1, 2. Ha yini swi li wutlhazri ku yingiseta Mutumbuluxi waku loko u hlawula leswi u taka swi yentxa hi wutomi byaku? (Vona swifaniso swa ku sungula.)

LOKO u li mumpswha, n’waninkama i vanyingi va ku layaka hi wumundzruku byaku. Vaprisori, valayi va le xikole kumbe van’wana va nga ha ku byela leswaku u fanela ku va ni kursu dzra univhersidadi kumbe ntizro lowu taka ku nyika mali hi masaka. Kambe leswi Yehovha a ku layaka swone swi hambanile. Hi swone leswaku a djula u tihita a xikole akuva u ta kota ku tizra ni ku tihlayisa. (Ba-le-Kolosa 3:23) Kambe ximbeni a xi tivaka hi leswaku loko we he mumpswha, u fanela ku yentxa swiboho swa lisima leswi taka khumba wumundzruku byaku. Xileswo, a ku nyika minsinya ya milawu ku ku kongomisa ni ku ku pfuna ku hanya hi ndlela leyi taka mu nyonxisa a masikwini lawa ya wugamu.​—Mattheo 24:14.

² Dzrimuka leswaku Yehovha a tiva hinkwaswu. A tiva leswi taka yentxeka a nkameni lowu taka nakone a swi tiva hi ku kongoma leswaku wugamu bya xiyimu lexi byi kusuhi ku tlhasa kwini.  (Ezaya 46:10; Mattheo 24:3, 36) Yehovha nakone awa ku tiva. A tiva leswi taka ku yentxa u nyonxa ni leswi taka ku yentxa u nga nyonxi. Swilayu swa vhanu swi nga ha voneka ingiki i swinene, kambe loko swi nga tiseketeli a Zritwini dzra Yehovha a hi wutlhazri bya ntiyiso.​—Amaproverbia 19:21.

3, 4. Ku yingiseta swilayu swa ku biha ku va khumbise kuyini va Adamu na Evha ni vanavu?

³ Swilayu swa ku biha i khale swi li kone. Sathana a ve wa ku sungula ku nyikela swilayu swa ku biha. A byele Evha leswaku yene na Adamu afa va ta nyonxisisa loko ku li vone va tibohelaka leswi va taka hanyisa xiswone. (Genesis 3:1-6) Kambe Sathana afa o kokela kwakwe! Afa a djula leswaku Adamu na Evha, kun’we ni vanavu lava afaka va ha ta belekiwa, va yingiseta ni ku gandzrela yene, ku nge Yehovha. Kambe a ku na ni xa xin’we lexi Sathana afaka a yentxele vhanu. Hinkwaswu leswi afaka va li naswu afa va nyikiwi ha Yehovha. Adamu a mu hanane Evha, na ye Evha a mu hanana Adamu, a tlhela a va nyika xizramba xa ku xonga ku tsrhama ka xone ni mizri lowu hetisekiki akuva va hanya hi la ku nga gamikiki.

⁴ Lexi vavisaka, Adamu na Evha va tsrhike ku yingiseta Yehovha. Hi ku yentxa leswo, va tihambanisile ni Lweyi a va nyikiki wutomi. Swoswo swi va tisele makhombo. Ku fana ni swiluva leswi khutukaka a nsinyeni, Adamu na Evha ha katsrongo-tsrongo va duhwalile va gama va fa. Vanavu na vone va biwile, ku patsra na hine hinkwezru. (Ba-le-Roma 5:12) Vanyingi namunhla va bakanya leswi Yehovha a swi hlayaka, va tiyentxela ntsena ku zrandzra kwavu. (Ba-le-Efesa 2:1-3) Mihandzru ya kone ke? Bibele dzri li ‘a ku na wutlhazri’ loko vhanu va fulazrela Yehovha.​—Amaproverbia 21:30.

5. Hi kwini ku dumba loku Yehovha a viki na kone hi vhanu, nakone afa a tiyisile ke?

⁵ Yehovha afa a dumba leswaku ku ta va ni vhanu, ku patsra ni vampswha vanyingi, lava taka djula ku mu tiva ni ku mu tizrela. (Amapsalma 103:17, 18; 110:3) Vampswha lavo va zrandzriwa swinene ha Yehovha! Xana u mun’we wa vone? Loko swi li tanu, hakunene wa tikholisa hi mintxhumu yinyingi leyinene leyi humaka ka Yehovha, nakone leswo swi ku yentxa u nyonxa a wuton’wini. (Dondzra Amapsalma 103:5; Amaproverbia 10:22) Hi ta bula hi mune wa mintxhumu leyo, ku nga swakuda swa moya, vanghanu lavanene, makungu lama phelaka ni ntsrhunxeko wa ntiyiso.

6. Ha yini u fanela ku xuzrisa ku vilela kwaku ka swa moya, nakone Yehovha a ku nyika yini ku ku pfuna?

⁶ Swihazri a swi yi vileli mintxhumu ya moya, hi leswaku, a swi titwi na swi vilela ku tiva Mutumbuluxi wa swone. Kambe hine ha yi vilela. (Mattheo 4:4) Loko hi yingiseta Xikwembu Nkulukumba, hi kuma ku twisisa, wutlhazri ni ku nyonxa. Yesu a te: “Ku nyonxa lava tivaka ku vilela kwavu ka swa moya”. (Mattheo 5:3, NM) Nkulukumba a hi nyika Bibele nakone a tizrisa ‘nandzra wa ku dumbeka ni ku tlhazriha’ ku hi nyika mabuku lama hi pfunaka ku tiyisa lipfumelo dzrezru. (Mattheo 24:45) Hi ma vitana swakuda swa moya mabuku lawa hikusa ma kulisa lipfumelo dzrezru nakone ma yentxa wuxaka byezru na Yehovha byi tiya. Ha tikholisa hi mixakaxaka ya swakuda swa moya swa ku nandzrika!​—Ezaya 65:13, 14.

7. Swi ta ku pfunisa kuyini swakuda swa moya leswi pfaka ka Yehovha?

 ⁷ Swakuda swa moya swi nga ku nyika wutlhazri ni wuswikoti bya ku yanakanya ha hombe, leswi nga ku sizrelelaka hi tindlela tinyingi. (Dondzra Amaproverbia 2:10-14.) Hi xikombiso, mintxhumu leyi yi ta ku pfuna ku vona madzrimi, ya ku fana ni lama liki a ku na Mutumbuluxi kumbe lama liki a mali ni mintxhumu leyi vonekaka swi ta ku yentxa u nyonxa. Mintxhumu leyi yi ta tlhela yi ku pfuna ku fambela kule ni ku navela kumbe mikhuva leyi taka ku vavisa. Xileswo, yentxa hinkwaswu leswi u nga swi kotaka akuva u va ni wutlhazri ni ku yanakanya ha hombe. Kutani u ta swi vona ha wuswaku leswaku Yehovha awa ku zrandzra nakone a ku navelela leswinene.​—Amapsalma 34:8; Ezaya 48:17, 18.

8. Ha yini u fanela ku tsrhindzrekela ka Nkulukumba swoswi, nakone leswo swi ta ku pfunisa kuyini a nkameni lowu taka?

⁸ Ku nga li khale, swiyenge hinkwaswu swa misava ya Sathana swi ta helisiwa. Ko va Yehovha ntsena lwa taka kota ku hi sizrelela ni ku hi nyika mintxhumu leyi hi yi vilelaka, leswi nga ha patsraka xa ku khoveta kunene. (Habakuk 3:2, 12-19) Xileswo, swoswi hi wone nkama wa ku tsrhindzrekela ka Xikwembu Nkulukumba ni wa ku tiyisa ku dumba kwaku ka yene. (2 Petros 2:9) Loko u yentxa tanu, nambi u ngo kumana na yini, u ta titwa ku fana na Davhida, lwa tiki: ‘Ndzri beki Yehovha mahlweni kwanga hi masiku hinkwawu; ndzri nga ka ndzri nga tsrekatsrekisiwi, hikusa a le tlhelweni dzranga ledzra xinene.’​—Amapsalma 16:8.

9. a) Hi ku ya hi Yohan 6:44, i yini leswi Yehovha a swi yentxaka? b) I yini lexi nyonxisaka hi ku tivana ni Timboni tin’wana?

⁹ Loko wa ha ku tivana ni mhunu lwa ngeke ntiyisweni, i yini leswi u swi tivaka hi yene mpela-mpela? U nga ha tiva vito dzrakwe ni xiyimu xakwe xa le handle, kumbexana u gamela kolanu. Kambe, a swi tanu loko wa ha ku tivana ni mhunu lwa nga ntiyisweni. U tiva leswaku a zrandzra Yehovha ni leswaku Yehovha a vone ntxhumu wa wunene ka yene a va a mu zramba ku va mun’we wa va ndangu wakwe wa vagandzreli. (Dondzra Yohan 6:44)  Nambi mhunu lweyo o huma kwini kumbe e kulisiwa xikuyini, i swinyingi leswi kutani u swi tivaka ha yene, nakone na yene a tiva swinyingi ha wene!

10, 11. I yini leswi vhanu va Yehovha va fanaka ha swone, nakone leswi swi ku khumbisa kuyini?

¹⁰ Neti u tivana ni Mboni yin’wana, wo tekela ku swi tiva leswaku mi ni mintxhumu ya lisima ngopfu leyi mi fanaka hi yone. Wa swi tiva leswaku nambi loko mi khanela tindzrimi leti hambaniki, ha wubidzri byenu mi khanela lidzrimi dzra ‘ku basa’ dzra ntiyiso. (Tsefaniya 3:9) Leswi djulaka ku hlaya leswaku ha wubidzri byenu mi pfumela ka Xikwembu Nkulukumba, mi landzra milawu leyi fanaka ya mahanyela ni leswaku mi ni dumbo ledzri fanaka hi wumundzruku. Mintxhumu leyi yi mi pfuna kuva mi dumbana ni ku yaka wunghanu lebyi tiyiki lebyi taka va kone hi masiku.

¹¹ Xileswo, loko u gandzrela Yehovha, u nga hlaya na u tiyisile leswaku u ni vanghanu lavanene ngopfu. U ni vanghanu a misaveni hinkwayu, nambi leswi u nga siki va tiva! A nga va mani lweyi u mu tivaka handle ka vhanu va Yehovha lwa tikholisaka hi nyiko leyi ya lisima?

12. Hi wani makungu lama phelaka lawa u nga ha tibekelaka wone?

¹² Dondzra Eklesiasta 11:9–12:1. Xana u ni makungu ya kukazri lawa u tikazratelaka ku ma hetisisa? U nga ha va u tibekele kungu dzra ku dondzra Bibele siku ni siku kumbe ku nyikela tinhlamulo letinene kumbe ku yampswisa mabekela yaku ya wukaneli a mintlhanganwini. Kumbexana u tikazratela ku yampswisa matizrisela yaku ya Bibele a nsin’wini. U titwisa kuyini loko u xiya leswaku u ya u yampswa kumbe loko vambeni va ku byela leswaku wa phokophela? Kumbexana u titwa na u nyonxile, nakone swa fanela! Ha yini? Hikusa u yentxa leswi Yehovha a djulaka kuva u swi yentxa, swanga hi leswi Yesu a swi yentxiki.​—Amapsalma 40:8; Amaproverbia 27:11.

13. Ha yini ku tizrela Yehovha swi li swinene ku tlula ku hisekela makungu ya misava leyi?

¹³ Loko u hisekela ntizro wa Yehovha, u yentxa leswi taka ku nyika ku nyonxa ni nkongometo a wuton’wini. Pawulo a te: ‘Tiyani, n’wi nga tsrekatsreki, n’wi va ni nkhinkhi yikulu a ntizrweni wa Hosi minkama hinkwayu, na n’wi tiva leswaku a ntizro wenu a Hosini a hi wa mahala.’ (1 Ba-le-Korinte 15:58, Testamente Ledrimpswha) Kambe loko vhanu va hisekela makungu ya misava leyi, ya ku fana ni ku hamba mali kumbe ku va ni ndhuma, a va naku ku nyonxa ka ntiyiso. Nambi loko va humelela, hakanyingi va titwa na va li phanga hi le ndzreni. (Luka 9:25) Hi dondzra leswo ka xikombiso xa Hosi Salomoni.​—Ba-le-Roma 15:4.

14. I yini leswi u nga swi dondzraka ka leswi humeleliki Salomoni?

¹⁴ Salomoni, lweyi a viki mun’we wa lava ku ganya swinene ni va ntamu lowukulu ku tlula hinkwavu lava samiki va hanya, a ke a dzringisa. A byele mbilu yakwe a ku: ‘Yana ke ndzri ta ku dzringa hi ku tsrhava; vana ni ku tsrhava’. (Eklesiasta 2:1-10) Salomoni a hanga yaka tiyindlu ta ku dula swinene, a hamba swizramba swa ku xonga a va a tiyentxela xini na xini a xi djulaka. Xana a titwe na a xuzrile ni ku nyonxa ke? Loko Salomoni a languta hinkwaswu leswi a swi yentxiki, a te: ‘Lavisani hinkwaswu swa vi leswa ku ka ndlela’. A yengete a ku: ‘A ka vanga na bindzru’. (Eklesiasta 2:11) Xana u ta dondzra ka leswi humeleliki Salomoni?

15. Ha yini u fanela ku va ni lipfumelo nakone dzri ta ku pfunisa kuyini, hi ku ya hi Amapsalma 32:8?

 ¹⁵ Van’we va dondzra xa kukazri a wuton’wini ntsena loko va hoxa va gama va pswha. Yehovha a nga djuli akuva leswo swi ku yentxekela. A djula leswaku u mu yingiseta u tlhela u yentxa leswi a ku byelaka swone. Leswo swi djula lipfumelo, kambe u nge ti txhuka u tisola hi swiboho leswi u swi yentxaka a wuton’wini hi kola ka lipfumelo dzraku. Nakone Yehovha a nge ti txhuka a dzrivala ‘ku tikazrata ka lizrandzru lolu u nga li kombisa ku vito dzrakwe’. (Ba-Heberu 6:10) Xileswo, yentxa hinkwaswu akuva u yaka lipfumelo ledzri tiyiki. Kutani u ta yentxa ku hlawula lokunene a wuton’wini u tlhela u swi vona ha byaku leswaku Tatana waku wa le tilweni a ku navelela leswinene.​—Dondzra Amapsalma 32:8.

16. Ha yini hi fanela ku zrandzra ntsrhunxeko ni ku wu tizrisa hi ndlela ya wutlhazri?

¹⁶ Pawulo a tsrale leswaku: ‘Lomu moya wa Hosi [Yehovha] wu nga kone, a wuntsrhunxeki byi kone.’ (2 Ba-le-Korinte 3:17) Yehovha a zrandzra ntsrhunxeko, nakone a ku vumbe hi ndlela leyi fanaka. Kambe a djula leswaku u tizrisa ntsrhunxeko waku hi ndlela ya wutlhazri ni leyi taka ku sizrelela. Kumbexana tintanga taku ti zrandzra ku vona mifoto ni mavhidiyu lama kombisaka swa tinkuku, ti yentxa swa tinkuku na ti nga txhatanga, ti hayeka wutomi bya tone hi ku nghenela mintlangu leyi nga ni tinghozi kumbe ti dzraha timbangi ni ku nwa mabyala. A ku sunguleni, mintxhumu leyi yi nga ha yentxa ingiki ya nyonxisa swinene, kambe hakanyingi yi ni mihandzru ya ku biha, ya ku fana ni mavabyi, ku ngheniwa ha yone ngatini, nambi lifu. (Ba-le-Galatia 6:7, 8) Vampswha lava tipetaka ka mintxhumu leyi va nga ha pimisa leswaku va ntsrhunxekile, kambe vo tihembela.​—Tito 3:3.

17, 18. a) Ku yingiseta Nkulukumba swi hi nyika ntsrhunxeko wa ntiyiso hi ndlela yini? b) Adamu na Evha afa va ni ntsrhunxeko lowukulu ku tlula wa vhanu namunhla hi ndlela yini?

¹⁷ Hi tlhelo dzrin’wana, ku yingiseta Yehovha swa hi pfuna. Swi hi vhikela ka mavabyi swi tlhela swi hi nyika ntsrhunxeko wa ntiyiso. (Amapsalma 19:7-11) Nakone loko u tizrisa ntsrhunxeko waku hi wutlhazri, hi leswaku, loko u hlawula ku yingiseta milawu ni minsinya ya milawu leyi hetisekiki ya Yehovha, u komba Yehovha kun’we ni vapswele vaku leswaku u kulile. Vapswele vaku va ta ya va ku dumba ni ku ku nyika ntsrhunxeko lowu yengetelekiki. Nakone Yehovha a dumbisa leswaku ku nga li khale a ta nyika malandzra yakwe hinkwawu ya ku dumbeka ntsrhunxeko lowu hetisekiki, lowu Bibele dzri wu vitanaka ‘vuntsrhunxeki bya ku phatima bya vana va Xikwembu Nkulukumba.’​—Ba-le-Roma 8:21.

¹⁸ Lowu i muxaka wa ntsrhunxeko lowu Adamu na Evha afaka va tikholisa ha wone. A xizrambeni xa Edeni, afa ko va ni ntxhumu wun’we ntsena lowu Xikwembu Nkulukumba afaka a va tsimbe wone. Afa va nga fanelanga ku da mihandzru ya nsinya wa kukazri ntsena. (Genesis 2:9, 17) U vona leswaku Nkulukumba afa o va dlisa kumbe a va beka djele hi ku va nyika nawu lowo? Nikatsrongo! Pimisa hi milawu ya yinyingi leyi vhanu va yi vumbiki va tlhela va sindzrisa vambeni ku yi landzra.  Kambe Yehovha afa e nyika Adamu na Evha nawu wa wun’we ntsena.

19. I yini leswi Yehovha na Yesu va hi dondzrisaka swone leswi taka hi pfuna ku kuma ntsrhunxeko?

¹⁹ Yehovha a kombisa wutlhazri swinene ka ndlela leyi a tizrisanaka na hine ha yone. A matsrhan’wini ya ku hi nyika milawu ya yinyingi, hi ku lehisa mbilu a hi dondzrisa ku yingiseta nawu wa lizrandzru. A hi dondzrisa ku hanya hi minsinya ya milawu yakwe ni ku venga leswi bihiki. (Ba-le-Roma 12:9) Ka Dondzro ya le Nhaveni, N’wanakwe, Yesu, a hi pfune ku twisisa xivangelo xa kuva vhanu va yentxa leswa ku biha. (Mattheo 5:27, 28) Nakone a misaveni leyimpswha, swanga Hosi ya Mfumu wa Xikwembu Nkulukumba, Yesu a ta ya mahlweni a hi dondzrisa ku vona leswinene ni leswi bihiki ku fana naye. (Ba-Heberu 1:9) Handle ka leswo, Yesu a ta hi yentxa lava hetisekiki a miyanakanywini ni le mizrini. Yanakanya hi leswi swi taka va xiswone loko hi nga ha dzringiwi ku yentxa leswi bihiki ni loko hi nga ha xaniseki hi kola ka ku pfumala ku hetiseka. Kutani, hi wugamu, hi ta tikholisa hi ‘vuntsrhunxeki bya ku phatima’ lebyi Yehovha a byi dumbisaka.

20. a) Xana Yehovha a wu tizrisa xikuyini ntsrhunxeko wakwe? b) Hi nga mu yetisela hi ndlela yini?

²⁰ A misaveni leyimpswha, a ntsrhunxeko wezru wa ha ta va ni mindzrilakana. Hi ndlela yini? Minkama hinkwayu hi ta vilela ku susumeteliwa hi lizrandzru dzrezru hi Yehovha ni van’wana. Loko hi kongomisiwa hi lizrandzru, ho yetisela Yehovha. Nambi leswi Yehovha a nga ni ntsrhunxeko lowu heleliki, a hlawula ku pfumelela lizrandzru dzri kongomisa hinkwaswu leswi a swi yentxaka, ku patsra ni ndlela leyi a hi khomaka ha yone. (1 Yohan 4:7, 8) Xileswo, swa twisiseka leswaku hi nga va ni ntsrhunxeko wa ntiyiso ntsena loko hi yetisela Yehovha.

21. a) Davhida afa a titwisa kuyini hi Yehovha? b) Hi ta bula hi yini ka nhloko-mhaka leyi landzrelaka?

²¹ Xana wa khensa hi mintxhumu hinkwayu leyinene leyi Yehovha a ku nyikiki yone? A ku nyiki swakuda swa moya, vanghanu lavanene, makungu lama phelaka, dumbo dzra ntsrhunxeko lowu hetisekiki a nkameni lowu taka ni tin’wana tinyiko ta tinyingi leta ku xonga. (Amapsalma 103:5) Swi nga yentxeka u titwa ku fana na Davhida loko a khongota hi mazritu lama nga ka Amapsalma 16:11 a ku: ‘U ta ndzri tivisa ndlela ya wutomi; a ndzralu ya ku tsrhava yi kone mahlweni kwaku, ni ku nyonxa vokweni dzraku ledzra xinene, hi la ku nga helikiki.’ Ka nhloko-mhaka leyi landzrelaka, hi ta bula hi wukosi byin’wana lebyi kumekaka ka Amapsalma 16, lebyi taka ku pfuna ku vona leswaku u nga hanyisa kuyini hi ku nyonxa ka ntiyiso!