1. He xini xiboho xa lisima swinene ku tlula hinkwaswu lexi mhunu a nga xi tekaka?

HAKANYINGI, swiboho leswi vapswali va swi tekaka swi khumba vanavu hi nkama wa ku leha. Loko vapswali va teka swiboho leswi ngeke swa wutlhazri, va nga tisela vanavu swikazratu. Kambe loko va teka swiboho hi wutlhazri, va ta pfuna vanavu akuva va va ni ku nyonxa wuton’wini. I ntiyiso ka leswaku na vone vana va fanela ku teka swiboho leswinene. Xiboho xa lisima swinene ku tlula hinkwaswu lexi mhunu a nga xi tekaka, i xa ku tizrela Yehovha, Tatana wezru wa le tilweni lwa nga ni lizrandzru, Yehovha.​—Ps 73:28.

2. He swini swiboho leswinene leswi Yesu xikan’we ni vapswali vakwe va swi tekiki?

² Vapswali va Yesu a va tiyimisele ku pfuna vanavu akuva va tizrela Yehovha, nakone swiboho leswi va swi tekiki, swi kombe leswaku ku tizrela Yehovha afa a li ntxhumu wa lisima ku tlula hinkwayu a wuton’wini byavu. (Lk 2:40, 41, 52) Yesu na yene a teke swiboho leswinene leswi mu pfuniki akuva a hetisisa ku zrandzra ka Yehovha. (Mt 4:1-10) Yesu a ve wanuna lwa nga ni wumbilu, lweyi a a dumbeka nakone a a ni xixixi​—ku nga muxaka wa n’wana lweyi mupswali mun’wana ni mun’wana lweyi a zrandzraka Yehovha a a ta nyonxa hi ku va na yene.

3. He swini swivutiso leswi hi taka swi hlamula ka nhlokomhaka leyi?

³ Ka nhlokomhaka leyi hi ta kambisisa swivutiso leswi landzrelaka: He swini swiboho leswinene leswi Yehovha a swi tekiki mayelanu na Yesu? I yini leswi vapswali lava nga vakriste va nga swi dondzraka ka swiboho leswi vapswali va Yesu va swi tekiki? Nakone vampswha lava nga vakriste va nga dondzra yini ka xikombiso xa Yesu a mhakeni ya ku teka swiboho?

4. He xini xiboho xa lisima lexi Yehovha a xi tekiki mayelanu ni N’wanakwe?

⁴ Yehovha a hlawulele Yesu vapswali lavanene. (Mt 1:18-23; Lk 1:26-38) Mazritu ya Mariya lama sukelaka mbilwini lama tsraliwiki a Bibeleni, ma kombisa lizrandzru ledzrikulu ledzri a a li na dzrone hi Zritu dzra Yehovha. (Lk 1:46-55) Nakone ndlela leyi Yosefa a yanguliki ha yone loko a kongomisiwa hi Yehovha, yi kombisa leswaku a a txhava Xikwembu Nkulukumba nakone a a djula ku mu nyonxisa.​—Mt 1:24.

5-6. I yini leswi Yehovha a kalaka a nga swi sivelanga akuva N’wanakwe a kumana na swone?

⁵ Xiya leswaku Yehovha a nga hlawulelanga Yesu vapswali lava a va ganyile. Xitlhavelo lexi Yosefa na Mariya va xi nyikeliki ntsrhaku ka loko Yesu a pswaliwile, xi kombisa leswaku a va li swisiwana. (Lk 2:24) Swi nga yentxeka Yosefa a a ni xiyindlwana xa kukazri kusuhi ni kaya kwakwe a Nazareta lexi a a yentxela ka xone ntizro wa wuvatli. Swi tikomba a va nge na mali kumbe mintxhumu yinyingi, ngopfungopfu leswi va gamiki va va ni 7 wa vana kumbe ku tlula.​—Mt 13:55, 56.

⁶ Yehovha a sizrelele Yesu ka makhombo ya kukazri, kambe a nga mu sizrelelanga ka swikazratu hinkwaswu. (Mt 2:13-15) Hi xikombiso, Yesu a a ni maxaka lawa a ma nga li vapfumeli. Yanakanya hi ndlela leyi a vavisekiki ha yone loko swizro swa ndangu wakwe a ku sunguleni swi yalile leswaku yene a a li Mesiya. (Mr 3:21; Yh 7:5) Swi tikomba na Yosefa a fe na Yesu a ha li mumpswha nakone leswo swi mu khumbe ngopfu swinene. Loko Yosefa a file, Yesu swanga mativula, a sindzriseke ku tizra akuva a wundla ndangu. (Mr 6:3) Loko Yesu a ya a kula, a dondzre ndlela ya ku hlayisa ndangu wakwe. Swi tikomba a a fanela ku tizra ngopfu akuva a wu hlayisa. Xileswo, a a swi tiva ha hombe leswi tlhamuxelaka swone kuva mhunu a titwa na a kazralile ntsrhaku ka ku tizra siku hinkwadzru.

7. a) Xana vatekani lava djulaka ku va ni vana va fanela ku tivutisa yini? b) Xana a buku dzra Amaproverbia 2:1-6 dzri nga va pfunisa kuyini vapswali akuva va dondzrisa vanavu?

⁷ Loko mi li vatekani nakone mi kunguhata ku va ni vana, tivutisani leswi: ‘Xana hi vhanu lava titsrongahataka, lava zrandzraka Yehovha ni Zritu dzrakwe? Xana Yehovha a a ta hi hlawula akuva va hlayisa wutomi bya lisima bya n’wana lwa taka pswaliwa?’ (Ps 127:3, 4) Loko u li mupswali, tivutise: ‘Xana na va dondzrisa vananga lisima dzra ku tizra hi ku tikazrata?’ (Ekl 3:12, 13) ‘Xana ni yentxa hinkwaswu leswi ni nga swi kotaka akuva ni sizrelela vananga ka  mintxhumu ya ku biha leyi va nga kumanaka na yone ka misava ya Sathana?’ (Pr 22:3) A wu nge swi koti ku sizrelela vanaku ka swikazratu hinkwaswu leswi va nga ha kumanaka na swone. A swi koteki ku yentxa leswo. Kambe u nga swi kota ku va lulamisela ku langusana ni swikazratu swa wutomi hi ku tama u va dondzrisa hi lizrandzru ndlela leyi ha yone va nga djulaka mpfunu wa Bibele. (Dondzra Amaproverbia 2:1-6.) Hi xikombiso, loko mun’we ka maxaka yenu a tsrhika ku tizrela Yehovha, pfuna vanaku ku tizrisa Bibele akuva va vona lisima dzra kuva mhunu a tama a tizrela Yehovha hi ku dumbeka. (Ps 31:23) Loko mhunu wa kukazri lweyi mi mu zrandzraka a fa, komba vanaku ndlela leyi va nga tizrisaka Zritu dzra Xikwembu Nkulukumba ha yone akuva va tiyiselela ku vaviseka ni ku va va kuma ku zrula.​—2Ko 1:3, 4; 2Tm 3:16.

8. Hi ku ya hi Deuteronoma 6:6, 7, i yini leswi Yosefa na Mariya a va fanela ku swi yentxa?

⁸ Yosefa na Mariya va pfune Yesu akuva a tama a nyonxisa Xikwembu Nkulukumba nambiloko a kulile. Vone a va landzra nkongomiso lowu Yehovha a wu nyikaka vapswali. (Dondzra Deuteronoma 6:6, 7.) Yosefa na Mariya a va mu zrandzra ngopfu Yehovha nakone nkongometo wavu lowukulu a ku li ku pfuna vanavu akuva va txutxela lizrandzru ledzri fanaka ha yene.

9. He swini swiboho swa lisima leswi Yosefa na Mariya va swi tekiki?

⁹ Yosefa na Mariya va hlawule ku gandzrela Yehovha minkama hinkwayu kun’we ni vanavu. Handle ka ku ganaganeka, vhiki ni vhiki a va ya a mintlhanganwini a sinagogeni dzra le Nazareta nakone lembe ni lembe a va famba va ya tlangela Paska a Yerusalema. (Lk 2:41; 4:16) Va nga ha va va tizrise minkama leyo ya ku yendzra akuva va dondzrisa Yesu kun’we ni vamakwavu leswi yentxekeliki vhanu va Yehovha khale. Nakone swi nga yentxeka nkama lowu a va yendzra a va pfuxela mimbangu leyi ku khaneliwaka ha yone a Matsralweni. Loko va ye va kuma vana vambeni, swi nga yentxeka swi nga va nabyalelanga ku tama va gandzrela Yehovha minkama hinkwayu. Kambe va tovokisiwile hi ku tama va yentxa leswo! Leswi a va zrangisa wugandzreli bya Yehovha, ndangu wavu wu tame wu hlayiseka hi tlhelo dzra moya.

10. I yini leswi vapswali lava va nga vakriste va nga swi dondzraka ka xikombiso xa Yosefa na Mariya?

¹⁰ I yini leswi vapswali lava zrandzraka Yehovha va swi dondzraka ka xikombiso xa Yosefa  na Mariya? Komba vanaku leswaku wa mu zrandzra swinene Yehovha hi mazritu ni hi swiyentxo, leswo i ntxhumu wa lisima swinene. Tiva leswaku ntxhumu wa lisima lowu u nga wu yentxelaka vanaku i ku va pfuna leswaku va zrandzra Yehovha. Nakone ntxhumu wun’we lowu u nga va dondzrisaka wone i ndlela leyi ha yone va nga kotaka ku dondzra Bibele siku ni siku, ku khongota, ku ya mintlhanganwini ni ku hlengela a ku zrezreni. (1Tm 6:6) I ntiyiso leswaku u fanela ku nyika vanaku mintxhumu leyi va yi vilelaka hi tlhelo dzra nyama. (1Tm 5:8) Dzrimuka leswaku leswi swi taka va pfuna akuva va huluka loko ku tlhasa wugamu bya xiyimu lexi xa mintxhumu ni ku va pfuna ku nhingena a misaveni leyimpswha, i wuxaka lebyi va taka va na byone na Yehovha ku nga li mintxhumu leyi vonekaka. *​—Ezk 7:19; 1Tm 4:8.

11. a) Xana xilayu lexi nga 1 Timoteo 6:17-19 xi ta va pfuna hi ndlela yini vapswali akuva va teka swiboho leswinene loko va kulisa vanavu? b) He wani makungu lawa ndangu waku wu nga tibekelaka wone nakone matovoko ya kone ma tava wani? (Vona bokisi ledzri liki “ Makungu Lawa U Nga Tibekelaka Wone”.)

¹¹ Swi nyonxisa ngopfu swinene ku vona vapswali lava va nga vakriste na va teka swiboho leswinene leswaku va pfuna vanavu akuva va tama va va kusuhi na Yehovha! Minkama hinkwayu va gandzrela Yehovha kun’we ni vanavu. Vone va famba ni vanavu ka mintlhanganu ya bandla ni ka tinhlengeletanu letikulu. Nakone va hlengela a ku zrezreni ka madzrungula lamanene. Mindangu yin’wana yi patsra ni ku ya zrezra ka nsimu leyi nga tizriwiki ngopfu. Van’wana va yendzrela Betele kumbe ku pfunisa a ku yakeni ka tiyindlu leti tizrisiwaka hi nhlengeletanu. Mindangu leyi hlawulaka ku yentxa mintizro leyo yi tizrisa mali ya yone akuva yi kota ku yi yentxa nakone swi nga ha va kazratela. Kambe Yehovha a ta va tovokisa ngopfu swinene hi ku va va yentxa leswo. (Dondzra 1 Timoteo 6:17-19.) Vana lava kulaka ka mindangu yoleyo va tama va yentxa leswinene ni loko va kulile nakone va nyonxa hi leswi vapswali va va kulisiki hi ndlela leyo! *​—Pr 10:22.

12. I yini leswi Yesu a a fanela ku swi yentxa loko a kulile?

¹² Tatana wa Yesu wa le matilweni minkama hinkwayu a teke swiboho leswinene, nakone vapswali vakwe va lani misaveni na vone va teke swiboho hi wutlhazri. Nambitanu, loko Yesu a kulile a a fanela ku titekela swiboho swakwe. (Ga 6:5) Ku fana na hine, Yesu a a ni ntsrhunxeko wa ku tihlawulela. Loko a e swi djula a a ta zrangisa ku navela kwakwe. A matsrhan’wini ya leswo, a hlawule ku tama a va ni wuxaka lebyinene na Yehovha. (Yh 8:29) Xana xikombiso xakwe xi nga va pfuna hi ndlela yini vampswha namunhla?

13. Hi wini ntxhumu wa lisima lowu Yesu a hlawuliki ku wu yentxa na e he ntsrongo?

 ¹³ Loko Yesu a ha li ntsrongo a hlawule ku yingiseta vapswali vakwe. A nga samanga a yala nkongomiso wavu hi ku pimisa leswaku a a tiva swinyingi ku va tlula. A matsrhan’wini ya leswo, a ‘a hamba a va yingiseta’. (Lk 2:51) Yesu a a li n’wana wa mativula, leswi tlhamuxelaka leswaku a a ni wutiyanguleli bya kukazri nakone yene a yentxe hinkwaswu akuva a kota ku byi hetisisa ha hombe. Yene a tikazrate ngopfu akuva a dondzra ntizro wa wuvatli ka tatana wakwe Yosefa akuva a kota ku pfunisa ndangu wakwe ka leswi a swi vileleka.

14. Hi swi tivisa kuyini leswaku Yesu a a li mudondzri lwenene wa Zritu dzra Xikwembu Nkulukumba?

¹⁴ Swi tikomba na vapswali va Yesu va mu dzrungulele ndlela ya ku hlamalisa leyi a pswaliwiki ha yone ni leswi tintsrumi ta Xikwembu ti swi hlayiki mayelanu na yene. (Lk 2:8-19, 25-38) Kambe Yesu a nga gamelanga ntsena ka leswi vapswali vakwe va nga mu byela swone, yene a tlhele a dondzra Matsralwa ha byakwe. Hi swi tivisa kuyini leswaku Yesu a ve mudondzri lwenene wa Zritu dzra Xikwembu Nkulukumba? Na e he ntsrongo vadondzrisi va nawu a Yerusalema a va ‘hlolelwa kumbe ku hlamala hi ku yingelisisa kwakwe ni hi ku yangula kwakwe’. (Lk 2:46, 47) Nakone na a ni 12 wa malembe ntsena, Yesu kutani a a tikholwisile ha byakwe leswaku Yehovha a a li Tatana wakwe.​—Lk 2:42, 43, 49.

15. Xana Yesu a swi kombise hi ndlela yini leswaku a hlawule ku yentxa ku zrandzra ka Yehovha?

¹⁵ Loko Yesu a dondzre leswi Yehovha a a djula leswaku a swi yentxa, yene a hlawule ku yentxa ntizro lowu Yehovha a a mu nyike wone. (Yh 6:38) A a swi tiva leswaku vhanu vanyingi a va ta mu venga. Nambi leswi a a nga djuli ku vengiwa, yene a hlawule ku tama a yingiseta Yehovha. Loko a Yesu a babatisiwile hi 29 a Nguveni Yezru (N.Y.), ntxhumu wa lisima a wuton’wini byakwe a ku li ku yentxa ku zrandzra ka Yehovha. (Hb 10:5-7) Nakone loko a li kusuhi ni ku fa a mhandzrini ya nxaniso, Yesu a tame a tiyimisela ku yentxa ku zrandzra ka Tatana wakwe.​—Yh 19:30.

16. Hi wini ntxhumu lowu vana va nga wu dondzraka ka xikombiso xa Yesu?

¹⁶ Yingiseta vapswali vaku. Ku fana na Yosefa na Mariya vapswali vaku a va hetisekanga. Nambitanu Yehovha a va nyike wutiyanguleli bya ku ku sizrelela ni ku ku dondzrisa. Loko u yingiseta swilayu swavu ni ku hlonipha nkongomiso wavu u ta va ni ‘ndjombo’ a wuton’wini byaku.​—Ef 6:1-4.

17. Hi ku ya hi Yehošua 24:15, hi xini xiboho lexi vampswha va fanelaka ku titekela xone?

 ¹⁷ Hlawula leswaku u ta tizrela mani. U fanela ku kambisisa ha byaku leswaku Yehovha hi mani, leswaku hi kwini ku zrandzra kwakwe ni leswaku u nga ku yentxa hi ndlela yini a wuton’wini byaku. (Ro 12:2) Loko u yentxa leswo u ta swi kota ku teka xiboho xa lisima a wuton’wini byaku ku nga ku tizrela Yehovha. (Dondzra Yehošua 24:15; Ekl 12:1) Loko u tihambela xiyimiso lexinene xa ku dondzra Bibele siku ni siku u va u xi landzrela, lizrandzru dzraku ha Yehovha dzri ta ya dzri kula na dzrone lipfumelo dzraku dzri ta ya dzri tiya.

18. Hi xini xiboho lexi vampswha va fanelaka ku xi teka, nakone ma ta va wani mabindzru ya kone?

¹⁸ Hlawula ku zrangisa ku zrandzra ka Yehovha a wuton’wini byaku. Misava ya Sathana yi hlaya leswaku loko u tizrisa wuswikoti byaku akuva u tipfuna u ta va ni ku nyonxa. Kambe hi ntiyiso wa kone, lava hlawulaka ku djuletela mintxhumu leyi vonekaka ‘va titlhava hi mahlomulo lamanyingi’. (1Tm 6:9, 10) Hi tlhelo dzrin’wana, loko u hlawula ku yingiseta Yehovha ni ku zrangisa ku zrandzra kwakwe a wuton’wini byaku u ta va ni wutomi lebyi nyonxisaka nakone ‘u ta famba hi wutlhazri’.​—Yš 1:8.

19. Xana i yini leswi vapswali va fanelaka ku swi dzrimuka?

¹⁹ Vapswali, yentxani hinkwaswu leswi mi nga swi kotaka akuva mi pfuna vanenu ku tizrela Yehovha. Tsrutsrumelani ka yene nakone yene a ta mi pfuna akuva mi teka swiboho hi wutlhazri. (Pr 3:5, 6) Dzrimukani leswaku vanenu va ta khumbiwa ngopfu hi leswi mi swi yentxaka ku tlula leswi mi swi hlayaka. Xileswo, tekani swiboho leswi swi taka va pfuna akuva va yamukeleka ka Yehovha.

20. Hi wani matovoko lawa vampswha va taka ma kuma loko va hlawula ku tizrela Yehovha?

²⁰ Vampswha, vapswali venu va nga mi pfuna akuva mi teka swiboho a wuton’wini. Kambe mi fanela ku teka swiboho leswo akuva mi nyonxisa Xikwembu Nkulukumba. Xileswo, yetiselani Yesu nakone hlawulani ku tizrela Tatana wenu wa le tilweni lweyi a nga ni lizrandzu. Loko mi yentxa leswo mi ta va ni wutomi lebyi nga ni nkongometo ni lebyi nyonxisaka swoswi. (1Tm 4:16) Nakone a nkameni lowu taka mi ta va ni wutomi lebyi nyonxisaka hi ku tlulisa!