1. I yini leswi vakriste lava babatisiwiki va fanelaka ku tama va swi yentxa?

XANA u babatisiwile? Loko swi li tanu, u swi kombise mahlweni ka vhanu leswaku u ni lipfumelo ka Yehovha ni leswaku u tiyimiseli ku tama u fambisana ni nhlengeletanu yakwe. * Nakunene, u fanela ku tama u kulisa lipfumelo dzraku ka Yehovha u tlhela u tiyisa lipfumelo dzraku ka leswaku Yehovha a tizrisa nhlengeletanu yakwe namunhla.

2-3. Xana ndlela leyi Yehovha a kongomisaka nhlengeletanu yakwe ha yone yi kombisa yini? Nyikela swikombiso.

² Ndlela leyi Yehovha a kongomisaka nhlengeletanu yakwe ha yone namunhla yi kombisa wumhunu byakwe, nkongometo wakwe ni milawu yakwe. A hi kambisiseni matsrhamela mazrazru ya Yehovha lawa ma vonekaka a nhlengeletanwini yakwe.

³ Dzra ku sungula, ‘Xikwembu Nkulukumba a nga langusi wuso’. (Min 10:34) Lizrandzru dzri susumetele Yehovha akuva a nyikela N’wanakwe leswaku a va xitizrulo hi nkonta ya hinkwavu. (1Tm 2:6; Yh 3:16) Yehovha a tizrisa vhanu vakwe akuva va zrezra madzrungula lamanene ka hinkwavu lava djulaka ku yingiseta. Hi ndlela leyo, a pfuna vhanu vanyingi lava djulaka ku pfuneka hi xitizrulo. Dzra wubidzri, Yehovha i Xikwembu Nkulukumba wa ku hleleka ni wa ku zrula. (1Ko 14:33, 40) Xileswo, hi yimela leswaku vagandzreli vakwe va va ntlawa lowu hlelekiki ni wa ku zrula. Dzra wuzrazru, Yehovha i “Mudondzrisi Lwenkulu”. (Eza 30:20, 21, Tradução do Novo Mundo, TNM) Xileswo, nhlengeletanu yakwe yi tikazrata ngopfu akuva yi dondzrisa Zritu dzrakwe a bandleni ni le nsin’wini. Xana matsrhamela lawa ya mazrazru ya Yehovha ma vonekise kuyini a bandleni dzra wukriste a dzaneni dzra ku sungula? Xana matsrhamela wolawo ma vonekisa kuyini a masikwini yezru? Nakone moya wa ku xwenga wu nga ku pfunisa kuyini akuva u tama u fambisana ni nhlengeletanu ya Yehovha namunhla?

4. Hi ku ya hi Amintiṛo 1:8, Yesu a lelete valandzreli vakwe leswaku va yentxa yini, nakone hi wini mpfunu lowu a va ta wu yamukela?

⁴ A dzaneni dzra ku sungula. Dzrungula ledzri Yesu a dzri zrezriki dzri nyikele dumbo ka vhanu hinkwavu. (Lk 4:43) A lelete valandzreli vakwe kuva va yisa mahlweni ntizro lowu a wu sunguliki, wa ku nyikela wumboni ku ya ‘tlhasa a wugan’wini bya misava’. (Dondzra Amintiṛo 1:8.) Nakunene, a va nge na ku swi kota ku yentxa ntizro lowu hi ntamu wavu. A va ta vilela moya wa ku xwenga​—ku nga “mupfunisi” lweyi Yesu a va dumbisiki yene.​—Yh 14:26, TNM; Zk 4:6.

5-6. Xana moya wa ku xwenga wu pfune valandzreli va Yesu hi ndlela yini?

⁵ Valandzreli va Yesu va yamukele moya wa ku xwenga hi Pentekoxta dzra 33 a Nguveni Yezru (N.Y.). Hi ku pfuniwa hi moya wolowo, va tekele ku sungula ku zrezra nakone hi nkama wutsrongo magidigidi ya vhanu va yamukele madzrungula lamanene. (Min 2:41; 4:4) Loko nxanisa wu sungulile, vadondzrisiwa a va zruzrumelanga kambe va dumbe mpfunu wa Xikwembu Nkulukumba. Va khongote va ku: ‘Nyika malandzra yaku ku dondzrisa Zritu dzraku hi ku tiya hinkwaku.’ Va game va tala hi moya wa ku xwenga va hlaya Zritu dzra Xikwembu Nkulukumba hi ku tiya.​—Min 4:18-20, 29, 31.

⁶ Vadondzrisiwa va Yesu va langutane ni swikazratu swimbeni. Hi xikombiso, a nkameni wavu a ku nge na makopiya manyingi ya Matsralwa. A va nge na mabuku ya ku tlhamuxela Matsralwa lawa hi nga na wone namunhla. Nakone a va fanela ku zrezrela vhanu lava a va khanela tindzrimi tinyingi. Nambi loko va langutane ni swikazratu hinkwaswu leswo, vadondzrisiwa lavo lava hisekaka, hi 30 wa malembe ntsena va yentxe leswi a swi voneka ingiki a swi nge na ku koteka. Va zrezre madzrungula lamanene ‘ku swivumbiwa hinkwaswu leswi nga hansi ka tilu’.​—Kl 1:6, 23.

7. Ka malembe ya dzana lama khalutiki, i yini leswi pfuniki malandzra ya Yehovha ku tiva leswi a a swi yimela ka wone, nakone ma yentxe yini?

⁷ A masikwini yezru. Yehovha a tama a kongomisa ni ku tiyisa vhanu vakwe. Nakunene, hakanyingi a nyikela nkongomiso ka vhanu vakwe hi ku tizrisa Zritu dzrakwe ledzri huhuteliwiki. A Bibeleni hi dondzra mayelanu ni wutizreli bya Yesu ni xileleto lexi a xi nyikiki valandzreli vakwe xa ku yentxa ntizro lowu a wu sunguliki. (Mt 28:19, 20) Xihondzro Xa Ku Zrindzra xa Julhu wa 1881 (hi xinghiza) xi hlaye leswi: “A hi vitaniwanga kumbe ku totiwa akuva hi dzrumisiwa hi vhanu kumbe akuva hi kuma lifuyu. Kambe leswaku hi tizrisa hinkwaswu leswi hi nga naswu ni ku zrezra madzrungula lamanene.” Xibukwana lexi liki To Whom the Work Is Entrusted (Lweyi A Tamelisiwiki Ntizro), lexi humexiwiki hi 1919, xi te: “A ntizro wu tikomba na wu li wukulu, kambe i wa Hosi nakone yene a ta hi nyika ntamu akuva hi wu yentxa.” Ina, ku fana ni vakriste va le dzaneni dzra ku sungula, vakriste lava hi xixixi va tizre hi ntamu hinkwawu, hikusa a va dumba leswaku moya wa ku xwenga a wu tava pfuna akuva va zrezrela vhanu va tinxaka hinkwatu. Na hine namunhla ha ha tama hi va ni ku dumba loku fanaka.

8-9. Hi wani mayentxela lawa nhlengeletanu ya Yehovha yi ma tizrisiki akuva yi hangalasa madzrungula lamanene?

⁸ Nhlengeletanu ya Yehovha yi tizrisa switizro leswinene leswi nga kone akuva yi hangalasa madzrungula lamanene. Switizro leswo swi patsra mabuku lama gandlisiwiki, Fotodrama da Criação, ma-fonógrafo, mimovha leyi nga ni swa ku humexa mpfumawulo, wuhaxi bya radiyu nakone swoswinyana yi tizrisa makomputadori ni internet. Nakone yi ndzrulutela madzrungula hi tindzrimi tinyingi swinene hi ndlela leyi nga samikiki yi yentxiwa. Ha yini yi yentxa leswo? Akuva vhanu va tinxaka hinkwatu va kota ku yingela madzrungula lamanene hi tindzrimi tavu. Yehovha a nga langusi wuso kumbe a nga na xihlawuhlawu. Yene a profete leswaku madzrungula lamanene a ma ta zrezriwa ku ‘hinkwawu matiko, ni tinxaka,  ni tindzrimi ni tintsrhundzru’. (Mpf 14:6, 7) Yene a djula leswaku dzrungula dzra Mfumu dzri zrezriwa ka vhanu hinkwavu.

⁹ Swi li yini hi vhanu lava tsrhamaka ka miti leyi swi nga kotekiki ku nhingena ka yone? Kumbexana hi leswi miti yavu yi nga ni valaveleli kumbe yi tsrhamaka na yi khiyiwile? Akuva hi kota ku zrezrela vhanu volavo, Yehovha a pfune nhlengeletanu yakwe akuva yi sungula ku tizrisa mayentxela ya ku siyanasiyana ya ku zrezra a mimbangwini ya mani na mani. Hi xikombiso, hi 2001, Huvo leyi Zrangelaka yi pfumelele vamakwezru va le França leswaku va sungula ku tizrisa swikarinyana swa mabuku ni tindlela tin’wana ta ku kombisa mabuku yezru nakone leswo swi tise mihandzru leyinene. Hi 2011, yentxela ledzrimpswha dzri sungule ku tizrisiwa a Estados Unidos, a doropeni dzra Nova Iorque, ka mimbangu leyi ku nga ni vhanu vanyingi ngopfu swinene. Ndzreni ka lembe dzra ku sungula ku nyikeliwe 102.129 wa mabuku ni 68.911 wa marevhixta. Nakone 4.701 wa vhanu va kombele ku fambiseliwa xidondzro xa Bibele. Swi livaleni leswaku Yehovha a tizrise moya wakwe wa ku xwenga akuva a kongomisa ntizro lowo. Xileswo, a Huvo leyi Zrangelaka yi pfumelele leswaku mayentxela lawo ya ku kombisa mabuku ma tizrisiwa a misaveni hinkwayu.

10. I yini leswi hi nga swi yentxaka akuva hi yampswisa ndlela leyi hi zrezraka ha yone?

¹⁰ Leswi u nga swi yentxaka. A mintlhanganwini ya wukriste, Yehovha a hi dondzrisa tindlela ta ku zrezra ha tone. Tizrisa leswi u swi dondzraka ka yone. Minkama hinkwayu, tizrisana ni ntlawa waku wa nsimu. Vamakwezru va ntlawa waku va nga ku pfuna ku yampswisa ndlela leyi u zrezraka ha yone. Nakone va nga ku kutxa hi xikombiso xavu lexinene. Tama u zrezra nambi loko u kumana ni swikazratu. Hi lani tsralwa dzra nhlokomhaka leyi dzri hi dzrimuxaka ha kone, hi kota ku hetisisa ku zrandzra ka Xikwembu Nkulukumba ku nga li hi ntamu wezru, kambe hi ku pfuniwa hi moya wa ku xwenga. (Zk 4:6) Phela, hi le ku yentxeni ka ntizro wa Xikwembu Nkulukumba.

11. Xana Huvo leyi Zrangelaka a dzaneni dzra ku sungula yi tizre hi xikan’we hi ndlela yini akuva yi hlayisa nhleleko a xikazri ka vhanu va Xikwembu Nkulukumba?

¹¹ A dzaneni dzra ku sungula. A Yerusalema, a Huvo leyi Zrangelaka yi tizre xikan’we akuva yi yentxa leswaku ku va ni nhleleko ni ku zrula a xikazri ka vhanu va Xikwembu Nkulukumba. (Min 2:42) Hi xikombiso, nkama lowu vakriste va sunguliki  ku va ni mavonela lama hambaniki a mhakeni ya ku soka hi lembe dzra 49 N.Y., Huvo leyi Zrangelaka yi kambisise mhaka leyo na yi kongomisiwa hi moya wa ku xwenga. Loko a ku yavana loko a ke tama ku va kone a bandleni, leswo a swi ta yentxa leswaku a ntizro wa ku zrezra wu nga yentxiwi hi ndlela leyi a wu fanela ku yentxiwa ha yone. Nambi leswi a va li va-Yuda, vapostola xikan’we ni vakulu a va kutxeteliwanga hi tindondzro ta va-Yuda kumbe hi lava a va seketela tindondzro leto. A matsrhan’wini ya leswo, va kambisise Zritu dzra Xikwembu Nkulukumba nakone va kombele nkongomiso wa moya wa ku xwenga akuva wu va pfuna ku teka xiboho lexinene. (Min 15:1, 2, 5-20, 28) Ma ve wani mabindzru ya kone? Yehovha a tovokise xiboho xavu nakone bandla dzri tame dzri va ni ku zrula ni wumun’we. Nakone va tame va hangalasa madzrungula lamanene.​—Min 15:30, 31; 16:4, 5.

12. I yini leswi kombisaka leswaku nhlengeletanu ya Yehovha yi hlelekile nakone yi ni ku zrula namunhla?

¹² A masikwini yezru. Nhlengeletanu ya Yehovha yi tizre akuva yi hlayisa ku hleleka ni ku zrula a xikazri ka vhanu va Yehovha. Hi 15 ka Novhembru wa 1895, a revhixta dzra A Torre de Vigia de Sião e Arauto da Presença de Cristo a dzri ni nhlokomhaka leyi liki: “Decentemente e em Ordem” (Hi Mfanelo Ni Hi Nawu), leyi a yi seketeliwa ka buku dzra 1 Ba-le-Korinte 14:40. Nhlokomhaka leyo a yi ku: “Vapostola va tsralele bandla dzra ku sungula mintxhumu yinyingi mayelanu ni ku hleleka . . . I swa lisima ku va hi yingiseta ha hombe ‘leswi nga tsraliwa khale, swi tsraliwela ku hi dondzrisa.’” (Ro 15:4) A nhlengeletanu ya Yehovha namunhla yi tizra hi ku tikazrata akuva yi hlayisa ku hleleka ni ku zrula a bandleni dzra wukriste hi lani a swi yentxeka ha kone ka vakriste va ku sungula. Hi xikombiso, loko u ya hlalela Xidondzro xa Xihondzro Xa Ku Zrindzra ka bandla dzrin’wana kumbe a tikweni dzrin’wana, wa swi tiva leswaku a xidondzro xi ta fambisiwa kuyini ni leswaku hi yini nhlokomhaka leyi taka dondzriwa. U hatla u titwa na wu li kaya. Ko va ntsena moya wa Xikwembu Nkulukumba lowu nga kotaka ku yentxa leswaku ku va ni wumun’we byolebyo.​—Tsf 3:9.

13. Na u yanakanya hi buku dzra Yakob 3:17, hi swini swivutiso leswi u fanelaka ku tihamba swone?

¹³ Leswi u nga swi yentxaka. Yehovha a djula leswaku vhanu vakwe va ‘bekisa wumun’we bya moya hi pindzra dzra ku zrula’. (Ef 4:1-3) Xileswo, tivutise: ‘Xana na pfunisa leswaku ku va ni ku zrula ni wumun’we a bandleni? Xana na va yingiseta lava nga ni wutiyanguleli? Xana van’wana va nga dumba ku yamukela mpfunu  wanga, ngopfungopfu loko ni ni wutiyanguleli a bandleni? Xana ni tiyimisele ku tizrela vamakwezru ni ku va pfuna hi nkama lowu va vilelaka mpfunu?’ (Dondzra Yakob 3:17.) Loko ku ni lomu u fanelaka ku yampswisa kone, khongota u kombela mpfunu wa Yehovha. Loko u ya u pfumelela moya wa ku xwenga leswaku wu ku pfuna ku yampswisa wumhunu byaku ni swiyentxo swaku, vamakwezru va ta ya va ku zrandzra nakone va ta tlangela hinkwaswu leswi u swi yentxaka a bandleni.

14. Hi ku ya hi Ba-le-Kolosa 1:9, 10, xana Yehovha a va dondzrise hi ndlela yini vhanu vakwe a dzaneni dzra ku sungula?

¹⁴ A dzaneni dzra ku sungula. Yehovha awa swi zrandzra ku dondzrisa vhanu vakwe. (Ps 32:8) Yene a djula leswaku va mu tiva, va mu zrandzra ni ku va va hanya hi lani ku nga helikiki swanga vana vakwe lava zrandzrekaka. Loko Yehovha a o kala a nga hi dondzrisi, hinkwaswu leswo a swi nge ti yentxeka. (Yh 17:3) Yehovha a tizrise bandla dzra wukriste dzra le dzaneni dzra ku sungula leswaku a dondzrisa vhanu vakwe. (Dondzra Ba-le-Kolosa 1:9, 10.) Moya wa ku xwenga, ku nga “mupfunisi” lweyi Yesu a va dumbisiki yene, wu va pfunile vadondzrisiwa lavo. (Yh 14:16, TNM) Wone wu pfune vadondzrisiwa lavo akuva va twisisa Zritu dzra Xikwembu Nkulukumba wu tlhela wu va dzrimuxa mintxhumu hinkwayu leyi Yesu a yi hlayiki ni ku yi yentxa, leyi hi ku famba ka nkama a va ta yi dondzra ka mabuku ya Evhangeli. Wutivi lebyo byi tiyisi lipfumelo dzra vakriste va ku sungula ni lizrandzru dzravu ha Yehovha, hi N’wanakwe ni hi mun’wana ni mun’wana wavu.

15. Xana u swi vonisa kuyini leswaku Yehovha awa xi hetisisa xidumbiso xakwe lexi nga ka Ezaya 2:2, 3?

¹⁵ A masikwini yezru. Yehovha a profete leswaku ‘a masikwini ya wugamu’ vhanu va matiko hinkwawu a va ta tlhantukela a nhaveni yakwe ya ku fanekisela akuva va ta dondzrisiwa tindlela takwe. (Dondzra Ezaya 2:2, 3.) Ha byi vona wuprofeta lebyo na byi hetiseka. Ha swi vona leswaku wukhongoti bya ntiyiso byi tlakukile ngopfu swinene ku tlula wukhongoti byin’wana ni byin’wana  bya matiko. Nakone Yehovha a nyika vhanu vakwe swakuda swinyingi swinene swa moya. (Eza 25:6) Yene a tizrisa ‘nandzra lweyi wa ku dumbeka ni ku tlhazriha’ akuva a hi nyika swakuda swinyingi swa moya ni swa ku hambanahambana. Hi xikombiso, hi nga dondzra tinhlokomhaka ta ku siyanasiyana, hi yingiseta wukaneli, hi hlalela ma-vídeo ya swibonekana ni man’wana. (Mt 24:45) Hi titwa hi ndlela leyi fanaka ni leyi Elihu, munghanu wa Yobe a titwiki ha yone, lweyi a hlayiki swone loko a ku: ‘Hi mani lweyi a dondzrisaka swanga ha Yehovha?’​—Yb 36:22.

16. I yini leswi u nga swi yentxaka akuva u kula hi tlhelo dzra moya?

¹⁶ Leswi u nga swi yentxaka. Moya wa ku xwenga wu ta ku pfuna akuva u tizrisa leswi u swi dondzraka a Zritwini dzrakwe. Khongota ka Yehovha ku fana ni mupsalma lweyi a khongotiki a ku: “Ndzri dondzrisi ndlela yaku Yehovha, ni ta famba xihlayelamfuzrini xaku. Yentxa mbilu yanga yi va yin’we leswaku yi txhava vito dzraku.” (Ps 86:11, TNM) Nakone, yana mahlweni u dondzra Bibele ni mabuku man’wana lawa Yehovha a hi nyikaka wone hi ku tizrisa nhlengeletanu yakwe. Handle ka ku ganaganeka, nkongometo waku a hi wa ku kuma wutivi ntsena, u djula ku kholwiseka hi ntiyiso lowu u wu dondzraka, u tlhela u wu tizrisa a wuton’wini byaku. Moya wa ku xwenga wa Yehovha wu nga ku pfuna ku yentxa leswo. Nakone, wene u djula ku tlhela u tiyisa vamakwenu a bandleni. (Hb 10:24, 25) Hi mhaka muni? Hikusa vone i ndangu waku wa moya. Khongota u kombela leswaku moya wa ku xwenga wa Xikwembu Nkulukumba wu ku pfuna akuva u nyikela tiyangulu leti sukelaka mbilwini loko u li mintlhanganwini ni leswaku u hetisa ha hombe xiyavelo xin’wana ni xin’wana lexi u nyikiwaka xone. Hi tindlela leto, u ta komba Yehovha ni N’wanakwe leswaku wa ma zrandzra mabyisela yavu lamanene.​—Yh 21:15-17.

17. Hi nga swi kombisa hi tindlela tini leswaku hi seketela nhlengeletanu ya Yehovha hi ku dumbeka?

¹⁷ Ku nga li khale, nhlengeletanu ya yin’we leyi taka va na yi salile lani misaveni yi ta va yone leyi kongomisiwaka hi moya wa ku xwenga wa Xikwembu Nkulukumba. Xileswo, tizrisana ni nhlengeletanu ya Yehovha hi ku hiseka. Kombisa leswaku wa va zrandzra vhanu hinkwavu ku fana ni leswi Xikwembu Nkulukumba a va zrandzrisaka xiswone hi ku zrezra madzrungula lamanene ka hinkwavu lava u va kumaka. Yetisela ndlela leyi Yehovha a zrandzraka ku hleleka ni ku zrula ha yone hi ku pfunisa leswaku ku va ni wumun’we a bandleni. Nakone yingiseta Mudondzrisi waku Lwenkulu hi ku susa londzrovoto ledzrikulu ka swakuda swa moya leswi a ku lulamiselaka swone. Nkama lowu misava ya Sathana yi yaka ku heleni, wene a wu nge ti txhava, a matsrhan’wini ya leswo, u ta va ni xixixi nakone u ta va kun’we ni lava fambisanaka ni nhlengeletanu ya Yehovha hi ku dumbeka.