Loko Yehovha a lelete vhanu leswaku va ‘yandzra, va tata misava’, swi vhele swi tikomba leswaku hakatsongokatsongo misava hinkwayu a yi ta ndzruluka paradeyisi. (Gn 1:28) Lava taka da pfindla dzra misava na vone va fanela ku landzra xileleto lexo. Kambe leswi a xizramba xa Edeni xi nga ha liki kone, swi ta djula leswaku hi yentxa hi ku sungulisa akuva misava yiva paradeyisi. Ntsrhakunyana ka Armagedoni, hi tava ni ntizro wa wukulu wa ku lungisa mimbangu leyi vhanu va yi honeteliki. Ntizro lowo wu nga ti va matlangwana!

Leswi swi hi dzrimuxa ntizro lowu Va-israyele va wu yentxiki nkama lowu va tlheleliki a Yuda na va huma a Babilona. Phela a ku khaluta 70 wa malembe na ku nga tsrhami mhunu a mbangwini luwani. Kambe muprofeta Ezaya a profete leswaku hi mpfunu wa Yehovha, a va ta swi kota ku ndzruluta mbangu luwani wu tlhela wu va mbangu wa ku xonga. A wuprofeta lebyo a byi hlaya leswi: “A  hula dzrakwe a dzri hambe dzri fana na Edeni, ni makwandzrasi yake ku fana ni ya Yehovha.” (Eza 51:3) Leswo swi yentxekile hakakunene. Hi mpfunu wa Yehovha lava taka da pfindla dzra misava va ta swi kota ku ndzruluta misava yiva paradeyisi. Nakone swoswi ku ni mintxhumu leyi u nga yi yentxaka akuva u kombisa leswaku wa swi djula ku patsreka ka ntizro lowo.

Wun’we wa mintxhumu leyi u nga yi yentxaka i ku tikazratela ku basisa ni ku bekisa kaya dzraku. U nga yentxa leswo nambiloko vayakelani vaku vanga swi yentxi leswo. Nakone u nga tlhela u pfunisa a ku bekiseni ka yindlu ya wugandzreli ni yindlu ya tinhlengeletanu. Nakone loko swiyimu swi ku pfumelela, u nga tinyikela akuva u pfunisa ka ntizro wa ku lamulela lava weliwiki hi timhangu. Hi ndlela leyo, u ta kombisa leswaku u tiyimiselile kuva u pfuna vamakwezru. U nga ha tivutisa leswi: ‘Xana i ntizro muni lowu ni nga wu dondzrelaka swoswi, lowu taka ni pfuna ku yentxa xa kukazri a misaveni leyimpshwa?’

Ntsrhakunyana ka loko a pfuxe n’wana wa Yayiro, Yesu a zrumele leswaku va nyika n’wana yelweyo swakuda. (Mr 5:42, 43) A swi va kazratelanga ku hanana swakuda n’wana yelweyo wa 12 wa malembe. Kambe yanakanya hi ntizro lowu hi taka va na wone loko Yesu a hetisisa xidumbiso xake, xa leswaku ‘hinkwavu lava nga masizreni va ta yingela zritu dzakwe, kutani va ta huma’. (Yh 5:28, 29) Nambileswi Bibele dzri nga tlhamuxelikiki hinkwaswu, swa twala ku hlaya leswaku lava taka pfuxiwa va ta vilela swakuda, mpahla ni mbangu wa ku tsrhama. A hi voneni swin’wana swa leswi u nga swi yentxaka swoswi akuva u kombisa leswaku wa swi djula ku pfunisa ka ntizro lowo.

Loko ku tivisiwa leswaku ku ta buya mulaviseli wa muganga a bandleni dzraku, tiyimiseli ku mu yamukela u va u mu zramba leswaku mi fihlula xikan’we. Loko a bandleni dzraku ku ni makwezru lweyi a a tizra Betele kumbe a a li mulaviseli wa muganga, tiyimiseli ku mu pfuna ku kuma mbangu wa ku tsrhama. Loko kongresu dzri hambeliwa kusuhi ni lomu u tsrhamaka kone, tinyikele akuva u tizra loko kongresu dzri nga si sungula ni loko dzri gamile, nakone tiyimisele ku yamukela vamakwezru lava buyaka hi le kule.

Hi ku ya hi Amintiṛo 24:15, swi tikomba na ku ta pfuxiwa vhanu va ntsrandzravahlayi. Wunyingi bya vhanu lavo, va fe na va nga si kuma mukhandlu wa ku dondzrisiwa ha Yehovha. Kambe ntsrhaku ka loko va ta pfuxiwa, va ta kuma mukhandlu lowo. a Xikwembu Nkulukumba a ta tizrisa malandzra yake ya ku dumbeka ni ku va ni wuswikoti, akuva ma dondzrisa vhanu lava taka pfuxiwa. (Eza 11:9) Makwezru wa xisati lweyi a vitaniwaka Charlotte, lweyi a zrezriki a Europa, América do Sul ni Africa, a swi navela ngopfu ku patsreka ka ntizro lowo. A te: “Ni swi navela ngopfu ku zrezrela lava taka pfuxiwa. Loko ni dondzra hi mhunu lweyi a hanyiki a nkameni lowu khalutiki ni tibyela leswi: ‘A wutomi bya mhunu lweni a byi tava byi yampswe ngopfu loko a a tive Yehovha.’ Phela a ni wu voni nkama wa ku dondzrisa vhanu ha Yehovha.”

Nambi malandzra ya Yehovha lama hanyiki na Yesu a nga si ta lani misaveni, ma ta va ni swinyingi swa ku swi dondzra. Yanakanya ndlela leyi swi taka nyonxisa ha yone ni kuva tovoko, ku tlhamuxela Daniyele ndlela leyi a wuprofeta lebyi a byi tsraliki byi hetisekiki ha yone, lebyi ni ku byi twisisa a a nga byi twisisi. (Dn 12:8) Kumbe yanakanya ndlela leyi swi taka nyonxisa ha yone ku tlhamuxela Ruti na Nawomi leswaku Yesu a belekiwe ka lixaka dzravu. Nakunene swi ta nyonxisa ku patsreka ka ntizro lowo lowu taka yentxiwa a misaveni hinkwayu na hi ntsrhunxekile nakone na hi nga hingeletiwi hi mintxhumu ya ku biha ya misava leyi hi hanyaka ka yone!

I yini leswi u nga swi yentxaka swoswi akuva u kombisa leswaku u swi lulamelile ku dondzrisa lava taka pfuxiwa? Wun’we wa mintxhumu ya lisima i ku tikazratela kuva mudondzrisi lwenene, ni kuva u hisekela ntizro wa ku zrezra. (Mt 24:14) Nambiloko u nga koti ku yentxa swinyingi hi lani a u navela ha kone, ku nga hava hi kola ka ntanga kumbe swin’wana, u nga kombisa leswaku wa swi djula ku zrezrela lava taka pfuxiwa hikuva u zrezra hi lani u nga kotaka ha kone swoswi.

Kutani a xivutiso hi lexi: Xana hakunene wa swi djula ku da pfindla dzra misava? Xana u swi yimele hi manyawu ku ndzruluta misava leyi yi va paradeyisi, ku pfuna ni ku dondzrisa lava taka pfuxiwa? U nga kombisa leswaku u swi lulamelile hi ku londzrovota mikhandlu leyi yi ku pfulekeliki ya ku yentxa swa ku fana ni leswi u taka swi yentxa loko u ta da pfindla dzra misava!