1. Xana Yehovha a titwisa kuyini loko mun’we ka malandzra a tlhelela ka yene?

HI LANI hi buliki ha kone ka nhloko-mhaka leyi khalutiki, Yehovha a tifananisa ni mubyisi lwenene lweyi hi lizrandzru a hlayisaka tihamba takwe. Nakone a famba a djuletela hamba yin’wana ni yin’wana leyi lahlekaka. Yehovha a hlaye leswi ka va-Israyele lava yimiki ku mu tizrela: ‘Tlhelelani ku mine, kutani ndzri ta tlhelela ku n’wine.’ Ha swi tiva leswaku Yehovha a ha li xiswoswo hikusa a te: ‘A ndzri ndzruluki.’ (Mlk 3:6, 7) Yesu a hlaye leswaku Yehovha ni tintsrumi va nyonxa swinene nambiloko mun’we ka malandzra Yakwe a tlhelela ka Yene.​—Lk 15:10, 32.

2. Hi ta bula hi yini ka nhloko-mhaka leyi?

² A hi buleni hi swikombiso swizrazru leswi Yesu a khaneliki ha swone, leswi hi dondzrisaka ndlela ya ku pfuna lava tsrhikiki ku tizrela Yehovha. Hi ta kambisisa matsrhamela lawa hi fanelaka ku va na wone akuva hi pfuna tihamba leti lahlekiki ku tlhelela ka Yehovha. Nakone hi ta vona leswaku ha yini swi li swa lisima ku yentxa hinkwaswu leswi hi nga swi kotaka akuva hi pfuna lava holiki.

3-4. Ha yini wansati lweyi ku khaneliwaka ha yene ka buku dzra Luka 15:8-10 a tikazratile ngopfu akuva a djuletela drakma dzrakwe ledzri a dzri lahlekile?

³ Hi fanela ku tizra hi ku tikazrata akuva hi pfuna lava djulaka ku tlhelela ka Yehovha. Ka xifaniso lexi nga ka evhangeli dzra Luka, Yesu a khanele hi wansati lweyi a a lahlekeliwe hi ntxhumu wa lisima ngopfu swinene​—ku nga mali yakwe ya drakma. Xa lisima ka xifaniso lexi i ndlela leyi a tikazratiki ha yone akuva a kuma drakma ledzri a dzri mu lahlekelile.​—Dondzra Luka 15:8-10.

⁴ Yesu a khanela hi leswi wansati lweyo a titwisiki xiswone loko a tlhele a kuma drakma dzrakwe ledzri a dzri lahlekile. A minkameni ya Yesu, swi nga yentxeka vamamana va le Yuda a va nyika vanavu va xisati 10 wa madrakma hi siku ledzri a va txhata ha dzrone. Swi nga yentxeka drakma ledzriyani a dzri li dzra lisima ka wansati lwiyani hi leswi kumbexana a a nyikiwe hi mamana wakwe. Wansati lwiyani a a kholwa leswaku a drakma a dzri wile a hansi. Hi loko a tlhavika motsre a sungula ku djuletela, kambe a nga voni  ntxhumu. A motsre wakwe a wu voni ha hombe akuva a kota ku kuma mali yakwe ya silivhela. A hetelela hi ku kukula kaya kwakwe hinkwaku ha hombe. Ndzreni ka nsila leyi a yi hlengeletiki, a vone drakma dzrakwe dzra lisima na dzri phatima loko dzri vaningeliwa hi motsre. Hi loko a ku hefu! A vitana vanghanu ni vayakelani akuva va nyonxa na yene.

5. Ha yini swi nga ha kazrataka ku kuma lava tsrhikiki ku tlhangana ni bandla?

⁵ Hi lani hi swi voniki ha kone ka xifaniso xa Yesu, swi djula ku tikazrata akuva hi kuma ntxhumu lowu lahlekiki. Hi ndlela leyi fanaka, hi fanela ku tizra hi ku tikazrata akuva hi kuma lava tsrhikiki ku titlhanganisa ni bandla. Ku nga ha va ku khalute malembe manyingi na va yime ku ya a mintlhanganwini. Swi nga yentxeka va txintxe ni mbangu lowu a va tsrhama ka wone va ya kun’wana lomu vamakwezru lava tsrhamaka ka wone va nga va tivikiki. Kambe swoswi hi khanelaka, van’we ka vhanu lava holiki hi tlhelo dzra moya va swi djula ku tlhelela ka Yehovha. Va swi djula ku mu tizrela kun’we ni ndangu wakwe wa vagandzreli va xihlayelamfuzri, kambe va djula mpfunu wezru.

6. Xana swizro hinkwaswu swa bandla swi nga pfunisa hi ndlela yini a ku djuleteleni ka vhanu lava holiki?

⁶ Xana hi vamani lava nga pfunisaka a ku djuleteleni ka lava holiki hi tlhelo dzra moya? Hinkwezru​—vakulu, maphayona, swizro swa mindangu ya vhanu volavo, ni vazrezri va bandla—​hi nga pfunisa a ku djuleteleni. Xana u ni munghanu kumbe xaka ledzri yimiki ku tizrela Yehovha? Xana ka ntizro waku wa ku zrezra hi muti ni muti kumbe a mbangwini wa mani na mani u same u tlhangana ni mhunu lweyi a yimiki ku tizrela Yehovha? Loko swi li tanu, mu tlhamuxeli leswaku loko a swi navela ku yendzreliwa, u nga swi nyoxela ku nyikela nhlayu yakwe ya telefone ka vakulu va bandla.

7. I yini leswi u swi dondzriki ka leswi hlayiwiki hi nkulu wa bandla lweyi a vitaniwaka Thomas?

⁷ I yini leswi ngopfungopfu vakulu va nga swi yentxaka akuva va kuma vhanu lava djulaka ku tlhelela ka Yehovha? Vona leswi Thomas, * nkulu wa bandla lweyi a tsrhamaka a Espanha nakone a pfuniki ku tlula 40 wa Timboni ta Yehovha akuva ti tlhelela a bandleni a swi hlayiki. A te: “Xa ku sungula ni xi yentxaka i ku vutisa vamakwezru va ku siyanasiyana leswaku va nga va va tiva lomu vhanu va kukazri lava va holiki va tsrhamaka kone. Kumbe ni vutisa vazrezri leswaku va nga va va dzrimuka makwezru wa kukazri lweyi a yimiki ku ta mintlhanganwini. Vamakwezru va hlamula hi ku hiseka, hikusa va titwa na va pfunisa ka ku djuletela lava holiki. Ntsrhaku, loko ni ya pfuxela makwezru lweyi a holiki, ni mu vutisa hi vanakwe ni maxaka yakwe mambeni. Vamakwezru van’wana lava holiki a va talisa ku famba ni vanavu a mintlhanganwini, nakone swi nga yentxeka vana volavo va ve vazrezri. Navone va nga pfuniwa akuva va tlhelela ka Yehovha.

8. Ka xifaniso xa n’wana lweyi a sukiki kaya, lexi nga ka Luka 15: 17-24, xana tatana a yentxe yini loko n’wana lweyi a tisoliki a tlhelela kaya?

⁸ Hi wani matsrhamela lawa hi fanelaka ku va na wone akuva hi pfuna vhanu lava djulaka ku tlhelela ka Yehovha? Vona leswi hi nga swi dondzraka ka xifananiso xa n’wana lweyi a sukiki kaya. (Dondzra Luka 15:17-24.) Yesu a tlhamuxela leswi yentxekiki loko n’wana lweyo hi wugamu a vone leswaku a a hoxile nakone a teka xiboho xa ku tlhelela kaya. Tatana wakwe a mu tlhangavetile a ya mu xingazra swinene, a tlhela a mu tiyisekisa leswaku a mu zrandzra ngopfu. N’wanakwe a a kingindzriwa hi lipfalu nakone a a titwa na a nga ha faneliwi hi ku vitaniwa n’wanakwe. N’wana a pfulele tatana wakwe xifuva, nakone tatana a twisise n’wanakwe hi ku tibeka a mbangwini wakwe. Hi swiyentxo, tatana a kombe n’wana leswaku a a yamukeleka a kaya swanga xizro xa ndangu ku nga li mutizri. Akuva a  tiyisekisa mhaka leyi a yi hlayiki, tatana a hambe fexta ni ku tlhela a nyika mpahla leyinene n’wanakwe lweyi a tisoliki.

9. Hi wani matsrhamela lawa hi fanelaka ku va na wone akuva hi pfuna lava yimiki ku tizrela Yehovha akuva va tlhelela? (Vona bokisi ledzri liki “ Pfuna Lava Holiki Akuva Va Tlhelela Ka Yehovha.”)

⁹ Hi nga fanisa Yehovha ni tatana lweyo. Awa va zrandzra vamakwezru lava yimiki ku mu tizrela nakone a djula leswaku va tlhelela ka yene. Loko hi yetisela Yehovha, hi nga va pfuna akuva va tlhelela. Akuva hi swi kota hi fanela ku lehisa mbilu, hi tibeka a mbangwini wavu hi tlhela hi va komba lizrandzru. Ha yini hi fanela ku kombisa matsrhamela lawo nakone hi nga swi yentxisa kuyini?

10. Ha yini hi fanela ku lehisa mbilu loko hi pfuna mhunu akuva a tlhelela ka Yehovha?

¹⁰ Hi fanela ku lehisa mbilu, hikusa swi teka nkama akuva mhunu a tlhela a hanya hi tlhelo dzra moya. Vanyingi ka lava a va holile, va pfumela leswaku va kote ku tlhelela a bandleni hi leswi vakulu va va pfuxeliki hi makhambi ya ku tala. Makwezru wa xisati wa le Ásia, lweyi a vitaniwaka Nancy, a li: “Munghanu lwenkulu wa le bandleni a ni pfune ngopfu swinene. A a ni zrandzra swanga makwavu lwenkulu. A ni dzrimuxe mintxhumu leyinene leyi hi yi hanyiki xikan’we. Loko ni mu pfulela mbilu a a ni yingiseta hi ku lehisa mbilu nakone a a nga tsrhiki ku ni nyika swilayu. A swi kombise hi ku helela leswaku i munghanu wa ntiyiso nakone a a tiyimiseli ku ni pfuna minkama hinkwayu.”

11. Ha yini hi fanela ku tibeka a mbangwini wa vambeni akuva hi pfuna mhunu lweyi a nga ni mbilu leyi vavisekiki ku daha mbilu yakwe?

¹¹ Ku tibeka mbangwini wa vambeni i muzri wa ntamu ngopfu swinene. Wu nga swi kota ku daha mbilu leyi vavisekiki. Vanyingi lava holiki va heta malembe manyingi na va khunguvanyekile ni mhunu a bandleni. Nakone matitwela lawo ma  nga yentxa leswaku va nga ha naveli ku tlhelela ka Yehovha. Van’we va nga ha pimisa leswaku va khomiwe hi ndlela leyi nga liki yinene. Vamakwezru lavo va vilela mhunu lweyi a nga va yingelaka a tlhela a va twisisa. (Yk 1:19) Maria, lweyi a samiki a hola hi tlhelo dzra moya, a li: “A ni vilela munghanu akuva ni mu pfulela xifuva, mhunu lweyi a ni ta dzrila na yene ni mhunu lweyi a a ta ni pfuna.”

12. Ha yini lizrandzru dzra Yehovha hi nga dzri fanisaka ni pindzra? Kombisa.

¹² Bibele dzri fananisa lizrandzru ledzri Yehovha a nga na dzrone hi vhanu vakwe ni pindzra. Ha yini hi nga hlayaka leswaku lizrandzru dzra Yehovha dzri fana ni pindzra? Vona xifaniso lexi: Tiyanakanyi na wu mbombomela ka lwandle ledzri kwatiki swinene kutani mhunu wa kukazri a ku txukumetela colete salva-vidas. Handle ka ku ganaganeka, a wu ta tlangela mpfunu lowo, hikusa swi ta ku pfuna akuva u nga mbombomeli. Kambe colete salva-vidas a dzri nge ti ku pfuna akuva u tama u hanya. Mati ma titimeta ngopfu lakakuva u nge swi koti ku hanya loko u nga kumanga boti akuva wu khwela. Ku djuleka mhunu akuva a ku txukumetela pindzra akuva a ku kokela ka boti. Yehovha a hlaye leswi ka va-Israyele lava lahlekiki: ‘Ndzri va koke hi mapindzra ya vhanu, hi switsrimbu swa lizrandzru.’ (Hš 11:4) Namunhla, Yehovha a ha titwa hi ndlela leyi fanaka hi vhanu lava tsrhikiki ku mu tizrela lava taliki hi mindzringo ni ku hlatiyela. A djula kuva va swi tiva leswaku awa va zrandzra nakone a djula leswaku va tlhelela ka yene. Yehovha a nga ku tizrisa akuva u komba vhanu lava holiki hi tlhelo dzra moya lizrandzru ledzri a nga na dzrone ha vone.

13. Kombisa ndlela leyi a lizrandzru dzra wumakwezru dzri nga ni ntamu ha yone?

¹³ I swinene ku tiyisekisa lava holiki hi tlhelo dzra moya leswaku Yehovha awa va zrandzra ni leswaku na hine ha va zrandzra. Pablo, lweyi ku  khaneliwiki ha yene ka nhloko-mhaka leyi khalutiki, a hete 30 wa malembe na a yime ku tizrela Yehovha. A li: “Siku dzrin’wana, loko ni huma hi kaya ni mixo, ni tlhangane ni makwezru mumbeni lweyi a duhwaliki lweyi a khaneliki na mine hi ndlela ya lizrandzru. Ni sungule ku dzrila ku fana ni xibebetana. Ni mu byele leswaku a swo fana ni loko Yehovha a mu zrumele akuva a ta khanela na mine. Hi kone ni nga hamba xiboho xa ku tlhelela ka Yehovha.”

14. Hi ku ya hi xifaniso lexi nga ka Luka 15:4, 5, i yini leswi mubyisi a swi yentxiki loko a kume hamba leyi a yi lahlekile?

¹⁴ Ku djuleka kuva hi pfuna vhanu lava holiki. Ku fana ni n’wana lweyi a lahlekiki wa xikombiso xa Yesu, vhanu lava holiki va nga ha tama va kazratiwa hi leswi va swi yentxiki. Leswi va hanyiki mintxhumu yinyingi a misaveni ya Sathana, swi nga yentxeka va tsranile hi tlhelo dzra moya. Hi fanela ku va pfuna akuva va pfuxeta wunghanu byavu na Yehovha. Ka xifaniso xa hamba leyi lahlekiki, Yesu a khanela hi ndlela leyi mubyisi a khomiki hamba yakwe a va a yi tlhelisa a ntlhambini. Mubyisi a hete nkama ni ntamu na a djuletela hamba leyi lahlekiki. Kambe awa swi tiva leswaku a hamba yi vilela a mpfunu wakwe, hikusa a yi nge swi koti ku titlhelela a ntlhambini.​—Dondzra Luka 15:4, 5.

15. Hi nga va pfunisa kuyini vhanu lava tsraniki akuva va tlhelela ka Yehovha? (Vona bokisi ledzri liki “ Xitizrisiwa Lexi Nga Ni Lisima”.)

¹⁵ Swi nga ha djuleka kuva hi heta nkama ni ntamu wezru akuva hi pfuna vhanu lava holiki ni ku va pfuna ku lwisana ni swikazratu swavu. Kambe hi ku pfuniwa hi moya wa Yehovha, Zritu dzrakwe ni mabuku lawa hi ma kumaka bandleni, hi nga pfuna vhanu lava akuva va tlhela va pfuzra hi tlhelo dzra moya. (Ro 15:1) Hi nga swi kotisa kuyini? Nkulu mun’wana lweyi a nga ni mfambu a  ntizrweni wa Yehovha a te: “Ntsrhaku ka loko va bohe ku tlhelela ka Yehovha, vhanu vanyingi lava holiki va vilela mhunu lweyi a nga dondzraka Bibele navu.” * Xileswo, loko vakulu va ku kombela leswaku u dondzra ni mhunu lweyi a holiki, swi ngo yini u pfumela hi ku swi zrandzra xiyavelo lexo, loko swi koteka? Nkulu lwiyani a tlhele a ku: “Muzrezri lweyi a fambisaka xidondzro a fanela ku hamba xinghanu, leswo swi ta yentxa leswaku mhunu lweyi a holiki a khanela hi ku ntsrhunxeka.”

16. Hi swi tivisa kuyini leswaku hi ni mpfunu wa tintsrumi?

¹⁶ Mimfambu yinyingi yi kombisa leswaku tintsrumi ti tizra kun’we na hine akuva hi kuma vhanu lava holiki lava djulaka ku tlhelela ka Yehovha. (Mpf 14:6) Hi xikombiso, Silvio, wa le Equador, a khongote a kombela mpfunu akuva a tlhelela a bandleni. Na a ha khongota, vakulu vabidzri va be dalisensa. Ka liyendzro ledzro, va nyonxe ngopfu hi leswi va mu nyikiki mpfunu lowu a a wu vilela.

17. Hi dzrini bindzru dzra ku pfuna lava holiki hi tlhelo dzra moya?

¹⁷ Hi nyonxa swinene loko hi pfuna vhanu lava tsraniki akuva va tlhelela ka Yehovha. Vona leswi Salvador, phayona ledzri zrandzraka ku pfuna lava holiki a swi hlayaka: “Minkama yimbeni swa kazrata ku tikhoma ni nga dzrile hi ku nyonxa. Swi ni nyonxisa swinene ku tiva leswaku Yehovha a suse yin’we ya tihamba takwe a misaveni ya Sathana a va a yi buyisa ka yene, ni tlhela ni nyonxa hi ku tiva leswaku ni tizre kun’we na Yehovha.”​—Min 20:35.

18. Loko u yimile ku tlhangana kun’we ni vhanu va Yehovha, u nga tiyiseka hi yini?

¹⁸ Loko u yimile ku tlhangana kun’we ni vhanu va Yehovha, tiyiseka leswaku Yehovha awa ku zrandzra. A djula leswaku u tlhelela ka yene. I ntiyiso leswaku ku ni leswi u fanelaka ku swi yentxa akuva u tlhelela ka yene. Kambe ku fana ni tatana wa xifaniso xa Yesu, Yehovha a yimela kuva u tlhelela ka yene nakone a ta swi nyonxela ku ku yamukela kaya.