1. Ha yini hi fanela ku gandzrela Yehovha hi mbilu hinkwayu?

YEHOVHA hi yene ntsena lweyi hi fanelaka ku mu gandzrela hi mbilu hinkwayu hikusa i Mutumbuluxi wezru ni Munyiki wezru wa wutomi. (Mpf 4:11) Nambitanu, hi lavisana ni xihinga. Nambi leswi hi zrandzraka Yehovha hi tlhela hi mu txhava, swi nga yentxeka leswaku hi wongiwa hi mintxhumu yin’wana, yi hi tsimba ku mu gandzrela hi mbilu hinkwayu hi laha swi mu fanelaka ha kone. Hi fanela ku twisisa leswaku swoswo swi nga yentxekisa kuyini. Kambe, a hi zrangeni hi ku kambisisa leswaku ku gandzrela Yehovha hi mbilu hinkwayu swi tlhamuxela yini.

2. Hi ku ya hi Eksoda 34:14, xana hi ta yentxa yini loko hi gandzrela Yehovha hi mbilu hinkwayu?

² A Bibeleni, ku gandzrela Xikwembu Nkulukumba swi tlhamuxela ku mu zrandzra ngopfu swinene. Loko hi gandzrela Yehovha hi mbilu hinkwayu, swi hlaya leswaku hi to tizrela yene ntsena. A hi nga ti pfumelela mhunu kumbe ntxhumu wu teka mbangu wa Yehovha a timbilwini tezru.​—Dondzra Eksoda 34:14.

3. Ha yini hi nga gandzreli Yehovha na hi li munyameni?

³ A hi gandzreli Yehovha na hi li munyameni. Ha yini hi hlaya tanu? Hikusa wugandzreli byezru byi tiseketele ka timhaka leti tiyiki leti hi ti dondzriki ha yene. Hi nyonxisiwe hi matsrhamela yakwe ya ku xonga. Leswi a swi zrandzraka ni leswi a swi vengaka, ha swi tiva nakone hi pfumelelana na swone. Ha swi twisisa leswaku vhanu a va hambe leswaku va hanyisa kuyini, nakone hi yima na yene. Hi tihlaya ndjombo hi leswi a hi nyikaka mukhandlu wa ku  va vanghanu vakwe. (Ps 25:14) Hinkwaswu leswi hi swi dondzraka mayelanu ni Mutumbuluxi wezru swi hi tsrhinetela kusuhi na yene.​—Yk 4:8.

4. a) Xana Diyavulosi a tizrisa yini akuva a hi tsrandzrekisa ku gandzrela Yehovha hi mbilu hinkwayu? b) Xana hi ta bula ha yini ka nhloko-mhaka leyi?

⁴ Diyavulosi a fuma misava leyi, nakone a tizrisa yone akuva a hi wonga leswaku hi zrangisa ku nyonxisa ku navela kwezru ka ntumbuluku hi tlhela hi bindzreliwa hi ku lwa ni xidoho. (Ef 2:1-3; 1Yh 5:19) Lexi a xi djulaka i ku yava mbilu yezru leswaku hi nga swi koti ku gandzrela Yehovha hi mbilu hinkwayu. A hi buleni hi tindlela tibidzri leti a nga ha hi phasaka ha tone. Ya ku sungula, a hi dzringa leswaku hi hlongolisela mali. Ya wubidzri, a dzringisa ku hi yentxa hi zrandzra swihungatiso leswi ngeke swa hombe.

5. Ha yini hi fanela ku tivonela leswaku hi nga zrandzri mali?

⁵ I swa ntumbuluku kuva hi djula ku va ni swakuda swa ku dzringana, mpahla ya ku tsrhamiseka ni muti wa ku tsrhamiseka. Nambitanu, hi fanela ku tivonela leswaku hi nga zrandzri mali. Vanyingi va lava nga va misava ya Sathana i ‘vazrandzri va mali’ ni mintxhumu leyi nga xaviwaka hi yone. (2Tm 3:2) Yesu a a swi tiva leswaku valandzreli vakwe va nga ha txhuka va dzringiwa leswaku va zrandzra mali. Xileswo, a te: ‘A nga kone lweyi a nga kotaka ku tizrela a tihosi tibidzri; hikusa kumbe a ta venga yin’we a zrandzra yin’wana, kumbe a ta namazrela yin’we a dzrela yin’wana. A n’wi na ku swi kota a ku tizrela Xikwembu Nkulukumba ni mali.’ (Mt 6:24, Testamente Ledrimpswha ni Mapsalma) Mhunu lweyi a gandzrelaka Yehovha na kuve a tlhela a heta nkama ni ntamu wa ku tlulisa mpimu na a dzringisa ku kuma wukosi bya misava leyi, hi ndlela ya kukazri, a a ta va lwa dzringisaka ku tizrela tihosi tibidzri. A a nge na ku swi kota ku gandzrela Yehovha hi mbilu hinkwayu.

6. Hi nga dondzra yini ka mazritu lawa Yesu a ma kongomisiki a bandleni dzra le Lawodikiya?

⁶ Loko dzana dzra ku sungula N.Y. dzri ya ku heleni, swizro swa bandla dzra le doropeni dzra  Lawodikiya a swi tikhuza, swi ku: ‘Ndzri mufuyi, ndzri tifuyisile, a ndzri pfumali ntxhumu.’ Kambe a mahlweni ka Yehovha na Yesu, a va li ‘va khombo, swisiwana, vapfumali, swi-fa-mahlo ni swisweli’. Yesu a va khwavelile, na a nga va khwaveli hi leswi a va ganyile, kambe hi leswi lizrandzru dzravu dzra mali a dzri hona wuxaka byavu na Yehovha. (Mpf 3:14-17) Loko hi gungula leswaku mbilu yezru yi sungule ku navela ku hlongolisela mali, hi fanela ku kahlula hi lulamisa miyanakanyu yezru. (1Tm 6:7, 8) Loko swi nge tanu, mbilu yezru yi ta yavana kutani Yehovha a nga ti yamukela wugandzreli byezru. Yehovha ‘i Xikwembu Nkulukumba lwa nga ni xikwele’. (Dt 4:24) I yini lexi nga hi yentxaka hi nga ha swi koti ku dzringanisela ka ndlela leyi hi yi vonaka ha yone mali?

7-9. U dondzra yini ka leswi humeleliki nkulu wa bandla lwa vitaniwaka David?

⁷ Vona xikombiso xa David, nkulu wa bandla lwa hisekaka, lwa tsrhamaka a Estados Unidos. A li minkama hinkwayu a ve mutizri wa nkhinkhi. A khwelisiwile ka komponi leyi a a tizra ka yone a tlhela a qokoleliwa hi mfumu ka muxaka wa ntizro lowu a a li ka wone. David a li: “A nkameni lowo, a ni pimisa leswaku swiqokolelo leswi a swi kombisa leswaku Yehovha o ni katekisa.” Kambe a swi li tanu hakunene?

⁸ David a sungule ku vona swikombiso leswi nga mu pfula matihlo. A swi vonile leswaku ntizro wakwe a wu honetela wuxaka byakwe na Yehovha. A li: “Loko ni li mintlhanganwini ya bandla nambi ni le nsin’wini, a ni tikuma na ni pimisa hi swikazratu swa le ntizrweni.” A tlhela a ku: “A ni bandzra mali ya yinyingi, kambe a ni tsrhama hi ku kazrateka miyanakanyu nakone a wukatini byanga a hi nga ha di byi yehla.”

⁹ David a swi vonile leswaku a ku djuleka a pompola mintxhumu leyi a a yi zrangisa a wuton’wini. A li: “Ni tlhasele wugamu bya leswaku ku djuleka ni lulamisa xiyimu xanga.” David a a djula ku sungulisa ku hlela matizrela yakwe, kutani a ye khanela ni mulungu hi makungu yakwe. Ku  humelele yini? David a hlongoliwe ntizrweni! A yentxe yini loko ku humelele swoswo? A li: “Mundzruku ka kone, ne vhela ni kombela wuphayona bya ku pfunisa hi nkama wa ku leha.” Akuva David ni nsati va kota ku tihanyisa, va sungule ku yentxa ntizro wa wubasisi. Ntsrhaku ka nkamanyana, a sungule ntizro wa wuphayona bya nkama hinkwawu. Nsati, na yene, a game hi ku teka wuphayona. Vatekani lava va lange ku yentxa ntizro wa ku tihanyisa lowu ntalu wa vhanu va wu langutelaka hansi. Kambe, ka David ni nsati xa lisima ngopfu a ku nga li muxaka wa ntizro lowu a va wu yentxa. Mali leyi va holaka yone swoswi yi pumbeke ngopfu lakakuva yo va 10% ntsena ka leyi a va yi kuma khale, kambe hweti ni hweti ya yanela ku hakela leswi va swi xavaka. Va djula ku zrangisa Yehovha, kutani va tivonele hi yavu leswaku Yehovha awa va bekisa lava zrangisaka timhaka ta Mfumu.—Mt 6:31-33.

10. Xana hi nga yi vonelelisa kuyini mbilu?

¹⁰ Nambi hi ni switsrongo kumbe swinyingi hi tlhelo dzra nyama, hi fanela ku vonelela mbilu. Hi ndlela yini? U nga zrandzre mapfindla. Nakone u nga tsrhike ntizro waku wa ku tihanyisa wu teka mbangu wa ku sungula kutani ntizro wa Yehovha wu va mbangwini wa wubidzri. U nga swi tivisa kuyini leswaku hi swoleswo swi ku yentxekelaka? U nga ha tivutisa swa ku fana ni leswi: “Xana ni talisa ku pimisa hi ntizro wanga wa ku tihanyisa loko ni li mintlhanganwini kumbe loko ni li nsin’wini? Xana ni tsrhama hi ku txhava leswaku ni nga txhuka ni nga vi na mali ya ku yanela nkameni lowu taka? Xana mali ni mintxhumu leyi vonekaka swi yentxa leswaku mine ni nkatanga hi tsrhama hi ku holova? Xana ni nga pfumela ku yentxa ntizro wa ku tihanyisa lowu van’wana va wu vonelaka hansi loko wu ngo ni pfumelela ku heta nkama lowu yengetelekiki na ni tizrela Yehovha?” (1Tm 6:9-12) Loko hi kambisisa swivutiso leswo, a hi dzrimukeni leswaku Yehovha awa hi zrandzra nakone a dumbisa leswi ka lava tinyiketelaka ka yene: ‘Ni nga ti ku tsrhika nikutsrongo, nambi [ku li] ku ku sukela.’ Hi swoswo mupostola Pawulo a tsraliki ha swone, a ku: ‘A mahanyeleni yenu n’wi nga vi pfumela ku fumiwa hi lizrandzru dzra mali.’​—Hb 13:5, 6, TLM.

11. Xana swihungatiso swi nga mu yentxa yini mhunu?

¹¹ Yehovha a djula leswaku hi tikholisa hi wutomi, nakone ku hungata swi nga hi pfuna ku yentxa tanu. Nakunene, Zritu dzra Xikwembu Nkulukumba dzri li ‘a ku na ku mhunu lexi tlulaka ku da ni ku nwa, ni ku titsrhavela ntizrweni wakwe’. (Ekl 2:24) Nambitanu, ku tala ka swihungatiso swa misava swi nga hi hona. Swi hona mahanyela lamanene ya vhanu, hi ku va kutxa ku  pfumelela​—nambi ku zrandzra—​mintxhumu leyi soliwaka hi Zritu dzra Xikwembu Nkulukumba.

12. Hi ku ya hi 1 Ba-le-Korinte 10:21, 22, ha yini hi fanela ku hlawula swihungatiso swezru ha hombe?

¹² Hi djula ku gandzrela Yehovha hi mbilu hinkwayu, xileswo a hi nge deli ‘tafoleni dzra Hosi ni le tafoleni dzra mademona’. (Dondzra 1 Ba-le-Korinte 10:21, 22.) Ku da ni mhunu hakanyingi swi komba leswaku mi vanghanu. Loko hi hlawula swihungatiso leswi kutxetelaka ku banana ni ku dlayana, wungoma, wuwoswani, kumbe ku navela kun’wana ni mapimisela ya nyama, hi nga hlaya leswaku ho da swakuda leswi swekiwiki hi valala va Xikwembu Nkulukumba. Mihandzru ya kone i ku tivavisa hine ha byezru, hi tlhela hi hona wuxaka byezru na Yehovha.

13-14. Hi ku landzra Yakob 1:14, 15, ha yini hi fanela ku hlawula swihungatiso ha hombe? Hamba xifaniso.

¹³ Vona tindlela ta kukazri leti kongomiki, leti ha tone swihungatiso swi nga fanisiwaka ni swakuda leswi hi swi daka. Loko hi da, ha hlawula leswi hi swi nhingenisaka a non’wini. Kambe loko ho za hi mita swakuda, leswi yentxekaka a ndzreni kwezru swo titiva nakone swinonisi leswi nga swakudeni swi gama hi ku ndzrulutiwa swi va xiyenge xa mizri. Swakuda leswinene swi nga hi yentxa hi va vatomi; kasi swakuda leswi ngeke swinene swi nga hi vangela mavabyi. Leswo a swi nga ti tikomba kola ni kola, kambe swi ta tikomba hi ku famba ka nkama.

¹⁴ Hi ndlela leyi fanaka, loko hi hlawula swihungatiso swezru, ha swi kota ku kheta leswi hi swi nhingenisaka a miyanakanywini yezru. A ntsrhaku ka leswo, leswi swi yentxekaka swo titiva nakone miyanakanyu ni timbilu tezru swa khumbeka. Swihungatiso leswinene swa hi pepisa, kasi swihungatiso leswa ku biha swi ta hi vavisa. (Dondzra Yakob 1:14, 15.) Mihandzru ya swihungatiso swa ku biha a yi nge tekeli ku tikomba, kambe yi ta tikomba hi ku famba ka nkama. Hi swoswo swi yentxaka Bible dzri hi ba ndleve, dzri ku: ‘N’wi nga tikanganyiseni; Xikwembu Nkulukumba a nga mpfhaviwi; hikusa leswi mhunu a swi byaliki, a ta swi tsrhovela. Hikusa lwa byalelaka nyama yakwe, a ta tsrhovela hi nyama ku bola.’ (Ga 6:7, 8) Vona lisima dzra kuva hi bakanya swihungatiso hinkwaswu leswi hlohlotelaka mintxhumu leyi Yehovha a yi vengaka!​—Ps 97:10.

15. I nyiko muni leyi Yehovha a hi hananiki yone akuva hi tikholisa ha yone?

¹⁵ Ku tala ka vhanu va Yehovha va zrandzra ku hlalela Wuhaxi bya JW^®, ku nga xititxhi xa televhizawu ka Internet lexi nga ni mintxhumu leyi yakaka. Makwezru wa xisati lweyi va liki i Marilyn a te: “Wuhaxi bya JW byi ni pfune ku vona mintxhumu hi tihlo dzrinene, nakone a ni sindzriseki ku pfana ni hluta leswi ni swi vonaka. Loko ni twa xivundzra kumbe ni hela ntamu, ni djuletela wukaneli lebyi nyikanaka ntamu kumbe nongonoko wa Wugandzreli bya Mixo a Betele ni hlalela. Leswo swi ni tsrhinetela kusuhi na Yehovha ni nhlengeletanu yakwe. Lulamiselo dzra Wuhaxi bya JW dzri txintxe wutomi byanga hi ku helela.” Xana wa susa mabindzru ka nyiko leyi ya Yehovha? Handle ka nongonoko wumpswha hweti ni hweti, Wuhaxi bya JW byi kombisa minongonoko yinyingi ya mintxhumu ya ku yingela ni ya ku yi hlalela ku ya tlhasa ni ka tinsimu leti nyikanaka ntamu leti mhunu a nga tilangelaka ha wuswakwe.

16-17. Ha yini hi fanela ku pimela ha hombe nkama lowu hi wu hetaka na hi hungata, nakone hi nga swi kotisa kuyini leswo?

¹⁶ Ina, hi fanela ku hlawula ha hombe muxaka wa swihungatiso. Kambe, hi tlhelo dzrin’wana, hi fanela ku hlawula ni ntsrengo wa nkama lowu hi wu hetaka na hi hungata. Loko swi nge tanu, hi nga ha heta nkama wa ku tala a ku hungateni ku tlula lowu hi wu hetaka na hi tizrela Yehovha. Vanyingi swa va kazratela ku pimela nkama lowu va wu hetaka a ku hungateni. Abigail, mumpswha lwa nga mukriste wa 18 wa malembe, a li: “Ku hlalela TV swi ni pfuna ku wisa loko ni hete siku na ni khamekile hi ntizro. Kambe loko ni nga tivoneli,  ni nga heta mawora ya ku tala na ni hlalela.” Djaha ledzri nga mukriste, ledzri va liki i Samuel, dzri li: “Ni txhuka ni tikuma na ni hlalela ntsrengo lowu nga pimekikiki wa ma-vídeo ya ku goma ka Internet. Ni sungula hi ku vona dzrin’we ntsena, kutani na ni nga si swi xiya, ku khalute mawora mazrazru kumbe ntlhanu na ni hlalela.”

¹⁷ Xana u nga swi kotisa kuyini ku pimela nkama lowu u wu hetaka na u hungata? Xa ku sungula i ku tivutisa leswaku, hi ntiyiso wa kone, u heta nkama wa ku gama kwini na u hungata. U nga tsrala ka buku nkama lowu u wu hetaka na u hungata hi vhiki. Ka kalendariyu tsrala leswaku i mawora mangani u ma hetaka na u hlalela televhizawu, na u valanga Internet, na u tlanga majogu ka selulari. Loko u pimisa leswaku u heta nkama wa ku tlulisa mpimu, dzringisa ku hamba xiyimiso. Nyika nkama mintxhumu leya lisima ku sungula, u gama u beka nkama wa ku hungata. Gama u kombela Yehovha a ku pfuna ku namazrela xiyimiso xaku. Hi ndlela leyo u ta va ni nkama ni ntamu lowu djulekaka a kuva u dondzra Bibele wuswaku kumbe u yentxa wugandzreli bya ndangu, u ya mintlhanganwini ya bandla ni ku tizrela Yehovha hi ku zrezra ni ku fambisa swidondzro. Nakone, u nge titwi nandzru loko u heta nkama na u hungata, hikusa wa swi tiva leswaku u zrangise Yehovha.

18-19. Xana hi nga kombisisa kuyini leswaku hi gandzrela Yehovha hi mbilu hinkwayu?

¹⁸ Loko mupostola Petro a game ku tsrala mayelanu ni ku hela ka misava ya Sathana ni ku buya ka misava leyimpswha, a te: ‘Hi leswo ke, vazrandzriwa, leswi n’wi laviselaka leswo, khinyelani akuva n’wi kumiwa hi yene na n’wi ni ku zrula, n’wi nge na bati ni nsandzru.’ (2Pe 3:14) Loko hi yingiseta xilayu lexo hi va hi yentxa hinkwaswu leswi hi nga swi kotaka akuva hi tsrhama na hi basile a hanyeleni dzrezru ni hi le moyeni, hi kombisa leswaku hi gandzrela Yehovha hi mbilu hinkwayu.

¹⁹ Sathana ni misava yakwe va ta ya mahlweni hi ku dzringisa ku hi yentxa hi beka mintxhumu yin’wana a mbangwini wa ku sungula, a matsrhan’wini ya Yehovha. (Lk 4:13) Kambe nambi ho kumana ni swikazratu swa ku tsrhamisisa kuyini, hi nga ti pfumelela mhunu kumbe ntxhumu ni wun’we wu teka mbangu wa Yehovha a mbilwini yezru. Hi tibekisele ku nyika Yehovha leswi swo ko fanela yene ntsena​—ku nga ku mu gandzrela hi mbilu yezru hinkwayu!