HINKWEZRU hi dumba leswaku, ‘a masikwini lawa ya wugamu’, Yehovha awa va kongomisa vhanu vakwe a tlhela a va nyika leswi va swi vilelaka hi tlhelo dzra moya. (2Tm 3:1) Kambe i yini leswi hi swi yentxaka loko Yehovha a hi kongomisa? Xiyimu lexi hi nga ka xone namunhla hi nga xi fananisa ni lexi va-Israyele a va li ka xone a huleni. A va fanela ku yentxa xa kukazri loko va yingela ku yimbiwa ka tinanga.

Yehovha a byele Moxe leswaku a hamba tinanga tibidzri ta silivhela akuva a ‘vitana ha tone nhlengeletanu ni ku fambisa makhandzra kumbe minxaxa’. (Tin 10:2, 3) A vaprista a va fanela ku txhaya tinanga hi ndlela leyi a yi ta kombisa leswi xitsrhungu a xi fanela ku swi yentxa. (Tin 10:3-8) Namunhla, vhanu va Xikwembu Nkulukumba va yamukela nkongomiso hi tindlela ta ku siyanasiyana. Vona tindlela tizrazru leti ti hi dzrimuxaka ku yimbiwa ka tinanga ta khale. Namunhla vhanu va Xikwembu Nkulukumba va vitaniwa ka tinhlengeletanu letikulu, vakulu va zrambiwa akuva va ta wupfisiwa, nakone malulamiselo ya moya lama yentxeliwaka mabandla hinkwawu ma yampswisiwa kumbe ku txintxiwa.

Nkama lowu Yehovha a a djula leswaku ‘hinkwayu nhlengeletanu yi ntlhangana’ a nyangweni ya tende dzra nhlengeletanu, vaprista a va txhaya tinanga ha tibidzri. (Tin 10:3) Tinxaka hinkwatu leti a ti kumeka hi mune wa mintlawa a matlhelweni ka tende dzra nhlengeletanu, a ti yingela ku yimbiwa koloko. Lava a va kumeka kusuhi ni nyangwa ya tende a va hatla va tlhasa. Vambeni a va tsrhama kule nakone a va vilela nkama lowu yengetelekiki ni ku yentxa minzamu akuva va tlhasa. Ka swiyimu hinkwaswu, Yehovha a a djula leswaku hinkwavu va tlhangana akuva va ta yingela swileleto swakwe.

Namunhla, a hi tlhangani ka tende dzra nhlengeletanu, kambe ha zrambiwa akuva hi tlhangana ni vhanu va Xikwembu Nkulukumba. Mintlhanganu leyo yi patsra tinhlengeletanu letikulu ta xifundzra ni tin’wana ta ku hlawuleka, lani hi kumaka dzrungula ni nkongomiso wa lisima. A misaveni hinkwayu, vhanu va Yehovha va yamukela dzrungula ledzri fanaka. Xileswo, hinkwavu lava yamukelaka xizrambu xa kuva va va kone ka mintlhanganu leyo va hamba xiyenge xa ntlawa lowukulu lowu tsrhaviki. Van’wana va buya hi ka mimbangu ya le kule ku tlula vambeni. Nambitanu, hinkwavu lava yamukelaka xizrambu va swi tiva leswaku swi sizile ku xi yamukela.

Swi li yini hi lava tsrhamaka a mimbangwini ya le kule swinene ni lomu ku yentxeliwaka kone tinhlengeletanu leto? Hi ku pfuniwa hi tekinolojiya, ku tala ka vone va swi kota yamukela dzrungula ledzri fanaka nambi ku titwa na va hamba xiyenge xa mintlhanganu leyikulu. Hi xikombiso, ndzreni ka liyendzro dzra muyimeli wa ntsindzra wa misava hinkwayu, a zrwavi dzra le Benin dzri yentxe malulamiselo akuva ntlhanganu lowo wu voniwa a mugangeni wa Arlit, ku nga doropa dzra le Níger a Huleni dzra Sahara. Vamakwezru ni vhanu van’wana lava va swi nyonxeliki  va tlhanganile akuva va hlalela ntlhanganu lowo, hinkwavu a va tlhasa 21 wa vhanu. Nambileswi a va kumeka a mbangwini wa le kule, a va titwa na va li kusuhi ni ntlawa lowukulu wa 44.131 wa vhanu. Makwezru mun’we a tsrale leswi: ‘Ni tlangela hi mbilu hinkwayu malulamiselo lawa ma yentxiwiki akuva ku kombisiwa ntlhanganu lowu. Ma hi kombe leswaku ma hi zrandzra hi timbilu tenu hinkwatu!”

Loko vaprista va le Israyele va txhaya nanga yin’we, a ku buya ntsena a tihosana ni tindzruna ta makume ya madzana a tendeni dzra nhlengeletanu. (Tin 10:4) A va ta yamukela swileleto ni ku wupfusiwa ha Moxe. Leswo a swi ta va pfuna ku hetisisa swiyavelo swavu ka tinxaka leti a va huma ka tone. Loko a wo va yin’we ya tihosana leto, xana a wu nga ti yentxa hinkwaswu leswi u nga swi kotaka akuva u va kone?

Namunhla, vakulu va bandla a hi “tihosana”. Nakone a va dzringise ku fuma ntlhambi wa Xikwembu Nkulukumba lowu va wu lavelelaka. (1Pe 5:1-3) Kambe va yentxa hinkwaswu leswi va nga swi kotaka akuva va wu hlayisa. Xileswo, va hatla va yangula loko va zrambiwa akuva va yamukela ku wupfisiwa loku yengetelekiki, ka ku fana ni ku ya a Xikole Xa Wutizreli Bya Mfumu. Ka ku wupfisiwa koloko, vakulu va dondzra ndlela leyi ha yone va nga bekisaka ha hombe timhaka ta bandla. Leswo swi yentxa leswaku bandla hinkwadzru dzri kula hi tlhelo dzra moya. Nambi loko u nga si tsrhama u ya ka swikole swoleswo, wa pfuneka hikusa lava va yiki ka swone va tizrisa leswi va swi dondzriki akuva va pfuna bandla.

Vaprista va txhaye mpfumawulu wun’wana wa nanga. Lowo a wu tivisa leswaku Yehovha a a djula leswaku minxaxa hinkwayu yi suka a mbangwini lowu a yi li ka wone. (Tin 10:5, 6) Va-Israyele a va susa minxaxa yavu hi ndlela leyi hlelekiki ni leyi hlamalisaka, kambe ku yentxa leswo a swi ni ntizro lowukulu ka hinkwavu. Minkama yin’wana, swi nga yentxeka, va-Israyele vambeni a va swi vona na swi kazrata ku pfumela ku txintxa koloko. Ha yini?

Swi nga yentxeka van’we a va vona leswaku a ku txhayiwa ka tinanga akuva va suka a ku yentxeka hi ku landzrelelana nakone a ku yentxeka kola ni kola. Minkama yin’wana a tlavi a dzri yima a madambyeni ku ya tlhasa a mixweni. Minkama yin’wana, a dzri yima ‘masiku mabidzri’, ‘hweti’ kumbe nkama lowu yengetelekiki. (Tin 9:21, 22) Xana minxaxa ya va-Israyele yi txintxa txintxe makhambi mangani? Ndzrima 33 ya buku dzra Tinhlayu yi khanela hi 40 wa mimbangu leyi va-Israyele va tsrhamiki ka yone.

Minkama yimbeni, va-Israyele van’wana a va kuma mimbangu leyi a yi ni ntsrhuti, ku nga ntxhumu lowu a wu nyonxisa swinene ‘a huleni ledzrikulu dzra ku txhavisa’. (Dt 1:19) Hi kola ka leswo, swi nga yentxeka van’we a va dzringeka ku pimisa leswaku ku txintxa loku a ku ta landzrela a ku ta va yisa a mbangwini lowu kalaka wu nga nyonxisi.

Loko va sungula ku suka, swi nga yentxeka van’wana swi va kazratelile ku yimela nkama wavu. Hinkwavu a va yingela ku txhayiwa ka nanga hi nkama wun’we, kambe a va nga suki hi nkama lowu fanaka. Ku txhayiwa loko ka nanga a ku tivisa leswaku tinxaka leti a ti kumeka a wuxeni, ku nga lixaka dzra Yuda, dzra Yissakar ni dzra Zebuloni a ti fanela ku suka. (Tin 2:3-7; 10:5, 6) Ntsrhaku ka loko va sukile, vaprista a va tlhela va txhaya nanga hi khambi dzra wubidzri leswaku a tinxaka tizrazru leti a ti kumeka a nyingitimu ti suka. Vaprista a va ya mahlweni va txhaya ku ya tlhasa lani minxaxa hinkwayu yi sukaka.

Swi nga yentxeka swi ku kazratelile ku yamukela ku txintxa ka kukazri loku yentxiwiki a nhlengeletanwini. Swi nga ha yentxeka u twitwe na wu kazralile loko ku yentxiwa ku txintxa kunyingi loku a wu nga ku yimelanga. Swi nga yentxeka a wu nyonxa hi malulamiselo ya kukazri ni ku navela leswaku inha ma nga txintxiwanga. Hi xivangelo xa kukazri, swi nga ha va swi ku kazratelile ku lehisa mbilu, nakone swi nga ha va swi teke nkama akuva u tolovelana na wone. Nambitanu, loko hi yentxa minzamu akuva hi landzra leswi txintxiwiki, hi ta vona leswaku swi ve swinene ka hine nakone Yehovha awa nyonxa ha hine.

A masikwini ya Moxe, Yehovha a kongomise magidigidi ya vavanuna, vavasati ni vana a huleni. Loko a va nga yingisetanga nkongomiso wa Yehovha, a va nga ti swi kota ku huluka. Namunhla, hi kota ku hanya hi tlhelo dzra moya hi leswi Yehovha a hi kongomisaka. Nakunene, ha humelela! Xileswo, ingiki hinkwezru hi nga tiyimisela ku yangula ka ku txhayiwa ka ku siyanasiyana ka tinanga ku fana ni va-Israyele lavaya va ku dumbeka!