No. Ku hlaya ntiyiso, leswi Davhida a swi tsraliki swa twisiseka.

Vona leswi a swi tsraliki ka ndzrimana leyi ni tin’wana leti nga ni mongo lowu fanaka. A tsrale a ku: ‘Kutani ndzri ta dzrumisa vito dzraku hi lani ku nga helikiki, ndzri hetisisa ku hlambanya kwanga siku dzrin’wana ni dzrin’wana.’ A tlhele a ku: ‘Ndzri ta ku twalisa, we Hosi, Xikwembu Nkulukumba wanga, hi mbilu yanga hinkwayu. Ndzri ta kulisa vito dzraku hi la ku nga helikiki.’ A va a ku: ‘Ndzri dzrumisa vito dzraku hi minkama ni hi laha ku nga helikiki.’—Ps 61:8; 86:12; 145:1, 2.

Davhida a a ngo tatisa hikusa a a swi tiva leswaku siku dzrin’wana a ta fa. Yene a a swi tiva leswaku vhanu hinkwavu va fa hi kola ka xidoho. Mfuzri a pfumelile leswaku a a li mudohi. (Gn 3:3, 17-19; Ps 51:4, 5) Nakone a a swi tiva leswaku nambi ku li vavanuna lava a va yamukeleka ka Xikwembu Nkulukumba va ku fana na Abrahamu, Izaki na Yakobe va file. Mfuzri a a swi vona leswaku a wutomi byake a byi ya byi tlhasa magamu. (Ps 37:25; 39:4) Kambe a mazritu lawa a ma tsraliki ka Amapsalma 61:8 ma kombisa ku navela ni ku tiyimisela loku Davhida a a li na kone ka ku dzrumisa Yehovha hi lani ku nga helikiki kumbe wutomi byake hinkwabyu.—2Sa 7:12.

Mintxhumu yin’wana leyi Davhida a yi tsraliki, yi fambisana ni mimfambu leyi a viki na yone a wuton’wini. Hi xikombiso, swingheniso leswi nga ka Amapsalma 18, 51, ni 52 ka Tradução do Novo Mundo, swi tiyisekisa mhaka leyi. Ka Amapsalma 23, Davhida a tlhamuxela Yehovha swanga mubyisi lweyi a hlayisaka, a sizrelelaka ni ku kongomisa tihamba take. Davhida na yene a a li mubyisi nakone a a djula ku tizrela Xikwembu Nkulukumba wutomi byake hinkwabyu.—Ps 23:6.

Nakone i swinene ku va minkama hinkwayu hi dzrimuka leswaku leswi Davhida a swi tsraliki a a huhuteliwa ha Yehovha. Ka leswi a swi tsraliki, hi kuma wuprofeta bya leswi taka yentxeka a nkameni lowu taka. Hi xikombiso, ka Amapsalma 110, Davhida a khaneli hi siku ledzri hosi yi taka tsrhama a vokweni dzra xinene dzra xiluvelo xa Xikwembu Nkulukumba, kutani yi yamukela ntamu. I ntamu wa ku yentxa yini? I ntamu wa ku helisa valala va Xikwembu Nkulukumba ni wa ku ‘tsrema timhaka makazri ka matiko’ a misaveni. Davhida a ve wa lixaka ledzri Mesiya a pswaliwiki ka dzrone, lweyi a a ta fuma a matilweni a tlhela a va ‘muprista hi lani ku nga helikiki’. (Ps 110:1-6) Yesu a hlaye leswaku a wuprofeta lebyi nga ka Amapsalma 110 byi kombetela kwake nakone a byi ta hetiseka hi ndlela leyikulu a nkameni lowu taka.—Mt 22:41-45.

Yehovha a nga huhutelanga Davhida ku tsrala leswi humeleliki a nkameni wake ntsena, kambe ni leswi a swi ta humelela a nkameni lowu taka. Loko Davhida a ta pfuxiwa, a ta kuma nkama wa ku dzrumisa Yehovha hi lani ku nga helikiki. Hi ndlela leyo, Amapsalma 37:10, 11, 29 yi hetisekile a Israyeleni wa khale nakone Xikwembu Nkulukumba a ta tlhela a hetisisa swidumbiso leswo a nkameni lowu taka.—Vona yava 8 ka nhlokomhaka leyi liki “U Ta Va Na Mine A Paradeyisini” ka Xihondzro lexi.

A mazritu ya Amapsalma 61:8 ni ya tindzrimana tin’wana leti fambisanaka na yone, ma swi beka livaleni leswaku Davhida a a tiyimisele ku dzrumisa Yehovha wutomi byake hinkwabyu. A mazritu lawa, ma swi kombisa hi ku helela leswi Davhida a taka swi yentxa loko Yehovha a ta mu pfuxa a nkameni lowu taka.