NHLOKOMHAKA YA XIDONDZRO 42
Ndlela Ya Ku Pfuna Swidondzro Swa Bibele Akuva Swi Babatisiwa—Xiyenge Xa Wubidzri
‘Tiwondle wene ni ku dondzrisa kwaku.’—1TM 4:16.
LISIMU 77 Livaningu A Misaveni Ya Munyama
NKATSRAKANYU WA LESWI TAKA DONDZRIWA *
1. Hi swi tivisa kuyini leswaku a ntizro wa ku yentxa vadondzrisiwa i ntizro wa ku huluxa vhanu?
NTIZRO wa ku yentxa vadondzrisiwa i ntizro lowu huluxaka wutomi bya vhanu. Hi swi tivisa kuyini? Loko Yesu a nyikele xileleto lexi nga ka Mattheo 28:19, 20, yene a te: “Fambani mi ya yentxa vadondzrisiwa, . . . mi va babatisa”, Tradução do Novo Mundo. Hi dzrini lisima dzra babatiso? Hi fanela ku babatisiwa loko hi djula ku hanya hi lani ku nga helikiki. Mhunu lweyi a djulaka ku babatisiwa a fanela ku pfumela leswaku a nga kuma wutomi lebyi nga gamikiki ntsena hi leswi Yesu a hi feliki a tlhela a pfuxiwa. Leswo hi leswi yentxiki mupostola Petro a byela vakriste a ku: ‘Ma huluxa na n’wine swoswi, . . . ndzri hlaya ku babatisiwa . . . hi ku pfuka ka Yesu Kriste.’ (1Pe 3:21) Xileswo, loko mudondzrisiwa lwemumpswha a babatisiwa, a kuma dumbo dzra ku hanya hi lani ku nga helikiki.
2. Xana buku dzra 2 Timoteo 4:1, 2 dzri hi byela leswaku hi fanela ku va vadondzrisi va muxaka muni?
2 Akuva hi yentxa vadondzrisiwa hi fanela ku txutxela wuswikoti bya ku dondzrisa. (Dondzra 2 Timoteo 4:1, 2.) Ha yini? Hikusa Yesu a hi nyike xileleto lexi: “Fambani mi ya yentxa vadondzrisiwa, . . . mi va dondzrisa.” Mupostola Pawulo a hlaye leswaku loko u tiya ka ntizro lowu, ‘u ta tihuluxa wene ni lava va ku yingelaka’. Kutani hi xivangelo lexi twalaka, Pawulo a hlaye mazritu lawa: ‘Tiwondle wene ni ku dondzrisa kwaku’ kumbe u kambela ku dondzrisa kwaku. (1Tm 4:16) Akuva hi yentxa vhanu va va vadondzrisiwa hi fanela ku va dondzrisa hi ndlela leyinene.
3. Ka nhlokomhaka leyi, i yini leswi hi taka swi dondzra mayelanu ni ku fambisa swidondzro swa Bibele?
3 Minkama hinkwayu hi dondzrisa magidigidi ya vhanu mintiyiso leyi nga Bibeleni. Kambe hi lani hi swi voniki ha kone ka nhlokomhaka leyi khalutiki, hi djula ku tiva ndlela leyi hi nga pfunaka ha yone vhanu lava yengetelekiki akuva va va vadondzrisiwa va Kriste lava babatisiwiki. Ka nhlokomhaka leyi hi ta vona mintxhumu yin’wana ya ntlhanu leyi mudondzrisi mun’wana ni mun’wana a fanelaka ku yi yentxa leswaku a kota ku pfuna xidondzro xa Bibele akuva xi hluvuka xi tlhasela ku babatisiwa.
TIZRISA BIBELE LOKO U DONDZRISA
Kombela mudondzrisi lweyi a nga ni wuswikoti akuva a ku pfuna ku yampswisa ndlela leyi u tizrisaka Bibele ha yone loko u dondzrisa (Vona mayava 4-6) *
4. Ha yini mudondzrisi a nga fanelanga ku khanela ku tlula mpimu loko a fambisa xidondzro xa Bibele? (Vona ni ntlhamuxelo wa le hansi.)
4 Ha ti zrandzra tindondzro ta Bibele leti hi ti dondzrisaka. Xileswo hi nga ha dzringeka ku khanela ku tlula mpimu hi leswi hi swi zrandzraka. Loko a fambisa Xidondzro xa Xihondzro Xa Ku Zrindzra, Xidondzro xa Bibele xa Bandla, kumbe ku fambisela mhunu xidondzro xa Bibele, mufambisi a nga fanelanga ku khanela ku tlula mpimu. Mudondzrisi mun’wana ni mun’wana a fanela ku tizrisa Bibele loko a dondzrisa, xileswo a fanela ku tivonela akuva a nga khaneli ku tlula mpimu ni ku kala a nga dzringisi ku khanela hinkwaswu a swi tivaka mayelanu ni ndzrimana ya kukazri ya Bibele, kumbe mhaka ya kukazri. * (Yh 16:12) Pimanisa wutivi bya Bibele lebyi u nga na byone swoswi ni lebyi a wu li na byone nkama u nga babatisiwa ha wone. Nkama lowu u nga babatisiwa ha wone swi nga yentxeka a wo tiva tindondzro ta masungulu ta Bibele ntsena. (Hb 6:1) Swi teke malembe akuva u twisisa leswi u swi tivaka namunhla. Xileswo u nga dzringisi ku dondzrisa xidondzro xa Bibele hinkwaswu leswi u swi tivaka hi nkama wun’we.
5. a) Hi ku ya hi 1 Ba-le-Thesalonika 2:13, i yini leswi hi djulaka leswaku xidondzro xezru xi swi twisisa mayelanu ni leswi xi swi dondzraka? b) Xana hi nga xi kutxa hi ndlela yini xidondzro xa Bibele akuva xi tiphofula ka leswi xi swi dondzraka?
5 Hi djula leswaku swidondzro swezru swa Bibele swi pfumela leswaku leswi swi swi dondzraka swi kumeka a Bibeleni. (Dondzra 1 Ba-le-Thesalonika 2:13.) Hi nga swi yentxisa kuyini leswo? Kutxa xidondzro xa Bibele akuva xi khanela hi leswi xi swi twisisaka ka leswi xi swi dondzraka. A matsrhan’wini ya kuva minkama hinkwayu ku va wene u tlhamuxelaka tindzrimana ta Bibele, xi kombele leswaku xi ku tlhamuxela tin’wana ta tone. Pfuna xidondzro xa Bibele akuva xi vona ndlela leyi ku dondzra Bibele swi nga xi pfunaka ha yone ku yampswisa wumhunu bya xone. Xi hambe swivutiso leswi taka xi pfuna ku hlaya leswi xi swi pimisaka, ni ndlela leyi xi titwaka ha yone hi Matsralwa lawa xi ma dondzraka. (Lk 10:25-28) Hi xikombiso, xi vutise: “Hi dzrini tsrhamela dzra Yehovha ledzri u dzri xiyiki ka ndzrimana leyi?” “Xana ntiyiso lowu wa Bibele wu nga ku pfuna hi ndlela yini?” “Xana u titwisa kuyini hi leswi u swi dondzriki?” (Pr 20:5) Xa lisima ngopfu a hi ku va xi va ni wutivi byinyingi, kambe i ndlela leyi xi byi zrandzraka ni ku byi tizrisa ha yone a wuton’wini bya xone.
6. Ha yini swi nga ha vaka swinene ku famba ni muzrezri lweyi a nga ni wuswikoti loko u ya fambisa xidondzro?
6 Loko u ya fambisa xidondzro xa Bibele, xana wa va teka vazrezri lava nga ni wuswikoti? Loko u famba navu u nga va vutisa leswaku va yi vonisa kuyini ndlela leyi u fambisaka xidondzro xa Bibele ha yone, ni leswaku u dzri tizrisa hi ndlela yini Bibele loko u dondzrisa. Loko u djula ku va mudondzrisi lwemunene, u fanela ku titsrongahata. (Dzringanisa ni Amintiṛo 18:24-26.) Ntsrhaku, vutisa muzrezri lweyi a nga ni wuswikoti leswaku xidondzro xi nga va na xi swi twisisa leswi xi swi dondzraka. U nga ha tlhela u kombela muzrezri lweyo akuva a ya ku fambisela xidondzro loko u nga ti swi kotisa hi vhiki dzrin’we kumbe hi mavhiki ya ku hlawa. Leswo swi ta yentxa leswaku xidondzro xi nga yimi, nakone swi ta pfuna xidondzro xa Bibele akuva xi vona lisima dzra ku dondzra. U nga txhuki u pimisa leswaku lexo ko va xidondzro xaku ntsena ni leswaku ko va wene ntsena u nga xi fambisaka. Henhla ka hinkwaswu, u djula leswi nga swinene ka xidondzro leswaku xi tama xi dondzra ntiyiso.
KOMBISA LESWAKU WA SWI ZRANDZRA NAKONE WA KHOLWA KA LESWI U SWI DONDZRISAKA
Nyikela swikombiso swa vhanu lava yentxiki ku txintxa a wuton’wini byavu akuva u pfuna xidondzro xa Bibele ku twisisa ndlela leyi xi nga tizrisaka minsinya ya milawu ya Bibele ha yone (Vona mayava 7-9) *
7. I yini leswi taka pfuna xidondzro xa Bibele akuva xi zrandzra leswi xi swi dondzraka?
7 Xidondzro xa Bibele xi fanela ku vona leswaku wa yi zrandzra nakone wa kholwa ka mintiyiso leyi kumekaka a Bibeleni. (1Te 1:5) Ku vona leswo swi nga yentxa leswaku xi zrandzra leswi xi swi dondzraka. Loko swi fanekela xi byele ndlela leyi ku tizrisa milawu ya Bibele swi ku pfuniki ha yone a wuton’wini byaku. Hi wugamu xi ta xiya leswaku Bibele dzri ni nkongomiso lowu wu nga xi pfunaka a wuton’wini bya xone.
8. I yini swin’wana leswi u nga swi yentxaka akuva u pfuna xidondzro xaku xa Bibele, nakone ha yini swi li swinene ku yentxa leswo?
8 Loko mi li ku dondzreni, xi byele swikombiso swa vhanu lava kotiki ku hlula swikazratu leswi fanaka ni leswi xi langutanaka na swone. U nga ha famba ni muzrezri lweyi xikombiso xakwe xi nga pfunaka xidondzro. Kumbe u nga ha djula swikombiso leswi khumbaka mbilu leswi kumekaka ka jw.org ka xiyenge lexi liki “Bibele Yi Hundzula Vutomi Bya Vanhu”. * Tinhlokomhaka leto ni ma-vídeo swi ta pfuna xidondzro xaku xa Bibele ku vona leswaku i wutlhazri ku tizrisa minsinya ya milawu ya Bibele a wuton’wini bya xone.
9. Xana u nga xi kutxisa kuyini xidondzro xaku xa Bibele akuva xi bula ni maxaka xikan’we ni vanghanu hi leswi xi swi dondzraka?
9 Loko xidondzro xaku xa Bibele xi txhatile, xana nuna kumbe nsati wa xone na yene awa dondzra? Loko swi nga li tanu, mu zrambe akuva a ta dondzra na n’wine. Kutxa xidondzro xaku akuva xi bula ni maxaka xikan’we ni vanghanu hi leswi xi swi dondzraka. (Yh 1:40-45) U nga swi yentxisa kuyini? U nga ha xi vutisa leswi: “U nga wu tlhamuxelisa kuyini ntiyiso lowu ka maxaka yaku?” kumbe “Hi yini ndzrimana leyi u nga yi tizrisaka akuva u kholwisa munghanu waku mhaka leyi?” Hi ndlela leyi, u ta va na u wupfisa xidondzro xaku xa Bibele akuva xi va mudondzrisi. Hi wugamu, loko xi fanekeleka xi nga ha sungula ku tizra swanga muzrezri lweyi a nga babatisiwangakiki. U nga ha vutisa xidondzro xaku leswaku xi nga va xi tiva mhunu mun’wana lweyi a djulaka ku dondzra Bibele. Loko xi mu tiva, tekela ku djuletela mhunu wa kone u va u tekela ku dondzra na yene. Mu kombe vídeo ledzri liki Xi Yentxisiwa Ku Yini Xidondro Xa Bibele? *
PFUNA XIDONDZRO XA BIBELE AKUVA XI DJULA VANGHANU A BANDLENI
Pfuna xidondzro xa Bibele akuva xi djula vanghanu a bandleni (Vona mayava 10-11) *
10. Hi lani swi kombisiwaka ha kone ka 1 Ba-le-Thesalonika 2:7, 8, xana hi nga xi yetisela hi ndlela yini xikombiso xa Pawulo?
10 Vadondzrisi va fanela ku zron’weka hi swidondzro swavu swa Bibele. Va fanela ku swi vona swanga vhanu lava taka va vamakwavu va xinuna ni va xisati hi tlhelo dzra moya. (Dondzra 1 Ba-le-Thesalonika 2:7, 8.) A swi swi nabyaleli ku tsrhika vanghanu lava a swi li na vone akuva swi sungula ku tizrela Yehovha. Xileswo, hi fanela ku swi pfuna akuva swi kuma vanghanu va ntiyiso a bandleni. Vana munghanu wa xidondzro xaku xa Bibele hi ku tinyika nkama wa ku va na xone ku nga li ntsena loko mi djula ku dondzra Bibele kambe ni ka swiyimu swin’wana. Ku xi fonela, ku xi zrumela mensaje kumbe ku xi yendzrela swi kombisa leswaku hakunene wa zron’weka ha xone.
11. Hi djula leswaku swidondzro swezru swa Bibele swi kuma yini a bandleni, nakone ha yini?
11 Ku ni xihlayahlaya lexi liki: “Nkanyi wa le ndzrilakanini a wu na n’winyi.” Akuva xidondzro xa Bibele xi va mudondzrisiwa wa Kriste ku vileleka mpfunu wa bandla. Xileswo, vadondzrisi lavanene va Bibele va pfuna swidondzro swavu swa Bibele akuva swi tiva vamakwezru van’wana a bandleni lava va nga swi pfunaka akuva swi tsrhindzrekela kusuhi na Yehovha. Swidondzro swa Bibele swi nga nyonxa hi ku va kun’we ni vhanu va Xikwembu Nkulukumba lava nga swi pfunaka akuva swi va vanghanu va Yehovha ni lava nga swi pfunaka loko swi langusana ni swikazratu. Hi djula leswaku xidondzro xin’wana ni xin’wana xa Bibele xi titwa na xi li xiyenge xa bandla ni xa ndangu wezru wa moya ni leswaku xi zrandzra ku va ni vamakwezru va ku zrandzreka. Leswo swi ta yentxa swi xi nabyalela ku tsrhika vanghanu lava a xi li navu, lava va kalaka va nga xi pfuni akuva xi zrandzra Yehovha. (Pr 13:20) Loko vanghanu va xone va khale va xi tsrhika, xi ta swi tiva leswaku xi nga kuma vanghanu va ntiyiso a nhlengeletanwini ya Yehovha.—Mr 10:29, 30; 1Pe 4:4.
MINKAMA HINKWAYU KHANELA HI LISIMA DZRA KU TINYIKETELA NI KU BABATISIWA
Xidondzro xa Bibele lexi nyonxelaka xi nga swi kota ku teka magwasu lawa ma vilelekaka akuva xi babatisiwa (Vona mayava 12-13)
12. Ha yini hi fanela ku khanela hi lisima dzra ku tinyiketela ni ku babatisiwa ni xidondzro xezru?
12 Minkama hinkwayu u fanela ku khanela hi lisima dzra ku va mhunu a tinyiketela ka Yehovha a va a babatisiwa. Phela, nkongometo wezru loko hi dondzrisa mhunu Bibele i wa ku mu pfuna akuva a va mudondzrisiwa lweyi a babatisiwiki. Ntsrhaku ka tinwhetinyana, ngopfungopfu loko xi sungule ku hlalela mintlhanganu, xidondzro xa Bibele xi fanela ku twisisa leswaku nkongometo wa kuva hi dondzra Bibele na xone i wa ku xi pfuna akuva xi va mun’we wa Timboni ta Yehovha.
13. Hi yini mintxhumu leyi xidondzro xa Bibele xi fanelaka ku yi yentxa akuva xi babatisiwa?
13 Ku ni mintxhumu ya kukazri leyi xidondzro xa Bibele lexi djulaka ku babatisiwa xi nga yi yentxaka. Wa ku sungula, xidondzro xa Bibele xi fanela ku tiva Yehovha, xi mu zrandzra xi tlhela xi kombisa lipfumelo ka Yene. (Yh 3:16; 17:3) Xidondzro xi fanela ku tlhela xi yaka wuxaka na Yehovha ni ku va ni vanghanu a bandleni. (Hb 10:24, 25; Yk 4:8) Hi wugamu, xi fanela ku tsrhika mahanyela ya ku biha lawa a xi li na wone xi tlhela xi tisola ka swidoho swa xone. (Min 3:19) Nakone lipfumelo ka Yehovha dzri fanela ku xi susumetela ku byela van’wana leswi xi swi dondzraka. (2Ko 4:13) Ntsrhaku ka hinkwaswu leswo, xi tinyiketela ka Yehovha xi va xi kombisa ku tinyiketela koloko hi ku babatisiwa. (1Pe 3:21; 4:2) Nakone ledzro i siku dzra ku nyonxisa swinene ka hinkwavu! Loko xidondzro xa Bibele xi teka gwasu dzrin’wana ni dzrin’wana, xi kulungeli hi mbilu hinkwayu nakone xi kutxe akuva xi tama xi yentxa nhluvuku lowu vilelekaka.
PFANA U KAMBELA NHLUVUKU LOWU XIDONDZRO XA BIBELE XI WU YENTXAKA
14. Xana mudondzrisi a nga kambela hi ndlela yini nhluvuku wa xidondzro xa Bibele?
14 Hi fanela ku lehisa mbilu loko hi pfuna xidondzro xezru xa Bibele akuva xi tinyiketela ka Yehovha xi va xi babatisiwa. Kambe hi fanela ku tlhela hi swi tiva leswaku xa swi djula ku tizrela Yehovha kumbe im-him. Xana xidondzro xa Bibele xa swi kombisa leswaku xa tikazrata akuva xi landzra swileleto swa Yesu? Kumbe xo djula ku kuma wutivi mayelanu ni Bibele ntsena?
15. I yini swi taka komba mudondzrisi leswaku xidondzro xakwe xi lulamele ku babatisiwa kumbe im-him?
15 Tsrhamela ku kambela nhluvuku lowu xidondzro xa Bibele xi wu yentxaka. Hi xikombiso, xana xa khanela hi ndlela leyi xi titwaka ha yone ha Yehovha? Xana xa khongota ka Yehovha? (Ps 116:1, 2) Xana xa swi nyonxela ku dondzra Bibele? (Ps 119:97) Xana xa kumeka a mintlhanganwini vhiki ni vhiki? (Ps 22:22) Xana xi yentxa ku txintxa ka kukazri loko vilelekaka a wuton’wini bya xone? (Ps 119:112) Xana xi sungulile ku bula hi leswi xi swi dondzraka ni maxaka xikan’we ni vanghanu? (Ps 9:1) Xa lisima swinene, xana xa swi djula ku va mun’we wa Timboni ta Yehovha? (Ps 40:8) Loko xidondzro xa Bibele xi nga kombisi nhluvuku ka mintxhumu hinkwayu leyi kombisiwiki lani henhla, hi ndlela ya xitxhavu dzringisa ku gungula leswaku i yini leswi swi xi sivelaka. Hi wugamu, bula na xone hi mhaka ya kone hi ndlela ya lizrandzru kambe na wu nga djikadjiki. *
16. I yini leswi nga kombisaka leswaku hi fanela ku yima ku dondzra ni xidondzro xa kukazri xa Bibele?
16 Pfana u kambela leswaku u nga tama u dondzra Bibele ni mhunu wa kukazri kumbe im-him. Tivutise: ‘Xana xidondzro xanga xa tilulamisela akuva hi ta dondzra? Xana xa swi zrandzra ku ya mintlhanganwini? Xana xa ma tsrhika mahanyela ya ku biha? Xana xi tsrhikile ku ya ka wukhongoti bya xone?’ Loko nhlamulo yi li im-him, ku tama u dondzra na xone a swi ta fana ni ku tama u dondzrisa mhunu ku hlambeta na a nge na nkongometo wa ku hlambeta. Loko xidondzro xa Bibele xi nga kombisi ku tlangela ka ntiyiso hi leswi xi swi dondzraka nakone xi nga djuli ku yentxa ku txintxa, hi fanela ku yima ku dondzra na xone.
17. Hi ku ya hi buku dzra 1 Timoteo 4:16, i yini leswi vadondzrisi hinkwavu va Bibele va fanelaka ku swi yentxa?
17 I swa lisima swinene ka hine ku hetisisa wutiyanguleli byezru bya ku yentxa vadondzrisiwa, nakone hi djula ku pfuna swidondzro swezru swa Bibele akuva swi yentxa nhluvuku ku ko swi babatisiwa. Leswo hi swone swi taka hi pfuna ku tizrisa Bibele loko hi dondzrisa ni ku tlhela hi kombisa leswaku ha swi zrandzra leswi hi swi dondzrisaka nakone ha kholwiseka ha swone. Hi ta kutxa swidondzro swezru akuva swi djula vanghanu a bandleni. Minkama hinkwayu hi ta khanela hi lisima dzra ku tinyiketela ni ku babatisiwa nakone hi ta pfa hi kambela nhluvuku lowu swidondzro swa Bibele swi wu yentxaka. (Vona bokisi ledzri liki “ Leswi Vadondzrisi Va Fanelaka Ku Swi Yentxa Akuva Va Pfuna Swidondzro Swavu Akuva Swi Tlhasela Ku Babatisiwa”.) Hi nyonxa ngopfu hi ku hlengela ka ntizro lowu wa ku huluxa vhanu. Ingiki hi nga yentxa hinkwaswu hi nga swi kotaka akuva hi pfuna swidondzro swezru swa Bibele akuva swi lulamela ku babatisiwa.
LISIMU 79 Dondzrisa Tihamba Kuva Ti Tiya
^ par. 5 Yehovha a hi hanane nyiko ya lisima ya ku pfuna swidondzro swezru swa Bibele akuva swi dondzra ku pimisa ni ku yentxa mintxhumu hi ndlela leyi yene a yi djulaka. Nhlokomhaka leyi yi ta hi tlhamuxela leswi yengetelekiki mayelanu ni ndlela leyi hi nga yampswisaka madondzrisela yezru ha yone.
^ par. 4 Vona nhlokomhaka leyi liki “Papalata Mintlhamu Leyi Loko U Ri Karhi U Fambisa Dyondzo Ya Bibele” ka xibukwana xa Mahanyelo Ni Ntirho Wa Hina Wo Chumayela xa Setembru wa 2016.
^ par. 8 Yana ka MALUNGHANA NA HINA > MINTOKOTO.
^ par. 9 Ka JW Library®, yana ka MÍDIAS > NOSSAS REUNIÕES E OBRA DE PREGAÇÃO > AJUDAS PARA PREGAÇÃO.
^ par. 15 Vona nhlokomhaka leyi liki “Lizrandzru Ni Ku Tlangela Yehovha Swi Hi Susumetela Ku Babatisiwa” ni leyi liki “Xana U Lungile Akuva U Babatisiwa?” ka Xihondzro Xa Ku Zrindzra xa Marsu wa 2020.
^ par. 77 MINTLHAMUXELO YA SWIFANISO: Ntsrhaku ka loko va fambise xidondzro xa Bibele, makwezru wa xisati lweyi a nga ni wuswikoti a pfuna makwezru lweyi a a li ku fambiseni ka xidondzro ku vona leswi a nga swi yentxaka akuva a nga khaneli ku tlula mpimu loko a fambisa xidondzro xa Bibele.
^ par. 79 MINTLHAMUXELO YA SWIFANISO: Xidondzro xa Bibele xi dondzraka ndlela leyi xi nga vaka nsati lwenene ha yone. Ntsrhaku, xi bula ni nuna wa xone hi leswi xi swi dondzriki.
^ par. 81 MINTLHAMUXELO YA SWIFANISO: Xidondzro xa Bibele xikan’we ni nuna wa xone va tihungatelaka na va nyonxile a kaya ka munghanu lweyi xi mu kumiki a bandleni.
