1-2. a) I yini leswi vazrangeli va misava va taka swi tivisa ku nga li khale? b) Hi swini swivutiso leswi hi fanelaka ku swi hlamula?

A HI nge vazrangeli va misava va ha ku yentxa xitiviso lexi ku nga khale na xi yimeliwile, xa leswaku ‘ku zrulile, a ku na khombo’. Swi nga yentxeka va li kazri va tibyela hi leswaku misava a yi ngi ngi sama yi va ni ku zrula lokukulu. Va ta djula leswaku na hine hi pimisa leswaku kutani va swi kota ku lawula xiyimu xa misava. Kambe a va nge ti swi kota ku sivela leswi taka landzrela! Ha yini? Hi ku ya hi wuprofeta bya Bibele, ‘a mhangu yi ta txhuka yi va wela henhla xikan’we, . . . va nga phondle’.​—1Te 5:3.

² Ku ni swivutiso swa lisima leswi hi fanelaka ku swi hlamula: Xana ku ta yentxeka yini hi nkama wa ‘nhlomulo lowukulu’? Xana Yehovha a ta yimela leswaku hi yentxa yini a nkameni lowo? Nakone hi nga tilulamiselisa kuyini na ke he swoswi akuva hi ta tsrhama na hi dumbekile hi nkama wa nhlomulo lowukulu?​—Mt 24:21.

3. Hi ku ya hi Apfuletelo 17:5, 15-18, xana Xikwembu Nkulukumba a ta mu helisisa kuyini ‘Babilona Lwenkulu’?

³ Dondzra Apfuletelo 17:5, 15-18. ‘Babilona Lwenkulu’ a ta helisiwa! Hi laha hi swi voniki ha kone ku sunguleni, tihosi ta misava a ti nge ti sivela leswi swi taka yentxeka a nkameni lowo. Ha yini? Hikusa Xikwembu Nkulukumba a ta beka timbilwini ta tone leswaku ti hetisisa mimpimiso yakwe. Hi yini ya kone? Ya ku helisa mfumu wa misava wa wukhongoti bya madzrimi, lowu patsraka  Wukhongoti bya Masonto. * Xikwembu Nkulukumba a ta nhingenisa mimpimiso yakwe ka ‘timhondzro leta khume’ ta ‘xihazri lexa libungu’. Timhondzro leta khume ti yimela minfumu hinkwayu ya politika leyi seketelaka ‘xihazri’, ku nga Ntlhanganu wa Matiko. (Mpf 17:3, 11-13; 18:8) Loko mimfumu leyo ya politika yi hlasela wukhongoti bya madzrimi, ku ta va ku sungula ka nhlomulo lowukulu. Ku ta va ntxhumu wa xitxhuketa ni wa ku txhavisa swinene lowu taka wela vhanu hinkwavu a misaveni.

4. a) Hi swini swivangelo leswi tihosi ta misava ti nga ha txhukaka ti swi nyikela akuva ti tiyimelela hi kuva ti hlasela wukhongoti bya madzrimi? b) Swi tikomba na lava a va li swizro swa wukhongoti byolebyo va ta yentxa yini?

⁴ A hi swi tivi swivangelo leswi tihosi ta misava ti taka swi nyikela akuva ti tiyimelela hi kuva ti hlasela Babilona Lwenkulu. Ti nga ha hlaya leswaku wukhongoti byi sivela leswaku ku va ni ku zrula ni leswaku byi tsrhamela ku nhingenela ka leswi tone ti swi yentxaka. Kumbexana ti nga ha hlaya leswaku a wukhongoti byi tikumele pfindla ni wukosi byinyingi. (Mpf 18:3, 7) Swa twisiseka ku pimisa leswaku nhlaselo lowo a wu nga ti helisa swizro hinkwaswu swa wukhongoti lebyo. A matsrhan’wini ya leswo, swi tikomba na tihosi ta misava ti ta tsravukana ni tinhlengeletanu ta wukhongoti. Loko tinhlengeletanu leto ti nga ha li kone, lava a va li swizro swa tone va ta swi xiya leswaku vazrangeli vavu va va lahlile nakone va ta dzringisa ku tsravukana ni wukhongoti byolebyo.

5. I yini leswi Yehovha a swi dumbisiki mayelanu ni nhlomulo lowukulu, nakone ha yini?

⁵ Bibele a dzri hlayi hi ku kongoma leswaku ku helisiwa ka Babilona Lwenkulu ku ta heta nkama wungani, kambe ha swi tiva leswaku a swi nga ti heta nkama wa ku leha. (Mpf 18:10, 21) Yehovha a dumbise leswaku a ta ‘pumba masiku’ ya nhlomulo lowukulu, lakakuva a ‘vahlawuliwa’ vakwe va ta huluka nakone wukhongoti bya ntiyiso byi ta tama byi va kone. (Mr 13:19, 20) Kambe i yini leswi Yehovha a taka yimela leswaku hi swi yentxa hi nkama lowu nhlomulo lowukulu wu taka sungula hi wone ku ya tlhasa Armagedon?

6. Ha yini swi nga yaneli ku titsravuxa ka wukhongoti bya madzrimi?

 ⁶ Hi laha hi swi voniki ha kone ka nhloko-mhaka leyi khalutiki, Yehovha a yimela leswaku vagandzreli vakwe va titsravuxa ka Babilona Lwenkulu. Nambitanu, a swi yanelanga ku titsravuxa ka wukhongoti bya madzrimi. Hi fanela ku tiyimisela ku seketela wukhongoti bya ntiyiso, ku nga wugandzreli bya ku tenga bya Yehovha. A hi voneni tindlela tibidzri leti hi nga swi yentxaka ha tone.

7. a) Xana hi nga tama hi landzra milawu leyinene ya Yehovha ya mahanyela hi ndlela yini? b) Xana a buku dzra Ba-Heberu 10:24, 25 yi dzri tshimisisa hi ndlela yini lisima dzra kuva hi hlengeletana, ngopfu-ngopfu swoswi?

⁷ Ya ku sungula, hi fanela ku tama hi landzra milawu ya ku lulama ya Yehovha hi tlhelo dzra mahanyela. A hi ma pfumeleli mahanyela ya ku biha ya misava. Hi xikombiso, a hi pfumeleli muxaka wini na wini wa mahanyela ya ku biha hi tlhelo dzra swa tinkuku, lama patsraka ku tekana ka vavanuna hi xivone kumbe vavasati hi xivone, ni mahanyela wani na wani ya wusodoma. (Mt 19:4, 5; Ro 1:26, 27) Ya wubidzri, hi fanela ku tama hi hlengeletana ni vakriste-kulozri. Hi tiyimiseli ku ya kwini na kwini, ku nga va ka Tiyindlu tezru ta Mfumu kumbe, loko swi vileleka, a makaya ya vamakwezru kumbe a mimbangwini leyi tumbeliki. Nambi ku nga yentxeka yini, a hi nge wu tsrhiki mukhuva wezru wa ku hlengeletana akuva hi gandzrela Yehovha. Phela, hi fanela ku hlengeletana ngopfu-ngopfu hi leswi hi ‘vona [ka] leswaku a siku dzri tsrhindzrekela kusuhi’.​—Dondzra Ba-Heberu 10:24, 25.

8. Xana dzrungula ledzri hi dzri huwelelaka dzri nga ha txintxa hi ndlela yini a nkameni lowu taka?

⁸ Hi nkama wa nhlomulo lowukulu, swi nga yentxeka dzrungula ledzri hi dzri huwelelaka dzri ta txintxa. Swoswi, hi zrezra madzrungula lamanene ya Mfumu nakone hi lwela ku yentxa vadondzrisiwa. Kambe a nkameni lowo, hi nga ha huwelela dzrungula ledzri kongomaka ni dzra ntamu swinene ku fana ni xihangu. (Mpf 16:21) Swi nga yentxeka hi ta huwelela leswaku misava ya Sathana yi kusuhi ni ku helisiwa. A nkameni wa kone, hi ta swi tiva ha hombe leswi hi taka swi huwelela ni leswi hi taka swi huwelelisa xiswone. Xana hi ta tizrisa mayentxela ya ku fana ni lawa hi ma tizrisiki hi nkama wa ku tlula dzana dzra malembe? Kumbe hi ta tizrisa man’wana? A hi yimeleni ku swi vona. Ka mayentxela hinkwawu, swi tikomba na hi ta va ni mukhandlu wa ku huwelela yavanyiso dzra Yehovha hi xixixi!​—Ezk 2:3-5.

9. I yini leswi tihosi ta misava ti nga ha swi yentxaka hi dzrungula dzrezru, kambe hi nga dumba yini?

⁹ Ntxhumu wun’wana lowu tikombaka na wu tiyile swinene, hi leswaku a dzrungula dzrezru dzri nga ha yentxa leswaku tihosi ta misava ti djula ku dzringisa ku yimisa ntizro wezru hi la ku heleliki. Swanga hi leswi hi tsrutsrumelaka ka Yehovha akuva a hi pfuna a ntizrweni wezru namunhla, hi ta vilela mpfunu wakwe a nkameni lowo. Hi nga dumba leswaku Xikwembu Nkulukumba wezru a ta hi nyika ntamu akuva hi hetisisa ku zrandzra kwakwe.—Mik 3:8.

10. Hi la swi profetiwiki ha kone ka Luka 21:25-28, i yini leswi ntalu wa vhanu va taka swi yentxa loko va vona leswi taka humelela ka nhlomulo lowukulu?

¹⁰ Dondzra Luka 21:25-28. Hi nkama wa nhlomulo lowukulu, vhanu va ta tsremeka nhlana loko va vona ku helisiwa ka ntxhumu wun’wana ni wun’wana lowu a va pimisa leswaku wu ta tsrhama hi masiku a misaveni. Va ta hlatiyela va tlhela va txhava hi ku vona leswaku va nga ha luza wutomi byavu a nguveni leyo ya ku txhavisa ku tlula hinkwatu a matin’wini ya vhanu. (Tsf 1:14, 15) A nkameni lowo, swi tikomba na wutomi byi ta ya byi kazrata swinene nambi ka vagandzreli va Yehovha. Hi mhaka ya leswi hi nga hambiki xiyenge xa misava, swi nga ha yentxeka hi ta va ni swikazratu swa kukazri. Hi nga ha sindzriseka ku pfumala swa kukazri leswi vilelekaka  akuva mhunu a hanya ha swone.

11. a) Hi nkama wa nhlomulo lowukulu, i yini lexi taka yentxa vhanu hinkwavu va langusa Timboni ta Yehovha? b) Ha yini hi nga fanelanga ku txhava nhlomulo lowukulu?

¹¹ Hi nkama wa kukazri, lava wukhongoti byavu byi taka va byi helisiwile va nga ha beka xiviti hi leswi Timboni ta Yehovha ti yaka mahlweni ni wukhongoti bya tone. Na ke he swoswi hi nga tekela ku yanakanya mpfilumpfilu leyi va taka yi pfuxa, ku patsra ni ka swa ku haxa madzrungula. Tihosi ta misava ku patsra ni ndhuna ya tone, Sathana, va ta hi venga hi ku va hi li va wukhongoti lebyi taka tama byi va kone. Va tava na va nga wu hetisisanga nkongometo wavu wa ku helisa wukhongoti hinkwabyu a misaveni. Xileswo, hinkwavu va ta langusa hine. A nkameni lowo, tihosi ta misava ti ta ndzruluka Gog wa Magog. * Ti ta patsrana akuva ti ta hlasela vhanu va Yehovha. (Ezk 38:2, 14-16) Hi nga ha sungula ku vindlavindleka hi mhaka ya ku pimisa hi mintxhumu yoleyo leyi nga ha yentxekaka, ngopfu-ngopfu hi kola ka leswi hi nga tivikiki hinkwaswu leswi taka humelela. Nambitanu, lexi tiyiki hi lexi: A hi fanelanga ku txhava nhlomulo lowukulu. Yehovha a ta hi nyika swileleto leswi taka hi pfuna ku huluka. (Ps 34:19) Hi ta swi kota ku ‘wololoka [hi] tlakuxa tinhloko [tezru]’ hikusa hi ta vona leswaku ‘ku tizruliwa [kwezru] ku kusuhi’. *

12. Xana ‘a nandzra lwe wa ku dumbeka ni ku tlhazriha’ a hi lulamisela hi ndlela yini ka leswi taka humelela?

¹² ‘A nandzra lwe wa ku dumbeka ni ku tlhazriha’ a hi lulamisela leswaku hi tsrhama na hi dumbekile hi nkama wa nhlomulo lowukulu. (Mt 24:45) A swi yentxa hi tindlela ta ku siyana-siyana, kambe a hi voneni xikombiso xin’we ntsena, ku nga tinhlengeletanu letikulu leti viki kone hi 2016 ku ya ka 2018. Wukaneli hinkwabyu lebyi bekiwiki ka tinhlengeletanu leto byi hi kutxi ku tama hi txutxela matsrhamela lawa ma taka hi pfuna loko siku dzra Yehovha dzri ya dzri tshindzrekela. A hi pfuxeteni matsrhamela wolawo.

13. Xana hi nga ku tiyisa hi ndlela yini ku dumbeka kwezru ka Yehovha, nakone ha yini hi fanela ku swi yentxa na ke he swoswi?

¹³ Ku dumbeka: Nhloko-mhaka ya nhlengeletanu leyikulu ya 2016 a yi ku: “Tama U Dumbeka Ka Yehovha!” Nhlengeletanu leyo yi hi dondzrise leswaku loko hi li ni wuxaka lebyikulu na Yehovha, hi ta tama hi dumbeka ka yene. Hi dzrimuxiwe leswaku hi nga tsrhindzrekela kusuhi na Yehovha hi ku hamba swikhongoto leswi sukelaka mbilwini ni hi ku dondzra Zritu dzrakwe swi phela. Hi ku yentxa leswo hi ta kuma ntamu wa ku hlula nambi swikazratu leswikulu ngopfu. Loko misava ya Sathana yi ya tlhasa wugan’wini, hi nga yimela ku ya hi langusana ni swikazratu leswi taka dzringa ku dumbeka kwezru ka Xikwembu Nkulukumba ni Mfumu wakwe. Swi tikomba na hi ta tama hi va xihlekiso a vhan’wini. (2Pe 3:3, 4) Xivangelo xin’we xi nga ha va hi leswi ngopfu-ngopfu hi taka tama hi yala ku seketela xiyenge xini na xini xa misava ya Sathana. Hi fanela ku tiyisa ku dumbeka kwezru na ke he swoswi akuva hi ta kota ku tama hi dumbeka hi nkama wa nhlomulo lowukulu.

14. a) Hi kwini ku txintxa loku taka va kone a makazri ka vamakwezru lava hi zrangelaka lani misaveni? b) Ha yini swi ta djula kuva hi kombisa ku dumbeka a nkameni lowo?

¹⁴ Hi nkama wa nhlomulo lowukulu, ku ta va ni ku txintxa a makazri ka vamakwezru lava zrangelaka nhlegeletanu ya Yehovha lani misaveni. Ku ta tlhasa lani vatotiwa hinkwavu lava ha  liki misaveni va taka tlhanganisiwa a matilweni akuva va ta ya lwa yimpi ya Armagedon. (Mt 24:31; Mpf 2:26, 27) Leswo swi tlhamuxela leswaku vamakwezru va Huvo leyi Zrangelaka a va nge he tiva kone lani misaveni. Nambitanu, xitsrhungu lexikulu xi ta tsrhama na xi hlelekile ha hombe. Vamakwezru lava fanelekaka ka lava tihamba tin’wanyana va ta zrangela. Swi ta djula hi kombisa ku dumbeka kwezru hi ku va seketela ni ku landzra nkongomiso wavu lowu humaka ka Xikwembu Nkulukumba. Ku huluka kwezru ku ta ya hi kuva hi yentxa leswo!

15. Xana hi nga ku tiyisa hi ndlela yini ku tiyisela kwezru, nakone ha yini swi li swa lisima kuva hi swi yentxa na ke he swoswi?

¹⁵ Ku tiyisela: Nhloko-mhaka ya nhlengeletanu leyikulu ya 2017 a yi ku: “U Nga Kazrali!” Nhlengeletanu leyo yi tiyise wuswikoti byezru bya ku tiyisela mindzringo. Hi dondzre leswaku ku tiyisela kwezru a ku yi hi kuva hi kumeka ka swiyimu leswinene. Hi fanela ku titoloveta ku tiyisela hi ku tsrutsrumela ka Yehovha. (Ro 12:12) Hi nga dzrivaleni leswi Yesu a hi dumbisiki swone, loko a te: ‘Lweyi a tiyiselaka ku tlhasa vugamu, yene a ta hanyisiwa.’ (Mt 24:13) Xidumbiso lexo xi tlhamuxela leswaku hi fanela ku tama hi dumbeka nambi loko hi langusana ni ndzringo wini na wini. Loko hi tiyiselela ndzringo wun’wana ni wun’wana swoswi, hi nga swi kota ku va ni lipfumelo ledzri tiyiki hi nkama wa nhlomulo lowukulu.

16. Xana xixixi xezru xi pfela kwini, nakone i yini leswi hi nga swi yentxaka akuva hi yengesela xixixi xezru?

¹⁶ Xixixi: Nhloko-mhaka ya nhlengeletanu leyikulu ya 2018 a yi ku: “Vana Ni Xixixi!” Nhlengeletanu leyo yi hi dzrimuxe leswaku xixixi a xi pfeli ka wuswikoti byezru. Ku fana ni ku tiyisela, xixixi xa ntiyiso hi xi kuma hi ku tsrutsrumela ka Yehovha. I yini leswi hi nga swi yentxaka akuva hi dondzra ku tsrutsrumela kwakwe hi la ku yengetelekiki? Hi ku dondzra Zritu dzrakwe siku ni siku, hi tlhela hi yanakanyisisa hi leswi Yehovha a swi yentxiki akuva a huluxa vhanu vakwe a nkameni lowu khalutiki. (Ps 68:20; 2Pe 2:9) Loko valala va hi hlasela hi nkama wa nhlomulo lowukulu, swi ta djula hi va ni xixixi hi tlhela hi dumba Yehovha hi lani ku yengetelekiki ngopfu. (Ps 112:7, 8; Hb 13:6) Loko hi tsrutsrumela ka Yehovha swoswi, hi ta va ni xixixi lexi hi xi vilelaka  akuva hi langusana ni nhlaselo wa Gog. *

17. Ha yini hi nga fanelanga ku txhava Armagedon? (Vona xifaniso lexi nga ka kapa.)

¹⁷ Hi la hi swi voniki ha kone ka nhloko-mhaka leyi khalutiki, ntalu wezru hi hanye wutomi byezru hinkwabyu a masikwini ya wugamu. Kambe hi lavisela ku huluka ka nhlomulo lowukulu. Yimpi ya Armagedon yi ta helisa hi ku helela xiyimu lexi xa mintxhumu. Nambitanu, a hi txhavi. Ha yini? Hikusa yi ta va yimpi ya Yehovha. (Pr 1:33; Ezk 38:18-20; Zk 14:3) Hi ku leletiwa hi Yehovha, Yesu Kriste a ta zrangela makhandzra a yimpini. A ta va kun’we ni vatotiwa lava pfuxiwiki ku feni xikan’we ni tintsrumi ta ntsrandzra-vahlayi. Hi wumun’we va ta lwisana na Sathana, mademona yakwe, ni makhandzra yakwe ya lani misaveni.​—Dn 12:1; Mpf 6:2; 17:14.

18. a) Xana Yehovha a hi dumbisa yini? b) Xana Apfuletelo 7:9, 13-17 yi hi pfuna hi ndlela yini ku dumba leswaku hi ta huluxiwa?

¹⁸ Yehovha a dumbisa leswi: ‘A tlhazri dzrin’wana ni dzrin’wana ledzri fuliwaka akuva dzri ta hona wene, dzri nga ka dzri nga koti ntxhumu.’ (Eza 54:17) ‘Xitsrhungu lexikulu’ xa vagandzreli va ku dumbeka va Yehovha xi ta huma nhlomulweni lowukulu na xi hanya! Kutani xi ta tama xi mu yentxela ntizro wa ku xwenga. (Dondzra Apfuletelo 7:9, 13-17.) Vona ndlela leyi Bibele dzri hi pfunaka ha yone ku dumba leswaku hi ta huluxiwa! Ha swi tiva leswaku ‘Yehovha a bekisa lava ku dumbeka’. (Ps 31:23) Hinkwavu lava mu zrandzraka va tlhela va mu dzrumisa va ta nyonxa ngopfu swinene hi ku mu vona na a basisa vito dzrakwe dzra ku xwenga.​—Ezk 38:23.

19. Hi kwini ku lavisela ka ku xonga loku hi yimelaka ku ku vona na ku hetiseka ku nga li khale?

¹⁹ Pimisa hi leswi 2 Timoteo 3:2-5 yi nga dondzrisiwaka xiswone, na yi khanela hi leswi vhanu va taka va xiswone a misaveni leyimpshwa, na ku nge he na nhlohlotelo wa Sathana. (Vona bokisi ledzri liki “ Leswi Vhanu Va Taka Va Xiswone Hi Nkama Lowo”.) Makwezru George Gangas, * lweyi a tizriki swanga xizro xa Huvo leyi Zrangelaka, a swi tlhamuxele hi ndlela leyi: “Vona leswi misava yi taka va xiswone loko hinkwavu a misaveni va li vamakwezru va xinuna ni va xisati! Ku nga li khale u ta va ni ndjombo ya ku hanya ka xiyimu leximpswha xa mintxhumu. U ta hanya hi nkama wa ku leha ku fana na Yehovha. Hi ta hanya hi la ku nga helikiki.” Hakunene hi ni ku lavisela ka ku xonga swinene!