NHLOKO-MHAKA YA XIDONDZRO 25
‘Mine, Ndzri Ta Djula Tihamba Tanga’
‘Mine, ndzri ta djula tihamba tanga, ndzri ti djulisisa.’—EZK 34:11.
LISIMU 105 “Xikwembu Nkulukumba I Lizrandzru”
NKATSRAKANYU WA LESWI TAKA DONDZRIWA *
1. Ha yini Yehovha a tifananisa ni mamana lweyi a yan’wisaka n’wanakwe?
‘XANA wansati a nga dzrivala xin’wananyana xakwe lexi yan’waka?’ Lexo ku ve xivutiso lexi Yehovha a xi hambiki a masikwini ya muprofeta Ezaya. Yehovha a dumbise leswi vhanu vakwe: ‘Ni loko kumbe vamamana va nga dzrivala vana, mine ndzri nga ka ndzri nga ku dzrivali.’ (Eza 49:15) Yehovha a nga talisi ku tifananisa ni mamana wa kukazri, kambe ka khambi ledzro a swi yentxile leswo. Yehovha a khanele hi lizrandzru ledzri nga kone ka mamana ni n’wanakwe akuva a kombisa ndlela leyi a ma zrandzraka ngopfu ha yone malandzra yakwe. Vamamana vanyingi va swi tiva ha hombe leswi makwezru Jasmin a swi hlayiki, a te: “Loko u yan’wisa xibebetana xaku, u sungula ku va ni lizrandzru ledzrikulu ha xone ledzri tamaka dzri va kone wutomi hinkwabyu.”
2. Xana Yehovha a titwa hi ndlela yini loko a vona mun’we ka vana vakwe a yima ku mu tizrela?
2 Yehovha awa swi tiva nambiloko mun’we ka vanakwe a yima ku ya mintlhanganwini kumbe a ku zrezreni, nakone leswo swa mu vavisa. Kutani, yanakanya hi ndlela leyi Yehovha a vavisekaka ha yone loko lembe dzrin’wana ni dzrin’wana a vona magidigidi ya malandzra yakwe ma hola hi tlhelo dzra moya. *
3. I yini leswi Yehovha a swi djulaka?
3 Ku tala ka vamakwezru lava holiki va gama va tlhelela a bandleni, nakone ha nyonxa hi ku va vona na va yentxa leswo! Yehovha a djula leswaku va tlhelela, na hine ha swi djula. (1Pe 2:25) Hi nga va pfunisa kuyini akuva va tlhelela? Na hi nga si na hlamula xivutiso lexo, swi nga va swinene ku tiva leswaku ha yini van’wana va yime ku ya mintlhanganwini ni ku zrezreni.
HA YINI VAN’WANA VA YIMA KU TIZRELA YEHOVHA?
4. I yini leswi yentxekeliki van’wana hi mhaka ya ntizro wa ku tihanyisa?
4 Vamakwezru van’wana va pfumelela ntizro wavu wa ku tihanyisa wu va ntxhumu wa lisima ku tlula hinkwaswu a wuton’wini byavu. Hung, * makwezru lweyi a tsrhamaka Ásia, a te: “Ni pfumelele ntizro wanga wu ni hetela nkama ni ntamu wunyingi. Ni tikanganyisile hi ku tibyela leswaku loko a no va ni mali yinyingi a ni ta swi kota ku tizrela Yehovha ha hombe. Xileswo, a ni heta mawora ya ku tala na ni tizra. Ni sungule ku luza mintlhanganu ha katsrongo katsrongo ku ta tlhasa lani ni yimiki hi ku helela ku ya mintlhanganwini. Swi tikomba ingi misava leyi yi hambeliwe ku tsravuxa vhanu ka Xikwembu Nkulukumba, ha katsrongo katsrongo.”
5. I yini leswi makwezru wa xisati a swi yentxiki hi mhaka ya swikazratu leswi a a li naswu?
5 Vamakwezru van’wana va bindzriwa hi swikazratu. Anne, lweyi a tsrhamaka Grã-Bretanha lwe a nga ni 5 wa vana, a te: “Mun’we ka vananga a belekiwe na a li ni mavabyi lamakulu. Hi ku famba ka nkama, mun’we ka vananga va xisati a susiwe a bandleni nakone n’wananga wa djaha a khomiwe hi mavabyi ya nhloko. Ni biwe hi gome ngopfu lakakuva ni yima ku ya mintlhanganwini ni ku zrezreni. Hi wugamu ni holile hi tlhelo dzra moya.” Ha mu twela makwezru Anne ni ndangu wakwe kun’we ni hinkwavu lava kumanaka ni swikazratu leswo.
6. Ha yini hi nga titsravuxaka ni bandla loko hi nga landzri xilayu xa Ba-le-Kolosa 3:13?
6 Dondzra Ba-le-Kolosa 3:13. Malandzra man’wana ya Yehovha ma khunguvanyisiwa hi vapfumeli kulobye. Mupostola Pawulo a a swi tiva leswaku minkama yin’wana hakunene hi nga ha va ni ‘mhaka leyi hi holovelaka’ makwezru ha yone. Swi nga yentxeka hi khomiwe hi ndlela leyi kalaka yi nga li yinene. Loko hi nga tivoneli, hi nga ha mu bekela xiviti. Ku vaviseka hi wugamu ku nga yentxa mhunu a titsravuxa ni vhanu va Yehovha. Vona xikombiso xa makwezru lweyi a tsrhamaka a América do Sul, a vitaniwaka Pablo. A lumbetiwe leswaku a yentxe xidoho, nakone hi mhaka ya leswo a luzekeliwe hi timfanelo a bandleni. Xana a yentxe yini? Pablo a li: “Ni hlundzrukile. Nakone ha katsrongo katsrongo ni titsravuxe ni bandla.”
7. I yini leswi mhunu lweyi a kingindzriwaka hi lipfalu a nga ha swi yentxaka?
7 Mhunu lweyi a samiki a dohela Xikwembu Nkulukumba khale a nga ha biwa hi lipfalu, lakakuva a titwa na a nga ha faneliwi ku zrandzriwa hi Xikwembu Nkulukumba. Nambiloko a tisolile a tlhela a dzrivaleliwa, a titwa a nga ha faneleki akuva a va mun’we wa malandzra ya Xikwembu Nkulukumba. Makwezru lweyi a vitaniwaka Francisco a a titwa hi ndlela yoleyo. A li: “Ni khwaveliwile loko ni yentxe wuwoswani. Nambileswi a ku sunguleni ni tamiki ni ya mintlhanganwini, ni sungule ku ku va ni gome ni tlhela ni titwa na ni nga faneleki ku va xikan’we ni vhanu va Yehovha. Lipfalu dzranga a dzri ni kingindzra ngopfu nakone a ni tiyiseka leswaku Yehovha a nga ni dzrivalelanga. Hi ku famba ka nkama, ni yime ku ya mintlhanganwini.” Xana u titwisa kuyini loko u vona vamakwezru lava tlhanganaka ni swiyimu leswi hi buliki ha swone? Xana u tibeka a mbangwini wavu? Xa lisima swinene, xana Yehovha a titwisa kuyini ha vone?
YEHOVHA AWA TI ZRANDZRA TIHAMBA TAKWE
Mubyisi wa le Israyele a a zron’weka ngopfu hi hamba yakwe leyi lahlekiki (Vona mayava 8-9) *
8. Xana Yehovha awa va dzrivala lava samiki va mu tizrela? Tlhamuxela.
8 Yehovha a nga va dzrivali lava samiki va mu tizrela kambe swoswi va yimiki ku va xikan’we ni vhanu vakwe. Nakone a nga wu dzrivali ntizro lowu va mu yentxeliki wone. (Hb 6:10) Muprofeta Ezaya a tsrale xikombiso xa ku xonga swinene lexi kombisaka ndlela leyi Yehovha a va zrandzraka ha yone vhanu vakwe. A tsrale leswi: ‘Swanga hi mubyisi, a ta byisa ntlhambi wakwe. A ta hlengeleta swihambana hi voko dzrakwe, a ta swi zrwala xifuveni xakwe.’ (Eza 40:11) Xana Yehovha, Mubyisi Lwenkulu a titwisa kuyini loko yin’we ya tihamba takwe yi lahleka? Yesu a hi byeli hi leswi Yehovha a titwisaka xiswone loko a vutise vadondzrisiwa vakwe, a ku: ‘Xana n’wi li yini hi leswi? Loko mhunu a fuya dzana dzra tihamba, yin’we ku tone yi ya lahleka, xana a nga tsrhiki leti ta ntlhanu wa makume na mune wa makume na ntlhanu na mune [99], le tinhaveni, a famba a ya djula leyi lahlekiki? Kutani loko a yi kumile, ndzri hlayela mfuzri, ndzri li ku n’wine leswaku a ta tsrhava ha yone ku tlula leswi a tsrhavaka hi leti ta ntlhanu wa makume na mune wa makume na ntlhanu na mune [99], leta ku ka ti nga lahlekanga.’—Mt 18:12, 13.
9. A minkameni ya Bibele, xana vabyisi lavanene a va tikhomisa kuyini tihamba tavu? (Vona xifaniso lexi nga ka kapa.)
9 Ha yini swi fanela ku fananisa Yehovha ni mubyisi? A minkameni ya Bibele mubyisi lwenene a a zron’weka ngopfu hi tihamba takwe. Hi xikombiso, Davhida a lwe ni nghonyama ni bere akuva a sizrelela ntlhambi wakwe. (1Sa 17:34, 35) Mubyisi lwenene a a swi xiya nambi loko hamba yin’we yi nga li kone a ntlhambini. (Yh 10:3, 14) Mubyisi wa ku tanu a a ta tsrhika tihamba takwe leta 99 a mbangwini lowu sizrelelekiki kumbe ni mubyisi kulobye kutani a famba a ya djula leyi lahlekiki. Yesu a tizrise a xifananiso lexi akuva a dondzrisa ntxhumu wa lisima: ‘A hi ku zrandzra ka Tatana wenu lwa nga matilweni, leswaku ku lahleka ni mun’we ku lavatsrongo lava.’—Mt 18:14.
Mubyisi wa le Israyele wa khale a hlayisaka hamba yakwe leyi a yi lahlekile (Vona yava 9)
HI YINI NDLELA LEYI YEHOVHA A DJULETELAKA TIHAMBA TAKWE HA YONE?
10. Hi ku ya hi Ezekiel 34:11-16, i yini leswi Yehovha a dumbisaka ku swi yentxela tihamba takwe leti lahlekiki?
10 Yehovha a zrandzra mun’wana ni mun’wana wezru, ku patsra ni ‘lavatsrongo’ lava sukiki a ntlhambini wakwe. Hi ku tizrisa muprofeta Ezekiel, Xikwembu Nkulukumba a dumbise leswaku a a ta djuletela tihamba takwe leti lahlekiki ni ku ti pfuna akuva ti tlhela ti va ni wuxaka lebyinene na yene. Nakone yene a khanele hi mintxhumu leyi a a ta yi yentxa akuva a ti buyisela ntlhambini, ku nga mintxhumu leyi mubyisi wa mu-Israyele a a yi yentxa loko yin’we ya tihamba takwe yi lahleka. (Dondzra Ezekiel 34:11-16.) Ntxhumu wa ku sungula, mubyisi a a djuletela hamba yakwe, ku nga ntxhumu lowu a wu teka nkama nakone a wu djula ku tikazrata. Kutani, loko mubyisi a yi kuma, a a yi teka a yi buyisela a ntlhambini. Handle ka leswo, loko hamba yi vavisekile kumbe loko yi li ni ndlala, hi lizrandzru mubyisi a a pfuna xihazri lexo lexi heliki ntamu, a xi banditxha swilondzra, a xi tlakula a xi nyika swakuda. Swanga vabyisi va ‘ntlhambi wa Xikwembu Nkulukuma’, vakulu va fanela ku yentxa mintxhumu yoleyo akuva va pfuna mun’wana ni mun’wana lweyi a tihambanisiki ni bandla. (1Pe 5:2, 3) Vakulu va va djuletela, va va pfuna ku tlhelela a bandleni nakone hi lizrandzru va va pfuna akuva va tlhela va va vanghanu va Yehovha. *
11. I yini leswi mubyisi lwenene a swi twisisaka?
11 Mubyisi lwenene awa swi twisisa leswaku hamba yi nga ha lahleka. Nakone loko hamba yin’we yi tihambanisa ni letin’wana, mubyisi a a nga yi xanise. Vona xikombiso lexi Xikwembu Nkulukumba a hi bekeliki xone loko a pfuna man’wana ya malandzra yakwe, lawa hi nkama wa kukazri, ma kalaka ma nga yentxanga leswi Yehovha a ma kombeliki swone.
12. Xana Yehovha a mu pfunise kuyini Yona?
12 Muprofeta Yona a tsrutsrume xiyavelo xakwe. Nambitasu, Yehovha a nga mu tsrhikanga. Ku fana ni mubyisi lwenene, Yehovha a mu buyiselile a tlhela a mu pfuna leswaku a kuma ntamu lowu a a wu vilela akuva a hetisisa xiyavelo xakwe. (Yn 2:7; 3:1, 2) Yehovha a milise mpono akuva a pfuna Yona ku twisisa lisima dzra wutomi bya mhunu. (Yn 4:10, 11) Hi dondzra yini? Vakulu a va fanelanga ku hatla va mu tsrhika lweyi a holiki hi tlhelo dzra moya. A matsrhan’wini ya leswo, vakulu va dzringisa ku twisisa xivangelo lexi mu yentxiki a tihambanisa ni bandla. Nakone loko mhunu lweyo a tlhelela ka Yehovha, vakulu va tama va mu komba lizrandzru va tlhela va zron’weka ha yene.
13. Hi nga dondzra yini ka leswi Yehovha a swi yentxiki loko a yingela mazritu lawa mutsrali wa Psalma 73 a ma hlayiki?
13 Mutsrali wa Psalma 73 a sungule ku godola loko a vone leswaku vhanu lava a va yentxa swaku biha a va tikomba na swi va fambela ha hombe wuton’wini. A tivutise leswaku a swi ni bindzru muni ku yentxa ku zrandzra ka Yehovha. (Ps 73:12, 13, 16) Xana Yehovha a yentxe yini? Yehovha a nga mu solanga. Nakunene, Yehovha a pfumelele leswaku mazritu ya mupsalma ma tsraliwa a Bibeleni. Hi wugamu, mupsalma a twisise leswaku a ku na ntxhumu lowu nga ni lisima ku tlula ku va ni wunghanu lebyinene na Yehovha. (Ps 73:23, 24, 26, 28) Hi dondzra yini? Vakulu a va fanelanga ku hatla va yavanyisa mhunu lweyi a sungulaka ku va ni ku ganaganeka mayelanu ni leswaku swi ni bindzru muni ku tizrela Yehovha. A matsrhan’wini ya ku mu yavanyisa, vakulu va fanela ku dzringisa ku twisisa leswi mu yentxiki a hlaya kumbe a yentxa leswo. Ntsrhaku ka ku kambela leswo vakulu va nga tizrisa Matsralwa akuva va mu nyika mpfunu lowu vilelekaka.
14. Ha yini Eliya a a vilela mpfunu, nakone Yehovha a mu pfunise kuyini?
14 Muprofeta Eliya a tsrutsrume Hosana Jezabele. (1Th 19:1-3) A a pimisa leswaku a ke sala yene ntsena ka vaprofeta va Yehovha, nakone a a pimisa leswaku ntizro wakwe a wu nga ha pfuni ntxhumu. Eliya a ve ni gome ngopfu lakakuva a navela ni ku fa. (1Th 19:4, 10) A matsrhan’wini ya kuva Yehovha a sola Eliya, a mu tiyisekise leswaku a a nga li wuswakwe, a a fanela ku dumba ntamu wa Xikwembu Nkulukumba ni leswaku a ka ha ni ntizro wa wunyingi akuva a wu yentxa. Yehovha a mu yingiseti ha hombe Eliya loko a mu byela leswi a swi mu kazrata nakone a mu nyike swiyavelo swin’wana. (1Th 19:11-16, 18) Hi dondzra yini? Hinkwezru, ngopfungopfu vakulu, hi fanela ku khoma malandzra ya Yehovha ha hombe. Loko mhunu a kombisa ku vaviseka kumbe a titwa na a nga fanekeliwe hi timpswalu ta Yehovha, vakulu va ta mu yingiseta ha hombe loko a va pfulela xifuva. Ntsrhaku ka leswo, vakulu va ta dzringisa ku mu tiyisekisa leswaku Yehovha a mu zrandzra ngopfu swinene.
XANA HI FANELA KU TIVONISA KUYINI TIHAMBA TA YEHOVHA LETI LAHLEKIKI?
15. Hi ku ya hi Yohan 6:39, xana Yesu a a ti vonisa kuyini tihamba ta Tatana wakwe?
15 Xana Yehovha a djula leswaku hi tivonisa kuyini tihamba takwe leti lahlekiki? Yesu a hi bekele xikombiso. Yene a a swi tiva leswaku tihamba hinkwatu i ta lisima ka Yehovha, xileswo Yesu a yentxe hinkwaswu leswi a a swi kota akuva a pfuna ‘tihamba leta ku lahleka ta yindlu ya Israyele’ akuva ti tlhelela ka Yehovha. (Mt 15:24; Lk 19:9, 10) Swanga mubyisi lwenene, Yesu a a yentxa hinkwaswu leswi a a swi kota akuva a nga lahlekeliwi ni hi yin’we ya tihamba ta Yehovha.—Dondzra Yohan 6:39.
16-17. Xana vakulu va fanela ku titwisa kuyini hi ku pfuna lava tihambanisiki ni bandla? (Vona bokisi ledzri liki “ Ndlela Leyi Hamba Leyi Lahlekiki Yi Nga Ha Titwaka Ha Yone”.)
16 Mupostola Pawulo a kutxe vakulu va bandla dzra le Efesa akuva va yetisela xikombiso xa Yesu. A te: ‘Hi fanela ku pfunisa xiswoswo lava nga ni gome hi ku tizra hi swoswo, na n’wi dzrimuka mazritu ya Hosi Yesu, hi ku va hi yene a nga ku: A tovoko dzra ku hanana dzri tlula tovoko dzra ku hananiwa.’ (Min 20:17, 35) Nakunene, vakulu va ni wutiyanguleli bya ku hlawuleka bya ku hlayisa vhanu va Yehovha. Salvador wa le Espanha, lweyi a tizraka swanga nkulu wa bandla, a tlhamuxeli leswi: “Loko ni pimisa hi ndlela leyi Yehovha a zron’wekaka ha yone hi tihamba takwe leti lahlekiki, ni susumeteleka ku yentxa hinkwaswu leswi ni nga swi kotaka akuva ni ti pfuna. Swanga mubyisi wa moya, na tiyiseka leswaku Yehovha a djula leswaku ni ti hlayisa.”
17 Hinkwavu lava ku khaneliwiki ha vone ka nhloko-mhaka leyi, lava a va tihambanisile na Yehovha, va pfuniwile akuva va tlhelela ka Yene. Swoswi hi khanelaka, vanyingi lava tihambanisiki ni bandla va swi djula ku tlhelela ka Yehovha. Nhloko-mhaka leyi landzrelaka yi ta khanela hi swin’wana leswi hi nga swi yentxaka akuva hi va pfuna leswaku va tlhelela ka Yehovha.
LISIMU 139 Tivone Na Hi Li Misaveni Lemimpswha
^ par. 5 I yini lexi yentxaka vhanu van’wana lava tizrelaka Yehovha hi malembe manyingi va tihambanisa ni bandla? Xana Xikwembu Nkulukumba a titwisa kuyini ha vone? Nhloko-mhaka leyi yi ta hlamula swivutiso leswo. Nakone yi ta kombisa leswaku hi nga dondzra yini ka ndlela leyi Yehovha a pfuniki ha yone man’we ka malandzra yakwe ya khale lawa hi nkama wa kukazri ma yimiki ku mu tizrela.
^ par. 2 NTLHAMUXELO WA MAZRITU: Mhunu lweyi a holiki hi tlhelo dzra moya i muzrezri lweyi a nga ni 6 wa tihweti kumbe ku tlula na a nga nyikeli ntizro wakwe wa nsimu. Nambitanu, vhanu lava holiki va ha li vamakwezru, nakone ha va zrandzra.
^ par. 4 Mavito mambeni ma txintxiwile.
^ par. 10 Nhloko-mhaka leyi landzrelaka yi ta khanela hi tindlela leti vakulu va nga yentxaka mintxhumu leyo yizrazru ha tone.
^ par. 60 MINTLHAMUXELO YA SWIFANISO: Leswi a a kazrateka hi kola ka hamba yakwe leyi lahlekiki, mubyisi wa le Israyele a a yi djuletela a tlhela a yi pfuna akuva yi tlhelela a ntlhambini. Namunhla vabyisi va moya va yentxa leswi fanaka.
^ par. 64 MINTLHAMUXELO YA SWIFANISO: Na a li ka xibomba, makwezru wa xisati lweyi a holiki hi tlhelo dzra moya a vona Timboni tibidzri leti zrezraka a mbangwini wa mani na mani ti nyonxile.
