Swivutiso Swa Vadondzri
Xana a buku dzra Eklesiasta 5:8 dzri khanela ntsena hi vafumi va misava kumbe Yehovha na yene awa patsreka?
Ndzrimana leyo yi li: ‘Loko u nga vona tikwaneni dzrin’wana a xisiwana xi xanisiwa, ni ku lulama ni ku yavanyisa swi sombolokisiwa, u nga hlamale ha swone, hikuva henhla ka mhunu lweyi a tlakukiki ku lavisela mun’wana lwe a mu tlulaka, ni henhla kwavu ku ni van’wana lava va va tlulaka.’—Ekl 5:8.
Hi mavonela ya ximhunu, ndzrimana leyi yi va tlhamuxela ha hombe vhanu lava nga ni wulawuli ka mimfumu. Kambe ku tlula leswo, yi tlhela yi khanela hi ntiyiso lowu txhavelelaka ni lowu nyonxisaka mayelanu na Yehovha.
Buku dzra Eklesiasta 5:8 dzri khanela hi mufumi lweyi a xanisaka swisiwana ni lweyi a nga swi kombikiki wululami. Mufumi lweyo a fanela ku dzrimuka leswaku a nga ha va a li ku voneleliweni hi mhunu lweyi a nga xiyin’wini lexi tlakukiki ku tlula yene kumbe lweyi a nga ni wulawuli lebyi tlakukiki mfun’wini ku tlula yene. Nakone ku nga ha va ni van’wana lava va nga ni wulawuli lebyi tlakukiki ku tlula vone hinkwavu. Lexi vavisaka, ka mimfumu ya vhanu, swi nga yentxeka vafumi lavo hinkwavu va yivela vhanu, nakone i xitsrhungu lexi xanisekaka hi mafumela yavu ya ku biha.
Nambi leswi xiyimu lexo xi tikombaka na xi nge te txintxa, ku ni leswi swi hi txhavelelaka. Dzrimuka leswaku Yehovha a ‘lavisa lava nga ni wuhosi’ ka mimfumu ya vhanu. Hi nga tsrutsrumela ka Xikwembu Nkulukumba hi va hi lahlela mintsrhwalu yezru ka yene. (Ps 55:22; Flp 4:6, 7) Ha swi tiva leswaku a ‘mahlu ya Yehovha ma fambafamba misaveni hinkwayu, ku lwela lava mu dumbaka hi timbilu tavu hinkwatu’.—2Mk 16:9.
Hi ku gomisa, buku dzra Eklesiasta 5:8 dzri khanela hi leswi mimfumu ya vhanu yi tsrhamisisiki xiswone, minkama hinkwayu ku ni lweyi a nga ni wulawuli lebyi tlakukiki ku tlula van’wana. Kambe xa lisima ngopfu, ndzrimana leyi yi hi dzrimuxa leswaku Yehovha a ni wulawuli lebyi tlakukiki ku tlula vhanu hinkwavu, nakunene, a ni Wulawuli lebyi Tlakukiki ngopfu swinene. Swoswi awa fuma hi ku tizrisa N’wanakwe, Yesu Kriste, lweyi a nga Hosi ya Mfumu wakwe. Lweyi wa Ntamu Hinkwawu, lweyi a vonaka hinkwaswu, a ni wululami hi ku helela nakone N’wanakwe na yene a ni wululami.
