1. Hi dzrini lani swi nga ha kazrataka ku tizrela Yehovha?

HI DZRINI lani u yanakanyaka leswaku swa kazrata ku tizrela Yehovha? Hi loko u li ndzreni ka swikazratu kumbe hi loko u ni ku zrula ka kukazri a wuton’wini byaku? Swa nabyala ku dumba Yehovha loko hi kumana ni swikazratu. Kambe swi li yini loko hi ni ku zrula ka kukazri a wuton’wini byezru? Xana hi nga wela khombyeni dzra ku dzrivala lisima dzra ku gandzrela Yehovha? Yehovha a dzrimuxe va-Israyele leswaku leswo swi nga ha yentxeka.​—Dt 6:10-12.

2. Hi xini xikombiso lexi hosi Asa a hi siyeliki xone?

² Hosi Asa i xikombiso lexinene xa mhunu lweyi a kombisiki wutlhazri. Yene a dumbe Yehovha nakone a tizreli Xikwembu Nkulukumba ku nga li ntsena a minkameni ya ku kazrata kambe ni hi minkama ya ku zrula. Ku sukela na a ha li ntsrongo ‘a mbilu ya Asa hinkwayu a yi li ku Yehovha’. (1Th 15:14) Yin’we ya tindlela leti Asa a kombisiki ha tone leswaku a tinyiketeli ka Yehovha ku ve hi ku helisa wukhongoti bya madzrimi a Yuda. A Bibele dzri li yene ‘a suse ma-altare ya vamatiko, ni mimbangu lemi tlakukiki; a pfotlota makolona, a mbumdzrumuxa ma-Axera’. (2Mk 14:3, 5) A tlheli a susa kokwana wakwe Maka ka vuhosi. Ha yini? Hikusa yene a a twalisa wugandzreli bya madzrimi dzra ku gandzrela xithombe xa kukazri.​—1Th 15:11-13.

3. I yini leswi hi taka swi dondzra ka nhloko-mhaka leyi?

³ Asa a yentxi leswi tlulaka ku helisa wugandzreli bya madzrimi a tikweni. Yene a twalise wugandzreli bya ntiyiso, a tlhela a pfuna a mfumu wa Yuda akuva wu tlhelela ka Yehovha. Hi mhaka ya leswo, Yehovha a tovokise Asa ni va-Israyele hi ku va nyika nkama wa ku zrula. * Ka malembe ya khume lawa a fumiki  wone ‘a tiko afa dzri zrulile’. (2Mk 14:1, 4, 6) Ka xidondzro lexi, hi ta vona ndlela leyi Asa a londzrovotiki nkama lowo wa ku zrula ha yone. Ntsrhaku, hi ta kambisisa xikombiso xa vakriste va le dzaneni dzra ku sungula. Ku fana na Asa, vone va swi kotile ku londzrovota minkama ya ku zrula. Hi wugamu, hi ta hlamula xivutiso lexi: Loko u hanya tikweni ledzri ku nga ni ntsrhunxeko wa wugandzreli, xana u nga londzrovota nkama wa ku zrula hi wutlhazri hi ndlela yini?

4. Hi ku ya hi 2 Makronika 14:2, 6, 7, xana Asa a londzrovote nkama wa ku zrula hi ndlela yini?

⁴ Dondzra 2 Makronika 14:2, 6, 7. Asa a byele vhanu leswaku Yehovha a a va nyike ‘ku wisa matlhelo hinkwawu’. Asa a a nga yanakanyi leswaku nkama luwani wa ku zrula a ku li mukhandlu wa ku tsrhama ntsrhutini. A matsrhan’wini ya leswo, a londzrovote mukhandlu lowo akuva a yaka madoropa, ni tihlampfu, ni swihondzro, ni timhazrana ni timpfalwana. Asa a byele va-Israyele a ku: ‘A tiko dzre he kone mahlweni kwezru.’ Xana leswo a swi tlhamuxela yini? A swi tlhamuxela leswaku vhanu a va ta famba na va ntsrhunxekile a tikweni dzra Israyele ni ku tlhela va yaka na va ntsrhunxekile. Asa a kutxe vhanu leswaku va londzrovota nkama luwani wa ku zrula.

5. Ha yini Asa a tiyise masotxha yakwe?

⁵ Asa a tlhele a londzrovota nkama wa ku zrula akuva a tiyisa masotxha yakwe. (2Mk 14:8) Xana leswo swi tlhamuxela leswaku a a nga mu dumbi Yehovha? Im-him. Asa a a swi tiva leswaku swanga hosi a a ni wutiyanguleli bya ku lulamisela vhanu akuva va lwisana ni xikazratu xin’wana ni xin’wana lexi a va ta kumana na xone. A a swi tiva leswaku nkama luwani wa ku zrula a tikweni dzra Yuda a wu nge ti tsrhama hi lani ku nga helikiki. Nakone hi leswo swi yentxekiki.

6. Xana vakriste va le dzaneni dzra ku sungula va wu londzrovotise kuyini nkama wa ku zrula?

⁶ Nambi leswi minkama yinyingi a va landzreleliwa, vakriste va dzana dzra ku sungula va ve ni minkama ya ku zrula. I yini leswi vadondzrisiwa a va swi yentxa a minkameni leyo? Va londzrovote minkama leyo akuva va zrezra madzrungula lamanene na va nga yimi. Hi ku ya hi buku dzra Amintiṛo, vavanuna ni vavasati lavo va ku dumbeka a va famba ‘ku txhaveni ka Hosi Yehovha’. A va tama va zrezra madzrungula lamanene ya Mfumu, nakone bindzru dzra kone, ‘va tame va yandzra’. Handle ka ku ganaganeka, Yehovha a tovokise ku hiseka ka vakriste volavo a minkameni leyo ya ku zrula.​—Min 9:26-31.

7-8. I yini leswi Pawulo ni vakriste van’wana a va swi yentxa loko va kuma mukhandlu? Tlhamuxela.

⁷ Vakriste va le dzaneni dzra ku sungula va londzrovote minkhandlu hinkwayu akuva va zrezra madzrungula lamanene. Hi xikombiso, mupostola Pawulo a pfumelile leswaku a a pfulekeliwe hi mukhandlu wa kuva a yentxa leswi yengetelekiki a Efesa. Xileswo, a londzrovote mukhandlu lowo akuva a zrezra ni ku yentxa vadondzrisiwa a doropeni ledzro.​—1Ko 16:8, 9

⁸ Mukhandlu wumbeni lowu Pawulo ni vakriste vambeni va wu kumiki wu humeleli hi lembe dzra 49 Nguveni Yezru (N.Y.) loko ku tlhantlhiwe mhaka ya ku soka. (Min 15:23-29) Ntsrhaku ka loko mabandla ma tive xiboho lexi tekiwiki, vadondzrisiwa va tikazrateli akuva va hlaya ‘evhangeli dzra Zritu dzra Hosi Yehovha’. (Min 15:30-35) Dzri ve dzrini bindzru dzra kone? Bibele dzri li: “A mabandla a ma ya mahlweni ma tiyisiwa a lipfumelweni ni ku yandzra hi nhlayu siku ni siku.”​—Min 16:4, 5, Tradução do Novo Mundo, TNM.

9. Hi xini xiyimu xa matiko manyingi namunhla, nakone hi xini xivutiso lexi hi fanelaka ku tihamba xone?

⁹ Namunhla wa siku, swa koteka kuva hi zrezra na hi ntsrhunxekile a matikweni manyingi. Xana u ni ntsrhunxeko wa ku gandzrela a tikweni dzraku? Loko nhlamulo i li ina, tivutise: ‘Xana ni wu londzrovota hi ndlela yini ntsrhunxeko lowo?’ A masikwini lawa ya wugamu, a nhlengeletanu ya Yehovha yi zrangela ntizro wukulu ngopfu swinene wa ku zrezra ni ku dondzrisa lowu nga samikiki wu voniwa a misaveni hinkwayu. (Mr 13:10) Mikhandlu yinyingi yi pfulekile ka vhanu va Yehovha.

10. I yini leswi buku dzra 2 Timoteo 4:2 dzri hi kutxaka ku swi yentxa?

¹⁰ Xana u nga wu londzrovota hi ndlela yini nkama wa ku zrula? (Dondzra 2 Timoteo 4:2.) Swi ngo yini u kambisisa swiyimu swaku? Xana wene kumbe mun’wana a ndangwini waku a nga yengesela ntizro wakwe wa ku zrezra kumbexana hi ku tizra swanga phayona? Swoswi a hi wone nkama wa ku hlengeletela wukosi ni mintxhumu leyi vonekaka​—ku nga mintxhumu leyi hi nga tiki hundzra na yone ka nhlomulo lowukulu.​—Pr 11:4; Mt 6:31-33; 1Yh 2:15-17.

11. I yini leswi vazrezri vanyingi va swi yentxaka akuva va zrezrela vhanu vanyingi madzrungula lamanene?

¹¹ Vazrezri vanyingi va dondzra lidzrimi dzrin’wana akuva va dzri tizrisa a ntizrweni wa ku zrezra ni ku dondzrisa. A nhlengeletanu ya Xikwembu Nkulukumba yi seketela vamakwezru lavo hi ku humexa mabuku lama seketeliwiki a Bibeleni hi tindzrimi tinyingi. Hi xikombiso, hi lembe dzra 2010, mabuku yezru a ma kumeka hi kolomu ka 500 wa tindzrimi. Namunhla, ma kumeka hi tindzrimi leti tlulaka 1.000 wa tone!

12. Ha yini swi li swinene kuva vhanu va twa dzrungula dzra Mfumu hi lidzrimi ledzri va dzri toloveliki? Kombisa.

 ¹² Xana swi ni lisima ku va mhunu a yingela ntiyiso lowu nga Zritwini dzra Xikwembu Nkulukumba hi lidzrimi dzra mamana? Vona xikombiso xa makwezru wa kukazri lweyi a hlaleliki a nhlengeletanu leyikulu a Memphis, Tennessee, Estados Unidos. A lidzrimi dzrakwe i xikinyaruwanda, ku nga lidzrimi ledzri khaneliwaka ngopfu a Ruanda, a República Democrática do Congo ni le Uganda. Nhlengeletanu leyo leyikulu yi kombisiwe hi lidzrimi ledzro. Ntsrhaku ka nhlengeletanu leyo, makwezru lweyo wa xisati a te: “Ni ni 17 wa malembe na ni tsrhama a Estados Unidos, kambe ledzri ku ve khambi dzra ku sungula na ni twisisa ntlhanganu hinkwawu hi ku helela.” Handle ka ku ganaganeka, makwezru lweyo a nyonxe ngopfu swinene hi ku yingela ntlhanganu hinkwawu hi lidzrimi dzrakwe. Loko swiyimu swaku swi ku pfumelela, swi ngo yini u dondzra lidzrimi dzrimbeni akuva u pfuna vhanu lava nga ka nsimu yaku? Swi nga yentxeka ka nsimu yaku ku ni vhanu lava titwaka na va nyonxile loko va khanela hi lidzrimi dzravu. Xana leswo swi nga ku kutxa ku dondzra lidzrimi dzrin’wana? I ntiyiso leswaku swi djula ku tikazrata, kambe swa pfuna!

13. Xana vamakwezru va le Rússia va londzrovote nkama wa ku zrula hi ndlela yini?

¹³ A hi vamakwezru hinkwavu va nga ni ntsrhunxeko wa ku zrezra. A mimbangwini yin’wana, mimfumu yi beka milawu leyi yentxeka swi kazrata ku zrezra. Hi xikombiso, pimisa hi vamakwezru va le Rússia. Ntsrhaku ka madzana ya malembe na va landzreleliwa, hi Marso wa 1991, vamakwezru lava va kume ntsrhunxeko wa ku gandzrela. Hi nkama lowo, a ku ni kolomu ka 16.000 wa vazrezri a Rússia. Ntsrhaku ka 20 wa malembe, nhlayu ya vazrezri yi yengeseleki yi tlula ni 160.000. Swi le livaleni leswaku vamakwezru lava va kombise wutlhazri hi ku londzrovota mukhandlu wun’wana ni wun’wana lowu a va li na wone wa ku  zrezra hi ku ntsrhunxeka. A nkama luwani wa ku zrula a wu hlwelanga. Kambe ku txintxa ka swiyimu a ku pumbanga ku hiseka loku a va li na kone hi wugandzreli bya ku xwenga. Va ha tama va tizrela Yehovha, nakone va tizrisa tindlela hinkwatu leti kotekaka akuva va zrezra.

14-15. Xana Yehovha a wu kombisise kuyini ntamu wakwe loko a pfuna Asa?

¹⁴ A masikwini ya Asa, nkama wa ku zrula wu game wu hela. Ku buye masotxha manyingi, lawa a ma tlula 1.000.000 wa wone, na ma sukela Etiyopiya. Muzrangeli wa wone, Zera, a a tiyiseka leswaku masotxha yakwe a ma ta swi kota ku helisa tiko dzra Yuda. Kambe hosi Asa a a nga dumbi nhlayu ya masotxha lawa a a li na wone, kambe a a dumba Xikwembu Nkulukumba wakwe, Yehovha. Asa a khongote a ku: ‘Hi pfune wene Yehovha, Xikwembu Nkulukumba wezru, hikuva hi dumbe wene kutani hi hume yimpi hi vito dzraku.’​—2Mk 14:11.

¹⁵ Nambi leswi a tiko dzra Etiyopiya a dzri ni nhlayu ya masotxha leyi phindiwiki kabidzri ku tlula masotxha ya le Yuda, Asa a a pfumela leswaku Yehovha a a ni ntamu ni wuswikoti bya ku pfuna vhanu Vakwe. Nakone Yehovha a nga mu khomisanga tingana, a va-Etiyopiya va hluliwile hi ndlela ya tingana.​—2Mk 14:8-13.

16. Hi swi tivisa kuyini leswaku nkama wa ku zrula a wu nge ti hlwela?

¹⁶ A hi tivi wutsrhokotsrhoko hinkwabyu mayelanu ni wumundzruku bya mun’wana ni mun’wana wezru. Kambe ha swi tiva leswaku nkama wa ku zrula lowu vhanu va Xikwembu Nkulukumba va nga na wone wu tava wa nkamanyana. Hi ntiyiso wa kone, Yesu a profete leswaku a vadondzrisiwa vakwe a va ta vengiwa hi matiko hinkwawu. (Mt 24:9) Nakone mupostola Pawulo a te: ‘Mfuzri hinkwavu lava zrandzraka ku hanya hi wukhongoti ku Kriste Yesu, va ta xanisiwa.’ (2Tm 3:12) Sathana a ni ‘mahlundzru lamakulu’. Swi nge twali ku yanakanya leswaku hi nga huluka hi ndlela ya kukazri ka mahlundzru yakwe.​—Mpf 12:12.

17. Hi kwini ku dzringiwa ka lipfumelo loku hi nga ha langusanaka na kone?

¹⁷ Ku nga li khale, hinkwezru hi ta dzringiwa ku dumbeka kwezru. A misaveni ku ta va ni ‘nhlomulo lowukulu . . . lowu wa ku va ke he ke loko misava mi vumbiwa, ku ta tlhAsa swoswi, lowanga hi lowu wu nga tsrhamikiki wu va  kone’. (Mt 24:21) Hi nkama lowo, swi nga yentxeka maxaka yezru ma nga yimi na hine, nakone swi nga yentxeka ntizro wezru wu yilisiwa. (Mt 10:35, 36) Xana u ta yangulisa kuyini? Xana ku fana na Asa, u ta dumba mpfunu ni nsizrelelo wa Yehovha?

18. Hi ku ya hi Ba-Heberu 10:38, 39, i yini leswi taka hi pfuna ku lulamela leswi taka humelela loko ku hela nkama wa ku zrula?

¹⁸ Yehovha a hi lulamiselela leswi taka humelela ku nga li khale. Yene a kongomisa ‘nandzra lwe wa ku dumbeka ni ku tlhazriha’ akuva a hi nyika swakuda swa moya hi ‘nkama lowu fanelekaka’. Xileswo, hi nga tama hi tiya ka wugandzreli bya Xikwembu Nkulukumba. (Mt 24:45) Kambe hinkwezru hi fanela ku hetisisa xiyenge xezru. Hi fanela ku yentxa hinkwaswu leswi hi nga swi kotaka akuva hi yaka lipfumelo ledzri tiyiki ka Yehovha.​—Dondzra Ba-Heberu 10:38, 39.

19-20. Hi ku ya hi 1 Makronika 28:9, hi swini swivutiso leswi hi fanelaka ku tihamba swone, nakone ha yini?

¹⁹ Ku fana na hosi Asa, hi fanela ku ‘djuletela Yehovha’. (2Mk 14:4; 15:1, 2) Ntxhumu wa ku sungula lowu hi fanelaka ku wu yentxa ka ku djuletela koloko, i ku tiva Yehovha hi va hi babatisiwa. Hi fanela ku londzrovota mukhandlu wun’wana ni wun’wana akuva hi kulisa lizrandzru dzrezru ha Yehovha. Akuva u tiva leswaku u humelelisa kuyini, tivutise: ‘Xana na kumeka ka mintlhanganu hinkwayu?’ Loko hi li mintlhanganwini hi kuma ntamu akuva hi tama hi tizrela Yehovha nakone ha tiyisiwa hi lipfumelo dzra vamakwezru van’wana. (Mt 11:28) Swivutiso swin’wana leswi u nga tihambaka swone hi leswi: ‘Xana na dondzra Bibele siku ni siku?’ Loko u tsrhama ni ndangu waku, xana mi tolovela ku yentxa wugandzreli bya ndangu vhiki ni vhiki? Loko u tsrhama wuswaku, xana wa tinyika nkama wa kuva u dondzra hi lani mindangu yin’wana yi yentxaka ha kone? Xana wa kumeka hi lani u nga kotaka ha kone ka ntizro wa ku zrezra ni ku yentxa vadondzrisiwa?

²⁰ Ha yini swi li swinene ku tihamba swivutiso leswo? Bibele dzri hlaya leswaku Yehovha a kambisisa mimpimiso ni mbilu yezru; xileswo, hi fanela ku yentxa hi lani ku fanaka. (Dondzra 1 Makronika 28:9.) Loko u yanakanya leswaku u fanela ku txintxa makungu yaku, mayentxela ya mintxhumu kumbe mapimisela yaku, kombela Yehovha leswaku a ku pfuna ku txintxa. Swoswi hi wone nkama wa kuva u tilulamisela akuva u hlula leswi taka. U nga pfumeleli ntxhumu xi ku sivela ku kuma wutlhazri a minkameni ya ku zrula!