ma nge mangani, ku hambiwa malulamiselo akuva ku yentxiwa minkhuvu ya ku hlawuleka ya ku tlangela ku tlhanganisiwa ka 50 wa malembe ya ku fuma ka hosi ya tiko dzroledzro. Lembe dzrodzro dzra wu-50 hakanyingi dzri tiviwa swanga lembe dzra jubilewu dzra hosi. Minkhuvu leyi yentxiwaka hi Jubilewu swi nga yentxeka yi teka siku, vhiki kumbe nambi ku tlula, kambe yi gama yi hela, nakone ku nyonxa loku yi ku tisaka ku hatla ku dzrivaliwa.

² Hi ta kambisisa jubilewu ledzri yampswaka, dzri tlulaka nambi nkhuvu lowu a wu heta lembe, lowu a wu zrezriwa loko ku tlhasa lembe dzra wu-50 a Israyeleni wa khale. Jubilewu ledzro dzra khale a dzri nyika ntsrhunxeko vhanu lava a va dzri tlangela. Ha yini hi fanela ku dondzra ha dzrone namunhla? Hi fanela ku yentxa tanu hikusa lembe dzra Jubilewu dzra Israyele dzri hi dzrimuxa lulamiselo dzra ku hlamalisa dzra ntsrhunxeko lowu nga helikiki, ledzri Yehovha a dzri yentxaka ni swoswi, ku nga ntsrhunxeko lowu Yesu a khaneliki ha wone.​—Dondzra Luka 4:16-18.

3. Hi ku ya hi Levitika 25:8-12, xana va-Israyele a va pfunekisa kuyini hi Jubilewu?

³ Hi nga twisisa ku yampswa leswi Yesu a a djula ku hlaya swone loko a khanele hi ku ntsrhunxeka loko ku sungula hi kambisisa Jubilewu ledzri Xikwembu Nkulukumba a dzri lulamiseliki tiko dzrakwe a minkameni leyi hundzriki. Yehovha a byele va-Israyele a ku: ‘N’wi va hlawula lembe dzra ntlhanu wa makume, n’wi zrezra ku ntsrhunxeka tikweni hinkwadzru ku vayaki va dzrone hinkwavu; dzri ta va jubilewu ku n’wine; n’wi ta buyela a mun’wana ni mun’wana a pfindleni dzrakwe, n’wi ta buyela  mun’wana ni mun’wana ku va kwavu.’ (Dondzra Levitika 25:8-12.) Ka nhloko-mhaka leyi khalutiki, hi vone ndlela leyi va-Israyele va pfunekiki ha yone hi Savata dzra vhiki ni vhiki. Nambitanu, xana va-Israyele va pfunekise kuyini ka Jubilewu? Akuva hi twisisa leswo, a hi nge mu-Israyele wa kukazri a pele swikwenetini, kutani a sindzriseka ku xavisa nsimu yakwe akuva a hakela swikweneti. Hi lembe dzra Jubilewu, a a fanela ku tlheliseliwa nsimu leyo. Xileswo, mhunu lweyo a a ta kota ku ‘buyela a pfindleni dzrakwe’, nakone pfindla dzra vanakwe a dzri nge na ku lahleka a nkameni lowu taka. Ka xiyimu xin’wana, mhunu lweyi a a li ku bindzreliweni hi wutomi a nga ha va a sindzriseke ku xavisa mun’we wa vanakwe​—nambi ku tixavisa ha byakwe—​leswaku a va xikazrawa akuva a kota ku hakela swikweneti. Hi lembe dzra Jubilewu, lweyi a a li xikazrawa a a ‘buyela ku va kwavu’. Hi ndlela leyo, a ku nge na mhunu lweyi a a yentxiwa xikazrawa hi la ku nga helikiki na a nge na dumbo! Vona lizrezre dzra Yehovha!

4-5. Ha yini namunhla hi fanela ku djula ku dondzra hi Jubilewu dzra khale?

⁴ Hi dzrini bindzru dzrin’wana dzra Jubilewu? Yehovha a tlhamuxele leswi: ‘Ku nga vi vana xisiwana a kwaku, hikusa Yehovha a ta ku tovokisa kunene a tikweni ledzri Yehovha, Xikwembu Nkulukumba waku, a ku nyikaka dzrone, dzri va pfindla dzraku.’ (Dt 15:4) Vona ku hambana loku nga kone ni leswi humelelaka namunhla a misaveni, lani lava ku ganya hakanyingi va yaka a mahlweni hi ku ganya na kasi swisiwana swo ya a mahlweni hi ku swela!

⁵ Swanga vakriste, hine a hi le hansi ka Nawu wa Moxe. Leswi liki a hi bekisi lulamiselo dzra Jubilewu dzra khale dzra ku ntsrhunxa swikazrawa, ku dzrivalela swikweneti ni kuva mun’wana ni mun’wana a buyela a pfindleni dzrakwe. (Ro 7:4; 10:4; Ef 2:15) Nambitanu, hi ni xivangelo xa ku djula ku dondzra hi Jubilewu. Ha yini? Hikusa hi nga kuma ku ntsrhunxeka, loku hi dzrimuxaka lulamiselo ledzri Yehovha a dzri yentxeliki va-Israyele.

6. Xana vhanu va djula ku ntsrhunxiwa ka yini?

⁶ Hinkwezru hi djula ku ntsrhunxiwa hikusa hi swikazrawa hi ndlela leyi txhavisaka​—hi swikazrawa swa xidoho. Leswi hi nga vadohi, ha  duhwala, ha vabya hi tlhela hi fa. Vanyingi va vona wumboni bya leswo loko va tilavisa ka xivonivoni kumbe loko va ya xipiritana va ya dahiwa. Nakone hi hela ntamu loko hi txhuka hi yentxa swidoho. Mupostola Pawulo a pfumele leswaku a a ‘boheliwa a nawini wa xihono lowu nga swizrweni [swakwe]’. A tlhele a ku: ‘Hla mine! ndzri mhunu wa khombo! Xana hi mani lwa taka ndzri huluxa a mizrini ya ku fa loku?’​—Ro 7:23, 24.

7. Xana Ezaya a profete yini mayelanu ni ntsrhunxeko?

⁷ Ndjombo ya kone, Xikwembu Nkulukumba a lulamisele ndlela ya kuva hi huluxiwa, kumbe hi ntsrhunxiwa, a xidohweni. Yesu hi yene lweyi a yentxaka swi koteka ku ntsrhunxiwa. Hi dzana dzra wu-8 Mahlweni Ka Nguva Yezru, muprofeta Ezaya a profete mayelanu ni ntsrhunxeko lowukulu a nkameni lowu taka. Ntsrhunxeko lowo lowukulu a wu ta hetisisa swa ku tlula ngopfu swinene leswi yentxiwiki hi lembe dzra Jubilewu dzra Israyele. A tsrale leswi: ‘A moya wa Hosi Yehovha wu le henhla kwanga, hikusa Yehovha a ndzri totile akuva ndzri dzrungulela lava ku nabyala madzrungula lamanene; a ndzri zrumi akuva ndzri daha lava nga ni timbilu leti tsrhovekiki, ni ku byela lava bohiwiki akuva va ntsrhunxiwa.’ (Eza 61:1) Xana wuprofeta lebyi byi tizra ka mani?

8. Xana wuprofeta bya Ezaya mayelanu ni ntsrhunxeko byi tizra ka mani?

⁸ Wuprofeta lebyo bya lisima mayelanu ni ntsrhunxeko byi sungule ku hetiseka a ntsrhaku ka loko Yesu a sungule wutizreli byakwe. Loko a nhingene a sinagogeni a tikweni dzra le kwavu dzra Nazareta, Yesu a dondzrele va-Yuda lava a va hlengeletanile mazritu wolawu ya Ezaya. Yesu a tizrise mazritu lawo ka yene hi ntshima a ku: ‘A moya wa Hosi [Yehovha] wu le henhla kwanga hikusa yi ndzri totile, akuva ndzri dzrungulela swisiwana evhangeli, a ndzri zrumi ku byela vabohiwa a ku ntsrhunxeka, ni lava ku fa mahlo a ku vona, ku ntsrhunxa lava xanisekaka, ni ku zrezra nyiwa ya lembe dzra vunene bya Hosi.’ (Lk 4:16-19) Xana Yesu a byi hetisise hi ndlela yini wuprofeta lebyo?

9. Xana vanyingi a nkameni wa Yesu a va lavisela ntsrhunxeko wa muxaka muni?

⁹ Ku ntsrhunxeka loku Ezaya a ku profetiki ni loku Yesu a dondzreliki va-Yuda a sinagogeni ku sungule ku nyikiwa vhanu a dzaneni dzra ku sungula. Yesu a tiyise mhaka leyi loko a ku: ‘Namunhla a tsralwa ledzri dzra yentxiwa a tindleveni tenu.’ (Lk 4:21) Vanyingi va lava twiki leswi Yesu a swi dondzriki n’waninkama a va djula ku txintxa ka mafumela, va ntsrhunxiwa ka mfumu wa Roma. Kumbexana va titwe ku fana ni vavanuna vabidzri lava tiki: ‘Hine afa hi dumba leswaku a ta va yene lwa taka va ni ku  tizrula Israyele.’ (Lk 24:13, 21) Kambe, hi laha u tivaka ha kone, Yesu a nga zanga a hlohlotela valandzreli vakwe ku pfukela mfumu wa va-Roma. A matsrhan’wini ya swoswo, a va lelete ku tlhelisela ‘swa Kezar ku Kezar’. (Mt 22:21) Xileswo, xana Yesu a tise ntsrhunxeko hi ndlela yini hi nkama lowo?

10. Xana Yesu a pfulele vhanu ndlela ya ku ntsrhunxeka ka yini?

¹⁰ N’wana wa Xikwembu Nkulukumba a tele ku ta pfuna vhanu ku kuma ku ntsrhunxeka hi tindlela tibidzri. Ya ku sungula, Yesu a pfule ndlela ya kuva vhanu va ntsrhunxeka ka tindondzro leti khinyavezaka leti a ti dondzrisiwa hi vazrangeli va wukhongoti. Va-Yuda vanyingi a nkameni lowo a va tsrimbeleliwe hi swihena ni tindondzro ta madzrimi. (Mt 5:31-37; 15:1-11) Lava a va voniwa na va li vafambisi va moya a va fe mahlo hi ndlela ya kukazri. Loko va dzrela Mesiya ni ku vaningeliwa loku a a ta naku, va tame va tsrhama a munyameni ni le xidohweni. (Yh 9:1, 14-16, 35-41) Hi tindondzro takwe letinene ni xikombiso xakwe lexa hombe, Yesu a tivise lava ku zrula ntsrhunxeko wa moya.​—Mr 1:22; 2:23–3:5.

11. Xana yi ve yini ndlela ya wubidzri leyi Yesu a nyikeliki ntsrhunxeko ha yone?

¹¹ Ndlela ya wubidzri leyi Yesu a nyikeliki ntsrhunxeko ha yone a ve ku ntsrhunxa vhanu a wukazraweni bya xidoho lexi va pswaliwiki naxu. Hi gandzrelo dzra Yesu, swi kotekile kuva Xikwembu Nkulukumba a dzrivalela swidoho swa lava kombisaka lipfumelo ni lava yamukelaka tizrulo ledzri a hi nyikiki dzrone. (Hb 10:12-18) Yesu a te: ‘Loko-ke N’wana a n’wi ntsrhunxa n’wi ta va lava ntsrhunxekiki kunene.’ (Yh 8:36) Ntsrhunxeko lowo hakunene a wu wu tlula ngopfu swinene ntsrhunxeko luwa a wu kumiwa hi lembe dzra Jubilewu dzra le Israyeleni! Hi xikombiso, a swi koteka kuva mhunu lwa ntsrhunxiwaka hi lembe dzra Jubilewu a tlhela a hamba xikazrawa. Nambi loko swoswo swi nga yentxekanga, hi ku famba ka nkama a a ta fa.

12. Xana i vamani lava nga sungula va pfuneka hi ntsrhunxeko lowu twalisiwiki hi Yesu?

¹² Hi siku dzra Pentekosta wa 33 N.Y., Yehovha a tote hi moya wa ku xwenga vapostola ni vavanuna ni vavasati van’wana va ku dumbeka. A va yamukele swanga vanakwe leswaku hi ku famba ka nkama va pfuxeliwa a tilweni akuva va fuma na Yesu. (Ro 8:2, 15-17) Lava va ve vone va nga sungula va pfuneka hi ntsrhunxeko lowu Yesu a wu twalisiki a sinagogeni le Nazareta. Vavanuna ni vavasati lavo a va nga ha li swikazrawa swa tindondzro ta madzrimi ta vazrangeli va wukhongoti bya xiyuda ni swihena swavu leswi a swi lwa ni Matsralwa. Xikwembu Nkulukumba  a tlhele a va vona swanga lava ntsrhunxekiki ka xidoho lexi yisaka ku feni. Jubilewu dzra ku fanekisela ledzri sunguliki loko ku totiwa valandzreli va Kriste hi 33 N.Y. dzri ta gama a ku heleni ka Mfumu wa Yesu wa 1.000 wa Malembe. Xana ku ta yentxeka yini ku sukela swoswi ku ya tlhasa a nkameni lowo?

13-14. Handle ka vakriste lava totiwiki, i vamani va nga kumaka ntsrhunxeko lowu twalisiwiki hi Yesu?

¹³ Namunhla wa siku, magidigidi ya vhanu va timbilu leti basiki lava humaka a matikweni hinkwawu i ‘tihamba tin’wanyana’. (Yh 10:16) A va vitaniwanga hi Xikwembu Nkulukumba leswaku va ya fuma na Yesu a tilweni. A matsrhan’wini ya leswo, va ni ku lavisela loku seketeliwiki a Bibeleni ka ku hanya hi la ku nga helikiki la misaveni. Xana u ni ku lavisela koloko?

¹⁴ Nambi swoswi wa ma kuma man’wana ya mabindzru lama kumiwaka hi lava taka va xiyenge xa Mfumu wa Xikwembu Nkulukumba wa le tilweni. Hi ku pfumela kwaku a ngatini ya Yesu leyi halatiwiki, u nga kombela ku dzrivaleliwa swidoho swaku. Leswo swi yentxa leswaku u va ni xiyimu lexi lulamiki ni lipfalu ledzrinene a mahlweni ka Xikwembu Nkulukumba. (Ef 1:7; Mpf 7:14, 15) Nangweso, pimisa hi matovoko lawa u ma kumaka hi leswi u ntsrhunxiwiki ka tindondzro ta madzrimi leti khale a wu ti kholwa. Yesu a te: ‘N’wi ta tiva xihlayelamfuzri; a xihlayelamfuzri xi ta n’wi ntsrhunxa.’ (Yh 8:32) A hi ku nyonxisa ka swone ku kuma ntsrhunxeko lowo!

15. Xana hi nga dumba leswaku hi ta nyikiwa ntsrhunxeko wini ni matovoko wani a nkameni lowu taka?

 ¹⁵ Hi nga dumba leswaku ku ta va ni ntsrhunxeko lowukulu. Ku nga li khale, Yesu a ta sekeleka a helisa wukhongoti bya madzrimi ni mimfumu ya vhanu leyi hezrekiki. Xikwembu Nkulukumba a ta mpfenkela ‘xitsrhungu lexikulu’ xa vhanu lava mu tizrelaka, a gama a va pfumelela ku tikholisa hi matovoko a misaveni leyi nga paradeyisi. (Mpf 7:9, 14) Vhanu va ku tala swinene va ta pfuxiwa va va va nyikiwa nkama wa ku ntsrhunxiwa ka mihandzru hinkwayu leyi vavisaka ya xidoho xa Adamu.​—Min 24:15.

16. Hi kwini ku ntsrhunxeka lokukulu loku vhanu va taka va na kone a nkameni lowu taka?

¹⁶ A Mfun’wini wa 1.000 wa Malembe, Yesu ni vafumi-kulobye va ta pfuna vhanu kuva va hanya na va nge he na mavabyi va tlhela va va ni wuxaka lebyinene na Xikwembu Nkulukumba. Nkama lowo wa ku busetela mintxhumu ni ku ntsrhunxa vhanu wu ta fana ni Jubilewu le Israyeleni. Hinkwavu lava tizrelaka Yehovha hi ku dumbeka a misaveni va ta va lava hetisekiki nakone va ta ntsrhunxiwa a xidohweni.

17. Xana wuprofeta bya Ezaya 65:21-23 byi li vhanu va Xikwembu Nkulukumba va ta yentxekeliwa hi yini? (Vona xifaniso lexi nga ka kapa.)

¹⁷ Wuprofeta bya Ezaya 65:21-23 byi tlhamuxela leswi vhanu va taka hanyisa xiswone la misaveni. (Dondzra.) Wutomi lebyo byi nga ti va bya ku tsrhama hi mavoko. A matsrhan’wini ya leswo, Bibele dzri komba leswaku vhanu va Xikwembu Nkulukumba a nkameni lowo va ta yentxa ntizro wa lisima ni lowu nyonxisaka. A wugan’wini bya Mfumu wa 1.000 wa Malembe, hi nga tiyiseka leswaku ‘swivumbiwa swi ta ntsrhunxiwa a vundjemeni bya leswa ku bola, swi ta tlhasa vuntsrhunxekeni bya ku phatima bya vana va Xikwembu Nkulukumba’.​—Ro 8:21.

18. Ha yini hi dumba leswaku hi ta va ni wumundzruku bya ku xonga?

¹⁸ Swanga hi leswi Yehovha a nyikiki va-Israyele malulamiselo ya leswaku va dzringanisela ntizro ni nkama wa ku wisa, swi ta va tanu ka vhanu vakwe a Mfun’wini wa 1.000 wa Malembe wa Kriste lowu tsrhindzrekelaka. Handle ka ku ganaganeka ku ta va ni nkama wa mintizro ya moya. Ku gandzrela Xikwembu Nkulukumba namunhla i ndlela ya ku kuma ku nyonxa, xileswo a misaveni leyimpswha hi ta tama hi yentxa tanu. Ina, a Mfun’wini wa 1.000 wa Malembe wa Kriste, vhanu hinkwavu va ku dumbeka va ta tsrhava hikusa va ta yentxa ntizro lowu nyonxisaka nakone hinkwavu ka vone va ta tizrela Xikwembu Nkulukumba.