‘Muyingeli wa swikhongoto, a nyama hinkwayu yi ta ta ku wene.’​—Amapsalma 65:2.

Vhanu vambeni va khongota hikusa leswo swa va pfuna. Va titwa na swi va yampswela kambe a va kholwi leswaku ku ni lweyi a va yingelaka. Xikhongoto xi tlula ntxhumu wini na wini hi nga wu yentxaka akuva hi titwa hi yampswa ni ku hi pfuna ku lwa ni swikazratu swezru. Bibele dzri hi tiyisekisa leswaku ‘Yehovha * a kusuhi ni hinkwavu lava mu vitanaka. Ku hinkwavu lava mu vitanaka hi swinene. . . . A yingela ku dzrila kwavu a va huluxa’.​—Amapsalma 145:18, 19.

Leswo swi hi tiyisekisa leswaku Yehovha Xikwembu Nkulukumba a yingela swikhongoto swa vagandzreli vakwe. Hi lizrandzru, a hi byela leswi: ‘N’wi ta ndzri vitana, n’wi va n’wi ndzri khongota, ndzri ta n’wi yingela.’​—Yeremiya 29:12.

‘Tiyiselani a ku khongoteni.’​—Ba-le-Roma 12:12.

Bibele dzra hi kutxa hi ku hi byela leswaku hi ‘hiteka hi khongota’ ni leswaku ‘hi khongota minkama hikwayu’. Swi le livaleni leswaku Yehovha a djula kuva hi khongota ku yene.​—Mattheo 26:41; Ba-le-Efesa 6:18.

Ha yini Xikwembu Nkulukumba a djula leswaku hi khongota ku yene? Hi xikombiso: Loko n’wana wa kukazri a byela tatana wakwe a ku: “Tatana ni kombela u ni pfuna”, tatana wakwe awa nyonxa ngopfu swinene, a hi swone xana? Ku hlaya ntiyiso, tatana lweyo a nga va a swi tiva ha khale leswi n’wanakwe a swi vilelaka kumbe leswi a titwisaka xiswone. Kambe loko a yingela mazritu lawa, n’wanakwe a kombisa leswaku awa mu dumba ni leswaku a ni wuxaka bya le kusuhi na yene. Hi ku fanana, loko hi khongota ka Yehovha Xikwembu Nkulukumba hi kombisa leswaku ha mu dumba ni leswaku hi djula ku va ni wuxaka bya le kusuhi na yene.​—Amaproverbia 15:8; Yakob 4:8.

‘N’wi txukumetela ku hlatiyela kwenu hinkwaku a henhla kwakwe, hikuva a zron’wa ha n’wine.’​—1 Petros 5:7.

Xikwembu Nkulukumba a djula kuva hi khongota ku yene hikusa awa hi zrandzra nakone awa zron’weka ha hine. Yene a tiva hinkwaswu leswi hi kazrataka ni ku hlatiyela kwezru, mfuzri a djula ku hi pfuna.

A wuton’wini byakwe, Hosi Davhida a khongote ka Xikwembu Nkulukumba a kombela mpfunu a tlhela a mu byela leswi nga ka miyanakanyu yakwe ni matitwela yakwe. (Amapsalma 23:1-6) Xikwembu Nkulukumba a titwise kuyini ha Davhida? A mu kombe lizrandzru ni ku yingiseta swikhongoto swake. (Amintiṛo 13:22) Hi ku fanana, Xikwembu Nkulukumba a yingiseta swikhongoto swezru hikusa awa zron’weka ha hine.

Lawa i mazritu ya mutsrali wa man’we ya mapsalma ma nga Bibeleni. Yene a a tiyiseka leswaku Xikwembu Nkulukumba a a yingela swikhongoto swake. Hi mhaka ya leswo, a a ni wunghanu lebyi tiyiki na yene. A a titwa a li kusuhi na Xikwembu Nkulukumba ni ku kuma ku tiya loko a langusana ni swikazratu swa wutomi ni ku vaviseka a mbilwini.​—Amapsalma 116:1-9.

Loko hi tiyiseka leswaku Xikwembu Nkulukumba awa swi yingela swikhongoto swezru, hi ta ya mahlweni hi khongota ku yene. A hi voneni xikombiso xa Pedro, lweyi a tsrhamaka a wuxeni bya tiko dzra Espanha. A luzekeliwi hi n’wanakwe wa djaha ka mhangu ya movha. Pedro a txhululeli Xikwembu Nkulukumba mbilu yakwe. A khongote hi ku phindaphinda a kombela mpfunu ni ku tiyisiwa. Pedro a li: “Yehovha a ni hlamule hi ku kahlula a swikhongo swanga. Hi nkama lowu a ni wu yimelile, Yehovha a hi pfunile mine ni nkatanga hi ku tizrisa vakristekulozri.”

Nambileswi n’wanakwe a kalaka a nga pfukanga, swikhongoto swi pfune Pedro ni ndangu wakwe hi ndlela leyikulu. Loko nsati María Carmen a dzrimukela a hlaya leswi: “Xikhongoto xi ni pfunile ku xanisekeni kwanga. Yehovha awa ni twisisa. Loko ni tsrhindzrekela ku yene, ni titwa na ni zrulile a mbilwini.”

A Bibele ni swikombiso swimbeni hi swi voniki lani, swi swi beka a livaleni leswaku Xikwembu Nkulukumba awa swi yingela swikongoto swezru. Nakone swi le livaleni leswaku Xikwembu Nkulukumba a nga hlamuli swikhongoto hinkwaswu. Ha yini Xikwembu Nkulukumba a hlamula swikhongoto swimbeni kambe swimbeni a nga swi hlamuli?