Hi ni ku dumba ka leswaku u ti dondzre ha hombe tinhlokomhaka ta Xihondzro Xa Ku Zrindzra xa lembe ledzri, xileswo dzringisa ku hlamula swivutiso leswi landzrelaka:

Xana hi ta pfuneka hi ndlela yini loko hi tinyika nkama wa ku khanela na Yehovha, hi mu yingiseta ni ku tlhela hi pimisa ha yene?

Hi ta kota ku teka swiboho leswinene, hi va vadondzrisi lavanene, hi va ni lipfumelo ledzri tiyiki nakone a lizrandzru dzrezru ha Yehovha dzri ta ya dzri kula.—Xihondzro Xa Ku Zrindzra 01/2022 pp. 30-31.

Xana hi ta pfuneka hi ndlela yini loko hi dumba Yehovha kun’we ni lava a va hlawuliki akuva va zrangela nhlengeletanu yake?

Swoswi hi wo nkama wa ku dumba ndlela leyi Yehovha a yentxaka mintxhumu ha yone, ku landzra minkongomiso ni swiboho leswi tekiwaka hi vakulu. Xileswo, loko ku sungula nhlomulo lowukulu hi tava hi lulamele ku yingiseta minkongomiso nambiloko yi kazrata ku yi twisisa.— Xihondzro Xa Ku Zrindzra 02/2022 pp. 4-6.

Xana a ma tlhamuxela yini mazritu lawa ntsrumi yi ma byeliki Zakariya mayelanu ni ‘mpimu a vokweni dzra Zerubabele [muzrangeli wa Yuda]’?

Ntsrumi a yi djula ku hlaya leswaku nambi leswi a tempele a yi nge ti xonga ku fana ni leyi ya ku sungula, a yi ta hetiwa nakone a yi ta fambisana ni milawu ya Yehovha.—Xihondzro Xa Ku Zrindzra 03/2022 pp. 16-17.

Xana hi nga va ‘xikombiso . . . a ku vulavuleni’ hi ndlela muni? (1Tm 4:12)

Hi vulavula hi ndlela ya ku zrula ni ya xitxhavu a ku zrezreni, hi tikazratela ku hlamula loko hi li mintlhanganwini, hi yimbelela swi sukela mbilwini, hi vulavula ntiyiso, hi vulavula hi ndlela leyi taka tiyisa vambeni ni ku nga tizrisi mazritu lama tlhavaka.—Xihondzro Xa Ku Zrindzra 04/2022 pp. 6-9.

Xana xihazri lexi kombisiwaka ka Apfuletelo 13:1, 2, xi ni matsrhamela ya mune wa swihazri (mimfumu) leswi nga ka buku dzra Daniel dzrimana 7 hi ndlela yini?

Xihazri lexi ku vulavuliwaka ha xone ka Apfuletelo 13 a xi fanekiseli mfumu wun’we, hi xikombiso Roma. Leswo swi hlaya leswaku, xihazri lexo xi fanekisela mimfumu hinkwayu ya vhanu ku ta tlhasela namunhla.—Xihondzro Xa Ku Zrindzra 05/2022 p. 9.

Xana hi swi kombisa hi ndlela yini leswaku ha byi dumba wululami bya Xikwembu Nkulukumba?

Loko mhunu wa kukazri a hi khunguvanyisa a hi nga ti mu bekela xiviti kumbe ku mu hlundzrukela. Hi ta tsrhika mhaka a mavokweni ya Yehovha. A ta lulamisa wubihi hinkwabyu lebyi vangiwiki hi xidoho.—Xihondzro Xa Ku Zrindzra. 06/2022, pp. 10-11.

I yini leswi makwezru lwa zrambiwaka ku hamba xikhongoto ka ntlhanganu wa kukazri a fanelaka ku swi dzrimuka?

Xikhongoto a xi fanelanga ku hambeliwa ku nyikela swilayu kumbe switiviso. Ngopfungopfu loko mintlhanganu yi sungula a swi vileli kuva makwezru a “tizrisa mazritu ya manyingi”. (Mt 6:7)—Xihondzro Xa Ku Zrindzra 07/2022 pp. 24-25.

Xana ‘lava yentxiki swa ku biha va ta pfuka va ya ku yavanyisiweni’ hi ndlela yini? (Yohan 5:29)

Va nga ti yavanyisiwa hi ku ya hi leswi va swi yentxiki na va nga si fa. Kambe va ta yavanyisiwa hi ku ya hi leswi va taka yangulisa xiswone ka leswi va ta ka dondzrisiwa a misaveni leyimpshwa.—Xihondzro Xa Ku Zrindzra 09/2022, p. 18.

He wani mazritu ya ku nyonxisa lawa makwezru Rutherford a ma hlayiki ka kongresu ledzri viki kone hi Setembru wa 1922?

Ka kongresu ledzri nga khomeliwa a Cedar Point, Ohio, a Estados Unidos da Ámerica, makwezru Rutherford: “A Mfumu wa fuma! N’wine mi vatwalisi va wone. Xileswo, zrezrani, zrezrani, zrezrani Hosi ni Mfumu wa yone!”—Xihondzro Xa Ku Zrindzra 10/2022, pp. 3-5.

He tini tindlela tizrazru leti ndzrima 30 ya buku dzra Ezaya yi kombisaka ha tone leswaku Yehovha a hi pfuna ku tiyisela?

Ndzrima leyi yi kombisa leswaku Yehovha 1) a swi yingiseta ha hombe swikhongoto swezru, 2) a hi nyika minkongomiso, nakone 3) awa hi tovokisa swoswi nakone a ta hi tovokisa a nkameni lowu ta.—Xihondzro Xa Ku Zrindzra 11/2022, p. 9.

Ha yini hi nga hlayaka leswaku a mazritu ya Amapsalma 37:10, 11, 29 ma hetisekile a nkameni lowu khalutiki nakone ma ta hetiseka a nkameni lowu taka?

Mazritu ya Davhida ma kombisa matovoko lawa ma viki kone a Israyeleni wa khale, ya ku fana ni lawa ma viki kone a mfun’wini wa Solomoni. Loko a tsrhaha ndzrimana 11, Yesu a hlaye leswaku ku ta va ni Paradeyisi a nkameni lowu taka. (Mt 5:5; Lk 23:43)—Xihondzro Xa Ku Zrindzra 12/2022, pp. 8-10, 14.