1. Xana muapostola Yohane a a li xiyin’wini xini a ku heleni ka dzana dzra ku sungula, N.Y.?

A KU heleni ka dzana dzra ku sungula N.Y., muapostola Yohane a a li xiyin’wini xa ku kazrata. A a duhwalile nakone a a pfaleliwe a xihlaleni xa Patmos. Swi tikomba ingi a ke sala yene ntsena ka vapostola hinkwavu. (Mpf 1:9) A a swi tiva leswaku vakaneti a va hangalasa tindondzro ta madzrimi a mabadleni nakone a va vanga ku yavana. A swi yentxa ingiki wukriste bya ntiyiso a byi li kusuhi ni ku hela.​—Yd 4; Mpf 2:15, 20; 3:1, 17.

2. Hi ku ya hi Apfuletelo 7:9-14, hi xini xivoniso xa ku hlamalisa lexi Yohane a viki naxu? (Vona xifaniso lexi nga ka kapa.)

² Hansi ka swiyimu swoleswo swa ku kazrata, Yohane a ve ni xivoniso xa ku hlamalisa mayelanu ni leswi a swi ta yentxeka a nkameni lowu taka. Ka xone, tintsrumi ti byeliwa leswaku ti tamela timheho leti honaka ta nhlomulo lowukulu ku ya tlhasa loko ku va ni ku fungiwa ka wugamu ka malandzra ya Xikwembu Nkulukumba. (Mpf 7:1-3) Ntlawa lowu wu vumbiwa hi lava 144.000 lava taka fuma na Yesu a tilweni. (Lk 12:32; Mpf 7:4) Ntsrhaku ka leswo, Yohane a vone ntlawa wun’wana lowukulu swinene lakakuva a hlamala hi ku vona ntxhumu lowu a a nga wu yimelanga. Xana Yohane a vone yini? A vone ‘xitsrhungu lexikulu, lexi faka ku nge na mhunu lwa kotaka ku xi hlaya, xa matiko hinkwawu, ni xa tinxaka, ni xa tintsrhundzru ni xa tindzrimi; va yimi mahlweni ka xiluvelo, ni le mahlweni ka Hambana’. (Dondzra Apfuletelo 7:9-14.) Yanakanya leswi Yohane a taka va a nyonxise xiswone hi ku tiva leswaku a nkameni lowu taka, magidi-gidi ya vhanu a ma ta landzra wugandzreli bya ntiyiso!

3. a) I yini lexi yentxaka leswaku xivoniso xa Yohane xi hi tiyisa lipfumelo? b) Xana hi ta dondzra yini ka nhloko-mhaka leyi?

³ Handle ka ku ganaganeka xivoniso lexo xi tiyise lipfumelo dzra Yohane. Xivoniso lexo ngopfu-ngopfu xi fanela ku tiyisa lipfumelo dzrezru, swanga heswi hi hanyaka a nkameni lowu xi hetisekaka ha wone! Hi vone ku hlengeletiwa ka vhanu va ntsrandzra-vahlayi lava  laviselaka ku huluxiwa a nhlomulweni lowukulu va va va hanya hi laha ku nga helikiki la misaveni. Ka nhloko-mhaka leyi, hi ta dondzra leswaku Yehovha a dzri pfunise kuyini tiko dzrakwe ku twisisa leswaku hi xini xitsrhungu lexo lexikulu ku tlula 80 wa malembe lama khalutiki. Hi ta gama hi kambisisa tinhla tibidzri leti hlawulaka xitsrhungu lexo: 1) wukulu bya xone ni 2) ku hambana-hambana ka tinxaka ta xone. Tinhla leti ti fanela ku tiyisa lipfumelo dzra hinkwavu lava laviselaka ku va xiyenge xa ntlawa lowo lowu katekiki.

4. Hi wini ntiyiso lowu nga Bibeleni lowu Wukhongoti bya Masonto byi nga wu twisisikiki, nakone xana Swidondzri swa Bibele a swi hambanisa kuyini a mhakeni leyi?

⁴ Wukhongoti bya Masonto hakanyingi a byi dondzrisi ntiyiso lowu nga Bibeleni lowu liki siku dzrin’wana vhanu lava yingisetaka va ta hanya hi laha ku nga helikiki la misaveni. (2Ko 4:3, 4) Namunhla, ku tala ka makezreke ya Wukhongoti bya Masonto ma dondzrisa leswaku hinkwavu vhanu lavanene va ya tilweni loko va fa. Kambe, ku humelele ntxhumu lowu hambanaka ka ntlawanyana wa Swidondzri swa Bibele leswi a swi humexa Xihondzro Xa Ku Zrindzra (hi xinghiza) a wugan’wini bya ma-1800. Swone swi twisise leswaku Xikwembu Nkulukumba a a ta pfuxeta Paradeyisi la misaveni ni leswaku vhanu va ntsrandzra-vahlayi lava yingisetaka a va ta hanya kola misaveni​—ku nga li tilweni. Nambitanu, swi teke nkamanyana na swidondzri leswi swi nga si twisisa hi ku khanya leswaku vhanu volavo lava yingisetaka a va ta va vamani.​—Mt 6:10.

5. Xana Swidondzri swa Bibele a swi kholwa yini hi lava 144.000?

⁵ Swi le livaleni leswaku Swidondzri swa Bibele swi tlhele swi twisisa leswaku Matsralwa ma li van’we a va ta ‘xaviwa misaveni’ akuva va fuma na Yesu a tilweni. (Mpf 14:3) Ntlawa lowo a wu ta vumbiwa hi 144.000 wa vakriste lava hisekaka ni lava tinyiketeliki, lava tizreliki Xikwembu Nkulukumba hi ku dumbeka na ve he misaveni. Ku hlayiwa yini hi xitsrhungu lexikulu?

6. Xana Swidondzri swa Bibele a swi kholwa yini hi xitsrhungu lexikulu?

⁶ Ka xivoniso lexi Yohane a viki naxu, a vone ntlawa lowo na wu ‘yimi mahlweni ka xiluvelo, ni le mahlweni ka Hambana’. (Mpf 7:9) Mazritu lawo ma yentxe Swidondzri swa Bibele swi twisisa leswaku, ku fana ni lava va 144.000, xitsrhungu lexikulu a xi ta ya hanya a tilweni. Kutani ke, loko lava va 144.000 ni va xitsrhungu lexikulu a va ta ya hanya a tilweni, xana ntlawa wun’we a wu ta hambanisa kuyini ni lowun’wana? Swidondzri swa Bibele a swi pimisa leswaku xitsrhungu lexikulu a xi ta va na xi vumbiwa hi vakriste lava a va nga yingiseti Xikwembu Nkulukumba hi ku helela na ve he misaveni. Mfuzri a swi pimisa leswaku nambi leswi vhanu lava a va hanya wutomi lebyi basiki hi mpimu wa kukazri, van’we va vone swi nga yentxeka va tame va tsrhama makezrekeni ya Wukhongoti bya Masonto. Swidondzri swa Bibele a swi pimisa leswaku vhanu lavo va kombise ku hiseka ka kukazri kambe loku nga dzringanikiki kuva va fuma na Yesu. Swidondzri swa Bibele a swi ku leswi vhanu volavo va kalaka va nga kombisanga lizrandzru dzra ku dzringana ka Xikwembu Nkulukumba, a va ta va xitsrhungu lexikulu lexi taka faneliwa hi ku va a tilweni a mahlweni ka xiluvelo kambe a va nge na ku tsrhama swiluvelweni.

7. Hi ku ya hi Swidondzri swa Bibele, i vamani lava a va ta hanya la misaveni hi nkama wa 1.000 wa malembe, nakone i yini leswi a swi kholwa swone hi vavanuna va khale lava ku dumbeka?

⁷ Kutani ke, i vamani lava a va ta hanya la misaveni? Swidondzri swa Bibele a swi kholwa leswaku a ntsrhaku ka loko lava va 144.000 ni va xitsrhungu lexikulu va hlengeleteliwe a tilweni, vhanu van’wana va ntsrandzra-vahlayi a va ta nyikiwa wutomi la misaveni va va va kuma makateko ya Mfumu wa Kriste wa 1.000 wa malembe. Swidondzri swa Bibele a swi nga swi yimelanga leswaku vhanu volavo va ntsrandzra-vahlayi va nga tizrela Yehovha na ku  nga si sungula Mfumu wa Kriste. Ku hambana ni swoswo, a ku pimisiwa leswaku ntlawa lowu a wu ta dondzrisiwa tindlela ta Yehovha hi nkama wa 1.000 wa malembe. A ntsrhaku, lava a va ta titwananisa ni milawu ya Yehovha a va ta katekisiwa hi wutomi lebyi nga helikiki la misaveni, kasi lava a va ta yala ku yingiseta a va ta suvisiwa. Swidondzri swa Bibele nakone a swi pimisa leswaku kumbexana van’we va lava a va ta tizra swanga “tihosana” la misaveni hi nkama wolowo hi ndlela ya kukazri a va ta hakeliwa hi wutomi lebyi nga helikiki a tilweni a ku heleni ka 1.000 wa malembe. Nakone Swidondzri swa Bibele a swi kholwa leswaku “tihosana” leti a ti ta patsra khale ka “vavanuna lava txhavisekaka” lava pfuxiwiki (vavanuna va ku dumbeka lava fiki na Kriste a nga si ta).​—Ps 45:16.

8. Hi yini mintlawa yizrazru leyi a yi voneka na yi ni mbangu a nkongometweni wa Xikwembu Nkulukumba?

⁸ Xileswo, Swidondzri swa Bibele a swi pimisa leswaku a ku ni mintlawa yizrazru: 1) wa va 144.000, lava a va ta fuma na Yesu a tilweni; 2) wa xitsrhungu lexikulu xa vakriste lava nga hisekikiki ngopfu, lava a va ta yima a mahlweni ka xiluvelo xa Yesu a tilweni; ni 3) wa vhanu va ntsrandzra-vahlayi lava a va ta dondzrisiwa tindlela ta Yehovha la misaveni hi nkama wa Mfumu wa Kriste wa 1.000 wa malembe. * Kambe hi nkama lowu faneliki wa Yehovha, livaningo dzra ntiyiso dzri sungule ku vaningela mhaka leyi yi ya yi khanya.​—Pr 4:18.

9. a) A swi ta kotekisa kuyini kuva lava va xitsrhungu lexikulu va yima ‘mahlweni ka xiluvelo, ni le mahlweni ka Hambana’ na va li la misaveni? b) Ha yini matwisisela lawa ya Apfuletelo 7:9 ma twala?

⁹ Hi 1935 ku khanyisiwe leswaku i vamani lava va xitsrhungu lexikulu va voniwiki hi Yohane. Timboni ta Yehovha ti twisise leswaku a swi sindzrisi leswaku xitsrhungu lexikulu xi va a tilweni hi ku kongoma akuva xi yima ‘mahlweni ka xiluvelo, ni le mahlweni ka Hambana’. Ku hambana ni swoswo, xiyimu xavu i xa ku fanekisela. Nambi leswi a va ta hanya la misaveni, lava va xitsrhungu lexikulu a va ta yima ‘mahlweni ka xiluvelo’ hi ku pfumela leswaku Yehovha i Mufumi wa Tilo ni Misava va tlhela va pfumela ku fumiwa ha yene hi ku mu yingiseta. (Eza 66:1) A va ta yima ‘mahlweni ka Hambana’ hi ku pfumela ka xitlhavelo xa tizrulo xa Yesu. Hi laha ku fanaka, ka Mattheo 25:31, 32, ku hlayiwa leswaku ‘matiko hinkwawu’​—ku patsra ni lava ku biha—​ma ta ‘hlengeletiwa a mahlweni’ ka Yesu a xiluvelweni xakwe lexa ku phatima. Swi le livaleni leswaku matiko lawa hinkwawu a ma nge ti va le tilweni, kambe kola misaveni. Matwisisela lawa lama yampswisiwiki ma twala. Swoleswo swi yentxa swi twisiseka leswaku ha yini Bibele dzri nga hlayi leswaku xitsrhungu lexikulu xi pfuxeliwa ku ya a tilweni. I ntlawa wun’we ntsena lowu dumbisiwaka wutomi lebyi nga helikiki a tilweni​—ku nga lava va 144.000, lava taka ‘fuma misava’ na Yesu.​—Mpf 5:10.

10. Ha yini lava va xitsrhungu lexikulu va fanela ku dondzra tindlela ta Yehovha na ku nga si sungula Mfumu wa Kriste wa 1.000 wa malembe?

¹⁰ Hi ndlela leyi, ku sukela hi 1935, Timboni ta Yehovha ti twisise leswaku xitsrhungu lexikulu lexi voniwiki ha Yohane xi vumbiwa hi ntlawa wa vakriste lava dumbekaka lava nga ni ku lavisela ka ku hanya hi laha ku nga helikiki la misaveni. Akuva xi huluxiwa a nhlomulweni lowukulu, xitsrhungu lexikulu a xi ta boheka ku dondzrisiwa tindlela ta Yehovha na ku nga si sungula Mfumu wa 1.000 wa malembe. Lava va xitsrhungu lexikulu a va ta fanela ku kombisa lipfumelo ledzri tiyiki akuva va kota ‘ku phondla ku hinkwaswu leswi taka yentxeka’ na ku nga si sungula Mfumu wa Kriste wa 1.000 wa malembe.​—Lk 21:34-36.

11. Ha yini van’wana va Swidondzri swa Bibele va pimise leswaku van’wana kumbexana a va ta pfuxeliwa ku ya hanya a tilweni a ntsrhaku ka Mfumu wa Kriste wa 1.000 wa malembe?

¹¹ Ku hlayiwa yini hi miyanakanyu ya leswaku van’wana lava nga xikombiso lexinene la misaveni  a va ta pfuxeliwa ku ya tilweni a ntsrhaku ka Mfumu wa Kriste wa 1.000 wa malembe? Mavonela lawo ma kombisiwe khale koloko ka Xihondzro Xa Ku Zrindzra (hi xinghiza) xa 15 ka Fevhereru wa 1913. Mhunu a a ta va ni xivangelo xa ku twala xa kuva a pimisa leswi: ‘I yini lexi a xi ta yentxa leswaku vhanu lava ku dumbeka va khale va nyikiwa pfindla dzra la misaveni ntsena na kasi vakriste lava hi ndlela ya kukazri a va nga hiseki va ta hakeliwa hi wutomi a tilweni?’ Swi le livaleni leswaku miyanakanyu leyo yi vangiwe hi matwisisela mabidzri lawa a ma hoxekile: 1) ya leswaku xitsrhungu lexikulu a xi ta hanya a tilweni ni 2) ya leswaku xitsrhungu lexikulu a xi ta vumbiwa hi vakriste lava nga hisekikiki ngopfu.

12-13. Xana vatotiwa ni lava va xitsrhungu lexikulu va twisisa yini hi hakelo dzravu?

¹² Kambe, hi laha hi voniki ha kone, ku sukela hi 1935, Timboni ta Yehovha ti twisise hi ku khanya leswaku lava taka huluka ka Armagedon hi vone xitsrhungu lexikulu lexi voniwiki ha Yohane. Va ta huma ‘a nhlomulweni lowukulu’ kola misaveni, nakone va ta ya mahlweni va ‘bandlukana hi zritu ledzrikulu, va ku: A huluxo i dzra Xikwembu Nkulukumba wezru lwa tsrhamiki xiluvelweni, ni dzra Hambana.’ (Mpf 7:10, 14) Handle ka leswo, Matsralwa ma dondzrisa leswaku lava va pfuxeliwaka ku ya kuma wutomi bya le tilweni va yamukela ‘xantxhumu lexi tlulaka’ xa vavanuna lava ku dumbeka va khale. (Hb 11:40) Hi ku twanana ni swoswo, vamakwezru va sungule ku zramba vhanu hi nkhinkhi akuva va tizrela Yehovha na va ni ku lavisela ka ku hanya hi laha ku nga helikiki la misaveni.

¹³ Lava va xitsrhungu lexikulu va nyonxa hi ku lavisela kwavu. Va swi twisisa leswaku i Yehovha lweyi a hlawulaka leswaku malandzra yakwe ya ku dumbeka ma ta mu tizrela kwini, a nga va a tilweni kumbe la misaveni. Vatotiwa ni lava va xitsrhungu lexikulu va swi twisisa leswaku hakelo dzravu dzro koteka ntsena hi timpswalu ta Yehovha leti kombisiwiki hi xitlhavelo xa tizrulo xa Yesu Kriste.​—Ro 3:24.

14. A ntsrhaku ka 1935, ha yini vanyingi va tivutisile leswaku wuprofeta lebyi khanelaka hi xitsrhungu lexikulu a byi ta hetiseka hi ndlela yini?

¹⁴ Ntsrhaku ka loko vhanu va Yehovha va khanyiseliwe ku twisisa kwavu hi 1935, vanyingi va ha tame va tivutisa leswaku a swi ta yentxisa kuyini kuva lava nga ni ku lavisela ka ku hanya la misaveni va ndzruluka xitsrhungu lexikulu. Hi xikombiso, Ronald Parkin a a ni 12 wa malembe loko ku khanyisiwile leswaku i vamani lava va xitsrhungu lexikulu. A dzrimukela a ku: “Hi nkama wolowo, a ku ni 56.000 wa vazrezri a misaveni hinkwayu nakone vanyingi, kumbexana ntalu wavu, a va li vatotiwa. Kutani xitsrhungu lexikulu a xi nga voneki na xi li xikulu ngopfu.”

15. Xana ntizro wa ku hlengeleta xitsrhungu lexikulu wu yise kuyini mahlweni?

¹⁵ Kambe, ka makume ya malembe lama tlhantamaka, ku yisiwe vazrumiwa a matikweni manyingi,  kutani nhlayu ya Timboni ta Yehovha yi sungule ku yandzra lembe ni lembe. A ntsrhaku ka leswo, hi 1968, ku sunguliwe nongonoko wa ku fambisa swidondzro swa Bibele hi ku tizrisa buku ledzri liki Ašihlayelamfuṛi Le’ši Yisaka Butomini Le’byi Nga Helikiki. Leswi a dzri tlhamuxelisa xiswone ntiyiso wa Bibele hi ku nabyala a swi kokela vhanu va ku zrula hi ndlela leyi a yi ngi ngi sama yi voniwa. Ndzreni ka mune wa malembe, ku babatisiwe ku tlula 500.000 wa vadondzrisiwa lavampswha. Loko Kezreke dzra Katolika dzri sungula ku lahlekeliwa hi swizro swa dzrone le América Latina ni le matikweni man’wana, ni loko ntizro wezru wu tsrhike ku tsimbisiwa le Europa Oriental ni le matikweni man’wana ya le África, ku babatisiwe vhanu lava yengetelekiki hi magidi-gidi. (Eza 60:22) A malembeni ya swoswinyana, nhlengeletanu ya Yehovha yi humexe switizro swin’wana swa ku siyana-siyana leswi nga ni ntamu wa ku pfuna vhanu ku tiva leswi Bibele dzri swi dondzrisaka. A ku na ku ganaganeka ka leswaku xitsrhungu lexikulu​—lexi swoswi xi tlulaka 8.000.000—​kutani xi hlengeletiwile.

16. Xana xi buya hi kwini xitsrhungu lexikulu lexi hlengeletiwaka?

¹⁶ Loko a tsrala leswi a swi voniki, Yohane a boxe leswaku xitsrhungu lexikulu a xi ta va ‘xa matiko hinkwawu, ni xa tinxaka, ni xa tintsrhundzru ni xa tindzrimi’. Muprofeta Zekariya a a profete swa ku djula ku fana. A tsrale leswi: ‘A masikwini wolawo vavanuna va khume va tindzrimi hinkwatu ta matiko, va ta khoma vugamu bya xiyambalo xa mu-Yuda,  va ku: Hi ta famba na n’wine, hikuva hi yingeli leswaku Yehovha a n’wine.’​—Zk 8:23.

17. Ku yentxiwa yini akuva ku pfuniwa vhanu va matiko hinkwawu ni tindzrimi hinkwatu?

¹⁷ Timboni ta Yehovha ta swi twisisa leswaku akuva vhanu va tindzrimi hinkwatu va hlengeletiwa, madzrungula lamanene ma fanela ku zrezriwa hi tindzrimi tinyingi. Hi ni ku tlula 130 wa malembe na hi ndzrulutela mabuku ya ku dondzra ha wone Bibele, kambe swoswi hi le ku yentxeni ka ntizro lowukulu swinene wa wundzruluteli lowu nga samikiki wu yentxiwa a matin’wini hi madzana-dzana ya tindzrimi. Swa tikomba, ke, leswaku Yehovha a kazri a yentxa hlolana dzra le masikwini yezru—i nga ku hlengeletela xitsrhungu lexikulu a matikweni hinkwawu. Leswi ku nga ni swakuda swa moya hi tindzrimi leti yaka ti yengeteleka, ntlawa lowu wa tinxaka ta ku hambana-hambana wu ni wumun’we bya wugandzreli. Nakone Timboni ti tiveka swinene hi nkhinkhi ya ku zrezra ni lizrandzru dzra wumakwavu. Xana leswo a swi tiyisi lipfumelo?—Mt 24:14; Yh 13:35.

18. a) Hi ku twanana na Ezaya 46:10, 11, ha yini hi nga hlamali loko hi vona Yehovha a hetisisa wuprofeta lebyi khanelaka hi xitsrhungu lexikulu? b) Ha yini lava nga ni ku lavisela ka ku hanya la misaveni va nga titwi na va sefiwile?

¹⁸ Hi ni swivangelo hinkwaswu swa kuva hi nyonxa hi wuprofeta bya xitsrhungu lexikulu! A swi hi hlamalisi ku vona Yehovha a hetisisa wuprofeta lebyo hi ndlela ya ku hlamalisa. (Dondzra Ezaya 46:10, 11.) Lava va xitsrhungu lexikulu va khensa swinene ku lavisela loku Yehovha a va nyikiki kone. A va titwi na va sefiwile hi ku kala va nga totiwanga hi moya wa Xikwembu Nkulukumba akuva va ya tizra na Yesu a tilweni. A Matsralweni hinkwawu, hi dondzra hi vavanuna ni vavasati va lipfumelo lava a va fambisiwa hi moya wa ku xwenga, kambe va ngeke xiyenge xa lava va 144.000. Yohane Mubabatisi i mun’we wa vone. (Mt 11:11) Mun’wana i Davhida. (Min 2:34) Vone ni van’wana va ntsrandzra-vahlayi va ta pfuxiwa leswaku va hanya a misaveni leyi nga paradeyisi. Hinkwavu ka vone​—kun’we ni lava va xitsrhungu lexikulu—​va ta va ni mukhandlu wa ku kombisa wudumbeki byavu ka Yehovha ni wuhosi byakwe.

19. Xana ku hetiseka ka leswi Yohane a vonisiwiki swone mayelanu ni xitsrhungu lexikulu ku swi kombisisa kuyini leswaku hi hanya minkameni ya xihatla?

¹⁹ A matin’wini hinkwawu ya vhanu, Xikwembu Nkulukumba a ngi ngi sama a tlhanganisa vhanu va ntsrandzra-vahlayi a matikweni hinkwawu ku fana ni namunhla. Nambi loko hi lavisela ku ya hanya a tilweni kumbe kola misaveni, hi fanela ku pfuna vhanu va ku tala hi laha hi nga kotaka ha kone leswaku va tipatsra ni xitsrhungu lexikulu xa “tihamba tinʼwanyana”. (Yh 10:16) Ku nga li khale, Yehovha a ta tisa nhlomulo lowukulu lowu profetiwiki, lowu taka helisa mimfumu ni wukhongoti leswi xanisaka vhanu. Hakunene nkateko lowu yimelaka hinkwavu va xitsrhungu lexikulu i wukulu swinene​—va ta tizrela Yehovha la misaveni hi laha ku nga helikiki!​—Mpf 7:14.