1. Xana djaha dzra kukazri dzri khumbisiwe kuyini hi wukaneli lebyi bekiwiki a nhlengeletanwini hi 1935?

MAKWEZRU wa kukazri wa djaha a babatisiwe hi 1926 na a ni 18 wa malembe. Vapswele vakwe a va li Swidondzri swa Bibele, ku nga ndlela leyi Timboni ta Yehovha a ti tiviwa ha yone nkameni luwani. Va dondzrise vanavu va vazrazru va madjaha ni vabidzri va vanʼhwanyana ku tizrela Yehovha ni ku yetisela Yesu Kriste. Lembe ni lembe djaha ledzri a dzri da kati dzri tlhela dzri nwa ni vhinyu hi lipfalu ledzri basiki ka xilalelo xa Hosi, hi lani Swidondzri hinkwaswu swa Bibele a swi yentxa ha kone hi nkama lowo. Nambitanu, matwisisela yakwe hi dumbo dzra wutomi ma txintxe loko a yingele wukaneli lebyi nga dzrivalekikiki, lebyi nga ni nhloko-mhaka leyi liki: “Xitsrhungu Lexikulu.” Wukaneli lebyo, byi bekiwe ha J. F. Rutherford hi 1935 a nhlengeletanwini leyikulu a Washington, D.C., Estados Unidos. Xana Swidondzri swa Bibele swi twisise yini ka nhlengeletanu leyo?

2. Xana hi wini ntiyiso lowu nyonxisaka lowu tlhamuxeliwiki ka wukaneli bya Makwezru Rutherford?

² Ka wukaneli byakwe, Makwezru Rutherford a tlhamuxele leswaku i vamani lava hambaka xiyenge xa ‘xitsrhungu lexikulu’, lexi ku vulavuliwaka ha xone ka Apfuletelo 7:9. Na wukaneli lebyi byi nga si na bekiwa, Swidondzri swa Bibele a swi pimisa leswaku a xitsrhungu lexikulu i ntlawa wa wubidzri wa lava taka ya tilweni kambe afaka wu nga dumbekaka ngopfu ku fana ni vatotiwa. Makwezru Rutherford a tizrise Matsralwa ku tlhamuxela leswaku xitsrhungu lexikulu a xi hlawuleliwanga  ku ya hanya a tilweni kambe i tihamba tin’wanyana * ta Kriste leti taka huluka a nhlomulweni lowukulu ti va ti hanya hi lani ku nga helikiki lani misaveni. (Mpf 7:14) Yesu a dumbise leswi: ‘Ndzri ni tihamba tin’wanyana, leti ngeke ta zranga ledzri. Na tone ti fanekela leswaku ndzri ti tisa, ta ta yingela zritu dzranga. Kutani ku ta va ni ntlhambi mun’we na mubyisi mun’we.’ (Yh 10:16) Vhanu lava, lava fanaka ni tihamba i Timboni ta Yehovha leti dumbekaka, leti laviselaka ku hanya ku hanya hi la ku nga helikikiki a Paradeyisini lani misaveni. (Mt 25:31-33, 46) A hi voneni ndlela leyi livaningo ledzro dzra moya dzri txintxiki ha yoni wutomi bya vhanu vanyingi va Yehovha, ku patsra ni dzra makwezru lwiyani wa 18 wa malembe.​—Ps 97:11; Pr 4:18.

3-4. Ka nhlengeletanu ya 1935, i yini leswi vanyingi va swi twisisiki nakone ha yini?

³ Nkama wa ku nyonxisa swinene a nhlengeletanwini ku ve loko xikaneli xi kombele leswi ka vayingiseti: “Ni kombela leswaku hinkwavu lava nga ni dumbo dzra ku hanya lani misaveni hi la ku nga helikiki va sekeleka va yima.” Hi ku ya hi mun’we wa vahlaleli, ku tlula hanfu ya 20.000 wa vahlaleli yi sekeleki yi yima. Kutani Makwezru Rutherford a ku: “Vonani! Hi lexi xitsrhungu lexikulu!” Hi loko vahlaleli va ba mavoko va tlhela va hlekelela hi ku nyonxa. Lava sekelekiki va yima va twisise leswaku a va nge na dumbo dzra ku ya hanya tilweni. Va swi vonile leswaku a va nga totiwanga hi moya wa Xikwembu Nkulukumba. Hi siku ledzri landzreliki ka nhlengeletanu liyani ku babatisiwe 840 wa Timboni letimpshwa. Lani ku tala kwavu a va li va tihamba tin’wanyana.

⁴ Ntsrhaku ka wukaneli lebyo, djaha ledzri ku khaneliwiki ha dzrone a ku sunguleni ka nhloko-mhaka leyi ku patsra ni vamakwezru vanyingi va tsrhike ku da kati ni ku nwa vhinyu ka Xilalelo xa Hosi. Vanyingi va titwe hi ndlela leyi fanaka ni ya makwezru lweyi a hlayiki leswi: “Khambi dzra wugamu ni diki Xilalelo ku ve hi 1935, hikusa ni twisise leswaku Yehovha a nga ni nyikaka dumbo dzra ku ya hanya a tilweni, kambe dzra ku hanya kola misaveni ni tizrisana ni vambeni a ku txintxeni ka misava yi va paradeyisi.” (Ro 8:16, 17; 2Ko 1:21, 22) Ku sukela kolanu, xitsrhungu lexikulu xi le ku kuleni nakone xi tizrisana ni nsalu ya vatotiwa. *

5. Xana Yehovha a va vonisa kuyini lava tsrhikiki ku da swifanekiselo swa Xilalelo?

⁵ Xana Yehovha a va vonisa kuyini lava tsrhikiki ku da swifanekiselo swa Xilalelo ntsrhaku ka 1935? Swi li yini hi loko Mboni ya Yehovha yi tsrhika ku da kati ni ku nwa vhinyu ka Xilalelo xa Hosi hi leswi yi twisisiki leswaku a yi totiwanga? (1Ko 11:28) Swi nga yentxeka vambeni a va da swifanekiselo hi mhaka ya leswi a va nga dzri twisisi ha hombe dumbo dzravu. Kambe loko va twisisa leswaku va hoxile, va yima ku da swifanekiselo va tlhela va tama va tizrela Yehovha hi ku dumbeka, Yehovha a va teka swanga xiyenge xa tihamba tin’wanyana. Nambi leswi va nga ha diki swifanekiselo, va ha tama va ya Xidzrimuxweni, hikusa va tlangela hinkwaswu leswi Yehovha na Yesu va va yentxeliki swone.

6. Xana Yesu a lelete tintsrumi leswaku ti yentxa yini?

⁶ Swanga hi leswi nhlomulo lowukulu wu nga kola kusuhi i swinene ku va hi yanankanyisisa hi leswi Apfuletelo ndzrima 7 yi swi hlayaka mayelanu ni vatotiwa ni lava xitsrhungu lexikulu xa tihamba tin’wanyana. Ka xivoniso lexo, Yesu a leleta leswaku tintsrumi ti tama ti khoma mimoya ya mune leyi honaka. A ti fanelanga ku tsrhika mimoya leyo yi hunga misaveni ku kota ku fungiwa vatotiwa hinkwavu va Kriste ku nga ku va va yamukeliwa hi Yehovha swanga lava dumbekiki. (Mpf 7:1-4) Swanga hakelo dzra ku dumbeka kwavu, vamakwavu va Kriste lava totiwiki va ta fuma na Yene a matilweni swanga tihosi ni vaprista. (Mpf 20:6) Hinkwavu lava vumbaka ndangu wa Xikwembu Nkulukumba wa le tilweni va hlunyela ku vona lava 144.000 lava totiwiki na va yamukela hakelo dzravu dzra le matilweni.

7. Hi ku ya hi Apfuletelo 7:9, 10 i vamani lava Yohane a va voniki a xivonisweni nakone a va yentxa yini? (Vona xifaniso lexi nga ka kapa.)

⁷ Ntsrhaku ka ku vona lava 144.000 na va li vaprista ni tihosi, Yohane a vona ntxhumu lowu hlamalisaka. A vona xitsrhungu lexikulu lexi hulukiki a Armagedoni. Ku hambana ni ntlawa wa ku sungula wa lava 144.000, a ntlawa wa wubidzri i wukulu swinene lakakuva a ku na mhunu lweyi a nga wu hlayaka. (Dondzra Apfuletelo 7:9, 10.) Xi yambale ‘minkhantxu leya ntlhohe’, leswi tlamuxelaka leswaku va swi kotile ku tihlayisa ka misava ya Sathana na va nge na bati, nakone va tsrhame na va dumbekile ka Xikwembu Nkulukumba na Kriste. (Yk 1:27) Va huwelela leswaku va huluxiwe hi leswi va yentxeliwiki swone ha Yehovha na Yesu, Hambana ya Xikwembu Nkulukumba. Hi nkama lowu fanaka va khoma minkindzru, leswi kombisaka leswaku va pfumela hi ku nyonxa leswaku Yesu i Hosi leyi bekiwiki ha Yehovha.—Dzringanisa na Yohan 12:12, 13.

8. Hi ku ya hi Apfuletelo 7:11, 12, xana a ndangu wa Yehovha wa le tilweni wu titwise kuyini loko wu vone lava xitsrhungu lexikulu?

⁸ Dondzra Apfuletelo 7:11, 12. Xana ndangu wa Yehovha wa le tilweni wu titwise kuyini loko wu vona xitsrhungu lexikulu? Yohane a vone ndangu wa Xikwembu Nkulukumba wa le tilweni na wu nyonxile wu tlhela wu dzrumisa Xikwembu Nkulukumba loko wu vona xitsrhungu lexikulu. Ndangu wa Yehovha wa le tilweni wu ta tlhela wu nyonxa swinene loko ku hetiseka xivoniso lexo xa Yohane, loko wu vona xitsrhungu lexikulu na xi huluka a nhlomulweni lowukulu.

9. Hi ku ya hi buku dzra Apfuletelo 7:13-15, i yini leswi lava xitsrhungu lexikulu va swi yentxaka swoswi?

⁹ Dondzra Apfuletelo 7:13-15. Yohane a hlaye leswaku xitsrhungu lexikulu hi lava ‘hlampswiki minkhantxu yavu, va mi basisa hi ngati ya Hambana’. Leswo swi tlhamuxela leswaku va ni lipfalu ledzri basiki, nakone va yamukeliwa ha Yehovha. (Eza 1:18) I vakriste lava tinyiketeliki va tlhela va babatisiwa lava nga ni lipfumelo ledzri tiyiki ka xitizrulo xa Yesu Kriste nakone va nga ni wunghanu na Yehovha. (Yh 3:36; 1Pe 3:21) Xileswo, va faneleka ku hambela Xikwembu Nkulukumba ntizro wa ku hlawuleka nhlikanhi ni wusiku kola misaveni. Ni swoswi, va hiseka nakone va yentxa swinyingi a ntizrweni wa ku zrezra. Hi ndlela leyo va zrangisa Mfumu wa Xikwembu Nkulukumba a wuton’wini byavu.—Mt 6:33; 24:14; 28:19, 20.

10. I yini leswi lava xitsrhungu lexikulu va tiyisekaka ha swone, nakone hi xini xidumbiso lexi va taka xi vona na xi hetiseka?

¹⁰ Lava xitsrhungu lexikulu, lava humaka a nhlomulweni lowukulu, va dumba leswaku Xikwembu Nkulukumba a ta tama a va hlayisa  hikusa a dumbisa ku va sizrelela hi tende dzrakwe. Hi wugamu, xidumbiso lexi xitsrhungu lexikulu a xi xi yimela ngopfu swinene xi ta hetiseka. Xidumbiso lexo hi lexi liki: ‘[Xikwembu Nkulukumba] a ta hlangula minyembeti hinkwayu a matihlweni yavu ni ku fa ku nga ha vi kone, ku nga ha vi na nkosi ni ku bongosa ni ku vaviseka.’—Mpf 21:3, 4.

11-12. a) Hi lani swi kombisiwiki ha kone ka Apfuletelo 7:16, 17, hi wani matovoko lawa ma taka kumiwa hi lava xitsrhungu lexikulu? b) I yini leswi lava va tihamba tin’wanyana va nga swi yentxaka ka Xidzrimuxo nakone ha yini?

¹¹ Dondzra Apfuletelo 7:16, 17. Namunhla, van’we ka vhanu va Xikwembu Nkulukumba va xaniseka hi swikazratu swa timali ni tiyimpi. Van’wana va pfaleliwa madjele hi kola ka lipfumelo dzravu. Nambi swi li tanu, lava xitsrhungu lexikulu va nyonxile hi ku tiva leswaku va ta huluxiwa loko ku helisiwa misava leyi ya ku biha kutani va kuma swakuda swinyingi swa nyama ni swa moya. Loko Yehovha a helisa misava leyi ya Sathana a ta sizrelela xitsrhungu lexikulu ka mahlundzru yakwe lama fanaka ni mumu. Loko nhlomulo lowukulu wu hela, Yesu a ta kongomisa vhanu vakwe a tinhlobyeni ta mati ya wutomi lebyi nga helikikiki. Swoswi, pimisa hi leswi: Xitsrhungu lexikulu xi ni dumbo dzra ku hlamalisa! Ka vhanu va ntsrandzra-vahlayi ko va vone ntsena lava nge tiki txhuka va fa!​—Yh 11:26.

¹² Lava tihamba tin’wanyana va ta mu tlangela swinene Yehovha na Yesu hi kola ka dumbo ledzri va nga na dzrone dzra ku xonga swinene. I ntiyiso leswaku a va hlawuleliwanga ku ya hanya tilweni, kambe leswo a swi pumbi lisima dzravu ka Yehovha. Vatotiwa ni lava tihamba tin’wanyana va ni ndjombo ya ku tizrela Yehovha, ya ku dzrumisa Xikwembu Nkulukumba nakone ndlela ya ku va va yentxa leswo i kuva va va kone ka Xidzrimuxo xa lifu dzra Yesu Kriste.

13-14. Ha yini hinkwezru hi fanela ku va kone ka Xidzrimuxo xa lifu dzra Kriste lembe ni lembe?

¹³ Hi malembe ya swoswinyana, ka 1.000 wa vhanu ko va mun’we ntsena a daka swifanekiselo a Xidzrimuxweni. Leswo swi tlhamuxela leswaku hi xidzringaniso, ka 6 wa mabandla, 5 wa wone a ku na mhunu a daka swifanekiselo. Ntalu wa vhanu lava yaka ka Xidzrimuxo xa lifu dzra Yesu Kriste va ni dumbo dzra ku hanya kola misaveni. Kambe a yini va ha tama va ya Xidzrimuxweni xa lifu dzra Yesu Kriste?  Va ya hi xivangelo lexi fanaka ni lexi yentxaka mhunu a ya ka mutxhatu wa munghanu wakwe. Va djula ku kombisa leswaku va va zrandzra vatekani volavo nakone va va seketela. Hi ndlela leyi fanaka lava tihamba tin’wanyana va ya Xidzrimuxweni akuva va kombisa leswaku va zrandzra Yesu kun’we ni vatotiwa nakone va va seketela. Va djula ku kombisa leswaku va dzri nyika lisima gandzrelo dzra Yesu Kriste, ledzri va nyikaka dumbo dzra ku hanya hi lani ku nga helikiki kola a misaveni.

¹⁴ Nakone ku ni xivangelo xin’wana lexi yentxaka lava tihamba tin’wanyana va va kone ka Xidzrimuxo xa lifu dzra Yesu Kriste. Va kombisa leswaku va mu zrandzra Yesu Kriste. Loko a li ka xilalelo xa ku sungula xa Hosi ni vadondzrisiwa vakwe, Yesu a va lelete leswi: ‘Yentxani leswo n’wi ta ndzri dzrimuka ha swone.’ (1Ko 11:23-26) Xileswo, na ka ha ni vatotiwa lani misaveni, lava tihamba tin’wanyana va ta tama va hlengela ka Xidzrimuxo xa lifu dzra Yesu, nakone va ta tama va zramba van’wana akuva va va kone ka Xidzrimuxo lexi.

15. Hi nga swi kombisa hi ndlela yini leswaku hi dzrumisa Yehovha na Yesu loko hi li Xidzrimuxweni?

¹⁵ A Xidzrimuxweni hi ni mukhandlu wa ku dzrumisa Xikwembu Nkulukumba na Kriste hi ku yimbelela tinsimu ni ku khongota. Nhloko-mhaka ya wukaneli bya Xidzrimuxo xa lembe ledzri yi li: “Tlangela Leswi Xikwembu Nkulukumba Na Kriste Va Ku Yentxeliki Swone.” Wukaneli lebyo byi ta hi pfuna ku yengesela ku tlangela loku hi nga naku ha Yehovha na Kriste. Loko swifanekiselo swi fambisiwa, hinkwezru hi ta dzrimuka leswi swi tlhamuxelaka swone, ku nga mizri ni ngati ya Yesu. Hi ta tlhela hi dzrimuka lizrandzru ledzri Yehovha a hi kombisiki dzrone hi ku pfumelela leswaku N’wanakwe a hi fela. (Mt 20:28) Hinkwavu lava zrandzraka Yehovha ni N’wanakwe a va nge ti djula ku luza Xidzrimuxo.

16. Hi yini mintxhumu leyi vatotiwa ni lava tihamba tin’wanyana va fanaka ha yone?

¹⁶ A vatotiwa ni lava tihamba tin’wanyana va fana hi mintxhumu yinyingi. Mintlawa leyi yibidzri i ya lisima ka Yehovha. Hinkwavu va xaviwe hi nxavu lowu fanaka, ku nga wutomi bya n’wanakwe lweyi a zrandzrekaka. Vo hambana hi dumbo dzravu ntsena. Vatotiwa ni lava tihamba tin’wanyana va fanela ku tama va dumbeka ka Xikwembu Nkulukumba na Kriste. (Ps 31:23) Nakone Xikwembu Nkulukumba a nga nyiki ntlawa wa kukazri moya wa ku xwenga hi ndlela leyikulu ku tlula wumbeni. Ku hlaya ntiyiso, a nyika moya wa ku xwenga hi ku ya hi xivileleko xa mhunu.

17. I yini leswi vatotiwa lava saliki va yimelaka ku swi kuma?

 ¹⁷ Vakriste lava totiwiki a va pswaliwi na va ni dumbo dzra ku ya hanya a tilweni, kambe i Yehovha lweyi a bekaka dumbo ledzro a timbilwini tavu. Va yanakanyisisa hi dumbo ledzro, va khongota ha dzrone, nakone va swi yimele hi manyawu ku yamukela hakelo dzravu a tilweni. A va swi tivi leswaku mizri wavu wu ta tsrhamisisa kuyini loko va li tilweni. (Flp 3:20, 21; 1Yh 3:2) Nambi swi li tanu, va swi navela ngopfu ku va na Yehovha, Yesu ni tintsrumi ni ku va va fuma kun’we ni vatotiwa vambeni lava kutani va nga tilweni.

18. I yini leswi lava tihamba tin’wanyana va swi yimeliki?

¹⁸ Lava tihamba tin’wanyana va swi yimele hi manyawu ku hanya hi lani ku nga helikiki a misaveni. Loko i ku navela ka ntumbuluku ka mun’wana ni man’wana. (Ekl 3:11) Va swi navela ngopfu ku pfunisa ka ku ndzruluta misava yi va paradeyisi. Va swi djula ngopfu ku yaka miti yavu, va hamba swizramba, ni ku wundla vana lava nga ni lihanyu ledzri hetisekiki. (Eza 65:21-23) Va swi navela ngopfu ku yendzra a misaveni hinkwayu, va khwela tinhava, va famba-famba tinhoveni ni ku tlhela va va ni mukhandlu wa ku dondzra hi mintxhumu leyi Yehovha a yi vumbiki. Nakone va nyonxa ngopfu hi ku tiva leswaku a nkameni lowu taka wunghanu byavu na Yehovha byi ta ya byi tiya swinene.

19. Hi wini mukhandlu lowu mun’wana ni mun’wana wezru a taka va na wone hi nkama wa Xidzrimuxo, nakone xi ta yentxeka dzrini lembe ledzri?

¹⁹ Yehovha a nyike nandzra mun’wana ni mun’wana wakwe dumbo dzra ku nyonxisa swinene, dzra ku hanya hi lani ku nga helikikiki. (Yr 29:11) Xidzrimuxo xa lifu dzra Kriste xi hi nyika mukhandlu wukulu wa ku tlangela Yehovha na Yesu hi hinkwaswu leswi va swi yentxiki akuva dumbo ledzro dzri hetiseka. Handle ka ku ganaganeka, a Xidzrimuxo i ntlhanganu wa lisima lembe ni lembe ka vakriste va xihlayelamfuzri. Lembe ledzri xi ta yentxiwa ntsrhaku ka ku pela ka dambu hi Mugqivela, 27 ka Marsu wa 2021. Vanyingi va ta ntsrhunxeka akuva va hlalela ntlhanganu lowu wa lisima, nakasi van’wana va ta va kone nambi loko va kanetiwa. Nakasi van’wana va ta hlalela ntlhanganu lowu a djele. Handle ka ku ganaganeka, Yehovha, Yesu, ni ndangu wa le tilweni wa Xikwembu Nkulukumba wu ta va na wu hi hlalela. Ingiki mhunu mun’wana ni mun’wana, ntlawa ni bandla va nga va ni ntlhanganu lowunene wa Xidzrimuxo.